اسیں زندہ قوم آں

زندہ قوماں اپنے مشاہیر’ ہیروز دی یاداں نوں اپنے لہو وچ شامل رکھدیاں نیں بلکہ ایہہ آکھن وچ مضائقہ نہیں کہ زندہ قوماں اوہناں دی یاداں نال ای حیاتی دا امرت کشید کردیاں نیں۔ پاکستان وچ وی 6ستمبر 1965 یعنی ”یوم دفاع”اک ایسا دیہاڑ اے جہدے وچ ساڈی بہادر فوج نے بھارتی فوج نوں شکست فاش دے کے میدان جنگ توں نسن تے مجبور کردتا۔ میرے کہن دا مقصد ایہہ اے کہ 6ستمبر 1965 دی رات نوں بزدل بھارتی فوج نے ایہہ سوچ کے لہور تے چونڈہ دے محاذاں اتے حملہ کر دتا تے اوہناں دا ارادہ سی کہ اسیں رات نوں ای لہور فتح کرن مگروں سویرے جم خانہ لہور وچ جشن فتح مناواں گے تے لہوری سری پاوے کھاواں گے لیکن بھارتی بھگوڑیاں نوں کیہ پتہ سی شیر چاہے ستا ای ہووے
اوہ شیر ای ہوندا اے۔ ایہناں پاکستانی شیراں نے دشمن دی اِٹ نال اٹ وجا کے سری پاوے کھان دے ارادے نال آن والیاں دے سری پاوے توڑ دتے۔ تریخ دے ورقے دسدے نیں کہ اوس ویلے ساڈے قومی ہیرو میجر عزیز بھٹی تے اوہناں دی یونٹ دے جواناں نے اپنی ہمت تے بہادری دی بنا تے بھارتی فوج دے ایس سفنے نوں مٹی وچ ملا دتا۔ ایسے دوران 12ستمبر1965 نوں لہور سیکٹر وچ برکی دے مقام تے بھارتی ٹینکاں دے سامنے سیسہ پلائی دیوار بنے رہن والے میجر عزیز بھٹی نے دشمن دے ٹینک توں نکلن والے اک گولے نال شہادت پائی تے ”نشان حیدر” اوہناں دے سینے دی زینت بنیا۔ ”نشان حیدر” پاکستان دا سب توں وڈا فوجی اعزاز اے جہڑا صرف اوہناں فوجی جواناں نوں دتا جاندا اے جہڑے مادر ملت لئی بہادری دا مظاہرہ کردے ہوئے اپنی جان قربان کر کے جام شہادت نوش کردے نیں۔
ایہہ اعزاز حیدر کرار حضرت مولا علی کرم اللہ وجہہ دے نام نال منسوب اے۔ایس حوالے نال دوجے تحقیق کاراں وچ جی آر اعوان اپنے اک مضمون وچ لکھدے نیں کہ ”اوس ویلے دے فیلڈ مارشل جنرل ایوب نوں کسے نے آکھیا کہ ایہہ اعزاز اوہناں لوکاں لئی کیوں مخصوص اے جہڑے بہادری نال پاک وطن اتے اپنی جان نثار کردے نیں حالانکہ بہادری دی عظیم مثالاں تے اوہ لوک وی قائم کردے نیں جہڑے زخماں نال چور ہو کے قربانیاں دیندے تے غازی کہلاندے نیں۔ اوہناں نوں وی نشان حیدر دے اعزاز نال نوازناچاہیدا اے۔ ایس سوال دا جواب دیندے ہوئے جنرل ایوب کہن لگے اوہ بہادر جہڑے قربانیاں دیندے نیں’زخم کھا کے غازی بندے نیں تے زندہ رہندے نیں اوہناں بارے کیویں آکھیا جا سکدا اے کہ اوہ باقی حیاتی وچ کدی بزدلی دا مظاہرہ کرن گے۔ وطن اتے جان لٹان والیاں نوں نشان حیدر ایس لئی دتا جاندا اے کہ دنیا توں چلے جان مگروں اوہناں کولوں کدی بزدلی دا خدشہ نہیں ہوندا ایسے لئی حضرت علی کرم اللہ وجہہ نال منسوب نشان صرف بہادری نال جان دین والے اوہناں شہیداں نوں دتا جاندا اے جہناں توں بزدلی دا کوئی ڈر نہیں ہوندا”ایسے شہادت دے متعلق شاعر مشرق حضرت علامہ اقبال نے اپنی ولولہ انگیز شاعری وچ ایس گل دی کیہ خوب ترجمانی کیتی اے کہ:
شہادت ہے مطلوب و مقصودِ مومن
نہ مالِ غنیمت نہ کِشور کُشائی
ایس جنگ عظیم وچ پاکستان فوج دے دوجے درخشندہ ستاریاں وچ اک ایسا ستارہ جہڑا اپنی جرات تے بہادری دے دم تے پاکستان دی قوم دا قومی فخر کہلایا۔ میری مراد محمد محمود عالم جہناں نوں دنیا سکوارڈرن لیڈر ایم ایم عالم دے نام توں جاندی اے۔ اوہناں نے 1965دی جنگ وچ مختلف محاذاں اتے کل گیارہ بھارتی طیاریاں نوں تباہی توں دوچار کیتا جہناں وچ 9مکمل طور تے تباہ ہو چکے سن۔ باقی اوہناں دے جہاز دی باڈی اتے نمایاں وکھائی دیندے سن۔ ایم ایم عالم نے اپنی جرات تے بہادری نال ایہہ ثابت کیتا کہ جنگاں افرادی قوت تے اسلحہ نال نہیں بلکہ ایمانی قوت’ صادق جذبیاں تے عزم صمیم دے نال لڑی جاندیاں نیں۔ ایسے بنا تے اوہناں نے پنج عدد بھارتی ہنٹر جنگی طیاریاں نوں اک منٹ دے اندر مار گرایا۔ ایس بہادر جنگجو تے عظیم ہیرو نوں تریخ ساز کارنامے اتے ستارہ جرات نال نوازیاگیا۔ ایسے جنگ ستمبر دے دوران کہے گئے جلیل عالی دے دو شعر ملاحظہ کرو جدوں اوہناں نے اوسے زمانے وچ اورینٹل کالج لہور وچ ایم اے اردو وچ داخلہ لیاسی۔
مرے وطن کے شہیدو تمہارے خوں کی قسم
جلائی تم نے حیاتِ دوام کی قندیل
تمہارے عزم نے پندارِ کفر توڑ دیا
بنا کے سامنے ٹینکوں کے چھاتیوں کی فصیل
اپنی جاناں دا نذرانہ پیش کرن لئی افواج پاکستان دے جوان ہر ویلے ایس عظیم مقصد دی تکمیل لئی تیار رہندے نیں۔ ارض پاک نوں جدوں وی ساڈے بہادر سپوتاں دی لوڑ پئی تے ساڈے جواناں نے چھاتی اتے گولیاں کھا کے ایس گل تے عہد کیتا کہ ”شہید کی جو موت ہے وہ قوم کی حیات ہے” کیوں جے ارض پاک دا دفاع کرنا ہر اک محبت وطن پاکستان سپاہی دا اولین فریضہ اے۔ اج جیویں مقبوضہ کشمیر دے مسلماناں دا قتل عام انتہا پسند بھارتی فوج دا مشغلہ بن چکیا اے جہڑی کشمیری قوم نوں صفحہ ہستی توں مٹان اتے تلی ہوئیاں نیں جہدے تے دوجے ملکاں دے حکمران وی خموش نیں جہدی وجہ نال دونویں ایٹمی طاقتاں اک واری فیر جنگ دے محاذ اتے کھڑیاں نیں۔ جہدے وچ یقینا پاکستان 1965دی تریخ نوں اک واری فیر دہرا سکدا اے۔ پاکستان مسئلہ افواج دے سپہ سالار جنرل قمر جاوید باجوہ یقینا قوم دی توقع اتے پورے اترن گے تے دشمن نوں خاک وچ ملاکے دم لین گے۔ بقول احمد فراز
شکوہِ ظلمتِ شب سے توکہیں بہتر تھا
اپنے حصے کی کوئی شمع جلاتے جاتے
تے اخیر وچ جنگ ستمبر دے حوالے نال جان کاشمیری دے دو شعر:
صرف خاموش محبت کے نہیں قائل
لمحہ لمحہ تری عظمت کی قسم کھاتے ہیں
خون کا آخری قطرہ بھی بہا دے گے ہم
اے وطن! تری حفاظت کی قسم کھاتے ہیں