پنجاب تے بابافرید گنج شکر

انسائیکلوپیڈیا بریٹانیکا دے 9ویں ایڈیشن دی 20ویں جلد دا سال اشاعت 1898 اے۔ ایہدے صفحے 106توں 112تک پنجاب دے متعلق اک دلچسپ مضمون درج اے۔ ایہدے مطابق پنجاب برٹش انڈیا دا انتہائی شمالی صوبہ اے۔ ایہہ اک تکون وانگوں اے جہدے دو اضلاع دریائے ستلج تے دریائے سندھ نیں جد کہ تیجا ضلع اوہناں دریاواں دے وچ دی پہاڑیاں نیں۔ پنجاب دا نام پنج دریاواں اتے محیط علاقہ نوں دتا گیا۔ایہدے وہ ہر دو آبے دا مخصوص نام اے۔ ستلج تے بیاس دے درمیانی علاقہ دا نام جالندھر دو آب اے جہدے وچ ضلع جالندھر تے ہوشیار پور شامل نیں۔ راوی تے بیاس ستلج وچ لمی پتی وچ گورداسپور ‘ امرتسر’ لاہور’ منٹگمری تے ملتان دے اضلاع نیں۔ ایہدانام باری دوآب اے۔ راوی تے چناب وچ علاقہ نوں رچنا دوآب آکھدے نیں جہدے وچ سیالکوٹ تے گوجرانوالہ دے اضلاع تے باری دوآب دا کجھ علاقہ شامل اے۔ چھج دوآب چناب تے جہلم وچ واقع اے جہدے وچ گجرات ‘ شاہ پور دے اضلاع تے جھنگ دا کجھ حصہ شامل اے۔ سندھ ساگر وہ وڈا دوآب اے جہڑا جہلم تے سندھ دے درمیان واقع اے جہدے وچ راولپنڈی’ جہلم’ مظفر گڑھ دے اضلاع آندے نیں۔ ایہدے وچ شاہ پور’ بنوں تے ڈیرہ اسماعیل خان دے مخصوص علاقے وی شامل نیں۔ دوآباں دے خشک علاقیاں نوں بار آکھدے سن۔ مظفرگڑھ تے ملتان دے وسیع ریتلے علاقے تھل کہلاندے نیں جد کہ باری دوآب دا درمیانی علاقہ (ضلع امرتسر) نوں مانجھا عام زبان وچ ماجھا بولیا جاندا اے۔آکھدے نیں جہڑا کہ سکھ قوم دا مرکزی مذہبی مقام اے جتھے امرتسر تے ترن تارن وچ دو مقدس تالاب وی نیں۔ پنجاب دی تکون دریائے ستلج تے سندھ وچ تقریباً 62 ہزار مربع میل اتے پھیلی ہوئی اے لیکن ایہہ صوبہ اک لکھ 42 ہزار 449مربع میل اے۔ 1881 دی مردم شماری دے مطابق مسلماناں دی تعداد اک کروڑ سولہ لکھ باسٹھ ہزار 434 تے ہندو آبادی 92لکھ 52 ہزار 295جد کہ سکھاں دی تعداد 7 لکھ 16 ہزار 114سی۔ جین مذہب دے پیروکاری 42ہزار 678 جد کہ مسیحی 33ہزار 699 آباد سن۔ بدھ مت دے پیروکاری دی تعداد 3 ہزار 251 تے 465 پارس رہندے سن۔ ایس طرح پنجاب دی کل آبادی 2کروڑ 27لکھ 12ہزار 120سی۔ ایہناں اعدادوشمارتوں اندازہ لائو کہ 1881 وچ پنجاب وچ ہندوآبادی مسلم آبادی توں 24لکھ گھٹ سی تے جے ہندو آبادی وچ سکھ وی شامل کر لیتے جان تے فیر وی مسلم آبادی بوہتی سی۔
