قومی یوم اقلیت تے خصوصی تقریب

تسیں آزاد او’ تسیں آزاد او مندراں وچ جان لئی’ تسیں آزاد او’ اپنی مسجداں وچ جان لئی تے ریاست اپکستان وچ اپنی کسے وی عبادت گاہ وچ جان لئی تہاڈا تعلق کسے وی مذہب’ ذات یاں نسل نال ہووے ریاست دا ایہدے نال کوئی لینا دینا نہیں۔ قائداعظم دے ایہ الفاظ 11اگست 1947ء نوں پاکستان دی پہلی دستور ساز اسمبلی وچ کیتی گئی تقریر دا حصہ نیں۔ ایس تقریر نوں بنیاد بنا کے حکومت پاکستان نے 11 اگست نوں قومی یوم اقلیت قرار دتا۔ ایسے نسبت نال پچھلے دیہاڑے محکمہ متروکہ وقف املاک بورڈ (ای ٹی پی بی) نے دیال سنگھ ریسرچ اینڈ کلچرل فورم دے آڈیٹوریم وچ اک شاندار تقریب دا پربندھ کیتا جہدا عنوان سی ”اس پرچم کے سائے تلے ہم ایک ہیں” تقریب دے مہمان خصوصی حبیب الرحمن گیلانی چیئرمین متروکہ وقف املاک بورڈ تے بورڈ دے ایڈیشنل سیکرٹری رانا شاہد سلیم سن۔ تقریب وچ پادری شاہد معراج کیتھڈرل چرچ نے کرسچین کمیونٹی دی نمائندگی کیتی۔ امرناتھ رندھاوا پاکستان ہندو مندرز مینجمنٹ کمیٹی ہندو برادری دے نمائندہ دے طور تے ڈاکٹر کلیان سنگھ کلیان پروفیسر جی سی یونیورسٹی سکھ برادری دی نمائندگی کیتی جد کہ سہیل احمد رضا ممبر بورڈ ای ٹی پی بی و ڈائریکٹر منہاج القرآن مسلم نمائندے دی حیثیت نال شرکت کیتی۔ تقریب وچ سیکرٹری رویت ہلال کمیٹی مولانا عبداللہ نے وی شرکت کیتی۔ ای ٹی پی بی دی ممبر جیکولین ٹریسلر وی تقریب وچ شریک ہوئیاں۔ مسلم’ ہندو’ سکھ تے کرسچین وڈی گنتی وچ تقریب وچ شریک ہوئے۔
قومی یوم اقلیت دے حوالے نال ہون والی ایس تقریب دا پہلا حصہ دعا لئی مختص سی۔ تقریب دا باقاعدہ آغاز تلاوت کلام پاک توں ہویا ایہ سعادت عمران احمد نے حاصل کیتی۔ سکھ برادری دے سردار دیاسنگھ نے گروگرنتھ صاحب دی نظم جپ جی دا اقتباس پیش کیتا۔ کرسچین تے ہندو برادری دے نمائندیاں نے وی انجیل مقدس تے گیتا توں دعاواں پڑھ کے تقریب دے مذہبی تقدس نوں جلا بخشی۔ تقریب دے اگلے حصے’ جہنوں اس پرچم کے سائے تلے ہم ایک ہیں دا عنوان دتا گیا سی۔ ننکانہ صاحب توں آئے بچیاں نے شرکاء محفل دے نال رَل کے قومی ترانہ پڑھیا تے ملی نغمے گا کے محفل دے حسن نوں دوبالا کیتا۔
