سیلاب تے ہجرت

ہند دا بٹوارہ ہویا تے لکھاں مسلماناں نے گھر’ کاروبار تے جائیداداں چھڈ کے نویں ملک پاکستان وَل ہجرت کر لیتی۔ اوہ وی ماں پیو تے بھین بھراواں دے نال اک مہاجر قافلے وچ شامل ہو گیا۔ سفر دے مصائب اک ٹرین وچ سوار ہون دی وجہ نال تھوڑی دیر گھٹ ہوئے مگر بھک تے پیاس ختم کرن لئی کجھ زادراہ نہیں سی فیر وی چھوٹا ہون دی بنا تے ماں پیو تے بھین بھرا اوہدا خاص خیال رکھدے۔ ایسے بنا تے ذہن وچ بیٹھ گیاکہ ہجرت دراصل مصائب تے آلام توں نجات داکارن بندی اے مگر بلوائیاں دے حملے وچ ماں پیو تے بھین بھراواں توں محرومی دا صدمہ برداشت ناقابل برداشت سی۔ آخرکار کسی نہ کسی طرح آزاد وطن پہنچ گیا ۔انجان لوک تے انجان سرزمین دے باوجود اوہنوں کامل یقین سی کہ ہن ایتھے کوئی اوہنوں نقصان نہیں پہنچا سکدا۔ لوک گلاں کردے کہ نویں ملک نوں معاشی مسائل درپیش نیں ایسے لئی کسی دے اگے دامن پھیلان دے بجائے لڑکپن وچ ای محنت مزدوری کرن لگیا۔ کدوں بچپن رخصت ہویا’ کدوں جوانی آئی تے کدوں ویاہ ہویا’ رحمت دے زندگی وچ آن نال اک غمگسار رفیق مل گیا۔ ویلا لنگھن دا اوہنوں پتہ ای نہیں چلیا۔ اللہ نے اولاد دی نعمت نال نوازیا تے ہجرت دے دکھاں تے زخماں دی یاداں تے تکلیفاں کسی حد تک بھلن لگیاں لیکن تنہائی وچ ماں پیو دی شفقتاں تے بھین بھراواں دے لاڈ تے پیار دی یاداں تڑپان نوں آ دھمکدیاں تے اوہدی پلکاں بھِج جاندیاں لیکن اوہ دعا کرن دے سوا کر وی کیہ سکدا سی ایسے لئی کسی نال غم دا ذکر کرن دے بجائے خود تک ای محدود رکھدا۔
سچی گل تاں ایہہ اے کہ رحمت اوہدے لئی واقعی رحمت ثابت ہوئی۔ دونویں سارا دن مشقت کردے تے فیر رات نوں جدوں دنیا سہانے سفنیاں وچ گواچ جاندی تے اوہ اپنی شریک حیات دے نال گھروندے دی تعمیر وچ جت جاندا۔ پکی اٹاں کیویںخریددے مستری تے مزدور نوں اجرت دین دی استطاعت تک نہیں سی ایسے لئی اک مٹی دے ڈھیلے سلیقے نال رکھدا جاندا تے دوجا گارا فراہم کرن دی ذمہ داری چک لیندا۔ ویلا انج لنگھدا رہیا گھر دی تعمیر دے نال کنبے دی تعداد ودھدی گئی۔ اک واری کسی نے دسیا دونویں ملکاں وچ جنگ لگ گئی اے تے اوہ سوچن لگیا کہ ہجرت دے دوران قتل و غارت توں کیہ دل نہیں بھریا جہڑافیر جنگ لڑ کے اک دوجے دا لہو بہان لگے نیں۔ کیسے عجیب لوک نیں مدد کرن دے بجائے بے گھر کرن وچ لطف محسوس کردے نیں۔ کدی تنہائی دا احساس دوچند ہو جاندا تے اوہ اپنے ملک دے معاشی مسائل حل کرن دی اللہ کولوں دعا کرن لگدا۔ رمضان وچ سائرن وجدا تے ہر پاسے افطاری دا شور مچ جاندا۔ طرح طرح دے پکواناں دی اشتہا انگیز خشبو اوہدے نتھناں نال ٹکراندی مگر ملک دے معاشی مسائل بارے سنی گلاں دی وجہ نال اوہ کسی سرکاری اہلکار دے اگے دامن پھیلان دی ہمت نہیں کر سکیا۔ بچے وڈے ہوئے تے ساریاں دے ویاہ کر دتے۔بھرے کنبے نوں ویکھ کے جیویں اوہدے دل نوں قرار جیا آ گیا تے فیر ہجرت دے تلخ دن جیویں بھلن لگے۔
