شجر کاری کرنا ویلے دی اہم لوڑہے

حامد نے جدوں دا ہوش سنبھالیا درخت لگان دے فیدے سندا آ رہیا سی۔ اوہنے سکولوں’ والدین کولوں’ ٹی وی اتے’ مسجد دے مولوی کولوں الغرض ہر اک کولوں درختاں دے فیدے اتے لمی لمی تقریراں سنیاں سن۔ کجھ سال توں ملک دا تقریباً ہر قال ذکر سیاستدان درخت لگان اتے زور دے رہیا سی۔ اوہ سوچدا جے ایہہ سب کہن والیاں نے اپنی گل اتے عمل کیتا ہوندا تے اج ملک دا نقشہ بدل گیا ہوندا۔ ایس سوال دا جواب اوہنوں کون دے سکدا سی۔ اوہ سوچدا جے ایہہ سب سیاست دان ای نہیں ٹی وی ا ینکراں توں لے کے سکول دے استاد تک کہن دے بجائے عمل کرن تے اج ملک وچ درختاں دی بہتات ہوندی۔ اج کوئی شجرکاری مہم چلان دی لوڑ نہ ہوندی۔ ایہناں آکھن والیاں دی سینکڑاں مربع ایکڑ زمیناں نیں۔ اوہناں دی شوگر ملز نیں’ اوہناں دی شہر شہر رہائشی کالونیاں نیں’ اوہناں دی حکومت اے۔ ایہدا مطلب اے نہراں’ سڑکاں ہر جگہ ایہہ درخت لگوا سکدے نیں۔ اوہناں دے کول عملہ وی موجود اے۔ ایہدے باوجود ایہہ صرف آکھدے نیں’ عمل نہیں کردے۔ اوہناں دے قول و فعل وچ تضاد اے۔
ایہہ قول و فعل دا تضاد ای ملکی زوال دا کارن بندا اے۔ ایس سال وی حکومت نے درخت لگائو’ وطن نوں سرسبز بنائو دا نعرہ لایا سی۔ ایہدے نال ای ملک دے طول و عرض وچ سارے اوہو گلاں کر رہے سن جہڑی اوہ اٹھارہ ورھیاں توں سندا آ رہیا سی۔ ہریالی’ ماحولیاتی آلودگی توں انسانی زندگیاں نوں محفوظ رکھدی اے۔ صبح سویرے کھلی فضا وچ چہل قدمی کرنا صحت نوں برقرار رکھن وچ مددگار ثابت ہوندی اے۔
درخت لگان دے بہت سارے فیدے نیں جہناں وچوں چند اک کجھ ایس طرح نیں کہ اک درخت اک سال وچ 10ائیر کنڈیشنراں دے برابر مسلسل ہوا دیندا اے۔750 گیلن برساتی پانی نوں جذب کردا اے۔ 60پونڈ آلودہ ہوا نوں صاف کرن وچ مدد دیندا اے۔ درختاں دی کمی دی وجہ نال آلودگی پھیل رہی اے تے امراض پیدا ہو رہے نیں جد کہ د رخت لگان نال آلودگی وچ کمی ہوندی اے۔ اک درخت 36بچیاں نوں آکسیجن فراہم کردا اے۔ دوجی گل جہڑی حامد نے شدت نال محسوس کیتی اوہ ایہہ سی کہ درخت لگان توں وڈا کم درخت اگانا اے۔ ہر سال ہزاراں درخت لگائے جاندے نیں لیکن اوہناں دی مناسب دیکھ بھال نہ ہون کارن ادھے توں ودھ ضائع ہو جاندے نیں۔
شجرکاری دا مقصد درخت لگانا ای نہیں بلکہ درخت اگانا وی اے لہٰذا ایہناں دی دیکھ بھال وی انتہائی ضروری ہوندی اے۔ حامد نوں شروع توں ای قدرتی تے فطری ماحول پسند سی۔ اوہدے سکول وچ کافی سارے درخت لگے ہوئے سن۔ اوہ سکول توں واپسی اتے وی اکثر کتاب چک کے کھیتاں وچ نکل جاندا تے کسے درخت دے تھلے بیٹھ کے پڑھدا رہندا سی۔
اوہنے وطن عزیز دے وزیراعظم دی ٹی وی اتے اک تقریر سنی جہدے وچ اوہناں نے پاکستانیاں نوں کم از کم2پودے لگان دی اپیل کیتی۔ وزیراعظم نے ”نیا پاکستان” بنان لئی سب توں پہلاں ماحولیاتی آلودگی توں نجات حاصل کرن دا عزم کیتا اے تے ایس اہم مسئلے دا ادراک کردے ہوئے باقاعدہ ”گرین پاکستان پروگرام” مہم دا آغازکرن دا اعلان کیتا جہدے تحت اوہناںنے ملک بھر وچ 10ارب پودے لگان دا اعلان کیتا۔اوہناں نے واضح کیتا کہ ایہہ زندگی تے موت دی جنگ اے۔
