بلھے شاہ دا عرس تے سیلاب

لہور نال جڑے شہر قصوروچ سید عبداللہ شاہ المعروف بابا بلھے شاہ دا 265 واں عرس جاری اے۔ بلھے شاہ پنجاب دے اوہ قدآور فلسفی تے شاعر نیں جہناں دی فکر تے آفاقی رنگ غالب اے۔ اوہناں نال محبت تے عقیدت صرف پنجابی زبان بولن تے سمجھن والیاں تک محدود نہیں سندھ’ خیبرپختونخوا’ بلوچستان’ گلگت تے کشمیر دے لوک گلوکار وی اوہناں نوں اپنے انداز وچ گاندے تے اوہناں دا پیغام لوکاں تک اپڑاندے نیں۔ پاکستان توں باہر وی اک عالم اوہناں دی حیرت انگیز شاعری تے فلسفے دا مداح اے۔ کئی زباناں وچ اوہناں دے کلام دے ترجمے ہو چکے نیں۔ عرس دے دِناں وچ اوتھے تہانوں ہر فرقے تے عقیدے دا بندہ ملے گا۔ پاکستان آن والے تے وکھووکھ مذہباں نال تعلق رکھن والے صاحب علم و دانش اوہناں دے ڈیرے تے حاضری نوں اپنے واسطے باعث سعادت سمجھدے نیں۔
اوہ صرف پاکستان وچ رہن والیاں دے ای نہیں سگوں دنیا بھر وچ وحدت انسانی دی گل کرن والیاں دے مرشد نیں۔ اک اجیہا مرشد جہدی جیون کتاب دا اک اک صفحہ سارے چاہن والیاں تے ظاہر اے۔ جہناں نے اپنی پوری حیاتی منافقت’ مصنوعی پن’ مذہبی ریاکاری تے تعصبات دے خلاف جہاد کردے گزاری جہناں تے بہت ساریاں حقیقتاں کھل چکیاں نیں جو انسانی وحدت دا راز جان گئے سن جہناں نوں خالق تے مخلوق دے اٹوٹ بندھن دا علم ہو گیا سی۔ جو انسانی روح وچ روح مطلق دی موجودگی دا راز پا چکے سن جہناں نے کائنات وچ انسانی کردار دا سراغ لا لیا سی جہناں نے نگاہ’ ذہن تے دل تے پائے گئے پردے چاک کرکے اصلیت تک رسائی حاصل کر لئی سی۔ جہناں نوں پوری دنیا اک نقطے وانگوں اکٹھی وکھائی دیندی سی جہناں دی اکھاں تے شعور نوں ہر چہرے وچ جلوہ گر اک جھلک نظر آندی سی جہناں لئی ہر انسان معتبر سی’ جو نسلاں’ عقیدیاں’ علاقیاں تے ذات پات دے تعصب توں ماورا سی’ اوہناں دے کلام وچ پوشیدہ رمز تک جہناں دی رسائی ہو جاندی اے اوہناں لئی دنیا واقعی اک کنبہ بن جاندی اے۔
بلھے شاہ دے فلسفے دی روشنی وچ اج دی دنیا تے اج دے پاکستان نوں ویکھنی آں تے دل خون دے اتھرو روندا اے۔ ایس لئی کہ اج بلھے شاہ دی فکر دے متصادم راہ تے ٹر کے اسیں سارے تقسیم دے اک نہ ختم ہون والے سلسلے چوں گزر رہے آں ساڈا کوئی نظریہ نہیں رہیا۔ اسیں مفادات تے ضروریات دی پجاری ہو کے حق و باطل دے معنی و مفہوم دا نقشہ ای وگاڑ کے رکھ دتا اے۔ اقوام عالم دا وی ایہو حال اے۔ زیادہ ڈگریاں تے سائنسی ترقی دے بعد انسان نوں زیادہ وسیع النظری دا حامل ہونا چاہیدا سی پر اوہ دائرے وچ سکڑدا جا رہیا اے اوہ اپنی پسند ناپسند تک محدود ہو چکیا اے۔ اوہدی سوچ دا قفس اک اجہی تنگ کوٹھڑی وچ اے جہدے وچ سجری ہوا تے چانن لئی کوئی روشن دان موجود نہیں۔ عجیب طرح دی ہوس نے پورے ماحول نوں گھیر رکھیا اے۔ طلب رہ گئی چاہت رخصت ہو گئی’ پاکستان تے ایس ویلے قیامت ورگا سماں اے۔ دنیا وچ قیامتاں برپا ہوندیاں رہندیاں نیں۔ قدرتی آفتاں قیامت دے ٹریلر نیں۔ پلک جھپکدے جہناں دے گھر بار اجڑ گئے’ خاندان’ دوست احباب ہمیشہ لئی بچھڑ گئے اوہناں لئی ایہو قیامت اے۔ لوکاں نوں مردے ہوئے ویکھنا گہرے کرب دا باعث اے۔ زندگی نوں فنا دے سمندر وچ غرق ہو کے بقا ول ودھنا اے۔ ہر بندے نے موت نوں گلے لانا اے پر بے بسی تے لاچاری وچ گھرے لوکاں نوں خوف دے عالم وچ گزردے ویکھنا بہت وڈا المیہ اے۔ اسیں بھاویں لکھ بے حس ہو جائیے پر ساڈی روح سانوں کچوکے دیندی رہندی اے کیوں جے بلھے شاہ دی فکر دے مطابق ساڈی روحاں دے دکھ سکھ سانجھے نیں۔ اسیں اجتماعی خوشی تے اجتماعی دکھ توں اپنے آپ نوں وکھ نہیں کر سکدے۔ اسیں نہ وی منیے پر دوجیاں نوں دکھ وچ ویکھ کے ساڈے اندر غم دا دیپ جلن لگدا اے جو ساڈے وجود نوں مضمحل کردا رہندا اے۔ پاکستان نے کئی اوکھے حالات کٹے’ اک دنیا نے ڈوبن دی کوشش کیتی پر قدرت نے ہمت دتی’ لہراں نال ہاتھا پائی کردے کنڈھے آ لگے’ حالیہ سیلاب شاید پوری 75 سالہ قومی تریخ دی کٹھن ترین گھڑی اے کہ ایس توں پہلاں اینی وڈی قیامت ساڈے تے نہیں گزری۔ ایہدے وچ ساڈیاں کوتاہیاں وی شامل نیں کہ مستقبل دی منصوبہ بندی کدی ساڈی ترجیح نہیں رہی۔ فطرت دے الٹ چلن دی سزا دے بارے اسیں سوچیا ای نہیں سی۔ توازن وگڑن نال آن والی قیامت دا سانوں اندازا ای نہیں سی نہیں تے اسیں موجود جنگلیاں نوں کٹن تے اگ لان دی تھاں ہور جنگل اگاندے۔
اج دا سیلاب صرف ایس ورھے دی تباہی نال لے کے نہیں آیا سگوں ایہ اک لماں سلسلہ اے جہدے نال نبڑن دی منصوبہ بندی کرن دی ضرورت اے۔ موسمیاتی تبدیلیاں دے خطرناک نتیجیاں دا اجے آغاز ہویا اے۔ کمزور معیشت واے ملک تے ناگہانی آفت بڑی خطرناک ہو سکدی اے۔ فصلاں’ رُکھ تے مویشی سیلاب دی نظر ہو جان نال اگلے دیہاڑیاں وچ ڈاڈھی غذائی کمی دا سامنا ہو سکدا اے سانوں ایس ویلے اوہناں سارے عوامل تے سوچنا اے۔ خدمت خلق سب توں وڈی عبادت اے۔ ایس ویلے ہر صاحب استطاعت نوں سیلاب زدگان دے دکھ دور کرن دی کوشش کرنی چاہیدی اے پر سیاسی جماعتاں دا کردار زیادہ اہم اے۔ پانی کائنات دی سب توں وڈی حقیقت تے طاقت اے۔ ایہدے اگے کسے دا وَس نہیں چلدا۔ لمحیاں وچ کئی منزلہ پکیاں عمارتاں’ پلاں تے پلازیاں نوں تباہ کر دیندا اے۔ سوچ وی نہیں سکدے کہ کدوں زندگی دی ضمانت بنن والا موت دا روپ دھار لوے۔ سانوں اپنے ہم وطناں نوں فیر پیراں تے کھڑا کرن لئی دنیا نوں آواز دینی ہووے گی کہ شاید آفتاں نال نبڑنا کسے وی صوبائی یاں مرکزی حکومت دے وَس دی گل نہیں۔ اجے تے اسیں حالت غم وچ آں۔ جانی و مالی نقصان دا تخمینہ تے پانی اترن دے بعد ہووے گا۔ ایس معاملے تے سنجیدگی نال غوروفکر کرن تے لائحہ عمل بنان دی ضرورت اے۔٭