ڈائمنڈ جوبلی، حکومتی جشن تے سماجی ادارے

اسلامی جمہوریہ پاکستان اک نظریاتی ریاست اے جہڑی دو قومی نظریہ تے نظریہ پاکستان دی بنیاد اتے وجود وچ آئی۔ پاکستان دے حصول لئی برصغیر دے مسلماناں نے سالہا سال جدوجہد کیتی تے لکھاں جاناں دی قربانیاں دتیاں۔ مرداں نوں تہ تیغ کیتا گیا۔ زنانیاں دی عزتاں پامال کیتی گئیاں۔ معصوم بچیاں نوں کرپاناں اتے اچھالیا گیا’ نوجواناں تے علما کرام نوں پھانسیاں اتے چڑھایا گیا۔ مسجداں نوں شہید کیتا گیا۔ تعلیمی’ معاشرتی تے اقتصادی طور تے مسلماناں نوں پچھے رکھیا گیا۔ نوجوان کڑیاں نوں اغوا کیتا گیا۔ کہڑا ظلم سی جہڑا برصغیر دے مسلماناں اتے انگریزاں’ ہندوواں تے سکھاں نے روا نہیں رکھیا۔ اک وکھری اسلامی نظریاتی تے فلاحی ریاست دا حصول مسلماناں دا اولین مقصد سی تے اوہدے لئی اوہناں نے ہر طرح دی قربانی دتی۔
قائداعظم محمد علی جناح نے اپنی صحت نوںدائو اتے لا دتا تے اپنی بیماری نوں لکائے رکھیا۔ مادر ملت محترمہ فاطمہ جناح نے اپنی زندگی وقف کر دتی۔ نواباں’ سرمایہ داراں تے بزراگان دین نے اپنے وسائل وقف کر دتے۔ طالبعلماں نے اپنے تعلیمی مستقبل دی پرواہ نہیں کیتی تے مسلم لیگ دا پیغام گھر گھر پہنچایا۔ گھریلو زنانیاں نے جلسے جلوساں وچ رلت کیتی۔ انج سانوں آزادی تے پیارا وطن نصیب ہویا۔
14 اگست 2022 نوں وطن عزیز پاکستان دا 75 واں یوم آزادی سی۔ 75 سال کسے وی قوم دی تریخ وچ بڑی اہمیت رکھدے نیں۔ قوماں ایس اہم سنگ میل نوں عبور کرن لئی خاص تیاری کردیاں نیں لیکن بدقسمتی نال سال دے وسط تک ایس حوالے نال سانوں حکومتی تے سرکاری سطح اتے کوئی تیاری یا سرگرمی نظر نہیں آئی۔
میں اپنے کالماں وچ وی ایس حوالے نال لکھیا مگر ساڈے حکمراناں تے سیاستداناں نوں باہمی محاذ آرائی توں فرصت ملدی تے اوہناں نوں پاکستان دی ڈآئمنڈ جوبلی دا خیال آندا۔ جولائی تک تے سارے حکمران تے سیاستدان بھاتا وچ مصروف رہے۔ قوم نوں کوئی خوشخبری دین دے بجائے بجلی’ گیس تے پٹرول دے بم سٹے جاندے رہے تے 14 اگست نوں پاکستان دے 75 ویں یوم آزادی اتے افراتفری وچ جہڑا جشن
منایا گیا۔ اطلاعات دے مطابق اوہدے اتے مقروض ملک دے کم بیش اک ارب روپے لٹا دتے گئے۔ اوس ویلے جدوں عوام مہنگائی دی چکی وچ پس رہی اے تے حکمران کشکول چکے قرضیاں دی بھیک منگدے پھر رہے نیں۔ مخلوط رقص دی محفلاں سجائی گئیاں۔ ہر سال یوم آزادی اتے طوفان بدتمیزی وچ وادھا ہوندا جا رہیا اے۔ ہر چھوٹے وڈے دے کول واجے سن۔ جہناں دا شور ہر پاسے سی۔ ڈھول واجے’ بھنگڑے’ بغیر سائلنسر دی موٹرسائیکلاں منچلیاں دی بدتمیزیاں غرض ہر اوہ کم کیتا گیا جہڑا اسلام دے نام اتے بنن والی ایس نظریاتی ریاست لئی جاناں تے عزتاں قربان کرن والیاں دی روحاں نوں تڑپاگیا۔علامہ اقبال’ قائداعظم تے تحریک پاکستان دے کارکن عالم ارواح توں ایہہ منظر ویکھ کے سوچ رہے ہون گے کہ اسیں ایس مقصد لئی تے پاکستان نہیں بنایا سی۔
ہونا تے ایہہ چاہیدا سی کہ ایس تریخی 75ویں یوم آزادی نوں منان لئی تن چار سال پہلاں تیاریاں شروع کر دتی جاندیاں’ مختلف اداریاں نوں تحقیقی کم تفویض کیتے جاندے’ کتاباں لکھوائی جاندیاں’ دستاویزی فلماں تیار کروائی جاندیاں’ کوئی خاص لوگو بنوایا جاندا جہڑا سارا سال سرکاری دستاویزات اتے پرنٹ ہوندا’ قومی سطح اتے ملی نغمے لکھن دا مقابلہ کروایا جاندا’ تحریک پاکستان دے حیات کارکناں تے نمایاں خدمات انجام دین والیاں دے انٹرویوز ریکارڈ تے نشر کیتے جاندے۔ تعلیمی اداریاں وچ سارا سال تقریباں’ ملی نغمے تے تقریراں دے مقابلے منعقد کروائے جاندے۔ تعمیر پاکستان پبلی کیشنز اینڈ فورم تے اکادمی ادبیات اطفال لاہور دے کول ملی حوالے تے بچیاں دے ادب بارے ایسے تعمیری منصوبے نیں۔تعلیمی اداریاں وچ سارا سال تقریباں’ ملی نغمے تے تقریراں دے مقابلے منعقد کروائے جاندے۔ تعمیر پاکستان پبلی کیشنز اینڈ فورم تے اکادمی ادبیات اطفال لاہور دے کول ملی حوالے تے بچیاں دے ادب بارے ایسے تعمیری
منصوبے نیں جہناں دے تحت چار پنج کروڑ وچ حب الوطنی دے فروغ تے قیام پاکستان توں ہن تک بچیاں دے سارے ادب نوں محفوظ کیتا جا سکدا اے۔ اک دن دی اخلاق باختہ تقریب اتے اک ارب روپے خرچ کیتے جا سکدے نیں۔ گلی دی اک سڑک کروڑاں وچ بن سکدی اے لیکن ایسے تعمیری منصوبیاں لئی یک مشت پنج کروڑنہ سہی ہر سال اک کروڑ روپے تے حکومت دے سکدی اے لیکن حکمراناں تے ارباب اختیار کول اینا ویلا نہیں کہ اوہ تعمیری منصوبیاں دی تفصیلات جانن لئی اوہناں دے عہدیداراں نوں کجھ ویلا دے دین۔ کنی ادبی تے سماجی تنظیماں نیں جہڑی ادب دے فروغ’ کتاباں دی اشاعت تے معاشرتی فلاح لئی کجھ لکھ دے حکومتی تعاون دی منتظڑ رہندیاں نیں۔ اک ایم پی اے یا ایم این اے خریدن اتے کروڑاں روپے خرچ کر دتے جاندے نیں مگر تعمیری کماں لئی حکومتاں دے کول بجٹ نہیں۔ شرم دامقام اے کہ غیر ملکی سفارتکار ساڈے یوم آزادی اتے اردو وچ پیغام دیندے نیں تے ساڈے حکمران انگریزی وچ خطاب کردے نیں۔ بس ایہناں ای حالات دی مایوسی تے بہتری دی امید دے نال تہانوں پاکستان دا 75واں یوم آزادی مبارک ہووے۔