پادری شاہد معراج نے گل بات کردے ہوئے آکھیا کہ پاکستان لمی جدوجہد’ عظیم قربانیاں تے قائداعظم دی ولولہ انگیز قیادت پاروں معرض وجود وچ آیا۔ قائداعظم دے ارشاد دے مطابق پاکستان وچ اقلیتاں دا ہر طرح دا تحفظ حاصل اے۔ سانوں وی رَل کے ایہدی ترقی وچ اپنا کردار ادا کرنا چاہیدا اے۔ امرناتھ رندھاوا نے آکھیا کہ ہندو برادری نے پاکستان دی جدوجہد وچ بہت ساریاں قربانیاں دتیاں اسیں ایس اعتبار نال خوش قسمت آں کہ اسیں پاکستانی آں تے پاکستان وچ پیدا ہوئے۔ اسیں تقریب دے شرکاء دے سامنے عہد کرنے آں کہ پاکستان دے وقار تے ترقی لئی کسے قربانی توں دریغ نہیں کراں گے۔ ڈاکٹر کلیان سنگھ کلیان نے آکھیا کہ اج دا دن تریخ دا اہم دن اے قائداعظم دے ویژن دے مطابق پاکستان وچ رنگ’ نسل’ مذہب تے کلچر دے امتیاز دے بناں برابری دی سطح تے حقوق حاصل نیں۔ سانوں چاہیدا اے کہ سارے رَل کے وطن دی ترقی وچ اپنا کردار ادا کریئے۔سہیل احمد رضا نے آکھیا کہ پاکستان دی تشکیل نوں 75 ورھے ہو چکے نیں برطانوی سامراج توں آزادی دی جدوجہد وچ ہندو’ سکھ تے کرسچین نے مسلماناں دے شانہ بشانہ حصہ لیا۔ جوگندر ناتھ منڈل دستور ساز اسمبلی دے پہلے صدر سن جو ایس گل دا ثبوت اے کہ پاکستان وچ اقلیتاں نال کوئی امتیازی سلوک نہیں ورتیا جاندا۔ مولانا عبداللہ نے وی سہیل رضا دی گل نوں اگے ودھاندے ہوئے پاکستان دی تشکیل لئی ہندوئواں’ سکھاں تے عیسائیاں دے کردار تے قربانیاں نوں سراہیا۔ جیکولین ٹریسلر نے آکھیا کہ سانوں پاکستانی ہون تے مان اے ساڈے بزرگاں نے پاکستان دا انتخاب اپنی مرضی نال کیتا۔ اج اسیں کہہ سکنے آں کہ اوہناں نے چنگا فیصلہ کیتا۔
تقریب دے مہمان خصوصی رانا شاہد سلیم نے ای ٹی پی بی دی اقلیتاں لئی کیتیاں کاوشاں دا تفصیلی ذکر کردے ہوئے دسیا کہ ہندو برادری دے لہور وچ وڈے مندر نوں قابضین توں واگزار کروایا جا چکیا اے۔ جین مندر جہنوں سانحہ بابری مسجد دے ردعمل وچ نقصان اپڑیا سی تزئین و آرائش دے بعد عبادت لئی کھول دتا گیا اے۔ سو کمریاں تے مشتمل ہوسٹل مکمل ہو چکیا اے۔ اوہناں نے اقلیتاں دے ورثے نوں محفوظ کرن لئی سٹیٹ آف دی آرٹ میوزیم بنان دا اعلان کیتا۔ تقریب دے مہمان خصوصی حبیب الرحمن گیلانی چیئرمین ای ٹی پی بی نے اپنے خطاب وچ ای ٹی پی بی دیاں کاوشاں نوں سراہیا۔ اوہناں نے وکھووکھ مذاہب دے نمائندیاں دی تقریب وچ شرکت تے شکریہ ادا کیتا۔ آخر وچ وکھووکھ مذاہب دی نمائندگی کرن والی نمایاں شخصیات نوں دیال سنگھ ریسرچ اینڈ کلچرل فورم دیاں کتاباں تے میگزین دا تحفہ تے قومی ترانہ و ملی نغمے پڑھن والے بچیاں نوں تحفے تے نقد انعامات وی دتے گئے۔ تقریب دوران سبز ہلال جھنڈیاں پاروں تقریب وچ پاکستانیت دے رنگ غالب رہے۔٭