ایہناں اعدادوشمار دا تریخی سطح اتے تجزیہ کرئیے تے ایہہ حقیقت منکشف ہووے گی کہ برطانوی راج توں چھ صدیاں پہلاں دلی جئے تخت شہر نوں چھڈ کے بابا فرید نے پنجاب ول ہجرت کیوں کیتی۔ دراصل اوہناں نے پاکپتن نوں اپنی تعلیمات دا مرکز بنا کے اطراف تے جوانب دے وسیع علاقیاں نوں ایس حد تک متاثر کیتا کہ جھنگ توں لے کے بیکانیر دی ریاست تک کئی قبیلے دائرۂ اسلام وچ داخل ہوئے۔ ایس تبدیلی دا نتیجہ ایہہ نکلیا کہ بالآخر پنجاب نہ صرف مسلم اکثریتی صوبہ بنیا بلکہ بابا فرید تریخی اعتبار نال تحریک پاکستان دے پہلے معمار تے مجاہد بن کے ابھردے وکھائی دیندے نیں۔ پنجاب ای حصول پاکستان لئی زینہ بنیا۔ ایہہ منفرد اعزاز پاکپتن ای نوں حاصل اے۔تحریک پاکستان دے آخری مرحلہ وچ پاک پتن ای دے وکیل ‘ راقم الحروف دے والد سید محمد شاہ ایڈووکیٹ دی خدمات تریخ دا حصہ نیں۔
پنجاب دے درخشندہ ماضی دا احوال ہڑپہ تہذیب دے علاوہ پوٹھوہار دی روحانی تریخ دے مطالعے توں وی کیتا جا سکدا اے جتھے اہل ہند دا اک نہایت مقدس مقام کٹاس وچ واقع اے۔ ایس دے علاوہ ایسے خطہ وچ نندنا نامی اوہ پہاڑی وی اے جتھے قیام کردے ہوئے البیرونی نے علمی دنیا وچ پہلی واری زمین دے قطر دی پیمائش دا اعزاز حاصل کیتا سی۔ بابا نانک دے حوالے نال پنجہ صاحب وی یاتریاں دی سجدہ گاہ اے۔ دوجے پاسے بدھ مت دے عروج و زوال دی تریخی داستان مانکیالہ وچ دفن اے۔ مسلماناں دے عالی قدر صوفی امام بری لطیف تے گولڑہ شریف والے سید مہر علی شاہ دے علاوہ بابا فضل کمالی ایسے زمین دی زینت نیں۔ ایہہ مقام اج وی مریداں دے شوق دا مرکز نیں۔ بادشاہواں تے امیراں دے قلعے تے تریخی مقام وی زائرین نوں متوجہ کردے نیں۔ ایہہ تریخی حقیقت اے کہ پنجاب کدی وی بھارت دا جزو نہیں سی۔ نسلی’ لسانی’ جغرافیائی تے تہذیبی لحاظ نال پنجاب وکھری اکائی سی۔ اکبر تے برطانوی ادوار وچ انتظامی سطح اتے حاکماں نے اپنی سلطنت وچ شامل ضرور کیتا لیکن اوہدی اپنی شناخت بعض دوجے خطیاں وانگوں محفوظ قائم رہی۔ ہڑپے دے تمدن تے دراوڑی تہذیب دے متعلق ماہرین دسدے نیں کہ 3250ق م توں 1500 ق م تک ایہہ تمدن زندہ و جاوید سن۔ ایس تمدن دا تعلق عراقی تمدن نال معروف سی۔ پنجاب دے مصر تے ترکستان نال تجارتی رابطے دا سراغ وی ملدا اے۔
ہڑپہ تمدن بالکل مقامی سی تے اوہدا ارتقا ایس دھرتی دا مرہون منت اے۔ موہنجوداڑو تمدن وی ایہدے شانہ بشانہ ترقی پذیر رہیا۔ آریائی تہذیب دے متعلق آکھنا کہ علم و عرفان تے اخلاقی اقدارا اوہناں دای دا حصہ اے’ درست نہیں۔ جدوں 1922وچ ہڑپہ تہذیب دا سراغ مل گیا تے آریائی تہذیب دی برتری دا تصور ختم ہو گیا۔
