سندھی بولی تے ثقافت نوں اوہدے قومی ہیروز نے کیویں بچایا ؟

قوم دی رہنمائی ایہدے قومی ہیرو ای کردے نیں تے تریخ دے اوکھے دور وچ ایہہ ای ہیرو اپنی قوم دی رہنمائی کردے’ اوہناں نوں بچاندے’ اگے ودھدے تے ایہدی بقا دی ذمے داری لیندے نیں۔ ایہہ ہی اوہ ہیرو ہوندے نیں جہڑے ویلا آن تے اپنی قوم تے دھرتی لئی جان وی قربان کر دیندے نیں۔ جہڑی قوماں اپنی قومی ہیروواں دی قدر نہیں کردیاں اوہناں دے ذہناں اتے دوجی قوماں دے ہیرو یا فیر خیالی تے افسانوی ہیرو ای چھا جاندے نیں۔
پاکستان بنن مگروں تعلیمی اداریاں وچ رائج نصاب توں لے کے پڑھائی جان والی تریخ وچ تحریک آزادی دے اصل ہیروواں دے سوا باقی جہڑے تریخی ہیروواں نوں پڑھایا جان لگیا اوہناں وچ اکثر ایس دھرتی دے نہیں سن۔ اُتوں اوہناں نوں اینا دیومالائی بنا کے پیش کیتا گیا کہ ساڈے نوجوان نوں خود اپنے قومی ہیرو حقیر لگن لگے۔ نسیم حجازی ٹائپ لکھاریاں نے اپنے افسانیاں’ ناولاں تے ڈرامیاں وچ خیالی تے افسانوی ہیرو دے ایسے بت تراش دتے جہناں دے اگے سجدہ ریز ہون نوں دل کرن لگیا۔
پاکستان وچ ایہہ صورتحال کجھ ڈرامیاں دی مدد نال ایس ویلے وی موجود اے مگر ایہہ صورتحال ون یونٹ دے دناں وچ اپنے عروج تے سی کیوں جے ریاست دے اندر موجود قوماں دی صوبائی اکائیاں ختم کیتی گئیاں تے سرکاری حکم ہویا کہ تریخ وی نویں بنائی جاوے۔ تریخ جو لکھی جاندی اے اوہ اوس دور وچ بنائی مطلب لکھوائی گئی۔
ایس مشکل ترین دور وچ سندھ دے ادیباں تے دانشوراں نے کمال چابکدستی نال اپنا محاذ سنبھالیا تے اپنے قومی ہیروز تے شناخت لئی اوہ کم کر وکھایا جہڑا پنجاب اج ایس ویلے وی نہیں کر پا رہیا حالانکہ 18 ویں ترمیم مگروں پنجاب مہاراجہ رنجیت سنگھ دے دور دے سوا تریخ وچ سب توں ودھ سیاسی’معاشی’ اقتصادی تے قومی خودمختاری دے دور توں گزر رہیا اے۔
کیہ تسیں نہیں جاننا چاہو گے کہ سندھ دے دانشوراں نے ون یونٹ دے کالے دور وچ وی اپنے قومی ہیرو’ ادب تے تریخ لئی کس قدر شاندار طریقے تے منصوبہ بندی نال کم کیتا۔ ایہدا اندازہ تسیں صرف تھلے دتے اوہ خطاں توں لا سکدے او جہڑے اوس دور وچ سائیں جی ایم سید نے جناب محمد ابراہیم جویو صاحب نوں لکھے سن۔
بتاریخ 20۔ 05۔ 1967 ع
جناب من محمد ابراہیم جویو صاحب
اسلام علیکم
بزم صوفیا سندھ دی ورکنگ کمیٹی 4 دا اجلاس 9 اپریل 1967ع کو سن وچ ہویا جہدے وچ پاس کیتی گئی کجھ قرارداداں تہاڈے توں متعلق نیں ایس لئی ایہناں کماں دی تکمیل لئی ایہہ قرارداداں تہانوں ارسال کیتی جاندیاں نیں کہ تسیں اوہ سارے کم ویلے تے احسن طریقے نال سرانجام دے سکو۔
