یااللہ رحم فرما!سیلاب نے وطن عزیز وچ تباہی پھیلا دِتی

وطن عزیز دا 70فیصد علاقہ ایس ویلے سیلاب دی زد وچ اے۔ شروع دے تخمینیاں دے مطابق حالیہ سیلاب وچ ایس ویلے تک اک ملین مویشی اک ملین گھر تے 10ملین ایکڑ توں ودھ زمین اتے فصلاں تباہ ہو چکیاں نیں۔ انفراسٹرکچر دی مد وچ 4000کلومیٹر سڑکاں’ ہزاراں سکول تے سرکاری عمارتاں تے اوہناں عمارتاں تے گھراں وچ موجود سامان تے 1500 دے کول قیمتی انسانی جاناں وی جا چکیاں نیں۔ کیہ تہانوں اندازہ اے کہ ایہہ کنا وڈا نقصان اے۔
ایہہ گھٹ توں گھٹ 36ارب ڈالر دا نقصان بندا اے لیکن میری ناقص رائے وچ ایہہ اندازہ اصل نقصان توں بہت گھٹ اے۔ ایس موقعے تے وطن عزیز دی کجھ جماعتاں تے اوہناں دے کارکناں دا جذبہ خدمت انسانی واقعی قابل تحسین اے۔ اوہناں وچ بعض جماعتاں ایسیاں وی نیں جہڑیاں کہ پورا سال کسے وی آفات ارضی تے سماوی دے موقعے تے اپنے کارکناں دے نال پیش پیش رہندیاں نیں۔ ایس موقعے تے بعض ناعاقبت اندیش صرف فوٹوسیشن تے فرضی کارروائیاں وچ لگے ہوندے نیں۔ ایس موقعے تے ایدھی ویلفیئر’ چھیپا’ ریسکیو1122′ انصاف ویلفیئر ونگ’ لبیک پاکستان’ الخدمت پاکستان’ دعوت اسلامی’ تحریک منہاج القرآن’ جماعت اسلامی JDCفائونڈیشن’ حبیب فائونڈیشن تے پاکستان طبی کانفرنس سنے دوجی جماعتاں دے کارکنان سیلاب توں متاثرہ علاقیاں وچ دن رات مصروف عمل نیں۔
چیئرمین تحریک انصاف تے پچھلے وزیراعظم پاکستان عمران خان نے پچھلے دناں ٹیلی تھون دے ذریعے تن گھنٹے وچ 500کروڑ دی رقم اوورسیز پاکستانیاں کولوں حاصل کیتی۔ واقعی ایس موقعے اتے اوہناں دا جذبہ قابل تحسین اے۔ ایس ویلے جے گل نوں ودھا چڑھا کے کرن دے بجائے گھٹ توں گھٹ حساب نال کیتی جاوے تے انج کیتی جا سکدی اے کہ پاکستانی قوم دے تیجے حصے نے اپنے پچھلے 12 سال دی کمائی تے بچت تے گھر ایس سیلاب وچ گوا دتے نیں۔ ہن اوہ دوبارہ فیر توں آباد ہون گے۔ ایس کم وچ پنج سال اوہناں نوں لگ جانے نیں تے فیر ہور پنج سال گزرن گے تے دوبارہ سیلاب آ جاوے گا تے فیر بربادی ہو جاوے گی۔
بحیثیت قوم اسیں بہت تنزل دا شکار آں۔ سیلاب زدگان دی مدد کرنی چاہیدی اے تے اسیں کراں گے وی۔ سیلاب زدگان دی مدد تے مسلم ملک تے غیر مسلم ملک وی کر رہے نیں۔ سوال ایہہ پیدا ہوندا اے کہ سیلاب زدگان ساڈے تے ہم وطن نیں اوہناں وچ ساڈے دوست ‘ عزیز رشتہ دار وی نیں تے اسیں اوہناں لیئی ایسا کیہ کر سکنے آں کہ آئندہ اوہناں دی ایسی حالت نہ ہووے۔ اوہدا اک ای حل اے کہ ڈیم تعمیر کیتے جان تاں جے سیلاب دی شدت گھٹ توں گھٹ ہووے۔ ایس توں ودھ کے اوہناں دی کوئی مدد نہ ہووے گی۔ مینوں ایس گل توں غرض نہیں کہ حکومتاں تے اداریاں دی کیہ ترجیحات نیں۔ کیہڑا ڈیم بنانا چاہندا اے تے کہڑا سڑکاں بنانا چاہندا اے۔ انفارمیشن دے ایس دور وچ اپنے پیاریاں دی ایسی تباہی ویکھ کے برداشت کر جانا ہر کسی دے بس دی گل نہیں۔ باقی رہے حکمراناں’ سیاسی پارٹیاں تے مقتدر اداریاں دی گل تے سب توں نہیں البتہ اوہناں دی اکثریت اپنی اپنی گڈول بنان دے چکر تے فوٹوشوٹ دے چکر وچ اے بلکہ جے پاکستانی قوم تھوڑاجیا غور کر لووے تے اوہ ایس نتیجہ اتے پہنچ جاوے گی کہ اشرافیہ ایس ویلے آپس وچ ایہہ ڈسکس کر رہی ہووے گی کہ چلو عوام دا نقصان تے ہوندا ای رہندا اے مگر بیرونی ملکاں توں امداد تے قرضے لین دا کوئی بہانہ تے ہتھ آ گیا اے۔ جے اوہناں دے چہریاں’ رویاں تے عملاں توں تہانوں عوام دا درد محسوس ہووے تے میری تصحیح کردینا۔
