سیلاب تے پاکستان دے ڈیزاسٹر مینجمنٹ ادارے

حالیہ سیلاب نے پاکستان دی تاریخ دے سارے سیلاباں دا ریکارڈ توڑ دیتا اے ایس دے مقابلے وچ 2010 دا سیلاب وی معمولی معلوم ہوندا اے۔پاکستان نوں 2010،11 تے 2012 وچ مختلف نوعیت دے سیلاباں دا سامنا کرنا پیا سی لیکن گزشتہ سیلاب دی نسبت ایس سیلاب دا جانی، مالی تے معاشی نقصان بہت زیادہ اے۔ایس سیلاب نال کم و بیش دو مہینیاں وچ 1136 لوگ موت دا شکار ہو چکے نیں۔ تین کروڑ تیس لاکھ آبادی دے متاثر ہون دا خدشہ اے۔ 20 ملین ایکڑ زمین وی ایس سیلابی پانی نال متاثر ہوئی اے۔ وزیر خزانہ دے اندازے مطابق پاکستانی معیشت نوں دس ارب ڈالر دا نقصان پہنچیا اے ملک دے ایک سو دس ضلعے جو جانی یا مالی طور تے متاثر ہوئے نیں اوتھے دس لکھ توں ودھ مکان تے عمارتاں نوں نقصان پہنچیا اے اور کوئی ساڈھے ست لکھ دے قریب مال مویشی موت دا شکار ہوے نیں۔ صرف صوبہ سندھ دی ڈیڑھ کروڑ دی آبادی سیلاب توں متاثر ہوئی اے۔ اکتیس سو کلومیٹر توں زائد سڑکاں اور بے شمار پل ٹٹ پھٹ گئے نیں۔
ساری دنیا نوں ماحولیاتی تبدیلیاں کارن موسمیاتی تبدیلیاں دا سامنا اے پاکستان دے زیادہ علاقے بارشاں دی وجہ توں سیلابی پانی وچ ڈوبے ہوئے نیں۔ صوبہ بلوچستان تے سندھ سب توں ودھ متاثر ہوے نیں اوتھے انتظامی اداریاں دی کمزور پلاننگ،ناقص مینجمنٹ تے گھٹ وسائل کھل کے سامنے آگئے نیں۔ پاکستان وچ جس ویلے وی کوئی آفت آندی اے اوس قدرتی آفت نوں خدا دا عذاب کہیا جاندا اے، لیکن اوس آفت تے قابو نہ کرن دی وجہ جو مس مینجمنٹ اے اوس دی زمہ داری کوئی سرکاری تے نیم سرکاری ادارہ قبول نہیں کردا۔آفتاں ہر ملک تے آندیاں نیں تے پاکستان وی اونہاں تو وکھ نہیں۔ لیکن دوسرے ملکاں وچ ایسی آفتاں توں نبڑن دی جو حکمت عملی اپنائی جاندی اے بدقسمتی نال پاکستان وچ اوس دا فقدان اے۔ دوسرے ملک تے ادارے انج دے حالاتاں دا سامنا کرن دی تیاری کردے نیں تے ساڈی حکومت تے ادارے ڈونگھی نیندر سوتے رہندے نیں،پتا اوس ویلے لگدا جدوں پانی سر توں گزر چکیا ہوندا اے۔1947 توں پاکستان وچ کئی سیلاب آئے جو عوام لئی معاشی طور تے کمر توڑ ثابت ہوئے لیکن حکومت طرفوں ایس نوں قابو کرن لئی کوئی خاطر خواہ کم نہیں کیتا گیا۔ حکومت دی زیادہ توں زیادہ کوشش ریسکیو تے ریلیف آپریشن تک رہی اے۔ کدھے وی ایس دا مستقل حل کڈھن ول دھیان ای نہیں کیتا گیا تاکہ اینہاں نال ہون آلی تباہی تے نقصان توں بچیا جا سکے۔ایس سیلاب تے وی اگر حکومتی سطح تے ریسکیو آپریشن دا جائزہ لئیے تے کمزور پلاننگ تے سست کارکردگی سامنے آندی اے۔ ریسکیو تے ریلیف آپریشن شروع ہون تک عوام دی وڈی تعداد ایس توں متاثر ہو چکی سی۔ ریسکیو آپریشن وچ تیزی لیاون لئی وزیراعظم تے وزیر اعلی نوں سیلاب متاثرہ علاقیاں دا دورہ کرنا پیا۔عوام لئی ایس توں ودھ تکلیف دہ چیز اے کہ حکومتی سیاستدان تے اپوزیشن ایس ویلے وی اپنی سیاسی نورا کشتی کھیڈ رہے نیں حکومت اپنی جھوٹی آنا دی تسکین لئی اپوزیشن تے سیاسی مخالفاں تے فوجداری تے دہشت گردی دے جھوٹے مقدمے بنان وچ مصروف اے۔ایس صورتحال وچ اک دوجے نوں سیاسی منظر نامے توں غائب کرن دا،بدلے دی ایس سیاست وچ ملک تے قوم دا کی نقصان ہوئے گاایس دا کی نتیجا آسکدا اے کسے نوں پروا نہیں۔۔ اے سیلاب اک قومی سانحہ اے تے ایس لئی سیاسی لڑائی توں اوپر سوچن دی لوڑ اے پاکستان دی آبادی دا وڈا حصہ غربت دی چکی وچ پھسیا اے تے رہی سہی کسر ایس سیلاب کڈھ چھوڑی اے جتھے سرکاری تے نیم سرکاری محکمیاں دی نااہلی کھل کے سامنے آگئی اے۔ساڈے سیاستداناں نوں چاہی دا اے کہ اقتدار دی لڑائی چھڈ کے سارا دھیان سیلاب متاثرین ول کرن۔ لیکن ایس موضوع تے فر کسے دن وی لکھ سکدے آن۔ آج دے موضوع ول آندے آں۔