زیادہ خیر والسلام
تہاڈا غلام مرتضی سنائی
قرارداد نمبر اک
بزم صوفیا سندھ تنظیم ولوں سندھ دے سارے صوفیا اکرام دی درگاہواں تے سجادیاں دے حقاں دے تحفظ دے نال نال سندھ دے صوفی ازم دے اصل پیغام نوں اگے ودھان’ عوام دی نفسیاتی اصلاح’ پیغام محبت’ اخلاقی درستگی’ سندھی ثقافت دی ترقی تے زبان دی ترقی لئی اہم شخصیات اتے 12 رکنی کمیٹی بنائی جا رہی اے۔ لوڑ پین تے ایہدے وچ دوجے سجادہ نشین یا ادیباں دے نام شامل کیتے جا سکدے نیں۔
1۔ سید غلام حیدر شاہ، سجادہ نشین، درگاہ شاہ کریم رح۔ چیئرمین
2۔ پیر سید شاہ ڈنو شاہ، سجادہ نشین، درگاہ شاہ عبداللطیف بھٹائی رح۔ میمبر
3۔ صوفی ارشاد عباس صاحب، سجادہ نشین، درگاہ شاہ عنایت شہید رح۔ میمبر
4۔ سید علی اصغر شاہ، سجادہ نشین، درگاہ علی شیرازی، ٹھٹہ۔ میمبر
5۔ صوفی عبدالحق، سجادہ نشین، درگاہ حضرت سچل سرمست رح درازا۔ میمبر
6۔ سید غلام مرتضی شاہ، سجادہ نشین، درگاہ سید علی حیدر شاہ، سن۔ میمبر
7۔ پیر حسام الدین شاہ راشدی، ادیب۔ میمبر
8۔ محمد ابراہیم جویو، ادیب۔ میمبر
9۔ شیخ مبارک (شیخ ایاز) ادیب۔ میمبر
10۔ علامہ غلام مصطفی قاسمی، ادیب۔ میمبر
11۔ قاضی فیض محمد، ادیب۔ میمبر
12۔ ایڈووکیٹ رسول بخش پلیجو، ادیب۔ میمبر
قرارداد نمبر۔ 2
سندھ دے دانشور تے ادیب حضرات نوں گزارش کیتی جاندی اے کہ پورے 6مہینے لا کے سندھ دے اصلی قومی تے تریخی ہیروواں دی سوانح تے تریخ لکھ کے بزم صوفیا دے صدر دفتر وچ جمع کران۔ اجلاس وچ اک رائے طور تے ایہہ فیصلہ کیتا گیا کہ کہڑے کہڑے دانشور تے ادیب کیہ کیہ کم کرن گے تے 6مہینے دے اندر ایس کم نوں مکمل وی کرن گے۔ ایس گل دا خاص خیال رکھیا جاوے گا کہ سندھ دے اصلی قومی تے تریخی ہیروواں دی سوانح تے تریخ تفصیل نال لکھی جاوے گی جہڑی گھٹ توں گھٹ اک سو صفحیاں اتے مبنی ہووے گی۔
1۔ آزاد سندھ دا حکمران دودو سومرو” دودو اعظم” :
ایس موضوع اتے لکھے گاپروفیسر محرم خان تے ایہہ ذمے داری ہووے گی محمد ابراہیم جویو صاحب دی اوہ ایس مضمون دی نگرانی کرے گا’تریخی تے ادبی پس منظر وچ ایہدی نوک پلک درست کرے گا تے چھپوان دا بندوبست کرے گا۔
2۔ جرنیل دولہہ دریا خان:
