مہینہ وار ادبی اکٹھ

معروف پنجابی ادبی تنظیم وراگ تاندلیانوالہ دی چھتر چھاویں مہینہ وار ادبی اکٹھ دے سلسلے وچ 4-9-2022 ،بروز اتوار پچھلے پہر پریس کلب تاندلیانوالہ وچ مشاعرے دا آہر کیتا گیا۔جہدی صدارت مان جوگ پنجابی زبان تے ادب دے سیوک پرچارک شاعر تے بانی و صدر پنجابی ادبی تنظیم وراگ، جناب ڈاکٹر بششیر فیض اسدی ہوراں کیتی۔نظامت نوجوان پنجابی سیوک تے شاعر ملک شاہ راز وٹوہوراں کیتی۔ سسمندری توں مشاعرے دے اُچیچے رلتی شعرا حضرات جناب حکیم سرفراز تابد،ارشد حمید ساگر،عرفان سانول تے علی اکبر غوری جی ہوریں بنے۔تنظیم دے سیکرٹری جنرل ملک شاہراز وٹو ہوراں نے مشاعرہ دا باقاعدہ آغاز کردیاں ہویاں تلاوت کلام پاک تے نعت شریف واسطے جڑاانوالہ توں رلتی بنن والے نوجوان لکھاری جناب مستنصر شوق وسیر ہوراں نوں سدا دتا تے شوق جی ہوراں نے بڑے ودھیا تے من موہنے انداز وچ اللہ پاک دے کلام دی تلاوت کیتی تے اللہ پاک دے سوھنے محبوب صل اللہ علیہ و آللہ وسلم دی بارگاہ اقدس وچ اپنی لکھی ہوئی نعت پاک دا نزرانہ پیش کر کے محفل دا رنگ دبالا کردتا۔ مشاعرے دے مجمان شاعراں وچ ڈاکٹر بشیر فیض اسدی، سید استقلال حیددر شمسی سبزواری،اعجاز حسین اسیر،شاہراز وٹو، انصر کھچی،بدر سیال، آکاش وٹو،ارشد جانی کھچی، رضوان عدیم طور،یاسر عرفات تے زین کھچی ہوری سن۔مجمان شعرا نے بہت ہی مختصر لیکن بھرواں کلام۔۔جہدے وچ دوہڑے،غزل،نظم تے بولیاں شامل سی سنا کے سنیاراں کولوں من کھچویں تے رجویں داد وصول کیتی۔دوہڑے دے لکھاریاں دے دوہڑے سن کے ۔۔کاروان شعر و ادب سمندری دے سیکرٹری جنرل جناب عرفان سانول جی ہوری آکھن۔لگے کہ ایہناں لکھاریاں دے دوہڑے سن کے من وچ ایہہ ریجھ پنگر پئی اسیں دوہڑے کیوں نہیں لکھدے۔حالانکہ عرفان سانول جی ہوریںاردو پنجابی غزل دے پکے پیڈے لکھاری نیں۔وارو واری مہمان شاعراں نے بہت ہی سوہنے چج تے دل موہ لین آلا کلام سنا کے سنیاراں کولوں دادو تحسین وصولی۔مشاعرے دی اخیر تے پنجابی ادبی تنظیم وراگ دے بانی و صدر تے مشاعرے دے پردھان جناب ڈاکٹر بشیر فیض اسدی ہوراں نے مشاعرے وچ رلتی پڑھیاراں تے سنیاراں دا دل دیاں ڈنگھیایاں نال شکریہ ادا کیتا۔تے اپنا کلام سنا کے اپنی حاضری پوری کیتی اوہناں اک گل بڑی اچیچ نال کیتی کہ کسے بندے نے کہیا سی کہ تاندلیانوالہ ادبی طور تے یتیم ہو چکیا ئے۔تے اس گل دے جواب وچ بشیر فیض ہوراں نے بڑے مان سمان نال ایہہ گل کیتی کہ جد تک میرے بت وچ ساہ نے میں اپنی ماں بولی دا مان ودھاندا رہواں گا۔تے پنجابی زبان تے ادب دا جھنڈا کدی وی ڈگن نہیں دیواں گاتے خاص کر کے تاندلیانوالہ دے ادبی قد کاٹھ نوںاُچا کردا رہواں گا تے ایہہ ثابت کراں گا کہ تاندلیانوالہ دے وارث جیندے نیں۔تاندلیانوالہ یتیم نہ ہویا ئے تے نہ ہووے گا۔ جے میں نہ رہیا تے میں انج دے بوٹے لا کے جاواں گا جہڑے ہمیش پنجابی ماں بولی تے تاندلیانوالہ دے ادبی گلشن دی راکھی کردے رہن گے۔تے اپنے لہو نال اس ادبی گلستان دی آبیاری کردے رہن گے۔۔انشا اللہ۔ڈاکٹر بشیر فیض نے متراں دا دوجی واری ہتھ بنھواں شکریہ ادا کیتا تے ایہہ اعلان کیتا کہ ایہہ ادبی اکٹھ ہر مہینے دے پہلے اتوار نوں باقاعدگی نال ہویا کرے گا۔تے مختلف علاقیاں وچوں لکھاری بلا کے ماں بولی دی سیوا کردے رہن گے۔آخرتے ڈاکٹر بشیر فیض نے اپنے اک شعر راہیں۔ماں بولی لئی اک سنیہا دتا تے اس توں بعد گپ شپ تے چاہ پانی نال پراہنیاں دی سیوا کیتی گئی۔
گل سن میرے ڈھول پنجابی
پڑھ،لکھ نالے بول پنجابی