پڑھن دی مہارت وچ کیویں وادھا کر سکنے آں

بخارا دے سلطان بن منصور اک پراسرار بیماری وچ مبتلا سن۔ بہت سارے تجربہ کار طبیب اوہناں دا علاج کر چکے مگر افاقہ نہیں ہویا۔ اخیر اک اٹھارہ سال دے نوجوان نے اوہناں دا علاج کیتا تے اوہ تندرست ہو گئے۔ اوہناں نے اوس نوجوان نوں پچھیا: تہانوں انعام وچ کیہ چاہیدا اے؟ نوجوان نے جواب دتا: مینوں تہاڈے کتب خانے تک مکمل تے ہر ویلے رسائی چاہیدی اے۔ نوح بن منصور ایہہ سن کے حیرت زدہ رہ گیا۔ بہرحال اوہنے اوس نوجوان نوں اپنے شاہی کتب خانے تک رسائی دتی جتھے ہزاراں کتاباں موجود سن۔ سلطان نوح بن منصور نوں حیرت ہوئی کہ اک سال دے عرصے وچ اوہ نوجوان نہ صرف اوس کتب خانے دی بیشتر کتاباں پڑھ چکیا سی بلکہ اوہناں کتاباں دے نال اوہناں دے لکھے ہوئے افادات تے نوٹس وی موجود سن۔ اوس نوجوان دے کول پڑھن دی حیرت کن مہارت موجود سی مگر اوہدے نال کتاباں دے بنیادی خیالات نوں سمجھنا تے اوہناں دے بارے اہم نوٹس تیار کرنا وی اوہدی حیرت انگیز قابلیت سی۔ ایہو نوجوان اگے چل کے سائنس تے طب وچ مسلم تریخ دا سب توں وڈا نام ثابت ہویاجہنوں دنیا بوعلی سینا دے نام توں جاندی اے۔
پڑھن دی مہارت وچ عبارت دے متن نوں سمجھنا بہت اہم اے۔ کتاب نوں پڑھن دے دوران اپنے کسے استاد یا ساتھی نال اوس کتاب دے موضوع تے تصورات بارے گل بات کردے رہنا بہت فیدے مند اے۔ ایس توں نہ صرف کتاب پڑھن دی رفتار تے مہارت وچ وادھا ہوندا اے بلکہ کتاب سمجھن وچ وی آسانی ہوندی اے۔ استاد یا تہاڈا ساتھی کتاب بارے سوال کردا اے۔ ایہدے وچ موجود اہم واقعات’ اہم تصورات تے اہم نکات بارے پچھدا اے۔ تہاڈے خیالات تے تصورات نوں واضح کرن وچ مدد دیندا اے جہدے توں نہ صرف تسیں کتاب دے موضوع نوں سمجھ لیندے او بلکہ ایس کتاب وچ درج اہم تصورات تے نکات توں وی آگاہ ہو جاندے او۔ بوعلی سینا تے البیرونی اپنے زمانے دی دو عظیم شخصیات سن۔ دونواں وچ ارسطو تے دوجے یونانی فلاسفر دی کتاباں تے فلسفے سنے فلکیات تے ریاضی جئے موضوعات اتے گل بات ہوندی رہندی سی۔ ایس دلچسپ گل بات وچ ایہہ دونویں مختلف کتاباں’ موضوعات’ تصورات تے خیالات کردے سن۔
ایتھے ایہہ سوال پیدا ہوندا اے کہ مطالعہ کرن والا پڑھن دی رفتار وچ وادھے دے نال متن سمجھن دی ا ہلیت وچ کیویں وادھا کر سکدا اے؟