سندھ دے سمہ حکمراناں دے دور دے بہادر فوجی سپاہ سالار جرنیل دولہہ دریا خان دی شخصیت’ کارنامیاں تے تریخ اتے مفصل مضمون لکھن دی ذمے داری ہووے گی۔ غلام ربانی آگر تے صاحب (پچھلے چیئرمین اکادمی ادبیات پاکستان)اتے ایس مضمون نوں مکمل کروان’ ادبی تے تریخی پس منظر وچ درست کرن تے چھپوان دی ذمے داری محمد ابراہیم جویو صاحب اتے ہووے گی۔
3۔ شہید مخدوم بلاول رح:
صوفی شخصیت تے دھرتی لئی جان قربان کرن والے شہید مخدوم بلاول دی شخصیت’ کردار تے کارنامیاں اتے تفصیلی مضمون سائیں جی ایم سید لکھن گے تے اوہنوں مکمل کروان توں لے کے چھپوان دی ذمے داری وی محمد ابراہیم جویو صاحب اتے ہووے گی۔
4۔ صوفی شاہ عنایت شہید:
سندھ وچ ہاری تحریک دے اہم نام تے جوکھیتی آباد کرے اوہو کھاوے دا نعرہ لان والے شاہ عنایت شہید بارے تفصیل نال مضمون لکھن دی ذمے داری (نامور شاعر تے سندھ یونیورسٹی دے پچھلے وائس جانسلر) شیخ ایاز صاحب دی ہووے گی۔ ایس سلسلے وچ جناب جی ایم سید صاحب تے غلام ربانی آگرہ صاحب (پچھلے چیئرمین اکادمی ادبیات پاکستان) ایہدی مدد کرن گے تے مضمون مکمل ہون مگروں اوہوچھپوان گے۔
5۔ شیر سندھ میر شیر محمد خان:
ٹالپور دور دے آخری حکمران تے انگریز دے خلاف میدان جنگ وچ باقاعدہ ہتھیاراں نال فوجی جنگ لڑن والے شیر سندھ میر شیر محمد خان بارے مضمون لکھن دی ذمے داری مولانا غلام محمد گرامی صاحب نوں دتی گئی اے۔اوہو خود ای ایہنوں درست کرکے چھپوان دے ذمے دار وی ہون گے۔
6۔ جرنیل ہوش محمد شیدی شہید:
انگریز دے خلاف حیدرآباد دے کول میانی تے دبی دی جنگ وچ جوہر وکھان والے’ سندھ دی فوج دے سپاہ سالار تے مرسوں مرسوں’ سندھ نہ ڈیسوں دا نعرہ لان والے جرنیل ہوش محمد شیدی بارے تفصیلی مضمون مولانا غلام محمد گرامی صاحب لکھن گے تے عام لوکاں تک پہنچان گے۔
7۔ دیوان ہرچند رائے :
سندھ دی اہم سماجی شخصیت دیوان ہرچند رائے دی شخصیت’ کرار تے کارنامیاں بارے تفصیلی مضمون لکھن تے اوہنوں عام لوکاں تک پہنچان دی ذمے داری محمد ابراہیم جویو صاحب نوں دتی گئی اے۔
8۔ رئیس غلام محمد خان بھرگڑی:
انگریز دور وچ سندھ دی سب توں مضبوط سیاسی آواز تے رہنما غلام محمد خان بھرگڑی دی شخصیت تے کارنامیاں اتے مضمون لکھن تے اوہنوں مکمل کر کے چھپوان دی ذمے داری محمد ابراہیم جویو صاحب اتے ہووے گی۔
9۔ شہید اللہ بخش سومرو:
سندھ دے پچھلے وزیراعظم تے بہادر سیاستدان شہید اللہ بخش سومرو دی شخصیت’ کارنامے تے بہادری بارے نوجوان نسل نوں روشناس کروان لئی تفصیلی مضمون سائیں جی ایم سید لکھن گے جد کہ ایس کم دی ذمے داری محمد ابراہیم جویو پوری کرن گے۔
