بلوچستان تے اک نظر

ایہدے وچ کوئی شک نہیں کہ بلوچستان وچ سیلاب دیاں تباہ کاریاں ناقابل بیان نیں۔ کئی بستیاں برباد ہو گئیاں۔ سینکڑوں انسانی جاناں لقمہ اجل بن گئیاں بہت سارے ڈنگر سیلابی ریلیاں دی نذر ہو گئے۔ آفت دی ایہ گھڑی آزمائش دا وقت اے سانوں ساریاں نوں بلوچستان دے لوکاں دی دل کھول کے مدد کرنی چاہیدی اے۔ حکومت بلوچستان دے کول جو وسیلے نیں اوہ تے لوکاں دی مدد لئی استعمال ہو رہے نیں وفاقی حکومت نوں وی وڈا کردار ادا کرنا چاہیدا اے۔ مسلح فوجاں دے جوان ہمیشہ دی طرح سیلاب زدہ علاقیاں وچ لوکاں دی مدد کر رہے نیں پر ایس دوران سوشل میڈیا دے بے لگام گھوڑیاں نے بلوچستان دے وزیراعلیٰ تے اوہناں دی کابینہ دے اراکین تے خوب تنقید کیتی۔ جے کوئی وزیر کھانا کھاندا نظرآیا تے ایہ کہیا گیا کہ وزیر صاحت تے کھانا کھا رہے نیں جے وزیراعلیٰ نے پانی پی لیا تے کہیا گیا کہ وزیراعلیٰ تے پانی پی رہیا اے۔
کسے نوں خیال نہ آیا کہ ایہ انسانی ضرورتاں نیں زندگی نوں برقرار رکھن لئی کھانا وی کھانا پیندا اے تے پانی وی پینا پیندا اے۔ جدوں تنقید دا محاذ گرم سی تے اجہے وچ حکومت بلوچستان دی ترجمان فرح عظیم شاہ نے اسلام آباد وچ اک پریس کانفرنس کیتی۔ ایس پریس کانفرنس وچ فرح عظیم شاہ نے سیلاب دے نال نال اک ہور گل وی کر دتی بس ایہو گل سوشل میڈیا دے بے لگام گھوڑیاں نوں پسند نہ آئی۔ ناپسندیدگی دی وجہ پاکستان نال محبت اے۔ ایس پریس کانفرنس وچ اوہناں کرداراں تے تنقید کیتی گئی جو ہمیشہ مسنگ پرسنز دا رونا روندے نیں۔ اصل وچ فرح عظیم شاہ پریس کانفرنس وچ ظہیرنامی بندے دا ذکر لے آئیاں سن ظہیرنامی بندہ کجھ مہینے ایرانی جیل وچ رہیا تے ایتھے بہت سارے لوک اوہنوں مسنگ پرسنز وچ شامل کرکے ریاست تے ریاستی اداریاں تے تنقید کردے رہے۔
ایہ اک کڑوا سچ سی جو فرح عظیم شاہ نے بول دتا۔ ایس پریس کانفرنس دے بعد مسنگ پرسنز دے نام نہاد ہمدرد جاگ گئے تے خاص طور تے بیرونی دنیا وچ بیٹھے ہوئے لوکاں نے فرح عظیم شاہ نوں ہدف تنقید بنایا۔ لوکاں نے فرح عظیم شاہ دی گل بات تے گل کرن دی تھاں اوہناں دی شخصیت تے گلاں بنانیاں شروع کر دتیاں۔ ایہناں ساریاں گلاں دے باوجود بلوچستان حکومت دی ایس بہادر ترجمان نے ٹی وی چینلاں دا سامنا کیتا وکھووکھ پروگراماں وچ جا کے بلوچستان دی گل کیتی تے بلوچستان نوں درپیش مسئلیاں دا تفصیل نال تذکرہ کیتا۔ پر ایتھے قابل افسوس گل ایہہ وے کہ ساڈے کجھ دوستاں نے تصویر دا اک رخ پیش کیتا کاش اوہ دوجا رخ وی پیش کردے۔ جائز تنقید ضرور کرنی چاہیدی اے پر حقائق نوں جانے بناں تنقید کرنا ٹھیک نہیں۔ سوشل میڈیا تے گلاں بنان والیاں نوں کیہ پتہ کہ فرح عظیم شاہ نے مشکل ترین حالات وچ وی پاکستان نال محبت کیتی اے۔ ایہ خاتون پہلی واری 2002ء وچ بلوچستان اسمبلی دی رکن بنیاں’ اسمبلی دے اکثر اجلاساں وچ فرح عظیم شاہ دیاں تقریراں دا محور و مرکز بلوچستان دے نال نال پاکستان ہونا سی۔
پاکستان نال اوہناں دی ایہ محبت باغیاں نوں پسند نہ آئی تے اوہناں نے اک ہور حل لبھیا فیر اوہناں نے بلوچستان اسمبلی بوہے ایس لئی خاتون لئی بند کر دتے۔ جنیاں وی علاقائی جماعتاں سن اوہناں دے رہنما باغیاں توں گھبراندے سن ایسے لئی اوہ ایس متحرک خاتون نوں نظرانداز کردے رہے پر قلات دی رہن والی ایس خاتون نے وی نظراندازی دا حل لبھ لیا۔ اوہنے ایمان پاکستان دے ناں توں اک سماجی تنظیم قائم کیتی۔ ایس تنظیم دے راہیں اوہ بلوچستان دے چھوٹے شہراں’ قصبیاں تے پنڈاں وچ چلی گئی’ اوتھوں دے نوجوان لڑکے تے لڑکیاں نوں ایہ دسنا شروع کیتا کہ پاکستان اک عظیم نعمت اے تے بلوچستان دی خوبصورت وچ خوشحالی اوس ویلے ای آ سکدی اے جدوں اسیں اپنے وطن نال محبت کراں گے۔ اوہنے کئی ورھے ایس تبلیغ وچ گزار دتے۔ ایہ تبلیغ باغیاں نوں چنگی نہیں لگدی۔ ہن جدوں کئی ورھیاں دی ریاضت دے بعد فرح عظیم شاہ حکومت بلوچستان دی ترجمان بنی تے ایس گل دا سب توں زیادہ دکھ باغیاں نوں ہویا۔
ایس دکھ دے مداوے لئی اوہ سوشل میڈیا دا استعمال کر رہے نیں۔ اوہ اپنی ای بلوچستانی بھین تے سوشل میڈیا راہیں بھرویں تنقید کروا رہے نیں۔ ایتھے باغیاں لئی وی بڑا اہم سوال اے کہ جہڑی خاتون گولیاں توں نہیں ڈردی جہدا ایمان اے کہ موت اپنے مقررہ وقت تے آوے گی’ بھلا اجہی خاتون سوشل میڈیا دی تنقید توں کیویں گھبراوے گی۔ جتھوں تک فرح عظیم شاہ دا تعلق اے تے میں ایہنوں گھٹو گھٹ سولاں ستاراں ورھیاں توں جاننا واں اوہ ایس تنقید توں پریشان نہیں ہووے گی تے نہ ای اپنے راہ توں ہٹے گی اوہناں دی تنظیم دا ناں ایمان پاکستان اے تے اوہ واقعی پاکستان نال ایمان دی حد تک محبت کردی اے ایس عظیم وطن نال محبت کرن والیاں تے جدوں وی کوئی تنقید کرے تے مینوں صادق حسین شاہ دا ایہ شعر بے اختیار یاد آ جاندا اے کہ:
تندی باد مخالف سے نہ گھبرا اے عقاب
یہ تو چلتی ہے تجھے اونچا اڑانے کے لئے