بیوروکریسی وچ گروپنگ

ملک وچ جتھے سیاسی افراتفری عروج اتے اے بیورو کریسی وی شدید اضطراب دا شکار اے۔ اوہ سوچدے نیں وفاق وچ پرائس پوسٹنگز لین تے صوبہ ناراض ہو جاوے گا۔ ہن جان تے جان کتھے؟ ویسے تے بیورو کریسی گروپاں دی صورت وچ من پسند سیٹاں حاصل کردی اے تے اک دوجے دے گروپ نوں نیواں وکھان لئی سارے حربے بروئے کار لیائے جاندے نیں۔
پنجاب وچ ایس ویلے دلچسپ صورتحال پیدا ہوگئی جدوں وزیراعلیٰ پنجاب چودھری پرویزالٰہی نے گریڈ22 دے سینئر ترین افسر تے اپنے پراعتماد ساتھی محمد خان بھٹی نوں پرنسپل سیکرٹری ٹو سی ایم تعینات کردتا۔ پنجاب دی بیوروکریسی وچ موجود سارے گروپس نے اپنی اپنی مخالفت چھڈ کے محمد خان بھٹی دے خلاف لابنگ شروع کر رکھی اے۔ اوہناں دا خیال اے بھاویں محمد خان بھٹی گریڈ22وچ ہون مگر اوہناں دا تعلق پاکستان ایڈمنسٹریٹو گروپ نال نہیں ایس لئی سیکرٹری ٹو سی ایم اوہناں نوں ہرگز نہیں ہونا چاہیدا۔ محمد خان بھٹی نوں وزیراعلیٰ پنجاب چودھری پرویزالٰہی دا اعتماد حاصل اے۔ ہو سکدا اے کہ اوہ بیورو کریسی دی مذموم سازش دی بھینٹ نہ چڑھ سکن مگر جہڑے بیوروکریٹ کسے گروپ دا حصہ نہیں اوہنوں وی چنگی پوسٹنگ اتے مختلف گروپ برداشت نہیں کردے تے جے اوہناں دا سیاسی بیک گرائونڈ نہ ہووے تے فیر اوہناں دا اللہ ای حافظ ہوندا اے۔
ایسے طرح مختلف گروپس پاکستان ایڈمنسٹریٹو سروس نال تعلق رکھن والے افسران نوں کس کس طرح ذاتی عناد دا نشانہ بناندے نیں اوہدی میں کجھ مثالاں لکھاں گا۔ شان الحق نے 21سال دی عمر وچ ملک وچ اعلیٰ ترین مقابلے دا امتحان پاس کیتا تے اوس ویلے دی ڈی ایم جی تے اج دی پیس گروپ نوں جائن کر لیا۔
شان الحق ملکی خدمت دے جذبے نال سرشار سن تے دل ای دل وچ ارماناں دا پودا پروان چڑھدا رہیا سی کہ آن والے ویلے وچ اوہ اک وڈا افسر بن کے نہ صرف ملک بلکہ عوامی خدمت نوں وی اپنے اولین فرائض دا حصہ بناوے گا۔شان الحق اک ذہین تے عمدہ طالبعلم ہون دے نال نال خلق خدا نال محبت دا سرچشمہ وی سی۔ ویلا تیزی نال لنگھن لگیا۔
شان الحق نوں کدی بلوچستان یاترا کرائی گئی جتھے اوہنوں اپنا گھر بار جہڑا راولپنڈی وچ واقع سی’ چھڈ کے جانا پیا مگر بلوچستان جا کے اوہنے اپنے دل ودماغ نوں ایہدے لئی تیار کیتا کہ بلوچستان ظاہری ترقی خوشحالی وچ پنجاب توں بہت پچھے اے۔ ایتھے اپنا مشن ملک و قوم دی خدمت والا سلوگن بوہتا پایا تے اوہ اپنی نوکری نوں عبادت جان کے انجام دین لگیا مگر اوتھے وی شان الحق دی نوکری دے ایس سٹائل نوں بالکل پسند نہ کیتا گیاتے ویکھدے ای ویکھدے ایہدے مدمقابل افسراں وچ اوہدی
مخالفت ودھن لگی تے نوبت ایتھوں تک آن پہنچی کہ اوہ سارا دن شان الحق دے سامنے بیٹھ کے اوہدے اقدامات دی تعریفاں دے پل بنھدے تے شام نوں صاحب بہادر دے دربار تے حاضری دیندے ہوئے شان الحق دی ایسی کردار کشی کردے جہدے بارے کوئی عام انسان سوچ وی نہیں سکدا ہووے۔ صاحب بہادر دی برین واشنگ دا نتیجہ ایہہ نکلیا کہ شان الحق نوں خیبر پختوانخوا دا پروانہ پھڑا دتا گیا جہنوں لے کے اوہ خیبر پختوانخوا آن پہنچیا تے اپنی نوکری دا سٹائل درویشاں والا ای رکھیا تے نوکری کرن لگیا۔ آخرکار شان الحق نوں بیورو کریسی دی نوکری لئی جنت سمجھن جان والا صوبہ پنجاب دا حکم نامہ وی موصول ہویا۔ ہن شان الحق نوں پنجاب وچ بزدار حکومت نے سپیشل سیکرٹری سکولز تعینات کر دتا جتھے اوہ دل لا کے کم کرن لگیا۔