10۔ شہید ہیموں کالانی:
قابض انگریز سرکار دے خلاف گوریلا جنگ شروع کرن والے تے گرفتاری ہون مگروں معافی منگن دے بجائے سزائے موت قبول کرن والے شہید ہیموں کالانی بارے مضمون لکھن تے اوہنوں مکمل کر کے عام لوکاں تک پہنچان دی ذمے داری غلام ربانی آگرو دی ہووے گی۔
11۔ مائی بختاور شہید:
سندھ وچ ہاری تحریک دا اہم نام تے اپنی دھرتی’ زمیناں’ اناج تے حق لئی جان دین والے عورت شخصیت مائی بختاور شہید جہنے اپنے سرکار ولوں غیر سندھی آباد کاراں نوں بدین وچ زمیناں الاٹ کرن دے خلاف تحریک وچ حصہ لیاتے اناج دی کلے سرنگرانی کردے جان قربان کردتی۔ ایہدی قربانی پاروں سرکار نوں زرعی قنون وچ ترمیم تبدیلیاں کرنی پئیاں۔ ایس عورت شخصیت بارے تفصیلی مضمون لکھن دی ذمے داری غلام محمد خان لغاری نوں دتی گئی اے۔ اوہو ایس مضمون نوں پورا کرن گے تے ذمے داری نوں لکان گے۔
12۔ جمشید نسروانجی مہتا:
سندھ دے سب توں وڈے شہر کراچی دے معمار تے پہلے میئر تے کراچی نوں ترقی دین وچ اہم کردار کرن والے جمشید نسروانجی مہتا جہناں نوں اک عام شہر نوں بین الاقوامی شہر بنایا’ سندھ دے لوکاں نوں عالمی معیار نوں شہر دتا تے اپنی ذاتی سماجی خدمات توں سندھ نوں عروج دتا۔ جمشید نسروانجی مہتا بارے تفصیلی مضمون شیخ ایاز صاحب گھلن گے تے اوہنوں چھپوان دی ذمے داری وی اوہناں دی ہووے گی۔
قرارداد نمبر۔ 2
بزم صوفیا دے اجلاس وچ دوجی قرارداد ایہہ پیش کیتی گئی کہ
سندھ وچ جہنے وی شاعر نیں اوہناں نال رابطے کیتے جان تے جہنی وی شاعری ہو رہی اے اوہدا تجزیہ کیتا جاوے’ شاعراں نوں سندھی زبان وچ شاعری کرن دی ترغیب دین دے نال نال سندھی قومی شاعری نوں مرکز بنایا جاوے۔ اک ایسی کمیٹی بنائی جاوے جہڑی سندھی زبان وچ ہون والی قومی شاعری نوں اکٹھا کرے’ ایہدا تجزیہ کرے تے بہترین شاعری نوں اکٹھا کرے اک مکمل کتاب ترتیب دتی جاوے۔ قومی شاعری دی مرکز بنایا جاوے۔ اک ایسی کمیٹی بنائی جاوے جہڑی سندھی زبان وچ ہون والی قومی شاعری نوں اکٹھا کرے’ ایہدا تجزیہ کرے تے بہترین شاعری نوں اکٹھا کرے۔ اک مکمل ترتیب دتی جاوے۔ قومی شاعری دی اک کتاب نوں صرف چھ مہینے دے اندر مکمل کیتا جاوے تے بزم صوفیا دے اجلاس وچ پیش کیتا جاوے۔
