جمہوریت تے جبر وچ فرق

ساڈے ایتھے سیاست تے جمہوریت وچ عدم برداشت ایس حد تک سرایت کر گئی اے کہ حکومت وچ آن والے مخالفین تے جبر کرن توں گریز وی نہیں کردے۔ جمہوریت تے جبر اکٹھے نہیں چل سکدے۔ جبر تہانوں تباہی تے بربادی ول لے جاندا اے۔ برداشت’ صبر’ تحمل’ بردباری نہ صرف جمہوریت سگوں زندگی دے ہر شعبے وچ ثمربار’ خوش رنگ تے برگ و بار دا کارن ہوندی اے۔ ساڈے ایتھوں دی سیاسی ایلیٹ نوں جیل تے جلاوطنی دے نال نال آمرانہ دور وچ کوڑیاں تے پھانسیاں دا سامنا کرنا پیا۔ جمہوری دور وچ وی مقدمے بنے’ پیشیاں در پیشیاں ہوندیاں سن۔ گرفتاریاں وی ہوئیاں’ اک سیاستدان لئی سیاسی گرفتاری اوہدی آن بان تے شان وچ وادھا کردی اے۔ اوہدے لئی فخر دا مقام ہوندا اے۔ کرپشن تے مقدمے بنے’ گرفتاریاں ہون تے سزاواں وی مل جان’ ایہ کسے وی سیاستدان کیہ عام بندے لئی شرمناک تے ڈب مرن دا مقام ہوندا اے۔
1988 توں لے کے 1999ء تک ساڈے ملک وچ انتقامی سیاست زوراں اُتے رہی۔ سیاسی رویے اخلاقیات تے اصول کنڈ پچھے سٹ دتے گئے سن۔ سیاست وچ بری طرح نفرتاں داخل ہو گئیاں۔ عدم برداشت نوں فروغ ملیا۔ ایس دوران مسلم لیگ ن ولوں میاں نوازشریف دو واری وزیراعظم بنے۔ بینظیر بھٹو وی پیپلزپارٹی دی دو واری وزیراعظم رہیاں پر دوہاں دی اک دوجے دے خلاف فوجی جرنیلاں نال رل کے سازشاں دی وجہ نال آئینی مدت پوری نہ کر سکی۔ 2006ء وچ بہرحال دوہاں نوں کجھ سمجھ آ گئی۔ اوہ وی ایس وجہ نال کہ پرویزمشرف دا دور لماں ہو رہیا سی۔ نوازشریف تے بنیظیر بھٹو نے مشرف دے خلاف میثاق جمہوریت کر لیا۔ آپ راقم نوں میاں نوازشریف دے دور حکومت وچ تے اوہناں دی مدعیت وچ سیاسی مقدمیاں دا سامنا کرنا پیا۔ مینوں پھڑ کے بے بنیاد تے جھوٹے مقدمے بنائے گئے۔ تھانے وچ دوران تفتیش تشدد کیتا گیا تے فیر اڈیالہ جیل وچ جوڈیشل ریمانڈ تے گھل دتا گیا جتھے میں سابق صدر آصف علی زرداری تے سابق وزیراعظم راجہ پرویزاشرف دے نال جیل وچ بند رہیا تے بعد وچ جدوں میثاق جمہوریت زیربحث سی تے محترمہ شہید دی خواہش تے اسیں اپنے اُتے ہون والے ظلم تے زیادتی نوں معاف کر دتا سی۔ ایہدے بعد کجھ عرصہ تے مفاہمت دی سیاست رہی ایہدے بعد ایہ دوویں جماعتاں فیر دھینگامشتی کردیاں نظر آئیاں پر عمران خان جو احتساب’ کڑے احتساب دا نعرہ تے کرپشن دے خاتمے دا ایجنڈا لے کے آئے تے حکومت وچ وی آئے اوہناں دے مقابل کل دی سیاسی حریف پارٹیاں پی پی تے مسلم لیگ ن متحد ہو گئیاں اوہناں دا ساتھ دوجیاں دس باراں جماعتاں نے وی دتا۔ اوہناں نے عمران خان دی حکومت گرائی تے اپنی بنا لئی۔ ایہدے بعد سابق حکمران جماعت دے لیڈراں تے مقدمیاں دی بھرمار نظر آئی۔ عدالتاں آزاد نہ ہوندیاں تے اج پی ٹی آئی دی عمران خان سنے ساری قیادت جیل وچ ہوندی۔ اج جہڑے لوک اقتدار وچ نیں اوہناں نوں کیسے کیسے جبر دا سامنا کرنا پیا سی پر اوہناں ولوں اپنے ای اُتے گزرن والی توں کوئی سبق نہیں سکھیا گیا۔ کوئی جرم کردا اے اوہدا محاسبہ لازم اے ایہدے لئی اک طریقہ کار اے’ قنون نال اوہنوں قابو کرو۔ 25مئی نوں پی ٹی آئی دے احتجاج نوں جس جبر دے نال روکیا گیا اوہ اک خوفناک مثال بن گئی۔ صحافیاں دے نال جو سلوک ہو رہیا اے اوہ وی سامنے اے’ کجھ صحافی ملک ای چھڈ گئے۔
شہبازگل دی گرفتاری اک ایف آئی آر دے تحت کیتی گئی۔ ایہدے بارے وی کہیا جاندا اے کہ گرفتاری دے بعد دائر کیتی گئی سی۔ بھاویں جدوں وی ہوئی پر جس طرح اوہنوں گرفتار کیتا گیا ایہ دہشت پھیلان والی واردات سی۔ حراست دوران وی اوہناں نوں مبینہ طور تے تشدد دا نشانہ بنایا گیا۔ اوہناں دا جس طرح نال دو روزہ ریمانڈ ختم ہون تے دوبارہ ریمانڈ لین دی کوشش کیتی گئی تے اوسے دن اگلی عدالت وچ نظرثانی دی اپیل وی دائر کر دتی گئی اوہدے نال کل دے خلاف حکومت دے ذمہ داراں ولوں ذاتی دشمنی دی جھلک نظر آندی اے تے فیر گل دے ڈرائیور اظہار نوں پھڑن لئی اوہدی بیوی نوں چک کے لاک اپ وچ سٹ دتا گیا اوہدی اک ورھے دی دھی نوں ماں توں وکھ رکھیا گیا۔ تے فیر اک ٹی وی چینل دی کلیرنس منسوخ کرکے اوہنوں بند کر دتا گیا۔ مرکز وچ عمران خان مخالف اتحادی پارٹیاں دی حکومت اے۔ پنجاب وچ پی ٹی آئی دی حکومت اے جہدے وزیراعلیٰ ق لیگ دے پرویزالٰہی نیں۔ سیاست وچ اج اجہے مفاہمانہ رویاں دی ضرورت اے۔ جبر دی ایس فضا وچ رانا ثناء اللہ دے رویے وچ تھوڑی جہی مثبت تبدیلی ویکھن وچ آئی اے۔ اوہناں نے آئی جی اسلام آباد نوں ہدایت کیتی اے کہ شہبازگل دے ڈرائیور اظہار دی گرفتاری لئی بنی گالا تے ریڈ نہ کیتا جاوے۔ اوہناں نے اظہار دی بیوی دی گرفتاری تے وی ناپسندیدگی دا اظہار کیتا۔٭٭