پاکستان وچ سرے توں ایس قابل کوئی ادارہ ہے ای نہیں جو آون آلی کسے آفت توں خبردار کر سکے۔ پندرہ سال پہلے ایک ادارہ نیشنل ڈیزاسٹر مینجمنٹ اتھارٹی (این ڈی ایم اے) بنایا وی گیا۔جس دی مڈھلی زمہ داری آون آلیاں قدرتی آفات نال
نبڑناں اے۔لیکن ایس ادارے کول ٹیکنالوجی، جدید آلات تے مشینری اے تے نہ ای مطلوبہ وسائل نیں۔ جو کچھ ایس ادارے نوں دتا جاندا اے اوس تے کرپشن تے بد عنوانی دے کئی سکینڈل سامنے آچکے نیں۔ ایس وجہ توں اے ادارے ہنگامی صورتحال توں نبڑن توں قاصر نیں۔ ویکھیا جاوے تے صوبائی سطح تے وی پراونشل ڈیزاسٹر مینجمنٹ دے ادارے موجود نیں لیکن اینہاں دی کارکردگی وی حالیہ تباہکاریاں توں بعد سامنے آچکی اے۔ صوبائی حکومتاں ڈیزاسٹر مینجمنٹ دے ایناں اداریاں نوں پراونشل، ڈویژنل اور ضلعی سطح تے مضبوط کرن وچ ناکام رہی اے۔ایناں اداریاں نو مطلوبہ وسائل ای نہیں مہیا کیتے گئے،ایس کارن اے ادارے کسے وی طرح دا ریسکیو تے ریلیف آپریشن کرن وچ معذور نظر آے۔ہر حکومت نے من پسند بندے بھارتی کر کے اداریاں دا انفراسٹرکچر تباہ کر دتا۔
نیشنل ڈیزاسٹر مینجمنٹ اتھارٹی لئی جدید ٹیکنالوجی اور تکنیکی طور تے ماہر افراد دی اک ٹیم تیار کرنا لازمی اے۔فوجی ہیلی کاپٹر تے جوان ہنگامی طور تے ریسکیو آپریشن لئی اس وچ شامل تیہو سکدے نیں لیکن ڈیزاسٹر مینجمنٹ دی پوری زمہ داری اونہاں نوں نی دتی جا سکدی۔ نیشنل ڈیزاسٹر مینجمنٹ اتھارٹی نوں چاہی دا اے کہ قدرتی آفات توں نبڑن لئی دوسرے متعلقہ اداریاں نال ریگولیٹ اور
کوآرڈینیٹ کرے اور جدید ٹیکنالوجی تے ماہر افراد دی اک ٹیم تیار کرے تاکہ آون والے وقت وقت وچ کسے وی آفت نوں تکنیکی طریقے نال قابو کیتا جاوے۔ کیونکہ سیلاب پاکستان وچ اکتر آن آلی آفت اے سو ایس توں بچن لئی اور ایس دے اثرات ختم کرن لئی فوری تے غیر معمولی کم کرنا ضروری نیں۔ قدرتی آفات نوں روکیا نہیں جا سکدا البتہ مناسب منصوبہ بندی تے بہتر اقدام کر کے اوس توں ہون آلے نقصان توں لازمی بچیا جا سکدا اے۔ ایس کم لئی این ڈی ایم اے موثر کردار ادا کر سکدا اے۔ نیشنل ڈیزاسٹر مینجمنٹ اتھارٹی، پراونشل اور ڈسٹرکٹ لیول تے ڈیزاسٹر مینجمنٹ اتھارٹی نوں مضبوط کر کے موثر کارکردگی وکھائی جا سکدی اے۔
این ڈی ایم اے نوں اپنے پہلے توں موجود ملازمین نوں تکنیکی طور تے ماہر کرن دی لوڑ اے ڈیزاسٹر مینجمنٹ بارے دنیا تے استعمال ہونے آلی جدید ٹیکنالوجی ، ڈیزاسٹر رسک ریڈکشن اور ڈیزاسٹر وارننگ دے نظام وچ بہتری دی لوڑ اے۔ مزید ڈیزاسٹرز توں بچن لئی این ڈی ایم اے پاکستان وچ عالمی سطح تے ڈیزاسٹر مینجمنٹ دے اداریاں مثلا محکمہ صحت، ریڈ کریسنٹ سوسائٹی، ولڈ ہیلتھ آرگنائزیشن تے اقوام متحدہ دے دفتر برائے رابطہ برائے انسانی امور نال رلت وی کر سکدا تاکہ کسے وی آفت دے آن توں پہلا موثر منصوبہ بندی کیتی جا سکے۔