قومی شاعری دی اک ایسی شاندار کتاب ترتیب دتی جاوے جہڑی ہر طرح توں کمال ہووے تے اوہنوں چھپوا کے سندھ دے ہر شہر وچ پہنچایا جاوے۔ ایہہ نہایت اہم کم کسی اک فرد دے بجائے اہم ترین شخصیات اتے مبنی اک پنج رکنی کمیٹی دے سپرد کیتا جاوے۔ ایس کمیٹی وچ جناب شیخ ایاز صاحب’ جناب تنویرعباسی’ میاں یار محمد پہنور ‘ رشید بھٹی تے محمد ابراہیم جویو صاحب شامل ہون گے۔
قرارداد نمبر۔ 3
سندھی زبان وچ قومی نغمیاں تے لوک گیتاں دی تیاری
اجلاس وچ ایہہ قرارداد وی پیش کیتی گئی کہ سندھی زبان وچ قومی شاعری مگروں ایس گل دی لوڑ اے کہ سندھی زبان دے قومی نغمے تے لوک گیت تیار کروان لئی شاعری دا چنائو کیتا جاوے تے سندھ دے مشہور فنکاراں دی آواز وچ قومی گیت ریکارڈ کروائے جان۔ایہناں قومی گیتاں دے فیر ودھ توں ودھ کارڈ بنوا کے پورے سندھ وچ پہنچان دا پربندھ کیتا جاوے۔ ہر اہم اجلاس’ جلسے’ تقریباں تے موقعے اتے اوہ قومی گیت اینے بوہتے چلائے جان کہ لوکاں نوں ازبر ہو جان۔ ایس توں عوام وچ قومی جذبہ بیدار ہووے گا تے ایہدے توں سندھی بولی تے قومی ثقافت نوں فیدہ ہووے گا۔ ایس شاندار کم کرن لئی وی کسے اک فرد نوں ذمے داری دین دے بجائے اک چار رکنی کمیٹی بنائی جاوے جہڑے ایہہ کم رل کے احسن طریقے نال سرانجام دے سکدے نیں۔ ایس کمیٹی وچ ابراہیم جویو صاحب’ سائیں جی ایم سید’ مولانا غلام محمد گرامی صاحب تے عبدالستار صاحب نوں شامل کیتا گیا اے۔
والسلام
تہاڈا اپنا
غلام مرتضی سید
سائیں جی ایم سید نے جناب محمد ابراہیم جویو صاحب نوں اک ہور وی خط لکھیا۔ دسمبر 1966,28 ع نوں بھیجے گئے اک ہور خط وچ لکھیا گیا اے کہ:
جناب من محمد ابراہیم جویو صاحب
اسلام علیکم
بزم صوفیا نوں سنگیاں ولوں اک تجویز آئی اے کہ کجھ اہم قومی معاملات تے موضوعات اتے اہم قلمکاراں کولوں مضمون لکھوان دی طرز اتے ہن اہم شاعراں توں شاعری وی کروائی جاوے۔ ایس سلسلے وچ ضروری اے کہ نامور شاعراں نال رابطہ کر کے کافیاں’ نظماں’ گیت تے بیت لکھوا کے کتابی شکل وچ چھپوائی جان تے ہر پنڈ تے شہر وچ پہنچائی جان۔ نال نال موسیقاراں کولوں موسیقی ترتیب دوا کے ای اوتھے دے لوک گلوکاراں دی آوازاں وچ ریکارڈ کروائے جان۔
ایس گل دا خیال رکھیا جاوے کہ گیتاں دے مصرعے پنج توں ودھ نہ ہون۔ ایہہ گانے یاد کرن وچ آسانی ہوندی اے۔ ایہہ گیت سرکلیان’ سرکوہیاری’ سرجوگ’ سربھیروی’ سررانو’ بھاگیسری’ سرملار تے سرکھماچ وچ ریکارڈ کیتے جان۔ ایہدے توں مختلف سراں نوں پسند کرن والے لوکاں تک اپنا قومی پیغام اوہناں دے پسندیدہ شاعر تے پسندیدہ گلوکار دے ذریعے پہنچ جاوے گا۔ایس گل نوں وی یقینی بنایا جاوے گا کہ ایہہ سارے گیت بزم صوفیا دی ہر تقریب وچ پیش کیتے جان گے تے نال نال شہراں دے مشہور ہوٹلاں’ ریستوران’ اوطاق تے دوجی تقریبراں وچ وی گائے تے وجائے جان۔ ایس سلسلے وچ آلات موسیقی فراہم کرن لئی اک دوست نے ذمے داری لیتی اے۔