ایس بارے مسلم اکابرین دا طریقہ بہت مفید اے کہ اوہ کتاب سمجھن لئی کتاب دے حواشی تیار کیتا کردے سن۔ اج وی تحقیق کرن والے کتاب بارے اہم نوٹس تیار کردے جاندے نیں جہدے توں نہ صرف اوہناں نوں کتاب نوں سمجھن وچ مدد ملدی اے بلکہ ایہدے حوالہ جات تیار کرن وچ وی مدد ملدی اے۔ ایس سلسلے وچ کتاب نوں سمجھن لئی ہائی لائٹ کرن دا طریقہ مفید رہندا اے۔ پڑھن والا اہم الفاظ تے موضوعات نوں ہائی لائٹ کردا جاندا اے جہدے توں دوجی واری اوہ اہم عبارت نوں پڑھ کے اوہدا مقصد سمجھ جاندا اے۔
اک صاحب علم شخصیت دا قول اے کہ بوہتا پڑھن نال نہ صرف یاد کرن تے سمجھن دی اہلیت وچ وادھا ہوندا اے بلکہ تہاڈا ذہنی معیار وی ودھ جاندا اے۔ ایران دے اک منے پرمنے عالم دین لکھدے نیں کہ مطالعہ کرن والیاں نوں رہنمائی دی بہت لوڑ ہوندی اے۔ تاہم رہنمائی دین والے نوں ویکھنا چاہیدا اے کہ پڑھن والا کتھے رہندا اے تے کیہ کردا اے تے ایسے حساب نال ایہنوں مخصوص کتاباں دے مطالعہ دا آکھیا جاوے۔ اوہناں نے ایہہ تجویز وی پیش کیتی کہ مختلف شہراں وچ کتاباں پڑھن والے مہینے وچ اک واری ملاقات دا پربندھ کر سکدے نیں جتھے اوہ کسے کتاب بارے اپنے خیالات دا اظہار تے کتاب دے تصورات اتے بحث کر سکدے نیں۔دوجے لوکاں نوں کتاب دے مطالعہ وچ شریک کرن دے ہور وی طریقے نیں۔ ہن سوشل میڈیا دا دور اے۔ تسیں فیس بک وچ کتاب اتے تبصرہ لکھ سکدے او۔ ایس دے علاوہ کتاب دے حوالے نال وٹس ایپ گروپ بنایا جا سکدا اے جتھے کتاب بارے گل کیتی جاوے۔ فیس بک دے بانی مارک زکربرگ آکھدے نیں کہ اوہ دو ہفتے وچ اک کتاب دا مطالعہ مکمل کردے نیں۔ اوہ جہڑی کتاب پڑھدے نیں ایہدے بارے اپنے فیس بک دے اکائونٹ اتے اپ ڈیٹ دے دیندے نیں۔ سماجی رابطے دی ویب سائٹ ٹویٹر دے سی او جیک پیٹر ڈور سی اپنی کامیابی دا راز اپنے مطالعہ کرن دی عادت نوں گرداندے نیں۔ اوہ اپنے ٹویٹر اکائونٹ اتے اپنی پسندیدہ کتاباں دے عنوانات تے موضوعات شیئر کردے رہندے نیں۔
ایتھے میں کجھ لوکاں دی اک عادت دا ذکر کرنا چاہواں گا جہدے توں پڑھن دی رفتار وچ نہ صرف کمی آندی اے بلکہ پڑھن والا چھیتی تھکاوٹ محسوس کردا اے۔ ایہہ لوک جدوں کوئی کتاب پڑھدے نیں تے اوہ اپنے دماغ تے اکھاںدے نال بولن دا وی استعمال کردے نیں’ اوہ اوہنوں زیرلب دہراندے نیں۔ ایہہ عادت کتاب نوں سمجھن وچ تے شاید مدد دیندی اے مگر کتاب نوں پڑھن دی مہارت لئی نقصان دی اے۔ بولن دی رفتار’ دماغ تے اکھاں دی رفتار توں بہت گھٹ ہوندی اے۔ ایس لئی پڑھن دی رفتار وچ وادھے لئی سب توں پہلاں ایہہ کوشش کیتی جاندی اے کہ پڑھن والا اوہنوں زیرلب پڑھن دی کوشش نہ کرے۔ ایس توں شروع وچ ایہہ نقصان ہوندا اے کہ پڑھن والا لکھے ہوئے لفظاں نوں ویکھ کے لنگھ جاندا اے اوہ اوہناں نوں سمجھ نہیں پاندا مگر ہولی ہولی اوہدا ذہن اوہناں لفظاں نوں ویکھن دے نال سمجھن دی مہارت وی حاصل کر لیندا اے۔
