نفرت اتے مبنی بیانیہ

ملک وچ افراتفری’ سیاسی بے چینی تے عدم تحفظ دی فضا اے تے کیہ مستقبل وچ چھیتی بہتری دا کجھ امکان اے؟ ایہدے جواب وچ وثوق نال ہاں کہنا بہت مشکل اے کیوں جے اخلاص دے منافی ساری جماعتاں دا بیانیہ نفرت اتے مبنی اے۔ سیاستدان ملکی مسائل حل کرن تے توجہ دین دے بجائے ایہہ ثابت کرن وچ مصروف نیں کہ اوہناں دے سوا کسے ہور نوں ملک تے قوم دا احساس نہیں بلکہ ملک دشمنی دا ایجنڈا اے۔ ایہہ طرزعمل کسے طور ملک تے عوام دے مفاد وچ نہیں ۔ ذاتی لڑائیاں لڑن دی بنا تے ملک دے اصل مسائل نظرانداز ہو رہے نیں۔ایسے حالات وچ جدوں ملک دے طول و عرض وچ عوام نوں سیلاب دی تباہ کاریاں دا سامنا اے۔ فیر وی سیاسی قیادت دا رویہ تبدیل نہیں ہو سکیا ۔ لاتعلقی تے اک دوجے نوں نیچا وکھان لئی جنونی ہونا کسے طور لائق تحسین نہیں۔
ملک نوں کئی گھمبیر مسائل دا سامنا اے۔ روزگار دے موقعے گھٹ ہون دی بنا تے بے روزگاری وچ وادھا ہوندا جا رہیا اے۔ قوت خرید گھٹ ہون نال شہریاں دی وڈی تعداد نوں غذائیت دی کمی دا سامنا اے۔ جدوں ملک وچ غربت تے افلاس وچ مسلسل وادھا ویکھن وچ آرہیا اے تے لوکاں دا حکومتی یا نجی اداریاں توں ملن والی امدادی رقماں یا سامان اتے انحصار ودھ رہیا اے۔ روزگار دے موقعے ودھان دی لوڑاے۔ سیاسی قیادت بے روزگاری جئے مسائل وچ دلچسپی لے کے حل کر کے ستائش حاصل کر سکدی اے مگر ہو ایہدے الٹ رہیا اے۔ بے نیازی تے لاتعلقی ظاہر کر کے عوام دے دل نہیں جتے جا سکدے۔ ایہہ درست اے کہ قومی خزانے دی حالت پتلی اے تے اوہ کروڑاں افراد دی کفالت دا متحمل نہیں ہو سکدا مگر قومی قیادت دا نفرت اتے مبنی موجودہ رویہ بے نیازی دے نال کسی حد تک سفاکی اتے مبنی اے۔ ایسے لئی غربت وچ کمی نہیںآ رہی۔ سیاستداناں دی نظر ملکی مسائل حل کرن دے بجائے سیاسی فیدے اتے اے ۔ ملک دی معیشت درست کرن دے دعویدار موجودہ حکمران وی اہلیت تے صلاحیت توں مسئلے حل کرن دے بجائے وقت گزار پالیسی اتے عمل پیرا نیں تے ایس کوشش وچ نیں کہ کوئی ایسا عجوبہ ہو جاوے کہ اوہ اگلے عام انتخابات وچ اینی اکثریت حاصل کر لین کہ بآسانی حکومت بنا سکن مگر اکثریت حاصل کرن لئی عوام دے دل جتنا لازم اے لیکن ایس حوالے نال کدھرے کوئی کم ہوندا نظر نہیں آندا۔ ایسے وجہ نال نہ صرف معاشی مسائل حل ہون دے بجائے بدستور موجود نیں بلکہ عوام اتے وی غربت تے افلاس دی گرفت مضبوط ہوندی جا رہی اے مگر نفرت اتے مبنی بیانیہ رکھن والیاں نوں لگدا اے کہ مجبور تے پریشان حال عوام دا احساس تک نہیں۔ جے ہوندا تے ایسی سفاکی تے بے نیازی دا مظاہرہ ہرگز نہ کردے۔
چالوں سال مون سون دی بارشاں نے عشریاں پرانے ریکارڈ توڑ دتے نیں ۔ ملک دے کئی علاقیاں وچ ہن وی جل تھل اے۔ ایسے علاقے وی سیلاب دی زد وچ نیں جہناں نوں اکثر پانی دی قلت دا سامنا رہندا اے۔ شہراں وچ موجود نکاسی آب دا نظام وی چالو مہینے ہون والی بارشاں دے سامنے بے بس نظر آیا۔ نشیبی علاقیاں وچ جانی تے مالی نقصان دے درجناں واقعات ہوئے۔ کوہ سلیمان’ بلوچستان تے گلگت بلتستان دے اکثر علاقیاں دا ملک نال رابطہ منقطع رہیا۔ ایہدے باوجود قومی قیادت وچ افہام و تفہیم دا جذبہ عنقا نظر آیا۔ مسائل وچ گھرے لوکاں دی جے کجھ مدد وی کیتی تے مخالف سیاستداناں نوں بدنام کرن دا موقع ہتھوں نہ جان دتا۔ ایہہ طرز عمل کسی طور ملک یا قوم لئی سودمند نہیں بلکہ ایہہ نفرت اتے مبنی بیانیہ عوام وچ قومی قیادت دی ساکھ وچ کمی لیان دا کارن بن سکدا اے۔ ایس طرزعمل نال عوام وچ ایہہ احساس تقویت پھڑے گا کہ قومی قیادت نوں عوام توں ودھ اپنے سیاسی مفاد تے اہداف بوہتے عزیز نیں۔ سیاسی قیادت نوں ایہہ نہیں بھلنا چاہیدا اے کہ جے ملک دی اکثریت نوں ہمدردی دے دعوے کھوکھلے ہون دا پختہ یقین ہو گیا تے انتخابی فیدے توں درکنار عوامی نفرت دے شکار ہو سکدے نیں۔ مستقبل وچ سیلاب دی تباہ کاریاں ختم کرن لئی ضروری اے کہ نویں آبی ذخائر دی تعمیردا کم ہنگامی بنیاداں اتے کیتا جاوے۔
