غزل
بیرا جی
دن چڑھیاں ای سر چڑھ جاندے ون سونے خرچے
خبر نہیں ہوندی جرماں دی تھانے لکھ لیندے پرچے
خلقت آپے موڈھیاں اُتے بدو بدی چک لیندی
ویلے دے اخباراں جس بندے دے کیتے چرچے
فن دے باہجھ شاعر نوں ویلا دناں دے وچ بھل جاندا
وڈیاں تقریباں لئی بھاویں پیسے پلیوں خرچے
میریاں صوبیاں دا قانون بناندے نیں اوہ لوکی
جنہاں دیس دے سکولاں وچ کدی نہیں دتے پرچے
دنیا اُتے وی اوہنوں چھیتی جنت لبھ جاندی
نیکی دی راہ تے جس اکھاں میٹ کے کیتے خرچے
اوہنوں مشکل ہو جاندا اے اپنا آپ سنبھالنا
اک واری وی جس دے بھیڑے ہو جاندے نیں چرچے
اپنیاں نسلاں وچ اوہناں نے وڈیاں عزتاں پائیاں
جنہاں ریت رواج بیراجی پرکھاں والے ورچے
