عظیم بھرا دی عظیم بھین

عظیم بھرا دی عظیم بھین محترمہ فاطمہ جناح جو نہ ہوندی تے شائد اج اسیں آزاد فضاواں دے واسی نہ ہوندے۔ اوہ عزم و استقلا ل دا پیکر سن جہڑی انتہائی مشکل حالات وچ صبر تے حوصلے دے نال اپنے بھرا دے نال رہیاں جہناں نے اپنے عظیم بھرا لئی اپنی ڈینٹل پریکٹس چھڈ دتی تے اوہناں دے گھریلو امور دی ایس طرح دیکھ بھال کیتی کہ اوہناں نوں تفکرات توں بالکل آزاد کردتا تے اوہ پوری دلجمعی تے یکسوئی دے نال جدوجہد آزادی وچ منہمک ہو گئے۔ دونویں بھین بھراواں نے اپنی جاناں پاکستان اتے نچھاور کر دتیاں۔ پچھلے دناں یکم اگست نوں اوہناں دی 130ویں سالگرہ منائی گئی۔ ایہہ ایس عظیم تے ناقابل فراموش زنانی دی سالگرہ اے جہدے لئی شیخ مجیب ڈھاکہ وچ پاکستان زندہ آباد دے نعرے لایا کردا سی۔ اوس ماں دی سالگرہ اے جہنوں جنرل ایوب نے اپنی فوجی آمریت نوں مضبوط کرن لئی غدار تے سکیورٹی رسک قرار دتا سی۔ اوس عظیم عورت دا جنم دن اے جہدے متعلق پاکستان دے پہلے سول آمر مسٹر بھٹو نے آکھیا سی ایہہ ویاہ کیوں نہیں کردی تے ایس تنزیہ جملے نوں سن کے اک برطانوی صحافی رو پیا سی کہ ایہہ کیسی قوم اے جہڑی اوس عورت اتے الزام لاندی ا ے جہنوں ایہہ مادر ملت یعنی قوم دی ماں آکھدی اے تے فیر جدوں جنرل ایوب نے اوہناں نوں دھاندلی نال ہرایا تے اوس ویلے متحدہ پاکستان وی ہار گیا۔ فاطمہ جناح ملت دے پاسبان دی بھین سی اوہ ایوب کولوں جت جاندی تے پاکستان واقعی اج ایشین ٹائیگر ہوندا ۔ فاطمہ جناح دی ہار دی سزا اج تک پاکستان بھگت رہیا اے۔ فاطمہ جناح بانی پاکستان قائداعظم دی اوہ عظیم بھین جہناں بارے قائداعظم نے خود فرمایا سی جے فاطمہ تحریک پاکستان وچ میرا ساتھ نہ دیندی تے میں کدی کامیاب نہ ہوندا۔ میری دعا اے کہ اللہ تعالیٰ قوم دے محسن دونواں بھین بھرا اتے کروڑاں رحمتاں نازل فرمائے آمین۔ مادر ملت دی معتمد ساتھی تے قائداعظم دے سیکرٹری کے ایچ خورشید دی اہلیہ بیگم ثریا کے ایچ خورشید نے آکھیا سی محترمہ فاطمہ جناح سراپا پاکستان سن تے ہر ویلے پاکستان لئی ای سوچدی رہندیاں سن۔ قیام تے استحکام پاکستان لئی اوہناں دی خدمات لازوال نیں۔ سانوں اوہناں دے نقش قدم اتے چلدے ہوئے اپنی زندگی پاکستان لئی وقف کر دینی چاہیدی اے۔ بالخصوص خواتین نوں میدان سیاست وچ اگے آنا چاہیدا اے۔ تحریک پاکستان نوں کامیابی نال ہمکنار کرن دے حوالے نال مادر ملت محترمہ فاطمہ جناح دا کردار کلیدی اہمیت دا حامل اے۔ مادر ملت قائداعظم محمدعلی جناح دا نقش ثانی سن۔ اوہناں دا فکر و عمل پاکستانی قوم بالخصوص خواتین لئی مشعل راہ اے۔ تحریک پاکستان دے دوران مادر ملت محترمہ فاطمہ جناح اپنے بھرا قائداعظم دا بھرواں ساتھ نہ دیندیاں تے پاکستان دا قیام مشکل ہو جانا سی۔ اوہناں نے قائداعظم دے آکھن تے برصغیر دی مسلم خواتین نوں منظم تے متحرک کیتا۔ خواتین دی شمولیت پاروں ایہہ تحریک کامیابی نال ہمکنار ہوئی۔ قیام پاکستان مگروں ملکی تعمیر و ترقی وچ اپنا کردار ادا کیتا۔ کشمیر کاز لئی اوہناں دی خدمات ناقابل فراموش نیں۔ قائداعظم محمد علی جناح ہندوستان دی مسلمان خواتین نوں مرداںدے نال قومی زندگی وچ فعال کردار ادا کردے ویکھنا چاہندے سن۔ ایہو وجہ سی کہ اوہناں نے بطور مثال اپنی ہمشیرہ نوں جدوجہد آزادی دے ہر مرحلے تے اپنے نال رکھیا۔ ساڈی زنانیاں نوں مادر ملت دے نقش قدم اتے چلنا چاہیدا اے۔ مادر ملت نے پاکستان وچ گرلز گائیڈ تحریک وی شروع کیتی۔ اوہ قائداعظم دا نقش ثانی سن۔ مادر ملت دی سیاسی تربیت اپنے عظیم المرتبت بھرا دے ہتھوں انجام پائی سی۔ مادر ملت محترمہ فاطمہ جناح پاکستانی زنانیاں لئی اک رول ماڈل نیں۔ پاکستان وچ جمہوریت لئی جدوجہد کیتی تے اک فوجی آمر ایوب خان دے مقابلہ وچ صدارتی الیکشن لڑیا ۔ ایہہ انتخابات جے شفاف انداز وچ ہوندے تے ایہہ ملک کدی دولخت نہ ہوندا کیوں جے مشرقی پاکستان وچ فاطمہ جناح نے کامیابی حاصل کر لیتی سی لیکن مغربی پاکستان وچ اوہناں نوں ہروا دتا گیا۔ اوہ بانی پاکستان تے پہلے گورنر جنرل محمد علی جناح دی چھوٹی بھین سن۔ ایہہ اوہ خاتون سن جہناں نے 1923 وچ کلکتہ یونیورسٹی توں ڈینٹل دی ڈگری حاصل کیتی۔ انج اوہ غیر منقسم ہندوستان دی پہلی خاتون دندان ساز بنیاں۔ اوہ اپنے وڈے بھرا محمد علی جناح دی قریبی ساتھی تے مشیر بنیاں۔ برطانوی راج دی سخت ناقد اوہ دو قومی نظریہ دی مضبوط حامی تے آل انڈیا مسلم لیگ دی اک سرکردہ رکن سن۔ پاکستان دی آزادی مگروں اوہناں نے پاکستان ویمنز ایسوسی ایشن دی مشترکہ بنیاد رکھی جہنے نوتشکیل شدہ ملک وچ زنانی مہاجرین دی آبادکاری وچ اک اہم کردار ادا کیتا۔ اوہ اپنے بھرا دی موت تک اوہناں دی سب توں قریبی معتمد ساتھی رہیاں تے فیر قائداعظم دی وفات مگروں فاطمہ جناح اتے 1951 تک قوم نال خطاب کرن اتے پابندی لادتی گئی۔ قوم نال اوہناں دا 1951 دا ریڈیو خطاب انتظامیہ نے بہت زیادہ سنسر کیتا سی۔ مادر ملت نے 1955 وچ مائی برادر نامی کتاب لکھی لیکن ایہہ کتاب 32سال مگروں 1987 وچ شائع ہوئی۔ فاطمہ جناح نے 1965 وچ اپنی خودساختہ سیاسی ریٹائرمنٹ توں نکل کے فوجی آمر ایوب خان دے خلاف صدارتی انتخاب وچ حصہ لیتا۔ اوہناں نوں سیاسی جماعتاں دے اک کنسورشیم دی حمایت حاصل سی۔ فوجی آمر دی سیاسی دھاندلی دے باوجود پاکستان دے دوڈے شہراں کراچی تے ڈھاکہ وچ کامیابی حاصل کیتی۔ا مریکی میگزین ٹائم نے 1965 دی ا نتخابی مہم اتے رپورٹنگ کردے ہوئے لکھیا سی کہ جناح نوں ایوب خان تے اوہدے اتحادیاں ولوں اپنی شائستگی تے حب الوطنی اتے حملیاں دا سامنا کرنا پیا۔ مادر ملت اتے ایسے ایسے الزامات عائد کیتے گئے کہ یاد آن تے اتھروں نکل آندے نیں۔ کیہ اسیں اپنے محسناں دے نال انج دا ای رویہ رکھاں گے۔ فاطمہ جناح دا انتقال 9جولائی 1967 نوں کراچی وچ ہویا تے
اوہناں دی موت تنازعیاں دی زد وچ آ گئی۔ کجھ رپورٹاں وچ الزام لایا گیا اے کہ اوہناں دی موت غیر فطری وجوہات دی بنا اتے ہوئی سی۔ اوہناں دے اہلخانہ نے انکوائری دا مطالبہ کیتا سی مگر حکومت نے اوہناں دی درخواست نوں روک دتا۔ کراچی وچ اوہناں دے جنازے وچ تقریباً نصف ملین افراد نے رلت کیتی۔ اوہناں دی میراث شہری حقوق لئی اوہناں دی حمایت’ تحریک پاکستان وچ اوہناں دی جدوجہد تے اپنے بھرا لئی اوہناں دی عقیدت نال جڑی اے۔ فاطمہ جناح نوں مادر ملت (مدر آف دی نیشن) تے خاتون پاکستان( لیڈی آف پاکستان) دے نام نال جانیا جاندا اے۔ پاکستان وچ بہت سارے اداریاں تے عوامی مقامات نوں اوہناں دے اعزاز وچ نامزد کیتا گیا اے۔ فاطمہ دی پیدائش 31جولائی 1893 نوں جناح خاندان وچ ہوئی۔ اوہ پونجا جناح تے مٹھی بائی دے ست بچیاں وچ سب توں چھوٹی سن۔ فاطمہ محمد علی’ احمد علی’ بندے علی’ رحمت علی’ مریم تے شیریں جناح دی نسبت محمد علی جناح دے سب توں بوہتے قریب سن جہڑی 1901 وچ اپنے والد دی وفات مگروں قائداعظم دی سرپرستی وچ آ گئی۔ 1923 وچ ممبئی وچ دنداں دا کلینک کھولیا جدوں فروری 1929 وچ بھابی رتن بائی دی موت مگروں اپنا کلینک بند کر کے بھانجی دینا جناح دی دیکھ بھال لئی اپنے بھرا محمد علی جناح دے بنگلے وچ چلی گئیاں تے گھر دی ذمہ داری سنبھالی جہڑی 11ستمبر 1948 تک جاری رہی۔ اپنی بھین نوں خراج تحسین پیش کردے ہوئے محمد علی جناح نے آکھیا سی کہ میری بھین روشنی تے امید دی اک روشن کرن وانگوں سی تے روشنی دی کرن نوں اسیں اپنے ہتھی بجھا دتا۔ اللہ تعالیٰ ساڈے اتے اپنا رحم فرماوے۔ آمین