کتھے عمران خان، کتھے جگتو فرنٹ

پہلے تہانوں جگتو فرنٹ دے بارے دس دیواں کہ جگتو فرنٹ کیہ سی؟ پنجاہ دی دہائی وچ چار جماعتاں تے مشتمل اک سیاسی اتحاد بنیا ایہ چارے جماعتاں اک دوجے دے خلاف سن اوہناں دے لیڈر اک دوجے دی شکل تک نہیں سن ویکھنا چاہندے پر ایہ سب جگتو فرنٹ وچ اکٹھے ہو گئے۔ ایہو حال پی ڈی ایم دا اے پی ڈی ایم اج دا جگتو فرنٹ اے اج دا ایہ جگتو فرنٹ عمران خان نال مقابلہ کر رہیا اے پر اکلوتے عمران خان نے ایہناں نوں چارے شانے چِت کر رکھیا اے۔ پی ڈی ایم دیاں پندراں جماعتاں اکلوتی تحریک انصاف توں ڈریاں نیں۔ عمران خان جنے وڈے جلسے کر رہے نیں پی ڈی ایم دیاں ساریاں جماعتاں سرکاری وسیلے استعمال کرکے جدوں وی جلسہ کرن دی کوشش کردیاں نیں تے اوہ جلسی ای ہوندی اے۔ اک مکارانہ چال دے تحت قومی اسمبلی توں پی ٹی آئی دے صرف یاراں استعفے قبول کیتے گئے حالاں کہ پوری پی ٹی آئی مستعفی ہو چکی اے۔ ہن جدوں قومی اسمبلی دے نو حلقیاں تے الیکشن دا مرحلہ آیا تے عمران خان نے فیصلہ کیتا کہ اوہ نو حلقیاں توں آپ الیکشن لڑن گے۔ چال چلن والیاں نوں عمران خان دی ایس انوکھی چال نے ہور پریشان کر دتا۔ ہن پی ڈی ایم یعنی جگتو فرنٹ دا امتحان سی کہ اوہ کیہ کرے؟ کسے نے مشورہ دتا کہ خیبرپختونخوا دیاں سیٹاں تے مولانا فضل الرحمن الیکشن لڑن۔ سندھ توں آصف علی زرداری شوق پورا کر لین تے پنجاب توں شہبازشریف آپ میدان وچ اترن یاں اپنے صاحبزادے نوں الیکشن لڑوان۔ ایس مشورے دے بعد مولانا صاحب ترکی چلے گئے۔ آصف علی زرداری نے دبئی وچ ڈیرے جما لئے تے مزہ شہباز لندن سدھار گئے۔ ہن صورتحال ایہہ وے کہ مبینہ طور تے اک سرکاری خفیہ ادارے دی رپورٹ شہبازشریف دی میز اُتے اے ایس رپورٹ وچ لکھیا اے کہ جو سیٹاں خیبرپختونخوا وچ نیں اوتھوں عمران خان ویہہ پ نجی ہزار دی لیڈ نال جتے گا۔پنجاب وچ ایہ مارجن دس توں پندراں ہزار دی لیڈ ہووے گا تے سندھ توں وی عمران خان دی جت اٹھ توں دس ہزار دی لیڈ نال ہووے گی۔ ایس رپورٹ نے پریشانیاں وچ ہور وادھا کر دتا اے جدوں توں بقول تحریک انصاف ایہ امپورٹڈ حکومت آئی اے ہر پاسے پریشانیاں ای پریشانیاں نیں ہن جو حکومت آپ پریشان ہووے اوہ لوکاں لئی آسانیاں کتھوں لبھے فیر جس حکومت دا مشن صرف مقدمیاں دا خاتمہ ہووے اوہنوں لوکاں دے مسئلیاں نال کیہ سگوں اوہنوں لوکاں نال کیہ؟۔
دوستو! میں پچھلے پنجی تریہہ ورھیاں وچ حکمراناں نوں بڑا نیڑیوں ویکھیا۔ اقتدار دے ایواناں نوں پرکھن دا موقع ملیا ایس تجربے دی بنیاد تے مینوں ایہ کہن وچ کوئی عار نہیں کہ ساڈے حکمران صرف اپنی گل کردے نیں۔ اوہناں نوں لوکاں نال کوئی غرض نہیں ایہ ہر ویلے اپنا مفاد سامنے رکھدے نیں۔ اکثر تے اجہے سن جو اپنے سوٹ تے ٹائیاں ڈسکس کردے سن کجھ اجہے سن کہ اوہ گڈیاں زیربحث لیاندے سن کجھ قرضیاں دی معافی دے طریقے لبھدے سن تے کجھ نویاں فیکٹریاں لان دیاں گلاں کردے سن تے کجھ تے اینے چالاک سن کہ اوہ اپنے ای ملک دا پیسہ دوجے ملکاں وچ گھلدے سن ایہ لمحہ میرے لئی ہور وی تکلیف دہ سی کہ ایہ کیہو جہے پاکستانی لیڈر نیں جو اپنی دھرتی دا سرمایہ بیرونی دنیا دے حوالے کر رہے نیں پر عمران خان ایہناں ساریاں توں وکھرا سی’ بطور وزیراعظم اوہناںنال میری آخری ملاقات اقتدار دے خاتمے توں کجھ دیہاڑ پہلاں ہوئی اوہ پاکستان لئی بڑے پریشان سن ایس ملاقات دا پورا احوال لکھ دینا واں۔ ایہ صبح ساڑھے دس وجے دا وقت سی وزیراعظم دے ہس مکھ تے خوبصورت ملٹری سیکرٹری بریگیڈیئر احمد نے مینوں جی آیاں آکھیا۔ کجھ دیر وچ قہوہ تے کھجوراں آ گئیاں مینوں دسیا گیا کہ ایہ محمد بن سلمان ولوں خاص تحفہ اے تسیں نوش فرمائو۔
خیر گل شروع ہوئی تے عمران خان کہن لگے میں اپنے لوکاں لئی دو حوالیاں نال پریشان آں۔ نمبر اک میری خواہش اے کہ لوکاں نوں ستا پٹرول دتا جاوے نمبر دو اسیں پام آئل ملائیشیا توں درآمد کرنے آں ایہ آئل ساڈے ایتھے کوکنگ آئل یاں گھیو بنان والیاں فیکٹریاں استعمال کردیاں نیں ایہ فیکٹریاں کوکنگ آئل تے گھیو لوکاں نوں مہنگے مُل دے رہیاں نیں پر ایہدی وجہ ایہہ وے کہ سانوں پام آئل مجبوراً درآمد کرنا پیندا اے ایہدا کیہ حل کیتا جاوے؟ دو پریشانیاں سنن دے بعد میں پٹرولیم لئی اک حل دسیا تے اوہناں نے اگلی گل سنن توں پہلاں ای فون پھڑیا تے کہیا کہ شوکت ترین نال گل کرائو۔ اوہناں نے اوہ حل وزیرخزانہ دے کنیں پایا میں اوہناں نوں آکھیا کہ دوجے مسئلے دا حل تھوڑا وکھرا اے سانوں فوری طور تے پام آئل تے امپورٹ ڈیوٹی ختم کر دینی چاہیدی اے پر ایہدے نال نال اپنی ساڑھے یاراں سو کلو میٹر لمی ساحلی پٹی تے پام دے رُکھ لگوانے چاہیدے نیں تاں جے کجھ عرصے بعد پاکستان پام آئل وچ خودکفیل ہو جاوے۔ اسیں پام آئل برآمد کرن دے قابل ہو جائیے۔ جدوں تک ایہ رُکھ جوان ہون گے ایس دوران سانوں دیسی گھیو دی پیداوار ودھان لئی ڈیری ڈویلپمنٹ تے دھیان دینا ہووے گا۔ سانوں کاشت کاراں نوں کہنا ہووے گا کہ اوہ سرہیوں دی کاشت زیادہ کرن تاں جے لوک سرہیوں دا تیل کوکنگ آئل دے طور تے استعمال کرن۔
ایہ واقعہ میں ایس لئی سنایا اے کہ مینوں اکلے عمران خان ورگا حکمران نظر آیا جو لوکاں لئی پریشان سی اوہنوں اقتدار توں وکھ کرن والی پی ڈی ایم سمجھدی سی کہ اوہ ختم ہو جاوے گا پر اوہناں نوں ایہ پتہ نہیں سی کہ کرونا دے موسم وچ اپنے غریب لوکاں نوں باراں ہزار اوہناں دی دہلیز تے دین والا پاکستان دے غریباں دے دلاں وچ گھر کر چکیا اے اوہناں نوں ایہ وی پتہ نہیں سی کہ لوکاں نوں صحت کارڈ دین والا لوکاں دے دلاں وچ بس چکیا اے اوہنوں اقتدار توں وکھ کیتا گیا تے لوک مٹھائی ونڈنا بھُل گئے سگوں لوک احتجاجاً کھڑے ہو گئے۔ ایس لئی دوستو کتھے عمران خان تے جگتو فرنٹ’ پورے ملک دا ہر شہر’ ہر پنڈ عمران خان دی آواز بن چکیا اے جد کہ مخالفین دیاں اوازاں اپنے گھراں وچ وی محدود ہو چکیا ںنیں۔ بقول نوشی گیلانی
اس شہر میں کتنے چہرے تھے کچھ یاد نہیں سب بھول گئے
اک شخص کتابوں جیسا تھا وہ شخص زبانی یاد ہوا
٭٭٭