پڑھن دی عادت تے مہارت لئی دلچسپی دا ہونا بہت ضروری اے۔ جے دلچسپی ہووے تے انسان کسی وی مشکل اتے قابو پا سکدا اے۔ ابو نصر فارابی بارے آکھیا جاندا اے کہ ا وہناں دے کول تیل خریدن لئی پیسے نہیں ہوندے سن۔ ایس وجہ توں رات نوں چوکیداراں دے کول بیٹھ کے اوہناں دی روشن کیتی گئیاں مشعلاں دے چانن وچ پڑھیا کردے سن۔
پڑھن دی مہارت وچ اک اہم گل ذخیرہ الفاظ اے۔ جے تسیں پڑھن دی رفتار ودھانا چاہندے او تے تہانوں ایس زبان وچ اپنے ذخیرہ الفاظ وچ وادھا کرنا پووے گا ۔ جہڑی زبان وچ تسیں پڑھنا چاہندے او۔ عموماً کسی وی زبان وچ دو توں ڈھائی ہزار لفظاں دا ذخیرہ الفاظ بہت اہم سمجھیا جاندا اے۔ مشہور برطانوی مفکر جان برائٹ آکھدے نیں کہ میں اپنے ذخیرہ الفاظ ودھان لئی پیراڈائز لاسٹ (Paradise Lost) دا کئی واری مطالعہ کیتا سی۔ اینی بریک بینی نال مطالعہ کرن نال اوہناں دے ذخیرہ الفاظ وچ کافی وادھا ہویا جہدے توں اوہناں دے پڑھن دی رفتار غیر معمولی حد تک ودھ گئی۔
پڑھن دی مہارت وچ اک ہور اہم گل بیٹھن دی عادت اے۔ پیر مہر علی شاہ صاحب دی عادت سی کہ عشا دی نماز مگروں پڑھن لئی بیٹھدے تے کئی واری پڑھن وچ اینے محو ہو جاندے سن کہ فجر دی اذان ہوندی تے اوہناں نوں ویلا لنگھن دا احساس ہوندا۔
پڑھن دی مہارت وچ وادھے لئی اک اہم گل پڑھن والے دا فوکس رہنا اے ایہدے لئی لائبریری وچ پڑھن نال وی مدد ملدی اے جتھے مکمل خموشی ہوندی اے تے پڑھن والا پوری توجہ نال پڑھدا اے۔ مشہور مسلمان ماہر فلکیات تے ریاضی دان ابو معشر بلخی خراسان توں مکہ لئی نکلے۔ رستے وچ بغداد پہنچے تے اوتھے دے کتب خانے خزانہ الحکمت دی شہرت سنی۔ ابو معشر اوس کتب خانے وچ گئے تے اوتھے اوہناں دے پسندیدہ موضوعات اتے ہزاراں کتاباں موجود سن۔ کتب خانہ ہر ویلے کھلیا رہندا تے اینا زبردست ماحول سی کہ ابو معشر نوں اوتھے کئی سال لنگھ گئے۔ اوہ دن رات مطالعہ وچ مصروف رہے تے ایہہ وی بھل گئے کہ اوہ خراسان توں کہڑے مقصد لئی نکلے سن۔ اوہناں نوں عباسی دور دا عظیم ترین ماہر فلکیات تے ریاضی دان سمجھیا جاندا اے۔
