مسلم لیگ تے حافظ دا حلوہ

اوہی ہویا جو ضرور ہوندا اے۔ مسلم لیگ ق دے پرویزالٰہی گروپ نے مسلم لیگ ق دے چوہدری شجاعت گروپ نوں جماعت چوں باہر کر دتا۔ ہن ایس فیصلے دی جو وی قنونی تے اخلاقی حیثیت ہووے اوہ تے خیر پارٹی دا اندرونی معاملہ اے پر سانوں تے ہن ایس خبر دا انتظار اے کہ کدوں گجرات دے ظہور پیلس توں ایہ اعلان جاری ہوندا اے کہ پرویزیاں دا ق نال کوئی لینا دینا نہیں۔ چوہدری شجاعت ای پارٹی دے سربراہ رہن گے۔ انج جدوں الیکشن کمیشن وچ رجسٹریشن دا مرحلہ آوے گا تے ممکن اے اک دھڑا مسلم لیگ ق پ دوجا مسلم لیگ ق ش دے ناں توں رجسٹر ہووے۔ جو وی فیصلہ ہووے نمبردار چوہدری ای رہن گے بھاویں سارا پنڈ مر جاوے۔ مسلم لیگ وچ پچھلے اک سو سولاں ورھیاں وچ اینی ٹٹ پھٹ ہو چکی اے کہ ہن آپ ایس جماعت دا ڈی این اے ایہدے توں ہٹ کے ہو گیا اے۔ مسلم لیگیاں دی موجودہ پیڑھی سر خواجہ سلیم اللہ’ نواب وقار الملک’ نواب محسن لملک’ سید امیر علی’ محمد علی جوہر تے سر محمد شفیع سنے پہلے مسلم لیگی کنونشن منعقدہ احسن منزل پیلس بمقام شاہ باغ ڈھاکا بروز 30دسمبر 1906 دے نیڑے تن ہزار مندوبین توں اونی ای واقف اے جنی میری سواحلی زبان دے ادب تے دسترس اے۔ آپ متحدہ مسلم لیگ ق وی تے ن توں وکھ ہون والا دھڑا سی۔ جہنوں پی ٹی آئی پنجاب دے موجودہ صدر حماد اظہر دے والد تے سابق میئر لہور تے شریف خاندان دے سابق اعتمادی میاں محمد اظہر نے تشکیل دتا۔ فیر ایس دھڑے دی فارمنگ اک کنٹرولڈ ماحول وچ شروع ہوئی تے میاں اظہر نوں مکھن وچوں وال دی طرح کڈھ کے پوری ٹکیہ چوہدریز آف گجرات دے حوالے کر دتی گئی۔ ایس دھڑے دے اک سرکردہ رکن شیخ رشید احمد نے وی اگے پچھے وزارتاں دے مزے لٹے۔ جدوں بعد از مشرف ٹانگے دیاں سواریاں پوریاں ہو گئیاں تے مسلم لیگ عوامی وجود وچ آئی۔ شیخ صاحب نے پہلے نواز شریف’ فیر پرویزمشرف تے فیر عمران خان نال اپنی بھربوٹی دے بدلے ہمیشہ پورا پورا بکرا وصول کیتا۔ آپ دا شمار اوہناں سرکردہ سیاستداناں وچ ہوندا اے جہناں نوں فخر اے کہ اوہناں نوں گیٹ نمبر چار دے اندر آن جان دا غیرمعینہ ویزہ ملیا ہویا اے۔ جس توڑم تاڑی دے نتیجے وچ مسلم لیگ ق پیدا کیتی گئی اوسے عرصے وچ بابائے مسلم لیگ ضیا الحق دے صاحبزادے اعجاز الحق نے اپنی وکھری اٹ تے مسلم لیگ ضیا دا ناں لکھیا تے ہن تک سنبھالے سنبھالے پھر رہے نیں۔ آپ جس مسلم لیگ ن توں ق’ ض تے ع پیدا ہوئیاں اوہ وی کوئی نیچرل جماعت نہیں سی سگوں 1985ء دے غیرجماعتی ایوان وچ جنم لین والی مسلم لیگ دا ای اک حصہ سی۔ اوہدا سربراہ محمد خان جونیجو نوں قرار دتا گیا تے شریف خاندان نوں پنجاب دی قلمرو تھمائی گئی تے گجرات دے چوہدریاں نوں وی غیراعلانیہ حصہ داری الاٹ ہوئی۔