علی عباس دے مطابق پنجاب وچ زرعی انقلاب مگروں پنجابی سماج دی بنیاد مادری اصول اتے قائم ہوئی۔ ایس ضابطے دے مطابق عورت نوں مرد اتے برتری حاصل سی۔ دھرتی انسانی زندگی دی کفیل سی لہٰذا ایہنوں ماں دا درجہ نصیب ہویا۔ پوجا پاٹ وچ دیویاں دی بوہتی اہمیت سی۔ ایہو وجہ اے کہ اج وی دھرتی نوں ماں دا درجہ دتا جاندا اے۔ ایس تصور نوں ہندو تے تہذیب نے دل وجان نال قبول کر لیتا سی۔ پنجاب نوں ایہہ اعزاز وی حاصل اے کہ دنیا دی پہلی یونیورسٹی اوہدے خطے ٹیکسلا وچ قائم ہوئی۔ ایہہ علاقہ پنجاب دا تعلیمی تے تہذیبی مرکز بنیا۔ ایس جامع دے استاد باہروں نہ آئے۔ پنجابی معلمین دی محنت شاقہ دا ایس گل توں اندازہ لایا جا سکدا اے کہ اپندیش دے فلسفی ادالیک نے لکھیا کہ جہڑے شخص نے ٹیکسلا دے تعلیمی مرکز توں علم حاصل نہیں کیتا اوہدی اکھاں اتے پٹی بنھی ہوئی اے۔
بابا فریدالدین شکر گنج نے پاکپتن دی سرزمین وچ روحانی جمہوریت دا پودالایا۔ ایہہ اٹھ سو سال پہلاں دی گل اے۔ پنجاب توں اٹھن والی ایہہ تحریک Humanismول پہلا محسوس قدم سی۔ ایہہ تحریک انسان دی آزادی تے ظلم و جبر توں نجات دی لہر سی۔ اوہناں دے منشور دے بنیادی نکات وچ توحید’ تکریم آدم’ مساوات’ تکثیریت (Pluralism) تے شخصی آزادیاں سن۔ باباجی دے ذہن وچ انسان دا فیروز بخت مستقبل متوازن معاشرہ ای دا ثمرہ ہو سکدا سی۔ مساوات تے اخوت دا سبق اوہناں نے اپنے دادا پیر خواجہ سید معین الدین چشتی کولوں حاصل کیتا۔ ایہہ سبق قرآنی تعلیمات دا عملی اظہار سی لیکن مساوات تے اخوت غلام تے آقا وچ تے نہیں ہو سکدی۔ ایہہ سماجی رشتہ برابری دی بنیاد اتے ای ممکن اے۔ ملوکیت’ جاگیرداری تے غلامی دے دور وچ بابا صاحب حجام نوں نائی دے مروجہ نام توں پکارن دے بجائے مزین یعنی (زینت دین والا) آکھ کے مخاطب ہوندے۔ باباجی ایہہ تعلیم دے رہے سن کہ نہ صرف ساری مخلوق دا خالق وحدہ لاشریک اے بلکہ سارے انسان اکو طرحاں دے نیں۔ اوہناں دی پیدائش’ زندگی تے موت دا اک ای قاعدہ قنون اے۔
لہٰذا دولت تے طاقت ای کامیابی یا بزرگی دا معیار قرار نہیں اے۔ حقیقت ایہہ اے کہ محنت کش تے مزدور طبقہ ای کافی حد تک انسانی زندگی نوں فعال تے متحرک بنان والا ہوندا اے لیکن پیداواری واحدہ کہلان دی بجائے اوہ کمی کمین کہلاندا رہیا۔ انگریز دے دور وچ کاغذات مال وچ محنت کش طبقہ لئی لفظ معین یعنی مددگار لکھیا جاندا سی لیکن دیہی معاشرہ وچ موجود جاگیردار طبقہ نے مددگار کارکن نوں معین آکھنا برداشت نہیں کیتاکیوں جے ایس لفظ وچ تکریم آدم دی بو آندی سی۔ ایس طقبہ نے اوہناں محنت کشاں نوں ترکھان ‘ لوہار’ حجام’ کمہار’ تیلی’ میراثی جئے پیشیاں وچ تقسیم کر کے ہندو معاشرہ وچ راسخ ذات پات دا مسئلہ زندہ رکھدے ہوئے اوہناں نوں کمی کمین ای تصور کیتا جہڑے چودھری دے نال نہ چارپائی اتے بیٹھن اتے قادر تے نہ ای حکم عدولی دا اختیار اوہناں دے کول سی۔ لفظ کمی دا مطلب تھلڑی سطح دا انسان جہدا مقدر زمیندار دی خدمت تے چاکری دی سوا کجھ نہیں سی۔ ایہہ رویہ ہندو دھرم دے مطابق انساناں نوں طبقاتی تقسیم کرن دی وجہ ای توں رائج ہویا۔