2008 وچ گھر دے فرد کم تے جان دی تیاریاں وچ سن تے بڑھاپے دے باوجود
رحمت صبح دا کھانا بنان وچ دھیاں دا ہتھ ونڈا رہی سی کہ اچانک زمین لرزن نال ہر پاسے چیخ و پکار ہون لگی۔ لرزدے گھر دی وجہ نال سارے صحن وچ آ گئے تے رحمت نے مٹی دا گھروندا بوہتا مضبوط نہ جاندے ہوئے نس نس کے اندروں شیواں باہر لیان لگی۔ ساریاں نے منع وی کیتا مگر بڑھاپے دی کمزوری دے باوجود گھر دی شیواں نوں محفوظ کرن وچ مصروف رہی۔ آٹا’ برتن تے سامان کڈ کڈ کے صحن وچ ڈھیر کردی جا رہی سی کہ اک زور دے جھٹکے نال کچا گھر زمین بوس ہو گیا۔ اوہو رحمت جہنے سالاں محنت مزدوری وچ ساتھ دتا’ گھر دی تعمیر وچ برابر دی شریک رہی۔ اوہ ملبے تھلے دب کے دم توڑ گئی جہدے تے اوہنوں محسوس ہویا کہ ہجرت دی آزمائش اجے ختم نہیں ہوئی۔ کسمپرسی دی وجہ نال
تجہیز تے تکفین دی سوچاں پریشان کرن لگیاں۔ دل توں اک ای آواز آندی کہ جہنے ہر مشکل وچ ساتھ دے کے ہمیشہ ڈھارس بندھائی۔ اوہدی آخری ہجرت
کجھ بہتر ہونی چاہیدی اے ۔ ایہناں سوچاں وچ کدوں شام ڈھلی تے فیر کدوں دن چڑھیا پتہ ای نہیں چلیا تے فیر سوٹ بوٹ پائے کجھ سرکاری بابو آئے تے افسوس کرن دے نال کجھ رقم پھڑاندے ہوئے تصویراں بنوا کے چلے گئے۔ کجھ رقم رحمت دی تجہیز تے تکفین وچ اٹھ گئی۔ واقعی اوہ رحمت سی زندگی بھر دکھاں توں بچاندے بچاندے آخری ہجرت اتے وی پریشانی نہ ہون دتی اوہدے جان مگروں کمزوری تے تنہائی دا احساس فزوں تر ہو گیا۔ کجھ دن لنگھے تے کسی نے اخبار وچ سائع ہون والی تصویر دا دسیا تے جیویں دل چھلنی جیا ہو گیا جہڑے ملک اتے پورا خاندان قربان کردتا اوہ معمولی جئی رقم دین دی تشہیر کرن تے اک غریب نوں رسوا کرن دا سامان کر گئے۔
پانی اللہ دی رحمت اے۔ ایہہ مردہ زمین نوں زندہ کردا تے ہرا بھرا کردا اے۔ اوہو گارے تے مٹی دا بنیا گھر جہڑا زلزلے دی تباہ کاریاں دی نذر ہو گیا سی۔ اک واری فیر جیسے تیسے بنا لیتا سی کہ 2010 نوں اچانک خبر آئی اس سال چھاجاں بارش برسن توں سیلاب آ گیا اے جہدی وجہ نال دریاواں تے ندی نالیاں وچ طغیانی اے۔ ایہناں خبراں توں دل دھڑکن لگیا کہ جانے ہن کہنوں ہجرت دا سامنا کرنا پووے گا۔ معاشی مسائل وچ گھرے ملک دے حکمراناں نے انجلینا جولی دی خدمت وچ دیدہ دل فرش راہ کر دتے لیکن ہم وطناں نوں معاشی مسائل دا رونا رو کے ٹرخا دتا فیر اک شام سائرن وجن لگے۔ ایسے ای سائرن رمضان وچ افطاری ویلے وی وجائے جاندے نیں لیکن ہن کہ سائرن وچ کجھ ہور قسم دی ای شدت محسوس ہوئی ایہہ اک واری فیر وڈے سیلاب دے خطرے دا سائرن سی۔ کوئی پیدل تے کوئی سواری اتے سوار جان بچان لئی گھربار چھڈ کے نسدا نظر آیا۔ ویکھدے ای ویکھدے لمحیاں وچ سارا پنڈ ویران ہو گیا اوہدے کول کنبے دے کجھ بندیاں دے سوا کجھ نہیں سی۔ کمزور جئی جان چلن توں قاصر سی ایسے لئی اہلخانہ نوں نمناک اکھاں نال چھیتی چھیتی رخصت کیتا بنھے جانوراں نوں آزاد کردتا تے بیٹھ کے ایہہ انتظار کرن لگیا کہ ویکھو ایہہ سیلاب کہدی ہجرت دا پیغام لیاندا اے؟
پانی دے شور توں اک واری تے خوفزدہ ہو گیا مگر ہمت کردے ہوئے کسی نہ کسی طرح چھت اتے پہنچ گیا لیکن مٹی دا گھروندہ کدوں تک ثابت قدم رہندا پانی دا بہائو اوہنوں وی ریت وانگوں بہا لے گیا۔ ایسے لئی چھت اتے ہون دا وی کوئی فیدہ نہیں ہویا۔ 2008 دے زلزلے نے اوہدی شریک حیات رحمت نوں کھو کے آخرت ول ہجرت کرائی۔ ایہہ سیلاب اوہنوں ہجرت دا پیغام دیندا محسوس ہویا۔ ناتواں وجود بچان دی ہر ممکن کوشس کیتی مگر کوئی تدبیر کامیاب نہیں ہوئی۔ ہر کوشش نکام ہوندی گئی۔ ویکھدے ای ویکھدے سال بھر لئی گھر وچ جمع گندم پانی دا حصہ بن گئی۔ فیر گھر دا سامان پانی وچ بہندا وکھائی دین لگیا۔ گھر ڈگن مگروں اوہ خود وی منہ زور پانی وچ غوطے کھان لگیا لیکن دور تے نزدیک کوئی بچان والا نظر نہیں آیا۔ اوہو لاٹھی جہدے سہارے کجھ قدم چل لیندا سی پانی نے اوہ وی کھو لیتی۔ ایہناں لمحیاں نے اوہنوں یقین دوا دتا کہ ایہہ سیلاب رحمت نہیںزحمت اے۔ ایہہ مردہ زمین نوں زندہ کرن دے بجائے تباہی پھیللاوے گا سیلاب توں اوہنوں آخری ہجرت یقینی نظر آن لگی۔ حکمران تے ملک دی معاشی حالت دی خرابی دا رونا روندے ہوئے باور کراندے رہندے نیں کہ اوہ عوام دی مدد توں قاصر نیں۔ اوہنے وی یقینی موت ویکھ کے خود نوں پانی دی بے رحم لہراں دے سپرد کردتا۔ڈُبن ابھرن وچ کجھ لمحے ای لگے تے فیر دن دے چانن دے باوجود انھیرا جیا محسوس ہون لگیا۔ پانی دا شور وی جیویں گھٹ ہون لگیا۔ اوہنے خود نوں خاصا ہلکا پھلکا محسوس کیتا۔ ڈبن دی بجائے ہن اوہ پانی اتے تیرن لگیا۔ بھک تک دا احساس وی ختم ہو گیا۔ ایس سیلاب نے جیویں زندگی دی ساری مشکلاں آسان کر دتیاں۔ ہن کوئی حکومت’ سیاسی تے سماجی رہنما مدد کردا اے یا نہیں ملک دے 75ورھیاں مگروں وی جیسی معاشی حالت اے اوہنے اسلام دے قلعے وچ رہائش پذیر 22کروڑ پاکستانیاں نوں خدا حافظ آکھ دتا۔