جیویں ای مئی 1988ء وچ جونیجو حکومت برطرف ہوئی تے فیر جونیجو نوں برطرف کرن والے نوں اُتلیاں نے زندگی تو ںبرطرف کر دتا تے مسلم لیگ دے اندر چھپی ہوئی خواہش خنجراں وانگوں باہر نکل آئی۔ حامیان جونیجو پچھے دھکیلے جاندے رہے تے کاروان شریف اگے ودھایا گیا۔ پہلے فدا محمد خان دے ناں تے اک دھڑا متعارف ہویا۔ اوہناں دے نائب نوازشریف مقرر ہوئے فیر ایس دھڑے نوں آئی جے آئی دا حصہ بنایا گیا۔ فیر 1993ء وچ مسلم لیگ نوں اک ہنگامی جنرل کونسل دے ناں تے شریف خاندان دے مکمل طور تے حوالے کر دتا گیا۔ فدامحمد خان دا کیہ بنیا؟ اللہ جان دا اے۔ جد کہ شریف آدمی محمد خان جونیجو دی جماعت مسلم لیگ جونیجو کہلان لگی جہنوں سابق سپیکر قومی اسمبلی حامدناصر چٹھہ نے سنبھالا دتا۔ ایسے دھڑے نے پیپلزپارٹی نال سودے بازی کرکے پنجاب وچ منظور وٹو نوں وزیراعلیٰ بنوایا تے فیر اوسے منظور وٹو نے جناح مسلم لیگ دے ناں توں اگے چل کے اک دھڑا بنا لیا تے فیر ایہ دھڑا وی پیپلزپارٹی وچ غایب ہو گیا پر آپ 1985ء دی اسمبلی دے کنٹرولڈ ماحول وچ پیدا ہون والی مسلم لیگ وی اسمبلڈ سی۔ ایہدے لئی محمد خان جونیجو سنے بنیادی کل پرزے مسلم لیگ فنکشنل دے سربراہ پیر صاحب پگاڑا نے سیاسی حلالے دے متلاشی جنرل ضیاء الحق نوں پٹے تے دان کیتے سن۔
پیر صاحب روحانی طور تے خودمختار پر سیاسی طور تے اپنے آپ نوں جی ایچ کیو دا بندہ کہندے سن ایس لئی بھٹو حکومت دے خلاف 1977ء دی تحریک وچ شامل پی این اے دے نو ستاریاں وچوں جس ستارے دی اقتداری قسمت سب توں ودھ چمکی اوہ سی مسلم لیگ فنکشنل دا ستارہ۔ پر مسلم لیگ فنکشنل دے جنرل سیکرٹری ملک قاسم نوں پیر صاحب دی جی ایچ کیو پرستی پسند نہ آئی تے اوہناں نے مسلم لیگ قاسم بنا لئی تے ضیاء مخالف ایم آر ڈی تحریک وچ وی حصہ لیا۔ فنکشنل وی کنونشن مسلم لیگ تے کونسل مسلم لیگ نوں اسمبل کرکے تشکیل دتی گئی سی۔ کنونشن مسلم لیگ نوں آپ اپنی آسانی لئی سٹھ دی دہائی دی مسلم لیگ ق سمجھ لوو جہنوں اسمبل کرکے اوہدا سیکرٹری جنرل جواں سال ذوالفقارعلی بھٹو نوں بنایا گیا تے جس طرح 2002ء وچ ق سب توں وڈی پارلیمانی پارٹی بن کے ابھری اوسے طرح کنونشن لیگ نے بنیادی جمہوریت دے تحت ہون والے ایوب خانی انتخابات وچ پالا مار کے فیلڈ مارشل نوں سویلین بنا دتا۔ جو لیگی سرکاری لیگ دا حصہ نہیں بنے اوہناں نے خان عبدالقیوم خان تے میاں ممتاز دولتانہ دی پیشوائی وچ کونسل مسلم لیگ بنا لئی تے محترم فاطمہ جناح دی ایوب مخالف صدارتی مہم دا حصہ بن گئے۔
1906ء دی آل انڈیا مسلم لیگ وچ پہلی دھڑے بندی 1927ء وچ ہوئی جدوں لیگ دا اک حصہ سائمن کمیشن دی تجاویز دی حمایت وچ مسلم لیگ پنجاب دے صدر سر میاں محمد شفیع دی قیادت وچ وکھرا ہو گیا تے اخبارات نے اوہنوں شفیع لیگ دا ناں دتا۔ جد کہ جناح صاحب سائمن کمیشن دیاں تجویزاں منن تے تیار نہیں سن تے اوہناں نے جواب وچ چوداں نکات پیش کیتے پر اوہ شرافت دے دور دی دھڑے بندی سی ایس لئی 1930ء وچ پارٹی فیر متحد ہو گئی۔ اوہ مسلم لیگ ہندوستان گیر جماعت سی جو اپنا مقصد حاصل کرن دے بعد غروب ہو گئی تے فیر پاکستان سیاسی ریلوے سٹیشن بن گیا جتھے ایہو پتہ نہیں چلدا کہ ایہ جہڑے ویہہ ڈبے سٹال تے نظر آ رہے نیں اوہناں وچوں حافظ دا اوریجنل ملتانی سوہن حلوہ کہڑا اے؟۔٭