تہانوں ایس سلسلے وچ ذمے داری دتی جاندی اے کہ تسیں تھلے دتے موضوعات اتے شاعری لکھوانی اے جہڑی فیر مختلف گلوکاراں نوں گان لئی دتی جاوے گی۔
1ـسندھی زبان وچ سندھ دا اک قومی ترانہ جہڑا ہر محفل دی شروعات تے اختتام اتے ساز تے آواز نال گایا جاوے گا۔
2ـ سندھی قومیت دا جذبہ بیدار کرن دے حوالے نال جوش پیدا کرن لئی قومی نغمے’ کافیاں تے گیت لکھوائے جان۔
3ـ سندھی زبان نال محبت دا اظہار شاعری وچ کیتا جانا چاہیدا اے’ ایس سلسلے وچ گیت’ غزل’ نظماں تے بیت لکھوانا
4ـ سندھ وچ مذہبی رواداری پیدا کرن لئی ادب دا استعمال کرنا خاص طور تے شاعری وچ اظہار کرنا ضروری اے۔
5ـ شاعری وچ سندھ دی سیاسی’ اقتصادی تے سماجی آزادی دا اظہار کرنا
6ـ سندھ دے لوکاں وچ برادری تے ذات پات توں اگے ودھ کے قومیت دا وطنی تصور پیش کر کے سب نوں اک لڑی وچ پرون دی گل شاعری وچ پیش کرنا
7ـشاعری وچ ایس گل نوں اجاگر کرنا کہ قومی مفادات انفرادی فیدیاں توں اہم نیں۔ خود مطلبی تے ذاتی انا نوں قومی مفاداں اتے قربان کر دینا
محترم جویو صاحب
مینوں امید اے کہ تسیں تے دوجے ساتھی ایس اہم گل ول دھیان دین گے تے ایس سلسلے وچ اپنا اہم کردار ادا کرن گے۔
زیادہ خیر والسلام
تہاڈا اپنا غلام مرتضی
ایہناں خطاں دے نال نال ہور وی سینکڑاں خط جناب ابراہیم جویو صاحب دی گھریلو لائبریری وچ موجود نیں جہناں وچ اک تریخ دفن اے۔ اتے دتے خط جناب محمد ابراہیم جویو صاحب دے پوتے محسن جویو نے اپنی سوشل میڈیا وال اتے شیئر کیتے سن جہناں نوں ایس ویلے وی ہزاراں لوکاں نے پسند کیتا تے اپنی اپنی رائے دا اظہار کیتا۔
سچ آکھدے نیں کہ تریخ دا مشل ترین دور ای چنگی قوماں لئی بہترین دور ہوندااے کیوں جے اوکھے ویلے قومیتاں دے کردار’ مزاج تے طاقت دا اندازہ لایا جا سکدا اے۔ پاکستان بنن مگروں ملک دی ساری قومی وحدتاں لئی مشکل ترین دور ون یونٹ دا دور سی جہدے وچ قوماں کولوں اوہناں دی تریخی حیثیت تے زبان کھون دی کوشش کیتی گئی سی۔ ایس دور وچ دوجی قوماں دے نال سندھیاں نے وی اپنی تہذیبی تے قومی شناخت دی بحالی لئی ہر قسم دی کوشش کیتی۔
