فوری سستے انصاف دا متبادل ثالثی نظام

آئین دے آرٹیکل نمبر37 وچ عوام نوں فوری تے سستے انصاف دی گارنٹی دتی گئی جہڑا ہر شہری دا اہم ترین بنیادی حق اے۔ اج تک ایہہ بنیادی حق عوام نوں نہیں مل سکیا جہدی بنیادی وجہ ایہہ اے کہ عوام دے اہم ترین بنیادی حقوق اتے مشتمل آئین دے آرٹیکل نمبر37 تے 38 نوں مکمل آرٹیکل دا درجہ دین دے بجائے اوہناں نوں بنیادی اصولاں دے باب وچ شامل کردتا گیا اے تے اوہناں نوں حکومتاں دی صوابدید اتے چھڈ دتا گیا اے۔ میری عاجزانہ رائے دے مطابق آئین دی اٹھارویں ترمیم وچ صوبیاں نوں مضبوط کرن تے وفاق نوں آئینی زنجیراں وچ جکڑن داجذبہ کارفرما سی۔ عوام دے بنیادی حقوق نوں یکسر نظرانداز کیتا گیا۔ ایس ترمیم دے مطابق آئین وچ آرٹیکل 10اے شامل کیتا گیا جہدے وچ ہر شہری نوں صاف تے شفاف ٹرائل دی ضمانت دتی گئی اے مگر ایہدے وچ فوری تے سستے انصاف دا کوئی ذکر نہیں اے۔
پاکستان دی تریخ وچ اللہ دی رضا تے عوام دی فلاح وچ یقین کامل رکھن والے افراد نوں اللہ دے دوست قرار دتا جا سکدا اے۔ عدلیہ نال تعلق رکھن والے نیک نام عوام دوست افراد خلوص نیت نال کوشش کردے رہے کہ عوام نوں فوری تے سستا انصاف فراہم کرنے کیلئے عدالتی نظام نوں تبدیل کیتا جاوے تے ایسا متبادل نظام تشکیل دتا جاوے گا جہڑا عوام نوں فوری تے سستا انصاف فراہم کر سکے۔ ایہناں قابل فخر شخصیات وچ جسٹس تصدق حسین جیلانی’ جسٹس منصور علی شاہ’ جسٹس انوارالحق’ جسٹس یاور علی تے ظفر اقبال کلانوری ایڈووکیٹ شامل نیں۔ ایہناں شخصیات دی پرعزم جدوجہد نال پاکستان دے شہریاں نوں فوری تے سستا انصاف فراہم کرن لئی ثالثی دا اک ایکٹ تیار کیتا گیا جہدا نام اے Punjab Alternate Dispute Resolution Act
ایس ایکٹ دی قنون سازی تے تدوین لئی ظفر اقبال کلانوری ایڈووکیٹ نے سرگرم تے پرجوش کردار ادا کیتا تے ایہدے نفاذ لئی سپریم کورٹ وچ پٹیشن وی دائر کیتی۔ سپریم کورٹ نے پنجاب حکومت نوں عوامی فلاح و بہبود دے ایس ایکٹ نوں نافذ کرن دی ہدایت جاری کیتی۔ جسٹس انوارالحق نے لہور ہائیکورٹ دے چیف جسٹس دی حیثیت نال پنجاب حکومت اتے دبائو پایا کہ متبادل ثالثی نظام دے ایکٹ نوں پنجاب اسمبلی توں منظور کرایا جاوے تے فوری نافذ کیتا جاوے تاں جے عوام دے دکھ دور کیتے جا سکن۔ایہہ اک جامع تے مکمل ایکٹ اے تے ہر لحاظ نال قابل عمل تے نتیجہ خیز ثابت ہو سکدا اے۔ ایس ایکٹ دے مطابق سول تے تاجداری عدالتاں نوں ایہہ اختیار دتا گیا اے کہ ایسے مقدمیاں جہناں بارے اوہ سمجھدے نیں کہ ثالثی توں حل ہو سکدے نیں اوہ رجسٹرڈ ثالثیاں نوں ریفر کر سکدے نیں۔ ثالث نوںپابند بنایا گیا اے کہ اوہ سول مقدمے60دن دے اندر تے فوجداری 90دناں دے اندر مکمل کرن۔ ایس ایکٹ دے مطابق پنجاب دے مختلف شہراں وچ ثالث مرکز بنائے جان گے۔ دونویں فریق اتفاق رائے نال اپنا ثالث نامزد کر سکن گے۔ جے دونویں فریق کسے ثالث اتے وی رضامند نہ ہو سکن تے عدلیہ دے جج رجسٹرڈ ثالثیاں وچوں کسے نوں نامزد کراں گے۔ تنازعے دے فریقین خود یا وکیل دے ذریعے اپنا مقدمہ پیش کر سکن گے۔ ثالث جو وی فیصلہ کرے گا عدلیہ اوہنوں تسلیم کرے گی تے ایس فیصلے دے خلاف کوئی اپیل یا نظرثانی نہیں ہو سکے گی۔ ثالثی کرن والے دے خلاف کوئی مقدمہ دائر نہیں کیتا جاسکے گا۔ حکومت ضابطہ اخلاق جاری کرے گی جہدے اتے ثالث سنٹر تے ثالث عمل کرن دے پابند ہون گے جہڑا ثالث بے ضابطگی دا مرتکب پایا جاوے گا اوہدی رجسٹریشن منسوخ کردتی جاوے گی۔
پنجاب اسمبلی نے ایس ایکٹ دی منظوری 19 ستمبر 2019 نوں دتی۔ گورنر پنجاب نے 10اکتوبر 2019 نوں ایہنوں منظور کردتا۔ ایس ایکٹ نوں پنجاب گزٹ وچ 11اکتوبر 2019 نوں شائع کردتا گیا۔ فوری تے سستے انصاف لئی عوامی فلاح و بہبود دا ایہہ ایکٹ بڑی محنت تے تگ و دو مگروں وجود وچ آیا۔ پنجاب اسمبلی نے ایس عوامی ایکٹ دی منظوری تحریک انصاف دے دور وچ دتی۔ انتہائی افسوس دا مقام اے کہ پنجاب دے وزیراعلیٰ عثمان بزدار عرف وسیم اکرم پلس نے ایس ایکٹ اتے عملدرآمد بند کرن لئی نوٹیفکیشن جاری نہ کیتا تے تاحال ایہہ ایکٹ سردخانے وچ پیا ہویا اے۔ ایہدے نفاذ تے عملدرامد لئی اک پٹیشن وی لہور ہائیکورٹ وچ زیر سماعت اے۔ جدوں جسٹس انوارالحق نے کجھ سیاستداناں کولوں پچھیا کہ تسیں عوام دی فلاح و بہبود لئی ایس ایکٹ اتے عملدرآمد کیوں نہیں کردے تے اوہناں نے آکھیا کہ جسٹس صاحب’ ایس ایکٹ دے نفاذ نال ساڈی سیاسی اجارہ داری ختم ہو جاوے گی۔ لوک اپنے تنازعیاں لئی ساڈے کول آن دی بجائے ثالث دے کول جاون گے تے ساڈے سیاسی ووٹ بینک اتے اثر پووے گا۔
ایہہ ایکٹ 2019 سیاسی اشرافیہ دی بے حسی عوام’ دشمنی تے مجرمانہ غفلت دا ناقابل تردید ثبوت اے۔ سیاسی اشرافیہ عدلیہ دے دبائو تے عوامی بہبود دے قنون تے بنا لیندی اے مگر اوہناں اتے عملدرآمد نہیں کیتا جاندا۔ بلدیاتی انتخابات دی افسوسناک تریخ ریکارڈ وچ موجود اے۔ جسٹس انوارالحق نیک روح انسان نیں۔ اوہناں دی گل مینوں نہیں بھلدی کہ پنشنراں نوں پنشن وی حلال کر کے کھانی چاہیدی اے۔ حکومت پنجاب نے تے چالاکی تے ہوشیاری نال کم لیتا۔ فوری تے سستے انصاف دے متبادل ثالثی نظام دے ایکٹ نوں اسمبلی توں منظور وی کروا لیتا لیکن اوہدے اتے عملدرآمد نہیں کیتا جا رہیا۔ جسٹس انوارالحق نے ہمت نہیں ہاری تے قاسم علی شاہ فائونڈیشن دے اشتراک نال آئو صلح کر لیں دے نام نال ثالثی نال تنازعات حل کران دا مثالی عملی ماڈل پیش کردتا اے۔
جسٹس انوارالحق نے بے مثال جذبے دا مظاہرہ کردے ہوئے بغیر کسی فیس دے ثالثی کر کے عدالتاں وچ چلن والے پندرہ سو تنازعیاں نوں حل کردتا تے فریقین وچ صلح کرادتی تے ایہہ صلح نامے باضابطہ طریقے نال عدالتاں وچ جمع وی کرائے گئے۔ دکھ تے اذیت دی گل ایہہ اے کہ صحافیاں’ انسانی حقوق تے وکلا دی تنظیماں تے مذہبی رہنماواں وچوں کسی نے وی پنجاب حکومت نوں ایہہ سوال نہیں پچھیا کہ عوامی فلاح و بہبود دا جہڑا ایکٹ پنجاب اسمبلی نے 2019 وچ منظور کیتا سی اوہدے اتے عملدرآمد کیوں نہیں کیتا جا رہیا؟