پاکستان وچ مون سون دے غیر معمولی لمے سیزن دے دوران بارشاں تے اوہناں دے نتیجے وچ آن والے سیلاب توں این ڈی ایم دے مطابق ڈھائی مہینے وچ 1136افراد دی ہلاکت دی تصدیق ہو چکی اے۔این ڈی ایم اے دے مطابق مجموعی طور تے تن کروڑ 33لکھ توں ودھ آبادی ایس قدرتی آفت توں متاثر ہون دا تخمینہ اے۔پاکستان دے وزیر خزانہ مفتاح اسماعیل دا آکھنا اے کہ ایس سیلاب دے نتیجے وچ گھٹ توں گھٹ 10ارب ڈالر دا نقصان ہویا اے۔این ڈی ایم اے دے مطابق ہن تک ملک دے 110اضلاع وچ جانی یا مالی نقصان ہویا اے جتھے ساڈے 10لکھ توں ودھ مکان تے عمارتاں نوں نقصان پہنچیا اے اوتھے دیہی علاقیاں وچ ست لکھ توں ود ھ مویشی بہہ گئے نیں۔
صوبہ سندھ سیلاب توں سب توں بوہتا متاثر ہویا اے جتھے 23ضلعے آفت زدہ نیں جد کہ اک کروڑ 45لکھ توں ودھ آبادی متاثرین وچ شامل اے۔صوبہ بلوچستان دے 34ضلعے تے 91لکھ 82ہزار توں ودھ افراد متاثرین وچ شامل نیں۔پنجاب وچ حالیہ بارشاں تے سیلاب نال صوبے دے کل 8ضلعے تے اوتھے دی 48لکھ توں ودھ آبادی متاثر ہوئی اے۔خیبر پختوانخوا دے 33ضلعیاں وچ سیلاب نال 43لکھ توں ودھ لوک کسی حد تک متاثر ہوئے نیں۔این ڈی ایم اے دا آکھنا اے کہ سیلاب نال تن کروڑ 33لکھ توں ودھ دی آبادی متاثر ہون دا تخمینہ لایا گیا اے۔ایہدے مطابق ایس ویلے 72ضلعے متاثر نیں جہدے وچ بلوچستان دے 31′ سندھ دے 23تے خیبر پختوانخوا دے 9′ گلگت بلتستان دے 6 تے پنجاب دے 3ضلعے شامل نیں۔
این ڈی ایم اے نے اپنی رپورٹ وچ دسیا اے کہ پچھلے 24گھنٹیاں وچ سیلاب نال گلگت بلتستان وچ پنج پل تے 14کلومیٹر لمی شاہراواں نوں نقصان پہنچیا اے۔مجموعی طور تے 14جون توں ہن تک سیلاب نال 3471 کلومیٹر لمی سڑکاں’ 162پل تے 170دکاناں تباہ ہوئیاں نیں۔پچھلے 24گھنٹیاں دے دوران 58ہزار توں ودھ گھر تے عمارتاں جد کہ 8231مویشی بہہ گئے جہناں وچوں 7804 خیبر پختوانخوا تے 427 سندھ وچ متاثر ہوئے۔ہن تک مجموعی طور تے ساڈے دس لکھ توں ودھ گھر تے عمارتاں جد کہ ست لکھ 35ہزار توں ودھ مویشی بہہ گئے نیں۔
ایہہ عذاب الٰہی درحقیقت ساڈے اپنے کرماں دا پھل اے۔ اسیں جے اپنے گریبناں وچ جھانک کے ویکھیاں کہ اسیں کیہ حقوق اللہ تے حقوق العباد دا خیال رکھ رہے آں۔ کیہ اسیں اپنے مسلمان بھراں نوں تکلیف دین وچ فخر محسوس کرنے آں؟ ساڈے اندر جھوٹ’ منافقت’ فسق و فجور دی بہتات اے۔ اسیں چغل خوری’ غیبت’ الزام تراشی تے بہتان لان وچ فخر محسوس کرنے آں۔ حق حلال دی روزی کمان وچ اسیں کوسوں دورآں۔ خدارا! ہن سانوں سنبھلنا ہووے گا۔ خدا دے دسے ہوئے احکامات اتے عمل کرنا ہووے گا۔ سنت نبویۖ اتے عمل پیرا ہونا ہووے گا۔ حقوق اللہ تے حقوق العباد دا خیال رکھنا ہووے گا تے اپنے گناہواں توں سچے دل نال توبہ کرنی ہووے گی۔
ایس ویلے سانوں اپنے مصیبت زدہ بھین بھراواں دی امداد لئی ودھ چڑھ کے حصہ لینا ہووے گا تے ایس اوکھے ویلے وچ اوہناں نوں کلیا نہیں چھڈنا ہووے گا۔