اسیں صحرا خرید رہے آں

اک سیانے بندے دی گڈی پنڈ دے نیڑے خراب ہو گئی اوہنے سوچیا کہ پنڈ توں کسے دی مدد لینا واں اوہ جیویں ای پنڈ وچ وڑیا تے اوہنے ویکھیا اک بڈھا بندہ منجی تے بیٹھا اے تے اوہدے نیڑے ککڑیاں دانہ چگ رہیاں نیں۔ اوہناں ککڑیاں وچ اک باز دا بچہ وی اے جو ککڑیاں وانگوں دانے چگ رہیا اے اوہ حیران ہویا تے اپنی گڈی نوں بھل کے اوس بڈھے بندے نوں کہن لگا کہ ایہ کیویں خلاف قدرت ممکن ہویا کہ اک باز دا بچہ زمین تے ککڑیاں دے نال دانے چگ رہیا اے تے اوس بڈھے بندے نے کہیا اصل وچ ایہ باز دا بچہ صرف اک دن دا سی جدوں ایہ پہاڑ تے مینوں ڈگیا ہویا ملیا میں ایہنوں چک لیایا ایہ زخمی سی میں ایہنوں مرہم پٹی کرکے ککڑی دے بچیاں دے نال رکھ دتا جدوں ایہنے پہلی واری اکھ کھولی تے ایہنے اپنے آپ نوں ککڑی دے چوچیاں دے درمیان پایا ایہ اپنے آپ نوں ککڑی دا چوچا سمجھن لگ پیا تے دوجے چوچیاں دے نال نال ایہنے وی دانہ چگنا سکھ لیا۔اوس سیانے بندے نے پنڈ والے اگے درخواست کیتی کہ ایہ باز دا بچہ مینوں دے دیو تحفے دے طور تے یاں ایہدی قیمت لے لوو میں ایہدے تے تحقیق کرنا چاہنا واں۔ اوس پنڈ والے نے باز دا بچہ اوس سیانے بندے نوں تحفے دے طور تے دے دتا ایہ اپنی گڈی ٹھیک کرا کے اپنے گھرآ گیا۔ اوہ روزانہ باز دے بچے نوں چھت توں تھلیوں سٹدا پر باز دا بچہ ککڑی وانگوں اپنے پراں نوں گھٹ کے دھون اوہدے وچ لکا لیندا اوہ روزانہ بلاناغہ باز دے بچے نوں اپنے سامنے ٹیبل تے بٹھاندا تے اوہنوں کہندا کہ توں باز دا بچہ ایں ککڑی دا نہیں اپنی پچھان کر ایسے طرح اوہنے کئی دن تک اردو’ پنجابی’ سندھی’ سرائیکی’ پشتو ہر زبان وچ اوس باز دے بچے نوں کہیا کہ توں باز دا بچہ ایں ککڑی دا نہیں’ اپنی پچھان کر اپنے آپ نوں پچھانن دی کوشش کر۔آخر کار اوہ سیانا بندہ اک دن باز دے بچے نوں لے کے اک اچے پہاڑ تے چلا گیا تے اوہنوں کہن لگا کہ اپنے آپ نوں پچھانن دی کوشش کر توں باز دا بچہ ایں تے اوس بندے نے ایہہ کہہ کے باز دے بچے نوں پہاڑ دی اچائی توں تھلے سٹ دتا باز دا بچہ ڈر گیا تے اوہنے ککڑی وانگوں اپنی دھون نوں جھکا کے پراں نوں گھٹ لیا تے اکھاں بند کر لئیاں تھوڑی دیر بعد اوہنے اکھاں کھولیاں تے اوہنے ویکھیا کہ زمین تے اجے بڑی دور اے تے اوہنے اپنے پر پھڑپھڑائے تے اڈن دی کوشش کرن لگا جیویں کوئی تہانوں دریا وچ دھکا دے دیوے تے نہ ترن دے باوجود وی تسیں ہتھ پیر مارو گے۔ تھوڑی ای دیر وچ اوہ اپنے آپ نوں بیلنس کرن لگا کیوں جے باز وچ اڈن دی صلاحیت خدا نے رکھی ہوندی اے۔ تھوڑی ای دیر وچ اوہ اچا اڈن لگا۔ اوہ خوشی نال چیخن لگا تے اُتے توں اُتے جان لگا۔ کجھ ای دیر وچ اوہ اوس سیانے بندے توں وی اُتے نکل گیا تے تھلے نظراں کر کے اوہدا احسان مند ہون لگا تے سیانے بندے نے کہیا اے باز میں تینوں تیری پچھان دتی اے اپنے کولوں کجھ نہیں دتا۔ ایہ کمال صلاحیتاں تیرے اندر موجود سن پر توں بے خبر سی۔
ایہو معاملہ ساڈے لوکاں دے نال اے ساڈی اک خاص پچھان اے۔ اسیں اک خاص امت دے ارکان آں۔ اسیں اک ایٹمی ملک دے شہری آں۔ ساڈے اندر اللہ رب العزت نے بے پناہ صلاحیتاں رکھیاں نیں پر مسئلہ ایہہ وے کہ ساڈے آل دوالے بے شمار ککڑیاں نیں جہناں وچ ساڈے ٹی وی چینل تے اخبارات وی شامل نیں جہڑے مسلسل سانوں دسدے نیں کہ اسیں باز دے نہیں ککڑی دے بچے آں جو مسلسل دسدے نیں کہ تسیں سپرپاور نہیں سپرپاور کوئی ہور اے جو مسلسل دسدے نیں کہ تسیں بہادر تے طاقتور نہیں سگوں بزدل تے کمزور ہو۔ تہاڈی تے قوم ای اجہی اے۔ تسیں دہشت گرد او تسیں لوگ اگے نہیں ودھ سکدے۔ کامیابی دی شرط ایہہ وے کہ اسیں اپنے آپ نوں پچھانن دی کوشش کریئے تاں جے اسیں اک بہترین امت تے بہترین قوم بن کے ایس ملک دی تعمیروترقی وچ اپنا کردار ادا کریئے۔
آزادی دا تعلق جھنڈیاں لان تے جھنڈے لہران نال نہیں آزادی دا تعلق موٹرسائیک بناں سلنسر دے چلان نال نہیں؟ آزادی دا تعلق واجے بنان نال نہیں’ آزادی دا تعلق مضبوط کردار نال اے’ آزادی دا تعلق احساس ذمہ داری نال اے۔ آزادی دا تعلق فرائض نوں بخوبی انجام دین نال اے۔ آزادی دا تعلق ملک دی خیرخواہی تے کرپشن دے خلاف جہاد نال اے۔ آزادی دا تعلق دین تے عمل کرن نال اے۔ آزادی دا تعلق اپنے بزرگاںدی امانت نوں سنبھالن نال اے۔ اوہناں دیاں قربانیاں دی لاج رکھن نال اے۔ خالی جھنڈے لانا تے تقریباں منعقد کرنا صرف اک رسم اے تے ایہ رسم پچھلے پچھتر ورھیاں توں جاری اے۔ ایس کہنہ رسم نوں ختم کرکے ملک و قوم دی بہتری تے ترقی ول سوچنا ای حقیقی آزادی اے۔ ایہو جذبہ ایمانی وی اے تے رسم شبیری وی اے۔ بقول احمد ندیم قاسمی
خدا کرے میری ارض پاک پر اترے
وہ فصل گل جسے اندیشہ زوال نہ ہو
یہاں جو پھول کھلے وہ کھلا رہے برسوں
یہاں خزاں کو گزرنے کی بھی مجال نہ ہو