ایہدے وچ سب توں اہم تے دلچسپ گل ایہہ رہی کہ ایہہ کوشش سندھ دی اہم ترین شخصیات نے کیتی تے ایس تحریک وچ سیاستداناں دے نال نال طلبہ’ دانشور’ ادیب’ شاعر’ موسیقار’ فنکار’ ڈاکٹر’ وکیل’ہاری’ آبادکار’ زمیندار’ سرمایہ دار’ وکیل’ دکاندار’ کاروباری حضرات’ علما’ صوفیا’ گدی نشین’ مرشدین’ مریدین’ پنڈت’ دیوان’ مطلب ہر مرد تے عورت نے سیاسی’ مذہبی’ مسلکی’ برادری تے نسلی مفادات توں ماورا ہو کے سندھ’ سندھی تے سندھیت لئی کم کیتا۔ ایہہ اینی طاقتور تحریک سی کہ ایہدے اثرات ادھی صدی گزرن دے باوجود اجے تک سندھ وچ بآسانی محسوس کیتے جا سکدے نیں۔
کیہ ایہہ ممکن اے کہ ہن پونی صدی لنگھن مگروں پنجاب وی ایہہ سمجھ رہیا ہووے کہ اپنی دھرتی’ بولی’ رہتل تے قومیت دی شناخت دی بحالی دی کوشش کیتی جاوے۔ لوک ایہہ سمجھدے نیں پچھلے اک دہائی دی سیاسی تبدیلیاں ہن پنجاب نوں قومی طور تے جگان لئی زرخیز سال ثابت ہوئے نیں۔ خاص طور تے پنجاب نوں تقسیم کرن والی وفاقی کوشش نے ایس خیال نوں ہور پختہ کیتا اے کہ پنجابی عوام دی تریخی بقا صرف تے صرف پنجاب’ پنجابی تے پنجابیت وچ اے تے پاکستان دی اصل ترقی تے بقا وی ایہدے وچ مضمر اے۔
پنجاب وچ پنجابی قومیت دے نام اتے سیاسی تے ثقافتی پارٹیاں تے تنظیماں دا بننا’ نالے پنجاب سرکار ولوں سرکاری طور تے پنجاب ثقافتی دیہاڑ منان دے فیصلے نے ایس امر نوں ہور تقویت دتی اے۔ پنجاب دے شاعر ہن اردو دے نال نال پنجابی وچ شاعری کردے شرمندگی محسوس نہیں کردے’ یونیورسٹیاں دے طلبہ تے افسر شاہی دے بابو ثقافتی دناں اتے پنجابی پگ پا کے اپنی تصویراں سوشل میڈیا اتے شیئر کردے خوشی محسوس کردے نیں۔ پنجاب سرکار دے محکمہ تعلیم نے پہلی واری سکولاں تے کالجاں وچ پنجابی بولی دے استاداں نوں بھرتی کرن لئی اشتہار دتے گئے نیں۔ ایس پوری صورتحال اتے سندھ دے لوک بہت خوش نیں۔
پنجاب وچ قومی تشخص اجاگر کرن وچ کافی دانشوراں دا اہم کردار رہیا اے مگر ایس عمل نوں سنجیدگی نال اگے نہیں ودھایا گیا۔ پنجاب دے نامور دانشور تے سیاستدان فخر زمان جئے پنجاب پرست نے اپنی کتاب پنجاب’ پنجابی تے پنچابیت وچ لکھیا اے کہ انج لگدا اے کہ (پنجاب وچ) ہیرو دا تصور وی سانوں سندھ دی قومی جدوجہد توں ملیا۔ سندھی ادبی سنگت دی تقلید وچ اسیں کجھ سالاں مگروں پنجابی ادبی سنگت قائم کیتی۔ اوتھوں راجا ڈاہر دا نعرہ بلند ہویا تے ساڈے لوکاں نے وی ہیرو دا سوال چکیا۔ اوتھے بزم صوفیا سندھ دے کارکناں نے اپنی مادروطن دے نال اپنی وحدت الوجود دا اعلان کیتا تے پنجاب دی ایہہ تحریک وی پنجاب دے نال اپنے وحدت الوجود دا اظہار کیتے بغیر نہیں رہ سکی۔