حامد رات نوں اپنے گھر دی چھت اتے چارپائی اتے لیٹے ہوئے اسمان ول ویکھدے ہوئے سوچ رہیا سی۔ ”مینوں وی ایس مہم وچ شامل ہونا چاہیدا اے بلکہ ہر پاکستانی نوں ایہدے وچ اپنا بھرواں کردار ادا کرنا چاہیدا اے کیوں جے ایہدے وچ سب دا فیدہ اے۔ آن والی نسلاں دی خوشحالی دا اک ذریعہ اے۔ سب توں پہلاں جہڑے آکھدے نیں لیکن عمل نہیں کردے اوہناں نوں اپنی ایہناں گلاں اتے عمل کرنا چاہیدا اے۔ انج دے الجھے ہوئے خیالاں وچ اوہ کافی دیر تک الجھیا ای رہیا۔ فیر اچانک اوہنوں اک خیال آیا ”میں دوجیاں دی بجائے خود ای ایہدے اتے عمل کیوں نہ کراں”۔ اوہ اٹھ بیٹھیا۔ اوہنے اپنے گھر وچ’سارے پنڈتے تقریبی علاقیاں وچ درخت لگان نوں بلکہ اگان نوں اک مہم بنان دا سوچیا۔ کافی دیر تک اوہ ایس بارے سوچدا رہیا۔ اوہدی اکھاں دے سامنے اوہ ساری تھاواں سن جتھے جتھے درخت لگائے جا سکدے سن۔ ایہہ فیصلہ کرن مگروں ای اوہ سو گیا۔
دوجے دن اوہنے درخت لگان دی مہم دا آغاز اپنے گھر توں کیتا۔ سویرے ناشتہ توںوی پہلاں اوہ کسی لے کے گھر دے اک نکڑ ے کیاری بنا رہیا سی۔ شام تک اوہنے اپنے گھر وچ تن مختلف تھاواں اتے چھوٹی چھوٹی کیاریاں بنا لئیاں۔ اوہدا دوست فیاض اوہنوں کرکٹ کھیڈن لئی لین آیا تے اوہنے نہ صرف صاف انکار کردتا بلکہ قول و فعل دے تضاد اتے اک لمی تقریر وی کردتی جہدے توں فیاض بہت متاثر ہویا تے اوہدے نال کیاری بنان وچ مدد کردا رہیا۔
اگلے دن شام تک اوہناں نے فیاض دے گھر وچ وی اک وڈی کیاری بنان دا فیصلہ کیتا کیوں جے فیاض دا گھر وڈا سی تے سامنے وی کافی جگہ خالی پئی ہوئی سی۔ آن والے اک ہفتے وچ اوہناں نے دونواں گھراں وچ 50 دے کول درخت لگا دتے۔ درخت اوہناں نے بہت گھٹ پیسیاں وچ مل گئے۔ کجھ درخت اوہناں نے کھیتاں توں حاصل کیتے۔ اوہناں دی ویکھا ویکھی اوہناں دی ادھے توں ودھ کرکٹ ٹیم تے سکول دے بہت سارے دوست وی ایس مہم وچ شامل ہون لگے۔ اوہناں نے اپنے پنڈ دے قبرستان دے چاروں پاسے اک خوبصورت کیاری بنائی۔ اوہناں نے پنڈ دے اہم تے معزز افراد نوں اپیل کیتی تے پنڈ ول آن والے کھال دا پانی ایس کیاری ول موڑ لیتا۔ ہن سب توں اہم مرحلہ سی کہ درختاں دے حصول دا’ اوہناں نوں ایس گل دا علم ہویا کہ شہر وچ پودے مفت دتے جا رہے نیں۔ پنڈ دے اہم تے معزز افراد نوں اپیل کیتی اوہ دن اوہناں لئی ڈھیراں خوشیاں لیایا جدوں اوہ سارے دوست رل کے شہر توں موٹرسائیکلاں اتے بہت سارے درخت لیائے تے اوہناں نوں پنڈ دے قبرستان تے مختلف تھاواں اتے لگا دتا۔عملی قدم چکن پاروں پنڈ وچ اوہناں دی عزت تے وقار وچ وادھا ہویا۔ حامد لئی ہن درخت لگانا اک جنون بن چکیا سی۔ فیاض تے حامد نے لوکاں نوں خاص کر اپنے دوستاں نوں ایس حوالے نال آگاہ کرنا شروع کردتا کہ ہر کوئی اپنے اپنے گھراں وچ دو’ چار’ پنج ‘ دس درخت لگاوے جہدے کول جنی وی جگہ اے اوہ اوہدے اتے درخت لگاوے۔ ایہدا نتیجہ ایہہ ہویا کہ کجھ ای دناں وچ پورے پنڈ وچ سینکڑاں درخت لگائے جا چکے سن۔ اک دن فیاض تے حامد شہر توں درخت لیا رہے سن تے اوہناں نوں اک نواں خیال سوجیھا۔ پنڈ نوں جان والی دو کلومیٹر لمی سڑک دے کنڈے صرف کجھ درخت ای سن۔