ویکھیا گیا اے کہ جہڑے لوک بچپن وچ کہانیاں سندے نیں۔ اوہ بچے پڑھن وچ وی بوہتی دلچسپی لیندے نیں۔ ایتھے اک اہم پہلو دی نشاندہی کرنا بہت ضروری اے کہ ساڈے ہاں رٹن دا اک نظام اے۔ بچے نوں زبانی سنایا جاندا اے تے اوہدے توں زبانی سنیا جاندا اے۔ ایہدے توں بچے دی یادداشت وچ بہتری آ سکدی اے۔ اوہدا حافظہ تیز ہو جاندا اے مگر تصورات نوں سمجھن تے چیزاں دی گہرائی وچ جانن دی صلاحیت وچ وادھا نہیں ہوندا۔ اوہدے وچ پڑھن دی اوہ مہارت پیدا نہیں ہوندی جہڑی وسیع مطالعے لئی درکار ہوندی اے۔
اک مخصوص مضمون وچ پڑھن دی مہارت حاصل کرن لئی وکھری حکمت عملی اتے کم کرن دی لوڑ ہوندی اے۔ ایہدے لئی سب توں اہم گل بچے وچ مضمون بارے سنجیدگی پیدا کرنا اے۔ بچے نوں اپنے مضمون بارے سنجیدہ ہون دی لوڑ ہوندی اے۔ اوہنوں اپنی ترجیحات وچ اہم ترجیح دے طور تے شامل کرنا پیندا اے۔ اوہدے مگروں کسی چنگے استاد کولوں اوس مضمون دے اہم تے بنیادی تصورات نوں سمجھنا پیندا اے۔
یاد رکھو جدوں تک کسی مضمون دے بنیادی تصورات نوں چنگی طرح سمجھ نہیں لیتا جاوے اوہدے وچ چنگی طرح مہارت پیدا نہیں کر لیتی جاوے’ پڑھن والا اوہدی کتاباں نوں روانی نال پڑھن وچ دلچسپی نہ لووے’ اوہدے وچ پڑھن دی مہارت وچ وادھا نہیں کیتا جا سکدا۔
جامعہ ملیہ دہلی دے اک استاد جناب ڈاکٹر مشتاق تجاوری لکھدے نیں کہ اک مخصوص موضوع اتے مطالعہ کرن والیاں نوں درخت دی مثال ذہن وچ رکھنی چاہیدی اے جیویں درخت دا اک تنا’ شاخاں تے پتیاں ہوندیاں نیں۔ اوسے طرح تہانوں اپنے خاص موضوع اتے گہرائی نال پڑھنا چاہیدا اے۔ جیویں درخت دی جڑاں نوں پانی دتا جاندا اے’ اوہناں نوں مضبوط تے توانا بنایا جاندا اے۔ ایسے طرح تہانوں وی اپنے متعلقہ موضوع اتے ودھ توں ودھ چنگی کتاباں پڑھنی چاہیدیاں نیںمگر تنا مضبوط کرن دے نال تہانوں شاخاں دا وی خیال رکھنا چاہیدا اے۔ شاخاں دے بغیر درخت بدصورت ہوندا اے۔ ایتھے شاخاں توں مراد ایس موضوع اتے مختلف اہل علم دی آرا توں واقفیت حاصل کرنا اے۔ ایہدے نال درخت دے پتے وی نیں۔ ایہہ ایس موضوع نال جڑے ضمنی موضوعات بارے پڑھنا اے۔ ایہدے مگروں تہاڈی اپنی رائے تے تبصرہ آندا اے جہدی مثال درخت دے پھل وانگوں اے۔
ملٹن دا قول اے کہ جیویں بیج بون توں زمین زرخیز ہوندی اے ایسے طرح مطالعہ تہاڈے ذہن نوں منور کر دیندا اے۔ مطالعہ دی عادت مستقل طور تے اپنا کے اپنے پڑھن دی رفتار ودھائوتاں جے تسیں گھٹ ویلے وچ بوہتا پڑھ سکو تے مطالعہ پاروں اپنی زندگی سنوار سکو۔