سچ منیا جاوے تے ایہہ اک چنگی گل اے سندھ تے پنجاب ہزاراں سالاں توں اک ای تہذیب دا حصہ رہے نیں تے ہزاراں سالاں تک نال رہنا اے۔ ایہہ گل وی خوش آئند اے کہ سارے سیاسی تے اقتصادی مسئلے تے اختلافات دے باوجود سندھ تے پنجاب اک دوجے دے نال قریب ترین رابطے رکھے ہوئے نیں تے ایہہ رابطے تے باہمی مفادات پاکستان دی مجموعی ترقی تے سلامتی دی ضمانت نیں۔
ہن لوڑ ایس امر دی اے کہ پنجاب اپنی دھرتی دے قومی ہیروواں نوں بچان دی باقاعدہ سعی کرے۔ ایس سلسلے وچ پنجاب دے دانشوراں’ سیاستداناں تے خاص طور تے پنجاب سرکار نوں اہم کردار ادا کرنا ہووے گا۔ ایہہ اک ضروری تے سوچ سمجھ کے چکیا گیا قدم ہووے گا جہدے وچ پنجابی زبان وچ پنجابی ہیروواں بارے مضمون لکھے جان۔گیت’ غزلاں’ نظماں’ واراں’ ٹپے تے ماہیے لکھے تے لکھوائے جان۔ ایس پورے کم نوں ترتیب دے کے کتابی شکل دتی جاوے۔ سوشل میڈیا توں لے کے الیکٹرانک میڈیا تے پرنٹ میڈیا نوں استعمال کیتا جاوے۔
پنجابی زبان وچ سنجیدہ قومی نغمے لکھے تے گائے جان جہدے وچ پنجاب دھرتی’ رہتل تے بالی نال عشق دا کھلا اظہار ہووے۔ پنجابی قوم نوں دوجی قومیتاں نال پیار تے انسیت دا اظہار کرنا سکھایا جاوے۔ اپنے بچیاں نوں قومی ہیروواں دے کم توں روشناس کروایا جاوے۔ بچیاں اتے قومی ہیروواں دے نام (نک نیم) رکھے جان تے کوئی چنگا کم کرن اتے بچیاں نوں پیار نال دُلا’ پورس، رائے کھرل تے بھگت سنگھ جئے لقب دتے جان۔بچے خوش ہو جان گے۔
پنجاب دی ساری یونیورسٹیاں نوں چاہیدا اے کہ اوہ پنجابی ادب’ زبان’ تریخ تے کلچر دے شعبیاں وچ ذہین طلبہ توں پنجابی شخصیات اتے ریسرچ کر کے تھیسز لکھن اتے تیار کرے۔ پنجابی اہم شخصیات دے نام گنوان دے بجائے ایہہ کم پنجاب دے دانشوراں’ یونیورسٹیاں تے سرکار اتے چھڈیا جاوے کہ اوہ گھٹ توں گھٹ 50 پنجابی شخصیات دے نام سلیکٹ کرن تے ایس اہم مقصد اتے کم شروع کرن۔ پنجابی مشاعریاں دا انعقاد کیتا جائے جہدے وچ قومی شاعری پیش کروا کے ایہدا مجموعہ بنایا جاوے۔ نال نال مختلف شاعراں دیاں کتاباں توں اک اک دو دو ایسی نظماں یا غزلاں اکٹھی کیتیاں جان جہدے وچ پنجاب’ پنجابی تے پنجابیت نال انسیت تے پیار دا ذکر اے۔
پنجاب نوں جاگنا ہووے گا’ بہت دیر ہو چکی اے’ زندہ قوماں نوں ایس توں ودھ دیروارے وچ نہیں آندی۔