سُر دی پکی نیئرہ نور

اسیں جہڑی شخصیات توں متاثر ہونے آں اوہناں دے کمال دا پہلو سطحی طور تے گل بات کرکے سمجھنے آں حق ادا ہو گیا۔ نیئرہ نور دی آواز ہمیشہ اینی پرتاثیر رہی کہ مینوں کدی اوہناں دی سادگی تے روحانی زندگی نوں پرکھن دی خواہش نہ ہوئی۔ سادگی دی صفت اوہناں لئی اہم ہووے گی جو گانا سنن دی تھاں ویکھن وچ دلچسپی رکھدے نیں۔ نورالہدی شاہ نمایاں حیثیت دی مالک نثرنگار نیں اوہناں دی نیئرہ نور نال ملاقات وی رہی’ وفات تے اک بے تاثر تحریر لکھ دتی جہنوں لوکاں نے دھڑادھڑ سوشل میڈیا تے حلوے وانگوں ونڈیا۔ جدوں قحط الرجال ہووے تے انج ای ہوندا اے۔ موجودہ دور دی اک وڈی گلوکارہ دا انتقال ہویا اے اوہدی گائیکی تے فن نوں چھڈ کے دسیا جا رہیا اے کہ اوہ سادگی دا نمونہ سن تے فکری تبدیلیاں دے زیراثر روحانیت ول مائل ہو کے گانا چھڈ چکیاں سن۔ کوئی گانا کیویں چھڈ سکدا اے نیئرہ نور دا وجود گانے نال مکمل ہویا اوہ اپنے وجود توں وکھ ہو کے کیویں زندہ رہ سکدیاں سن’ ہاں اوہناں نے اوہناں لوکاں دے نال کم کرن توں معذرت کر لئی سی جو موسیقی دے معیار توں واقف نہیں سن۔
نیئرہ دی آواز سُر دا اک بہائو اے جو کناں نوں سدا بھلا محسوس ہویا۔ اوہ شوبز دا حصہ رہیاں پر ایس طرح کہ اپنے آپ نوں وکھ رکھیا۔ نیئرہ نور دیاں گائیاں تقریباً ساریاں غزلاں سن رکھیاں نیں اوہناں نے فلماں لئی گھٹ گایا پر جناں گایا اوہنے اعلیٰ موسیقی دا ذوق رکھن والیاں توں داد کھٹی۔ نیئرہ نور دی سب توں ودھ سنی جان والی غزل اے جذبہ دل گر میں چاہوں ہر چیز مقابل آ جائے۔ بہزاد لکھنوی دی لکھی ایہ غزل ماسٹر منظورحسین دی ترتیب دتی گئی دھن تے گائی گئی۔ فلم گھرانہ دا گیت تیرا سایہ جہاں بھی ہو سجنا کہدے دل وچ نہیں اتریا۔ اوہدی موسیقی ایم اشرف نے دتی۔ فیر ایہ مشہور نغمہ روٹھے ہو تم کو کیسے منائوں پیا ساڈی روح وچ اتردا اے۔ آئینہ فلم دے ایس نغمے دی موسیقی روبن گھوش نے ترتیب دتی۔ بندش فلم دا نغمہ اچھا اچھا لاگورے پیارا پیارا لاگو رے وی نیئرہ نور دی آواز تے روبن گھوش دی موسیقی دا ملاپ اے۔
غزل تے رومانوی نغمیاں دے نال ملی نغمے وی گائے۔ فلم فرض تے ممتاز دا نغمہ اس پرچم دے سائے تلے ہم ایک ہیں ہم ایک ہیں کہدا پسندیدہ نہیں۔ ایہدی موسیقی ایم اشرف نے دتی۔ نغمہ وطن کی مٹی گواہ رہنا بڑا مقبول ہویا۔ پی ٹی وی دے ریکارڈ کیتے گئے ایس نغمے دی موسیقی خلیل احمد نے دتی۔ نیئرہ نور نے زیادہ تر نثاربزمی’ جاوید اللہ دتہ’ خلیل احمد’ ارشد محمود’ ایم اشرف’ شاہد طوسی’ ماسٹر منظورحسین تے روبن گھوش دی موسیقی تے گایا۔ ایہ سارے استاد نیں۔ اصل وچ شعیب ہاشمی’ ثمینہ احمد’ نوید شہزاد تے شہریار زیدی دا اک گروپ سی فیر اسراراحمد’ ایہناں لوکاں نے فلمی تے مقبول لوک گائیکی دے مقابل پڑھے لکھے طبقے نوں جس موسیقی نال روشناس کرایا نیئرہ نور اوہدا حصہ سن۔ ایہناں لوکاں نے مارشل لاء دے زمانے وچ جمہوریت پسنداں دیاں محفلاں وچ اعلیٰ معیار دی موسیقی پیش کیتی۔
ہارون عدیم دلچسپ واقعہ بیان کردے نیں کہ 1979ء وچ لہور ریڈیو سٹیشن جان ہویا جتھے اوہ غلام علی دے کول بیٹھے سن کہ فریدہ خانم آ گئیاں’ فریدہ خانم نے خان صاحب توں پچھیا کم کیسا اے’ غلام علی برجستہ بولے’ جس پروڈیوسر توں کم دا پچھو اوہ کہندا اے موسیقی حرام ہو چکی اے۔ ایہ اوہو زمانہ اے جدوں نیئرہ نور دا فن چمک رہیا سی۔ نیئرہ نور توں پہلے بیگم اختر نے مومن خان مومن دا کلام وہ جو ہم میں تم میں قرار تھا تمہیں یاد ہو کہ نہ یاد ہو گا کے دنیا توں داد کھٹی۔ نیئرہ نور بیگم اختر توں متاثر سن اوہناں نے ایہو غزل ایس سلیقے تے فنی گرفت نال گائی کہ غزل دی دھن تے مومن دے کلام نوں نویں زندگی دے دتی۔ روبن گھوش اپنی بیوی شبنم دیاں اکثر فلماں دی موسیقی دیندے رہے۔ جس فلم دے موسیقار روبن گھوش ہوندے اوہ شبنم تے فلمائے نغمے لئی مہناز یاں نیئرہ نور دا انتخاب کردے۔ نیئرہ نور گانے دوران زیادہ سرگم گھمان دے حق وچ نہیں سن ۔ اوہناں دی گائیکی دا دبستان ہموار گلے دے نال سر پھڑ کے سدھے سبھاء گانے دی تلقین کردا اے۔ جو لوک کہہ رہے نیں کہ نیئرہ نے کسے توں گانا نہیں سکھیا اوہ غلط نیں’ اوہناں دی ریاضت ایس گل دا پتہ دیندی اے کہ اوہ سر دی پکی تے موسیقی نوں سمجھدیاں سن۔ ایہو وجہ اے کہ فریدہ خانم تے اقبال بانو ورگیاں گلوکاراواں دی موجودگی وچ نیئرہ نور نے اپنی گائیکی دی پچھان بنائی تے قدردان پیدا کیتے۔
برطانیہ وچ رہندے ساڈے بزرگ دوست علی جعفر زیدی نے ایہناں دیہاڑیاں جدوں اپنی اک پوسٹ وچ نیئرہ نور دے صاحبزادے جعفر دی گائیکی دی تعریف کیتی تے میں جعفر نوں سنیا۔ شاہ حسین دی کافی مدت بعد کسے نویں آواز وچ سنی۔ گانے والا شاہ حسین دے کلام وچ ڈب کے گا رہیا سی۔ اکھاں بند معلوم نہیں جعفر نوں کوک سٹوڈیو دے موسیقاراں تے سازندیاں دے اشارے کیویں بند اکھاں نال وکھائی دے رہے سن۔ ایہ نیئرہ نور دا روشن کیتا ہویا چراغ اے۔ نیئرہ نے ایس طرح گایا کہ سر دی پاکیزگی دا مفہوم سکھا دتا’ اللہ اوہناں دی بخشش کرے۔ (آمین)