اوہناں دے علاوہ سیاہ فام دراوڑی نسل دے افراد ایہدے توں وی فروتر سن۔ پنڈ وچ اوہناں نوں کھوجے’ مسلی’ دیندار تے چمار وغیرہ دے ناں نال یاد کیتا جاندا تے شہراں وچ ایہہ مخلوق چوڑھا کہلاندی سی۔ اوہناں دے ذمہ انسانی تے حیوانی غلاظت نوں اکٹھا کرنا تے مردہ جانوراں تے ہر قسم دی غلاظت نوں سنبھالنا ہوندا۔ مسلماناں وچ اوہناں دی حیثیت اوہو سی جہڑی ہندوواں وچ اچھوت دی۔ اگرچہ اوہناں دی جوان بہو دھیاں مراعات یافتہ نوجواناں دی ہوس دا نشانہ بندیاں رہیاں۔ ایہہ مخلوق ایس دھرتی دے قدیمی باشندے سن جہڑے مرور زمانہ مفتوح قوم بنا دتی گئی۔ ساڈا مولوی تے واعظ مسجداں تے آباد کردا سی تے مسلمان بچیاں نوں قرآن پاک پڑھاندا سی لیکن اوہ قرآن وچ درج تکریم آدم دے تصور توں خود ناآشنا سی۔ اوہنوں کدی احساس وی نہ ہویا کہ ایس راندہ درگاہ مخلوق نوں اسلام دی نعمت توں سرفراز کیتا جانا چاہیدا اے کیوں جے قرآن پاک تے حدیثاں دا مقامی زباناں وچ ترجمہ نہ جانے کیوں ممنوع قرار دتا گیا سی۔
انگریز نے برصغیر وچ پیر رکھدے ای ایس پچھڑے ہوئے طبقے دی تعداد دا اندازہ لایا۔ مسیحی حکمراناں نے مشینریاں نوں تیار کیتا جہدے نتیجہ وچ ایہہ خاک افتادگان مسیحی مذہب وچ جوق در جوق شامل ہونا شروع ہو گئے۔ مذہب دی تبدیلی نال اوہناں نوں انساناں دی صف وچ شامل ہون دا احساس ہویا۔ اوہ چٹی چمڑی والے حاکم دے ہم مذہب بن گئے تے ایس طرح اوہناں دی صدیاں پرانی ذلت دا ازالہ ہونا شروع ہویا لیکن مذہب دی تبدیلی دے باوجود ہندو تے مسلماناں دی اکثریت اوہناں نوں حسائی تے چوڑھے دے نام نال پکار کے اپنی انا نوں تسکین دیندی رہی۔ چوڑھا’ حسائی’ چمار’ اچھوت وغیرہ سب پلیدقرار پائے۔ اوہناں دے جسم نال مس ہون توں ہندو بھرشٹ ہو جاندے۔ ہندوواں دی متبرک کتاباں دے بول سنن دی سزا کناں وچ پگھلیا ہویا سیسہ انڈیلنا سی۔ تحریک آزادی دے نال نال سوچ وچ تبدیلی آنا شروع ہوئی لیکن حقارت تے کراہت نسل بعد نسل منتقل ہوندی رہی۔ ایس تریخی تعصب تے معاشرتی امتیاز نے اوہناں محرومین دی غالب اکثریت دی نفسیات اتے منفی اثرات مرتب کیتے۔ اج وی ہندو بڑا متعصب اے اگرچہ اسیں مسلمان وی ایس منفی سوچ تے عمل توں بری الذمہ نہیں۔
پنجاب دی تہذیب و تمدن دے نال جہڑا سلوک اج پنجاب دے نویں رئیس زادے کر رہے نیں اوہ اک وکھرا المیہ اے۔ تسیں ایس سوال اتے غور کرو کہ پنجاب دی مختلف حکومتاں تے قنون ساز اسمبلیاں وچ پنجابی زبان دا داخلہ کیوں ممنوع اے۔ باقی سارے صوبیاں وچ صوبائی زبان وچ انگریزی تے اردو وچ گل کرن دی اجازت اے۔ آئین دے مطابق علاقائی زباناں دا تحفظ ہونا اے۔ میں کئی پلیٹ فارم توں مختلف سیاسی عسکری حکومتاں نوں ایس غفلت دا احساس دوایا اے لیکن اجے تک کوئی نتیجہ برآمد نہیں ہویا۔
