خدا دا در

اوہدے منہ توں نکلیا فقرہ بم وانگوں پھٹیا تے میرا منہ حیرت نال کھل گیا۔ میرا ہتھ لکھدے لکھدے رک گیا’ نظراں ٹھہر گئیاں تے دل حلق وچ آ گیا۔ میری ساہنواں بے ترتیب ہو چکیاں سن۔ مینوں اپنے حلق وچ پتھر ڈگدے محسوس ہوئے’ میرے قلب تے احساس وچ عجیب جئی ہلچل پیدا ہو گئی سی۔ اوہ موت دی دہلیز اتے کھڑی امید بھری نظراںنال میرے ول ویکھ رہیاں سن۔اوہ پتہ نہیں اذیت دے کنے دریا پار کر کے میرے کول آئی سی۔ اوہدے لہجے وچ گہری سیاہ رات دا درد سی۔ مینوں اپنی سماعت اتے بالکل وی یقین نہیں آیا۔ میں خوفزدہ تے بے یقینی دے لہجے وچ دوبارہ اوہدے کولوں پچھیا تے اوہنے اوہو پہلے والا جواب دتا’ ہن میں حیرت بے بسی تے دکھ دے گہرے احساس دے نال اوہدے ول شفقت بھری نظراں نال ویکھ رہیا سی’ مینوں بالکل وی یقین نہیں آ رہیا سی کہ کجھ دناں مگروں اوہدی روشن اکھاں روشنی نور امید دے چراغاں تے مستقبل
دے سہانے سفنیاں توں محروم ہو جاون گئیاں؟۔ میری اکھاں وچ اوہدے لئی دکھ نمی بن کے تیرن لگیا’ میں ایہہ یقین کرن نوں بالکل وی تیار نہیں سی کہ میرے سامنے بیٹھی 25 سالہ خوبصورت نوجوان کڑی جہڑی دو معصوم بچیاں دی ماں وی اے کرہ ارض دی لاعلاج تے خوفناک ترین بیماری دا شکار ہو سکدی اے۔ ایہہ ہولناک تے لاعلاج بیماری جہڑی پچھلے کجھ عشریاں توں ہزاراں لوکاں نوں نگل چکی اے۔ پوری دنیا دے ہسپتال’ لیبارٹریاں تے قابل ترین ڈاکٹر اوہدے سامنے بے بسی دے مجسمے بنے نظر آ رہے نیں۔مغرب تے دنیا دے سارے ترقی یافتہ ملک اپنے بے پناہ وسائل دے باوجود ایس لاعلاج بیماری دا علاج کرن توں قاصر نیں’ اک ایسی خوفناک تے لاعلاج بیماری جہڑی خوفناک عفریت وانگوں ہر سال بے شمار انساناں نوں نگل رہی اے۔ ایسی بیماری جہدا نام آندے ای دل و دماغ اتے خوف طاری ہو جادنا اے۔ ایسی بیماری جہدے بارے دسدے ہوئے وی انسان شرماندا تے گھبراندا اے۔ پوری دنیا وچ ہر لنگھدے دن دے نال ایہدے مریض ودھدے جا رہے نیں۔ اللہ دالکھ شکر اے کہ وطن عزیز وچ ایہہ بیماری بہت گھٹ اے۔ ایہدی خبر نے مینوں بنیاداں تک ہلا کے رکھ دتا۔ مینوں یقین نہیں آ رہیا سی کہ میرے سامنے بیٹھی صحت مند خوبصورت نوجوان کڑی ہر لنگھدے دن دے نال موت ول ودھ رہی اے۔ اوہدے جسم وچ نسدا ہویا گرم صحت مند لہو چھیتی ای سرد ہون والا اے۔ موت دا وائرس اوہدے لہو وچ شامل ہو چکیا اے تے کسی دن اچانک اوہنوں گرفت وچ لے کے موت دے انھے غار وچ دھکیل دیوے گا۔ ایہہ صحت مند جسم چھیتی ای مٹی دے ڈھیر وچ تبدیل ہون والا اے۔ میرے سامنے بیٹھی نوجوان کڑی نے اک خط مینوں دتا کہ سر تسیں ایہنوں پڑھ لوو’ ایہدے وچ تفصیل درج اے۔ خط وچ اوہ لکھدی اے: سر پنج سال پہلاں میرا ویاہ دبئی وچ میرے کزن دے نال ہوئیا۔ لہٰذا میں ویاہ مگروں لہور توں دبئی شفٹ ہو گئی۔ میں اپنے خاوند دے نال بہت خوشگوار ازدواجی زندگی گزار رہی ساں۔اسیں دونویں میاں بیوی اپنے ننھے منے بچیاں وچ گم زندگی دا بھرویں طریقے نال لطف اٹھا رہے سن۔ فطری طور تے اسیں دونویں میاں بیوی مذہبی رجحان رکھدے آں۔ ایسلئی اسیں پوری کوشش کرنے آں کہ زندگی مذہب اسلام دے مطابق گزاری جاوے۔ اسیں دونویں شدت نال حرام حلال دا خیال رکھنے آں کہ کوئی وی ایسا کم نہ ہووے جہدی سانوں اسلام اجازت نہیں دیندا کیوں جے دبئی وچ دنیا جہان دی قوماں آباد نیں آزادی تے عیاشی دے سارے ذریعے تے سہولتاں موجود نیں لیکن اللہ تعالیٰ دا لکھ لکھ شکر اے کہ اسیں ہر قسم دی غلط آزادی’ عیاشی تے گناہواں توں پاک زندگی گزار رہے ساں ‘ کوئی غم پریشانی نہیں سی۔ ہر پاسے خوشیاں دے رنگ تے گلستان مہکے ہوئے سن۔ ایس طرح ساڈی ازدواجی زندگی دے پنج سال پورے ہو گئے۔ اک مہینے پہلاں میرے میاں دا سالانہ میڈیکل ٹیسٹ ہویا تے میرے میاں نے احتیاطاََ میرا وی میڈیکل ٹیسٹ کروایا۔ میرے
میاں دا میڈیکل ٹیسٹ تے بالکل ٹھیک آیا لیکن میرے ٹیسٹ دے مطابق میں دنیا دی خوفناک تے لاعلاج ترین بیماری ایڈز دا شکار ہو چکی آں۔ ایڈز دی خبر میرے تے میرے خاوند لئی زلزلے تے آتش فشاں دے پھٹن توں گھٹ نہیں سی۔ ساڈی پریشانی تے حیرت ایس لئی بوہتی سی کہ ایڈز دے پھیلن وچ جہڑی وجوہات نیں میری زندگی وچ کوئی اک وجہ وی ایسی نہیں اے جہڑی ایہدا موجب بندی اے’ ڈاکٹر وی بہت پریشان نیں اوہ میرے نال کئی سیشن کر چکے نیں۔ اوہ سوالاں اتے سوال کر کے تھک چکے نیں کہ ایہہ بیماری میرے جسم وچ کس طرح اتری’ میری پچھلی ساری سرگرمیاں نوں نوٹ کیتا گیا۔ میں کتھے کتھے گئی کہڑی کہڑی حد تک ملی آں۔ ایہناں سارے اعدادوشمار تے تفصیلات نوٹ کرن مگروں ڈاکٹرز تے اسیں میاں بیوی پریشان آں کہ کوئی ایسی غفلت عیاشی یا وجہ جہڑی ایس بیماری دا موجب بندی اے میں نہیں کیتی تے فیر ایہہ بیماری میرے جسم وچ کیویں آئی۔ میں اوہدا خط پڑھ کے اوہدے ول ویکھیا اوہ پرسکون چہرے نال میرے ول ویکھ رہی سی۔ میں عجیب ذہنی کشمکش تے اضطراب دا شکار ہو چکیا سی۔ میں بے بسی لاچاری محسوس کر رہیا سی کہ میں اوہنوں کیہ جواب دیواں۔ میری پریشانی ویکھ کے اوہ بولی سر! تسیں دعا کرو اللہ بہت رحیم و کریم اے۔ اوہ میرے اتے ضرور کرم کرے گا۔ اوہدی امید تے زندگی نال بھرپور آواز سن کے میں فوری طور تے بے بسی دے سمندر توں نکل آیا۔ میں تے بھل ای گیا سی اوہ خدا جہڑا ساڈے ساریاں دا مالک اے ۔ ساڈے جئے نافرماناں’ ظالماں’ فرعوناں’ نمروداں تے ناشکریاں نوں مسلسل رزق صحت تے مہلت دتے جا رہیا اے اوہ خدا جہڑا دل و دماغ تے روح دی عمیق ترین گہرائیاں دے اندر ست غلافاں وچ لپٹی خواہشاں تے آوازاں توں وی باخبر اے اوہ خدائے بزرگ وبرتر ایس معصوم تے بے گناہ بچی اتے وی ضرور رحم کرے گا۔ اسیں دنیا تے مادیت پرستی دے لق و دق صحرا وچ ایس طرح گم ہو چکے آں کہ ایہہ بھل چکے آں کہ اوہ تے پتھر دے اندر حرکت کرن والی کیڑیاںتوں وی باخبر اے۔ کائنات وچ ارباں درختاں دے کھرباں خشک پتیاں دے ڈگن توں وی باخبر اے۔ اپنے ویلے دے بہت وڈے بزرگ حضرت حسن بصری نے بلند آواز نال آکھیا: لوکو! اللہ دے بوہے نوں کھٹکھٹاندے رہوو’ بوہا ضرور کھلدا اے۔ کول ای اک بڑھیا نے سنیا تے بولی: اے حسن! کیہ اللہ دا بوہا بند وی ہوندا اے؟ حضرت حسن بصری بڑھیا دی گل سن کے غش کھا گئے تے بولے: اے اللہ! ایہہ بڑھیا تینوں میرے توں ودھ جاندی اے۔ اوہ کڑی تے میرے نال مل کے چلی گئی لیکن اوہدا روشن تے طمانیت نال لبریز چہرہ اج وی میرے حافظے نال چپکیا ہویا اے تے اوہدا فقرہ کہ اللہ دا در ہمیشہ کھلیا رہندا اے اوہ میرے اتے ضرور کرم کرے گا۔