اوہناں نے سوچیا جے ایس سڑک دے دونویں پاسے’ کنڈیاں اتے درخت لگائے جان تے کیسا رہوے گا۔ لیکن ایہہ اوہناں دونواں دے بس دی گل نہیں سی۔ ایہدے لئی اوہناں نے اپنے دوستاں نال رابطہ کیتا۔ ہولی ہولی پنڈ دے کجھ ہور لوک وی اوہناں دے نال ایس کارخیر وچ حصہ پان تے اوہناں دی درخت لگان دی مہم دا حصہ بنن لئی اوہناں دے نال شامل ہو گئے۔ اوہناں نوں علم سی کہ شجرکاری دا موسم لنگھداجا رہیا اے سانوں چھیتی توں چھیتی ایس کم نوں کرنا اے۔ دوجے دن فیاض تے حامد پنڈ دے مین چوک وچ جا کھڑے ہوئے تے ہر اک کولوں درخت لگان لئی مدد منگن لگے۔ بوہتے درخت’ بوہتی آکسیجن۔ صرف گلاں کرن نال اسیں ماحول نوں بدل نہیں سکدے’ ایہدے لئی محنت کرنا ہووے گی۔تہانوں ساریاں نوں ساڈا ساتھ دینا ہووے گا۔
اسیں شہر ول جان والی سڑک دے دونویں پاسے درخت لگانا چاہنے آں۔ سانوں افرادی قوت تے مالی مدد وی درکار اے۔ ساڈے ملک وچ درختاں دی بہت لوڑ اے۔ودھدی گلوبل وارمنگ توں بچن دا اک اہم رستہ ودھ توں ودھ درخت لگانا اے۔ چیونٹیاں توں لے کے انسان ‘پرندے تے جانور ساریاں دی زندگیاں درختاں نال جڑیاں نیں۔ اوہناں نے ظہر تے عصر دی نماز مسجد وچ ادا کیتی۔ اوتھے وی نمازیاں نال گل کیتی۔ اخیر اوہناں نوں اوہ سب کجھ ملن لگیا جہدی اوہناں نوں لوڑ سی۔ دوجے دن سویرے ای دو ٹریکٹر اوس سڑک دے دونویں پاسے زمین ہموار کر رہے سن۔ 20دے کول بندے اوہناں دا ساتھ دے رہے سن۔ آن والے تن دن وچ’ جی ہاں صرف تن دن وچ سڑک دے نال نال شہتوت’ ششم’جامن’ پیپل دے درخت لگائے جا رہے سن۔
حامد تے فیاض بہت خوش سن جدکہ حامد دی خوشی دا تے کوئی ٹھکانہ ای نہیں سی۔ اوہ اپنے رب دے حضور شکر بجا لیا رہیا سی کہ اوہنوں درخت لگان دی ایس مہم وچ کامیابی حاصل ہوئی کیوں جے شجرکاری کرنا ویلے دی اک اہم لوڑ سی کیوں جے گلاں تے سارے کردے نیں لیکن عمل کوئی کوئی کردا اے تے حامد نے اوہدے اتے عمل کر کے ساریاں دے دل جت لیتے سن۔
کجھ دن مگروں ای یوم آزادی دا دن 14اگست آ رہیا سی۔ اوہناں نے سوچیا ایس واری سکول وچ یوم آزادی دے موقعے اتے اوہ بچیاں تے استاداں نوں شجر کاری مہم وچ اپنا کردار ادا کرن نوںآکھن گے کہ ایس واری سبز ہلالی جھنڈیاں تے پرچماں دے بجائے’ درخت لگائوتے درخت لگاکے وطن نال اپنی محبت دا ثبوت دیو۔ جھنڈیاں تے پرچم تے ہفتے دو ہفتے مگروں ضائع ہو جاندے نیں۔ سانوں چاہیدا اے کہ سبز درخت لگائیے تے اوہناں دی حفاظت کرئیے’ دیکھ بھال کرو تاں جے ایہو درخت کل نوں تہانوں سایہ دین گے’ تسکین دین گے تے مدتاں یاد رہن گے۔ سانوں اک دوجے نوں آکھن تے دسن دی وی لوڑ اے کیوں جے آکھن توں ودھ عمل کرن نال زندگی بندی اے ایس لئی اک دوجے نوں ویکھ کے لوکاں وچ درخت لگان دا جذبہ ودھے گا۔
حامد چاہندا اے کہ وطن عزیز دے مخصوص دناں نوں جیویں کہ یوم دفاع’ یوم آزادی’ یوم شہدا’ یوم تکبیر نوں جے درخت لگا کے منایا جاوے اوہنوں اک مہم بنا دتا جاوے تے ملک دی تقدیر بدل سکدی اے لیکن ایہدے وچ دو گلاں دا خاص خیال رکھنا ہووے گا۔ پہلی گل ایہہ کہ اوہو گل کرو جہناں اتے عمل کردے ہوو تے ایس گل دا احساس اپنے استاداں’ علما کرام’ سیاست داناں’ ٹی وی اینکراں تے خاص کر ملک دے سیاست داناں نوں لوڑ اے۔ اللہ پاک کولوں دعا اے کہ سانوں ساریاں نوں نیک عمل کرن دی توفیق دیوے تے احساس دی دولت نال مالا مال کرے۔ آمین ثم آمین