پچھلے چیف سیکرٹری تے سینئر مینجمنٹ نے شان الحق دے کم نوں سراہیا تے اوہدی کارکردگی دے بل بوتے اتے اوہنوں کمشنرملتان تعینات کر دتا۔ ہن شان الحق اوہ 21سالہ نوجوان نہیں رہیا سی۔ ہن اوہ زمانے دے رنگ تے سنگیاں دی سازشاں تے منافقت توں چنگی طرح واقف سی۔ خوش اسلوبی نال نوکری کرن لگیا۔ اچانک بزدار حکومت نے اپنے انتہائی قریبی افسر زاہد اختر زمان نوں ڈی جی خان دی پروجیکشن تے جنوبی پنجاب دے سپیشل ٹاسک دے کے ایڈیشنل
چیف سیکرٹری جنوبی پنجاب تعینات کردتا ۔ زاہد اختر زمان نے بظاہر تے کمشنر ملتان شان الحق نال انتہائی شفیق رویہ رکھیا تے حسب سابق اوہدے کیتے گئے اقدامات دی تریفاں دے پل وی بنھدے رہے مگر بزدار حکومت تے خاص طور تے اوس ویلے دے وزیراعلیٰ سردار عثمان بزدار نوں روزانہ دی بنیاد اتے بذریعہ واٹس ایپ مطلع کرنا شروع کر دتا کہ کمشنر ملتان دی نہ صرف کارکردگی ناقص اے بلکہ اوہ جنوبی پنجاب تے اوہدی عوام دے مخالف کم انجام دے رہے نیں۔ آخرکار اک واری فیر ظالم بیوروکریسی دا لقمہ اجل بن گیا تے اوہناں نوں او ایس ڈی بنا دتا گیا۔ پچھلے ڈیڑھ سال توں اوہ او ایس ڈی سن۔ کجھ دن پہلاں اوہناں نوں کسی غیر معروف سی پوسٹنگ اتے بھجوا دتا گیا اے۔ ہن موصوف نوں پتہ چلیا کہ اوہناں دے اے سی ایس جنوبی پنجاب زاہد اختر زمان ای اوہناں دی بیڑیاں وچ پتھر پان والے سن۔
اسیں سمجھنے ساں کہ بیورو کریسی آپس وچ متحد ہوندی اے تے کسے اک افسر دے مفاد لئی سارے افسر متحد ہو جاندے نیں۔ کجھ دن پہلاں الیکٹرانک میڈیا پرنٹ میڈیا اتے اک سینئر بیورو کریٹ دا نام منظر عام اتے آیا کہ ڈاکٹر کامران افضل دی جگہ بابر حیات تارڑ نوں نواں چیف سیکرٹری پنجاب تعینات کیتا جا رہیا اے۔ پنجاب نے وفا ق نوں اوہناں دا نام پینل وچ ٹاپ اتے بھجوا دتا اے۔ ایسے دوران سوشل میڈیا اتے اک کمپین لانچ کردتی گئی جہنوں مختلف واٹس ایپ گروپاں وچ وی شیئر کیتا گیا۔ مینوں بابر تارڑ دی کردار کشی دی مہم ویکھ کے انتہائی افسوس وی ہویا تے اندازہ وی ہویا کہ بابر حیات تارڑ وی شان الحق دی جدید طرز اے جہڑے عوامی تے ملکی خدمات دے پیش نظر اپنا پروفائل بنانا چاہندے نیں نہ کہ سازشاں تے مدمقابل افسراں دی کردارکشی کر کے اپنا مقام بنانا چاہندے نیں۔ دوجی گل ایہہ وی سمجھ آئی کہ بابر تارڑ دا وی شان الحق وانگوں کوئی گروپ نہیں اے۔ میں بابر حیات تارڑ نوں بوہتا قریب توں نہیں مگر خاصا جاننا واں بابر حیات حقیقت وچ مٹیا ہویا انسان اے تے خلق خدا دی خدمت اتے یقین رکھدا اے۔ مینوں حیرت اے کہ جدوں کوئی افسر میرٹ یا اپنی کارکردگی اتے چنگی پوسٹاں اتے لگن لئی نامزد ہوندا اے تے ایہدی کردار کشی صرف ایس لئی کیتی جاندی اے کہ ایہدا کوئی گروپ نہیں ہوندا تے نہ ای اوہ سیاستداناں دا آلہ کار ہوندا اے۔