کیہ پاکستان سیاسی خودکشی وَل ودھ رہیا اے!

پاکستان وچ ہن کیہ ہووے گا؟ کیہ 9اپریل نوں ہون والی تبدیلی مگروں کیہ پاکستان وچ جمہوریت تے جمہوری حکومت اے تے یا فیر ہمیشہ وانگوں پاکستان وچ آمرانہ جمہوریت اے تے پاکستان دی ساری سیاسی پارٹیاں تے ادارے پاکستان تے پاکستان دی جمہوریت یا جمہوری نظام دے نال مخلص نیں؟ کیہ پاکستان وچ ایہہ جمہوری نظام جہڑا کہ پچھلے مہینیاں توں پاکستان وچ چل رہیا
اے؟ اوہ پاکستان نوں ترقی تے خوشحالی تے بہتر پاکستان دے سکے گا؟ الغرض اج پاکستان دے کروڑاں عوام اوہ پاکستان وچ ہون یا فیر پاکستان توں باہر انتہائی تذبذ دا شکار نظر آندے نیں۔ پاکستان دی اک وڈی سیاسی پارٹی نوں پاکستان دے طاقتور اداریاں تے پاکستان دی رائٹ لیفٹ دی ساری جماعتاں نوں اکٹھا کر کے عمران خان تے اوہناں دی حکومت دے سامنے کھڑا کر کے انتہائی بھونڈے انداز وچ رجیم دی تبدیلی کر کے پاکستان وچ اک سیاسی خلا پیدا کر دتا گیا جہدی وجہ نال پاکستان معاشی بحران دا شکار ہو گیا۔ ایہہ وی کھلی حقیقت اے کہ پاکستان ڈیفالٹ کر چکیا اے تے ایہدی انائونسمنٹ ہونا باقی اے۔
پچھلے دناں پاکستان وچ ہون والے ضمنی الیکشنز وچ پاکستان مسلم لیگ ن نوں اینا شدید دھچکا لگیا تے پنجاب اک واری فیر اوہناں دے ہتھوں نکل گیا تے افسوسناک تے پوری دنیا نوں اوس ویلے ورطہ حیرت وچ پا دتا جدوں پاکستان دی نویں رجیم
60فیصد قیدیاں جہڑے کہ ضمانتاں اتے سن اقتدار اوہناں دے حوالے کردتا گیا تے بغیر اپوزیشن دے ایہہ قیدیاں اتے مشتمل آئین ساز اسمبلی بنا دتی گئی۔ جہنوں کسے وی ملک تے عوام نے قطعی پسند نہیں کیتا تے ایس لئی وزیراعظم پاکستان دے بجائے پاکستان دے آرمی چیف دنیا دے اگے بھیک منگدے نظر آ رہے نیں تے دنیا دا کوئی ملک وی خیرات یا قرضہ دین نوں تیار نہیں!!۔ پاکستان مہنگائی تے طوفان بدتمیزی دی زد وچ اے۔ چین پاکستان دا نام لیتے بغیر پاکستان نوں سمجھا رہیا اے کہ اوہ امریکہ دے پیارے نہ بنن تے اپنی ڈائریکشن درست کر لین۔درحقیقت چائنہ ایہہ پیغام پاکستان دے طاقتور حلقیاں نوں دے رہیا اے لیکن انج محسوس ہوندا اے کہ پاکستان دے مقتدر حلقے بضد نیں کہ پاکستان وچ سیاسی پارٹی (پی ٹی آئی) تے عمران خان نوں پاکستان دی سیاست توں باہر کڈ کے پہلاں وانگوں فوجی جمہوریت برقرار رکھ کے چند مفاد پرستاں دے ہتھاں وچ دے کے خود کار کنٹرول دے ذریعہ چلایا جاوے تے اوہ قوتاں جہڑی پاکستان تے پاکستانی عوام دے نال مخلص نیں اوہناں اتے غداری دے الزام لا کے بھٹو وانگوں تختہ دار اتے چڑھا دتا جاوے تے پاکستان وچ لا اینڈ آرڈر تے جوڈیشری اتے اوہناں دا قبضہ برقرار رکھیا جاوے تے اپنی مرضی دے فیصلے لیتے جان۔ پاکستان دی تڑپدی’ سسکدی معیشت چیخ چیخ کے اپنی آہ زاریاں سنا رہی اے۔ بے لباس جمہوریت نوں وردی پوا دتی گئی اے تاں جے اوہدا بدن وردی وچ لک جاوے۔ کسے نوں کجھ نظر نہ آوے۔ زبان بندی دا ایہہ عالم اے کہ ہونٹ تے لفظاں اتے پابندی اے۔ سچ آکھن دی سزا ہووے گی۔ الغرض افراتفری دا عالم اے تے پاکستان دے مقتدر حلقے خواب خرگوش دے مزے لے رہے نیں تے یا فیر پاکستان دی ڈُبدی کشتی وچ اوہناں دا وی حصہ اے۔ پاکستان دی جمہوریت دنیا لئی اک تماشا بن چکی اے۔ پاکستان دی پارلیمنٹ ذاتی دشمن گاہ بن چکی اے۔ اپوزیشن دے بغیر پارلیمنٹ انتہائی اہمیت دے فیصلے کر رہی اے۔ سیاسی دشمنیاں عروج تے نیں۔ اپوزیشن سڑکاں اتے اے۔ مقدمے بنائے جا رہے نیں۔ معیشت ڈب رہی اے۔ گرفتاریاں دا سلسلہ شروع ہو چکیا اے۔ اسلام آباد وچ شہباز گل دی گرفتاری توں باقاعدہ آغاز ہویا اے تے چھیتی ایدھر عمران خان سنے دوجے مرکزی رہنماواں نوں وی چھیتی گرفتار کر لیتا جاوے گا۔ اودھر پنجاب وچ پی ڈی ایم خصوصی ن لیگ دے رہنماواں دی گرفتاریاں دے علاوہ ماڈل ٹائون کیس وچ وزیراعظم شہباز شریف تے وزیر داخلہ رانا ثنا اللہ دی گرفتاریاں دی تیاریاں ہو رہیاں نیں۔ ادارے اک دوجے دے سامنے کھڑے نیں۔ شاید دنیا وچ پاکستان ای ایسا جمہوری ملک اے جہدے وچ ایسی جمہوریت اے جہڑی کہ سوائے ملکی مفادات دے خلاف تے عوام دشمنی اتے مشتمل اک گروپ قابض اے تے پاکستان دے سارے ادارے پاکستان دی پٹھ اتے خنچر
گھونپ رہے نیں۔ یاد رکھو انج تے ایس طرح دا نظام بوہتی دیر نہیں چل سکے گا تے ملک نوں ناقابل تلافی نقصان دہ اندیشہ اے۔ پاکستان دے مقتدر حلقیاں نے ایہہ کھیڈ 71 وچ وی کھیڈ کے ویکھ لیتا سی جہدے نتیجہ وچ مشرقی پاکستان دا سانحہ پیش آیا سی۔ پاکستان وچ ہور تباہی نہ پھیلائو تے پاکستان دی جمہوریت دے پیر بھاری بوٹاں تے وردی توں آزاد کرو تاں جے مدتاں توں تڑپدی عوام اک خوشحال پاکستان ویکھ سکے۔
میاں نواز شریف نوں پاکستان دی جمہوریت توں کڈ باہر کردتا گیا سی تاں جے اوہ سمجھے سن کہ اوہ بوہتے طاقتور ہو چکے نیں تے اوہ فوج دے ادارے نوں مکمل کنٹرول کرنا چاہندا اے۔ مریم نواز’ نواز شریف تے پاکستان دی ن لیگی مین سٹریم وی جمہوریت نوں بوٹاں توں آزاد کروان دی حامی اے تے پاکستان نوں حقیقی جمہوریت ول لے جانا چاہندی اے لیکن مقتدر حلقیاں نوں شاید ایسا پسند نہیں اے جد کہ اج دی وڈی سیاسی
پارٹی پی ٹی آئی تے اوہناں دے چیئرمین عمران خان وی ایس گل دے حامی نیں کہ جمہوریت نوں آزادی ملنی چاہیدی اے۔ میاں نواز شریف نوں نااہل کرنا یقینا کوئی دانشمندی نہیں اے۔ پاکستان دی ترقی حقیقی جمہوریت تے پائیدار امن لئی مقتدر حلقے خود نوں ری وزیٹ کرن تے میاں نواز شریف دی نااہلی نوں ختم کرن تے عمران خان نوں دیوار نال لان دی حماقت نہ کرن ورنہ پاکستان اک ایسی بند گلی وچ چلا جاوے گا جتھے سوائے پچھتاوے دے کجھ نہیں ہووے گا۔ پاکستان وچ فوری شفاف الیکشن کروا کے ذاتی مفادات توں بالاتر ہو کے نویں شروعات دا اک چنگا آغاز کرو تے پاکستان دے روشن مستقبل ول ودھو۔ پاکستان دی حقیقی جمہوریت نوں وردی توں آزاد کروان لئی میاں نواز شریف تے عمران کان نوں اک پلیٹ فارم اتے آ کے اکٹھے ایہہ جنگ لڑنا ہووے گی ورنہ جمہوریت دا تماشا ہمیشہ لئی ختم ہو جاوے گا۔