پنجاب ہائوس وچ چودھری الیاس گھمن دی ورھے گنڈھ

25اگست2022اپنے وٹس ایپ گروپ وراگ ادبی بیٹھک وچ اک پوسٹ پڑھی کہ پنجابی زبان دے مہان سیوک، سوجھوان، لکھاری تے آگو ”قائد پنجابی زبان تحریک”مان جوگ جناب چودھری الیاس گھمن جی ہوراں دی ورھے گنڈھ”سالگرہ”دے سلسلے وچ چیئر مین پنجابی میڈیا گروپ چیئرمین و بانی پنجابی اخبا بھلیکھا لہور، مہان پنجابی سیوک تے کھوج کار جناب مدثر اقبال بٹ ہوراں دی مجمانی تے آہر نال پنجاب ہائوس لہور وچ اک تقریب دا پربندھ کیتا گیا اے۔میںپوسٹ پڑھی تے دل خشی تے ایہناں مہان لوکاں نوں ملن دی سک پاروں سینے وچوں باہر آون لگ پیا۔ میں پرسنل تے گھمن صاحب نال رابطا کیتا۔پروگرام دے بارے پچھیا تے اوہناں مینوں اکو فقرا آکھیا کہ:ڈاکٹر صاحب نکی جہی اک تقریب اے بس۔۔۔۔۔ایہ پڑھ کے میں واپسی لکھیا کہ: چلو پھر کدی نصیب وچ ہویا تے مل لواں گے۔پر دل مطمئن نہ ہویا تے گھمن صاحب دے گوڑھے بیلی معروف پنجابی رسالا پنچھی انٹرنیشنل دے بانی جناب جاوید پنچھی نوں ایہ گل دسی۔ اوہناں آکھیا کہ: ڈاکٹر صاحب باقی سب چھڈو، بس تسی اپڑن دی کرو، رابطا رہوے گا۔میں انج کر کے اپنا ارادا پکا کر لیا۔روانگی ویلے اچانک اک خیال آیا کہ کیوں نہ سانجھ پبلیکیشنز دے مالک ”جتھے میری کتاب دریا آخر دریا ہوندن چھاپے چڑھ رہی اے”جناب امجد منہاس تے اوہناںدے کمپوزر جناب ارشد جی ہوراں نال رابطا کرکے مسودے دی پروف ریڈنگ فائنل کر لئی جاوے۔ اوہناں نال گل کیتی تے تقریب دے ویلے توں دو گھنٹے پہلے میں لہور واسطے نکل پیا۔لاری اڈا اپڑ کے باییکیا نوں میپ کال کیتی تے اوہنے مینوں مزنگ روڈ تے واقع سانجھ پبلیکیشنز تک اپڑا دتا۔ منہاس صاحب نے لہوریاں دی روایت مطابق دال چاول تے چاہ نال میری سیوا کیتی۔ میں پروف ریڈنگ مکمل کیتی۔منہاس جی ہوراں کجھ کتاباں دان کیتیاں تے کجھ مل لئے لیئاں۔ رکشا لیا تے اوکھ سوکھ نال پنجاب ہائوس اَپڑ گیا۔ اُتلے فلور تے تقریب شروع سی ۔پنچھی جی ہوراں میری آدر کیتی تے میں جا کے اک کرسی تے بہ گیا۔ کجھ مہاندرے جانے پچھانے لگے۔ اشارے نال سلام دعا ہوئی۔ جناب الیاس گھمن جی اچیچی کرسی تے بیٹھے انج لگدے پئے سن جسراں کسے عدالت وچ جج بیٹھا ہووے پر رویہ ججاں والا نہیں سی۔ مکھ تے نما نما ہاسا سوہنی من بھاونی اُچے سچے شملے والی پنجابی پگ بنھ کے پورے پنجابی پتر ہوون دا ثبوت دیندے پئے سن۔کجھ چر مگروں الیاس گھمن جی ہوراں مدثر بٹ صاحب نوں آپے ای میرا تعارف کروا کے مینوں سٹیج دے سامنے والی اک کرسی تے بہن دا اشارہ کیتا۔ میں اوہناں دے حکم مطابق جا کے بہ گیا۔ وارو واری متراں نے گھمن صاحب دی شخصیت، پنجابی زبان دی سیوا تے اوہناں ساہویں آون والیاں اوکڑاں دا ویروا کیتا تے نال ورھے گنڈھ دیاں ودھایاں وی دتیاں۔الیاس گھمن جی دے حکم تے ای ناچیز نوں گل بات کرن دا ویلا لبھیا۔ لمی چوڑی روایتی تقریر جھاڑن توں پرہیز کردیاں ہویاں کجھ گلاں تے مبارکباد پیش کرن مگروں اجازت لئی تے بہ گیا۔میری خشی دی حد نہ رہی جدوں گھمن صاحب نے اپنی گل بات وچکار آون والے سارے متراں دا شکریا ادا کردیاں ہویاں ناچیز بارے کھلم کھلا اس گل دا ذکر کر دتا کہ میں جان بجھ کے ڈاکٹر صاحب نوں مختصر جواب دتا سی کہ ایہ میری وجھا توں وکھت نہ کرن پر سچی گل اے، ایہ ایہناں دی محبت دا امتحان سی تے ایہ پاس ہو گئے نیں۔ لہذا میں ایہناں نوں اپنے ہتھیں اپنے گل والا سلارا”پٹکا”پوانا چاہواں گا تے نال ای ایہ اعلان وی کردا واں کہ اج دی اس محفل دے خاص تے اچیچے پروہنے ڈاکٹر صاحب نیں۔گھمن صاحب نے مینوں سٹیج تے سدیا، میرے گل وچ روایتی پٹکا پوا کے میرا مان ودھایا، نال ای آکھیا کہ ڈاکٹر صاحب بٹ صاحب سندے پئے نیں۔ ایہ پنجاب ہاوس اج توں بعد انج سمجھو کہ تہاڈا اپنا گھر اے۔ تے بٹ صاحب نوں ایہ وی دسیا کہ ڈاکٹر صاحب دی کتاب چھپدی پئی اے۔جدوں وی چھپ گئی اوہدی پہلی مکھ وکھالی دا پربندھ پنجاب ہاوس وچ ہووے گا۔ تقریب توں بعد کیک کٹن ویلے وی سب توں پہلاں ناچیز دے ہتھ چھری پکڑائی تے کیک کٹن دی ریت پوری کیتی۔بعد وچ اعلی قسم دا چائے پانی دا بندوبست سی۔ پر ویلے دی تھوڑ نے سکھ نال بیٹھن وی نہ دتا۔ لہور توں تاندلیانوالہ واسطے آخری بس 7وجے نکلدی اے تے میں لیٹ ہوون دے دکھوں چاہ دا چسکا پورا نہ لئے سکیا تے پھر بائیکیئے نوں میپ کال کیتی تے مسیں مسیں اپنی بس پکڑی۔ انج میں لگ بھگ رات دس وجے گھر اپڑیا۔مترو اک گل کرنا ضروری سمجھدا ہاںنہ تے میں کوئی نثر نگار ہاں تے نہ ای کوئی ناولسٹ ہاں، نہ ای مینوںسفر نامے لکھن دا شوق تے چج اے۔میری زندگی دی سبھ توں لمی لکھت ایہ ہے جہڑی میں اج تہاڈے ساہویں رکھی اے۔ ایہ سبھ کجھ نہ ہون دے باوجود میں ایہ سبھ کجھ لکھ گیا ہاں تے ایہدا مطلب اوس عظیم شخصیت الیاس گھمن دی محبت، نگھے ورتارے تے وراگ دا جذبا ہے جہنے ایہ سارا کجھ لکھن داچج تے حوصلا دتا اے۔لمی لکھت توںمن میلا ہویا ہووے تاں ایہ پڑھنہار دا اپنا مسلا ہے۔ میں اپنے دل دی گل تے چنگے لوکاں دی گل نہ کردا تے ضمیر مویاں لیکھے ہونا سی۔تسیں سارے پنجابی جگ جگ جیو تے وسے دیس پنجاب ،رب راکھا۔