پاکستان زندہ باد

ماشااللہ پاکستان نوں بنے 75ورھے ہو گئے نیں۔ پاکستان کیوں بنایا گیا’ اوس ویلے کیہ حالات سن’ اک وکھرے وطن لئی کیوں قائداعظم تے ہندوستان دے مسلم اک جھنڈے تھلے جمع ہون لگے سن۔ ایہناں ساری گلاں دا اج دی نسل نوں دسیا جانا بہت ضروری اے۔ جدوں تک ہندوستان اتے مسلمان حکمران تخت نشین رہے اوہدوں تک ہندو مجبوری دے تحت مسلماناں دی اطاعت کردے رہے مگر جدوں ہندوستان اتے انگریز سامراج دا جھنڈا لہران لگیا تے ہندو بڑی تیزی نال اوہناں دے نزدیک ہوندے چلے گئے۔ کانگریس وچ اپنی برتری دی وجہ نال ہندوواں نے برملا آکھنا شروع کر دتا سی کہ انگریز دے جان مگروں ایس خطے نوں عملی تے نظریاتی طور تے ہندو ریاست بنایا جاوے گا جہڑا کہ اج دے بھارت وچ عملی طور تے کیتا جا رہیا اے۔ ہندو قوم پرست ایس گل دا وی اظہار کیتا کردے سن کہ شمال مشرق تے شمال مغرب جتھے مسلمان اکثریت وچ نیں۔ اوتھے باقاعدہ فوج تعینات کیتی جاوے گی جہدا اک مقصد مسلماناں نوں کنٹرول وچ رکھنا ہووے گا تے نال ای لالچ یا دھونس نال مسلماناں دا مذہب تبدیل کرایا جاوے گا۔کدی آکھیا جاندا سی کہ مسلماناں نوں مکہ تے مدینہ چلے جانا چاہیدا اے’ہندوستان وچ اوہناں لئی کوئی جگہ نہیں اے۔ نال ای مستقبل دے ہندوستان وچ مسلماناں نوں مٹان’ اوہناں دی مسجداں ڈھان تے قرآن ساڑن دی پلاننگ کیتی جاندی سی۔ انج دے کئی واقعات پاروں دو قومی نظریہ دی بنیاد اتے وکھرے وطن دا مطالبہ کیتا گیا۔ چونکہ کلمہ طیبہ دی بنیاد اتے اک وکھری ریاست حاصل کرن دی کوششاں شروع ہوئیاں سن ایس لئی ہندوواں نے اپنا سارا زور ایس گل اتے لانا شروع کر دتا کہ اوہ کسے وی حالت وچ پاکستان نہیں بنن دین گے۔ امن دا پیغام دین والے گاندھی نے شدید غصے وچ آ کے آکھیا سی کہ جے سارا ہندوستان وی سڑ کے راکھ ہو جاوے تے اوہ پاکستان بنان دی اجازت نہیں دین گے۔ جواب وچ میرے قائد،قائداعظممحمد علی جناح نے فرمایا سی کہ گاندھی اپنے اندر دی گل بالآخر زبان اتے لے ای آیا اے۔ ہن ایہہ صاف وکھائی دے رہیا اے کہ جواہر لال نہرو تے گاندھی نے انگریز دے نال رل کے تقسیم ویلے لہو دی ندیاں بہان دا پلان بنا لیتا اے تے فیر ویلے نے اوہ دن وی وکھائے جدوں بپھرے ہوئے غنڈیاں نے بے دردی نال مسلماناں دا لہو بہایا۔ شہر اجاڑ دتے گئے۔ بستیاں صفہ ہستی توں مٹا دتی گئیاں۔ قرآن ساڑ دتے گئے۔ مسجداں ویران ہو گئیاں۔ ماں پیو دے سامنے اوہناں دے بالاں دے گلے وڈے گئے۔ اجتماعی عصمت دری کیتی گئی۔ ایس طرح دی ہزاراں المناک داستاناں نیں جہناں دا ذکر سن کے ای اکھاں اتھروواں نال بھر جاندیاں نیں۔ ایہہ اک حقیقت اے کہ ا یس ارض وطن لئی ساڈے بزرگاں نے بہت عظیم قربانیاں دتیاں نیں۔ لیکن اوس ویلے وی کجھ مسلماناں نے قیام پاکستان دی مخالفت کیتی سی کجھ لوک اج وی پاکستان دی آزادی دا جشن نہیں منانا چاہندے۔ اج ہر لنگھدے دن دے نال بھارت وچ مسلم دشمنی ودھدی جا رہی اے۔ مسلماناں نوں شک دی نظر نال ویکھیا جاندا اے۔ پچھلے کجھ سالاں وچ نہ جانے کنے مسلماناں نوں گاں دا گوشت کھان’ ویچن دے شک وچ سرعام قتل کیتا جا رہیا اے۔ دنیا کہڑے منہ نال مسلماناں نوں شدت پسند آکھدی اے۔ اصل شدت پسند تے بھارت دے ہندو نیں جہڑے اج وی بھارت وچ مسلماناں’ سکھاں’ عیسائیاں تے خود اپنی تھلڑی ذات دے لوکاں دا جینامشکل کیتے ہوئے نیں۔اج سانوں دو قومی نظریے دی اہمیت نوں سمجھن دی شدت نال لوڑ اے۔ دنیا وچ قوماں دی پہچان اوہناں دے عقیدے تے نظریات توں ای ہوندی اے۔ نظریات قوماں دی شناخت بندے نیں تے جدوں کوئی قوم اپنے نظریات توں بے وفائی کردی اے تے اوہدا نام صفحہ ہستی توں مٹا دتا جاندا اے۔ قائداعظم نے واضح کردتا سی کہ اسیں اک ایسی ریاست بنانا چاہنے آں جتھے عوام اسلامی اصولاں دے تحت اپنی زندگیاں گزار سکن۔ جتھے مسلماناں دے نال دوجے مذہب دے لوکاں نوں وی اوہناں دی مرضی دے مطابق زندگی گزارن دا پورا پورا موقع ملے تے اج پاکستان وچ جنے وی مذہب دے لوک نیں اوہناں نوں اوہناں دی رسم و رواج تے عبادتاں دی مکمل آزادی اے۔ مادر وطن لئی اپنی جاناں دے نذرانے پیش کرن والے شہیداں نوں یاد کرو۔ اوہناں ماواں نوں یاد کرو جہناں دے سامنے اوہناں دے ددھ پیندے بچیاں نوں قتل کردتا گیا۔ اوہناں پاک مسلم عورتاں تے بچیاں نوں وی یاد کرو جہناں دی عزتاں لٹ لیتی گئیاں۔ قیام پاکستان دے مقصد تے دو قومی نظریہ دی اہمیت نوں سمجھدے ہوئے اپنے ملک پاکستان دی قدر دل و جان نال کرو’ ایہنوں سرسبز و شاداب بنان دے عمل وچ اپنا حصہ پانا شروع کرو۔ ایہنوں صاف ستھرا رکھن دی کوشش کرو۔ ایہدے قنوناں اتے عمل پیرا رہن دا عہد کرو۔ تے ایہدے مگروں اللہ دی بارگاہ وچ سجدہ ریز ہو جائو۔ سجدہ شکر ادا کرو تے سارے رل کے نعرہ لائو۔ پاکستان زندہ باد۔ پاک فوج پائندہ باد۔