عوام اینی وی سادی نہیں جہنی سیاسی قیادت سمجھدی اے۔ جہدا ثبوت ایہہ اے سیلاب زدگان دی امداد لئی وزیراعظم ولوں اک خصوصی فنڈ قائم کرن دے اعلان نوں دو ہفتے گزر چکے نیں مگر بار بار دی اپیلاں دے باوجود ایس امدادی فنڈ وچ شہریاں ولوں رقماں جمع کران دا سلسلہ شروع نہیں ہو سکیا۔ ایہدی اک وڈی وجہ تے ایہہ اے کہ اوہ سیاسی طور تے اک غیر مقبول شخصیت نیں۔ دوجا ایہہ کہ اوہناں دی عملداری عملی طور تے وفاقی دارالحکومت دی حد تک اے۔ ایسے بنا تے امور مملکت اتے گرفت نہ ہون دے برابر اے جہدی وجہ نال اوہناں دی آواز دے جواب وچ ہاں آکھن دی رفتار مایوس کن اے لیکن کیہ حالات دا اوہناں نوں خود وی کسی حد تک ادراک اے؟ اوہناں دے اقدامات تے ترجیحات توں ایسے کوئی اشارے نہیں ملدے بلکہ اوہناں دے اعتماد توں انج محسوس ہوندا اے کہ آمدہ انتخابات وچ اکثریت حاصل کرن دا کامل یقین اے۔ جے اوہ عمران خان دی تقریر نوں بنیاد بنا کے ملکی منظرنامے توں ہٹانا چاہندے نیں تے انج ہونا بظاہر مشکل ای نہیں ناممکن اے جہدی کئی وجوہات نیں۔ اک وڈی وجہ تے ایہہ اے کہ عمران خان ملک دی سب توں مقبول جماعت دے ایسے سربراہ نیں جہناں دی آواز اتے لوک متحرک ہوندے نیں لیکن وزیراعظم دے حوالے نال عوام وچ ایہہ جذبہ مفقود اے ایس لئی کسی وی اقدام توں پہلاں حکومت نوں ایہہ پہلو ہرگز نظرانداز نہیں کرنا چاہیدا کہ مقبول سیاسی رہنما دے خلاف غیر جمہوری تے غیر قنونی اقدامات دے نتائج افراتفری تے انتشار وچ وادھے دا کارن بن سکدے نیں تے کیہ ایہہ بہتر نہیں کہ ملک دے حقیقی مسائل حل کرن لئی نفرت اتے مبنی بیانیہ ترک کر دتا جاوے۔
غیر معمولی بارشاں تے سیلاب توں زرعی پیداوار متاثر ہون دا خطرہ اے جہدے وَل سٹیٹ بینک نے وی حالیہ اجلاس وچ توجہ دوائی اے۔ شرح سود وچ کمی لیان دے بجائے پندرہ فیصد برقرار رکھن دا فیصلہ ظاہر کردا اے کہ ملک دے معاشی حالات ہن وی غیر متوازن نیں۔ تجارتی خسارہ وی گھٹ ہون دے بجائے ودھدا جا رہیا اے تے زرمبادلہ دے ذخائر محض 7.9 ارب ڈالر رہ گئے نیں۔ ایہہ صورتحال کسے طرح وی حوصلہ افزا نہیں بہتری آن دے بجائے جے معاشی ترقی ہور متاثرہوندی اے تے لامحالہ مہنگائی تے دبائو شدید ہووے گا تے زرعی پیداوار وچ کمی معاشی بگاڑ دی رفتار ہور تیز کر دیوے گی۔ موجودہ حالات قومی قیادت دی صلاحیتاں دا امتحان نیں۔ بہتر ایہو اے کہ قومی قیادت نفرت اتے مبنی بیانیے اتے کاربند رہن دی بجائے لچکدار رویہ اپنائے تے اک دوجے لئی گل بات دے بوہے بند نہ کرے۔ قیادت پست سوچ تے تنگ نظر نہیں ہوندی۔ عمران خان دے خلاف دہشت گردی دا مقدمہ تے فیر توہین عدالت دی کارروائی ایسا بے لچک رویہ اے جہدے توں ایسا تاثر ملدا اے کہ سیاسی قیادت نے آپس وچ سلسلہ جنبانی دے بوہے مستقل بند کر دتے نیں تے سیاسی لڑائی وی اداریاں دے سہارے لڑی جا رہی اے۔ ایہہ اطوار کسی طور لائق تحسین نہیں بلکہ اوہناں دے بھیانک نتائج سیاسی استحکام دے سفنے نوں توڑن دا کارن بن سکدے نیں۔ انتقامی کارروائیاں دی بجائے نازک معاشی حالات دی وجہ نال ملک نوں ایسی نتیجہ خیز حکمت عملی دی لوڑ اے جہدے توں نہ صرف سیلاب متاثرین تے معیشت دی بحالی ممکن ہووے بلکہ غربت تے افلاس گھٹ کرن لئی زرعی تے صنعتی پہیہ رواں ہووے۔ سیاسی استحکام لئی سیاسی قیادت نوں انتقامی جذبات توں مغلوب ہو کے فیصلے کرن دے بجائے ملک و قوم دا مفاد مقدم رکھنا چاہیدا اے۔