ایہہ رویہ پنجاب دے خلاف سازش اے۔ فارسی دا ادبی ثقافتی ورثہ اسیں مدتاں پہلاں فراموش کر دتا تے پاکستان بنن مگروں پنجابی زبان دا قیمتی فکری ورثہ وی ساڈی نوجوان نسل دی پہنچ توں باہر ہو چکیا اے۔ پنجابی زبان علم و عرفان دے خزانیاں دی رکھوالی اے۔ بابا فرید تے بابا نانک جئی عظیم شخصیتاں نے صدیاں پہلاں ایس زبان دے ذریعے معاشرتی تبدیلی دی بنیاد رکھی۔ پنجابی زبان توں خوف دی اک وجہ ایہہ اے کہ ایہہ خطہ دی اوہ واحد زبان اے جہڑی ایشیا وچ پہلی واری اٹھ صدیاں پہلاں ظلم و استدبال تے استحصال تے مکروہ سیاسی معاشی نظام دے خلاف مزاحمت دا تصور لے کے ابھری سی۔ بابا بلھے شاہ’ سید وارث شاہ’ شاہ حسین تے سلطان باہو جئی عظیم شخصیتاں ایسے پنجاب وچ پیدا ہوئیاں جہناں نوں تکریم آدم دے تصور نوں ادبی سطح اتے اجاگر کرن وچ بھرواں کردار ادا کیتا۔ گل بابا فرید دی روحانی جمہوریت توں شروع ہوئی سی۔ باباجی دی تعلیمات نے گرو گرنتھ صاحب وچ محفوظ ہو کے پنجاب وچ روحانی ادب دی اولین قابل قدر صورت اختیار کیتی۔ ایس دور وچ ادب ای اوہ میدان سی جہدے ذریعے اسیں عصر نظام اتے تبصرہ ممکن سی کیوں جے معروف سیاسی ذمہ داری جمہوری نظام دی عدم موجودگی وچ قصے کہانیاں’ اکھان ‘ پتلی تماشیاں تے منظوم ادب ای وچ اشارے کنائے نال ہم عصر سیاسی رجحانات تے زندگی دے نشیب و فراز اتے موثر انداز وچ گل ہو سکدی سی۔ معاشرہ وچ جلسے’ جلوس تے تقریراں دا تصور ای نہیں سی۔ عوام دی تربیت دا واحد موثر ذریعہ خانقاہ سی جتھے اخوت تے مساوات دا نظام سی۔ ایس پس منظر وچ باباجی دے نظریاتی دوہڑے تربیت دا ذریعہ تے بیداری دا پیغام بن گئے۔ باباجی نے دو دو مصرعیاں اتے مشتمل شلوک مرتب کیتے۔ ایہناں شعراں وچ حکمت تے دانائی دے علاوہ عمل و عرفان دی ترغیب سی۔ باباجی نے مروجہ فارسی’ عربی زبان دے بجائے پنجابی زبان وچ ادب پیدا کیتا تاں جے عام انسان دا شعور بیدار ہووے۔ اوہناں دے پیغام دا مخاطب عام انسان سی اگرچہ اپنے شعراں وچ اہل ثروت نوں مخاطب کر کے اوہناں نوں وی زندگی دی تلخ حقیقتاں اتے غوروفکر دی دعوت ملدی اے۔ بابا فرید چنگی طرح جاندے سن کہ صدیاں توں ابلاغ دا یقینی ذریعہ زبان دی ای صورت وچ ممکن سی۔ اوہناں نوں اپنا انقلابی پیغام لوکاں تک پہنچانا سی لیکن کہڑی زبان اوہناں دے انسان دوست پیغام دی امین بنے گی؟ فارسی یا عربی۔ فارسی درباری زبان سی جد کہ عربی زبان اتے ملا دا قبضہ سی۔ ملا نے قرآن وسنت اتے پہرے بٹھائے ہوئے سن۔ اسلامی تعلیمات دا مقامی زباناں وچ ترجمہ کرن دی اجازت نہیں سی۔ ملا اپنی علمی حدود وچ عام انساناں نوں شامل کرن توں انکاری سی۔ باباجی دی پیدائش پنجاب دی سی تے اپنے مرشد دے وصال مگروں اوہ پہلے پنجابی صوفی سن جہناں نوں چشتی روحانی سلسلہ دی صدر نشیبی دا اعزاز ملیا سی۔ اوہناں دے مرشد دا مقام دلی سی جہڑا تخت شہر سی لیکن بوجوہ باباجی نے پنجاب دے وسط وچ ہجرت کرن دا فیصلہ کیتا جتھے عام انسان پنجابی زبان دے سہارے اپنے شب و روز گزار رہیا سی۔
زبان تے معاشرہ وچ قدیمی ربط اے۔ دونویں اک دوجے اتے اثرانداز ہوندے رہندے نیں۔ زبان تے معاشرہ دا چولی دامن دا ساتھ اے۔ اوہناں وچ مضبوط باہمی ربط اے۔ زبان بیشک ابلاغ تے اظہار دا مضبوط ذریعہ اے تے زبان دی ایہہ منفرد خوبی اے کہ معاشی’ اخلاقی’ قنونی’ سیاسی’ روحانی’ مذہبی’ سماجی سطح اتے زندگی دے مختلف النوع شعبیاں وچ عوامی شعور نوں بیدار کردی اے۔ زبان جدوں مکالمے دا رخ اختیار کردی اے تے امن دی نقیب بندی اے تے جدوں تجزیہ تے تنقید دا لبادہ اوڑھدی اے تے انساناں دی خفتہ صلاحیتاں نوں تحریک دیندی اے تے جدوں بے باک ہوندی اے تے تلوار دی دھار بن کے وڈ دیندی اے۔
ایس پس منظر وچ ای ایہہ حکمت سمجھ آندی اے کہ باباجی نے اپنے پیغام نوں لوکاں تک پہنچان لئی اوہناں ای دی زبان نوں کیوں استعمال کیتا۔ ایسے روایت دا بھرواں اظہار مگروں بابا نانک’ بلھے شاہ’ وارث شاہ’ شاہ حسین’ سلطان باہو’ میاں محمد بخش تے خواجہ غلام فرید جئے درویشاں دی تعلیمات وچ نظر آندا اے۔
اک پاسے ایہہ کیفیت کہ حکومت تے معاشرے وچ صدیاں دی خلیج حائل اے تے دوجے پاسے ایہہ شعور کہ زبان تے ثقافت اک دوجے توں وکھ نہیں ہو سکدے۔ جے زبان دے پچھے مضبوط نظریہ تے زبان دا وسیلہ اختیار کرن والا شفاف کردار دا حامل ہووے تے معاشرہ متاثر ہوئے بغیر نہیں رہ سکدا۔
باباجی دی شعوری کوشش دا ایہہ نتیجہ نکلیا کہ د رباری سرپرستی توں محروم پنجابی زبان اعلیٰ اقدار دی حامل زبان بن گئی۔ اوہدے دامن وچ تصوف دی باریکیاں بعثت انبیا دے مقاصد دا بیان’ متوازن معاشرہ دے قیام دی لوڑ’ ایس دھرتی اتے انسان دی اہمیت’ تریخ دا جبر’ امن دا قیام’ تکریم آدم’ حقوق بشری تے احتساب جئے مضمون سمو گئے۔
آخری گل: اک اوہ مادی دنیا اے جہنوں روشن کرن لئی قدرت ہر دن سورج نوں طلوع کردی اے تاں جے تھکیا ہاریا انسان آرام کر کے چوکس تے بیدار ہو سکے۔ اک اوہ دنیا اے جہڑی نظراں توں تے اوجھل اے لیکن مادی دنیا توں سراسر مختلف اے۔ اوہدے مطالبے تے تقاضے وی مختلف نیں۔ ایس نہ نظر آن والی دنیا نوں روشن کرن لئی کجھ روشن ضمیر اللہ دے بندے ہر عہد وچ پیدا ہوندے رہندے نیں جہڑے اپنے کردارپاروں تبدیلی دا استعارہ بن جاندے نیں ۔