اک سکیولر زدہ پیرزادے دے نام

منے پرمنے کالم نگار عطاالحق قاسمی دے والد گرامی مولانا بہاء الحق قاسمی نے اپنے جدی بزرگاں دے شاندار علمی تے عملی کارنامیاں اتے مشتمل ”تذکرہ اسلاف” دے نام نال اک کتاب لکھی سی۔ اوہناں نوں امید سی کہ ممتاز علما دین دی زندگی تے دینی خدمات اتے لکھی گئی ایہہ کتاب اوہناں دی موجودہ تے آئندہ نسلاں لئی مشعل ہدایت ثابت ہووے گی۔ مولانا بہاء الحق قاسمی نے اپنی کتاب وچ بڑے فخر نال تحریر کیتا اے کہ اوہناں دے والد محترم مولانا پیر غلام مصطفی قاسمی دے مایہ ناز شاگرداں وچ امیر شریعت سید عطا اللہ شاہ بخاری تے مولانا مفتی محمد حسن وی شامل سن۔ بہرحال مولانا بہاء الحق قاسمی دی اپنے صاحبان علم و عرفان بزرگاں اتے لکھی ہوئی ایہہ کتاب ہوراں لئی تے مشعل ہدایت کیہ ثابت ہوئی خود اوہناں دے خاندان دی نویں نسل نے وی ایس کتاب توں رہنمائی لین لئی انکار کردتا اے۔ بہاء الحق قاسمی دے اک پوترے پیرزادہ یاسر قاسمی نوں تے اسلام توں اینی الرجی اے کہ اوہناں نوں اسلام تے پاکستان دے رشتے توں متعلق قائداعظم دے سارے فرمودات ای توں انکار اے۔ اوہناں دا خیال اے قائداعظم اک سکیولر سیاست دان سن تے پاکستان دے لوک خواہ مخواہ قائداعظم نوں ”مولوی محمد علی جناح” بنان دی کوشش کر رہے نیں۔ ”پیرزادہ” صاحب نے اپنے کالم وچ پہلا جھوٹ ایہہ لکھیا اے کہ محمد علی جناح نے بیرسٹری لئی ”لنکن ان” وچ داخلہ لین مگروں اپنا نام تبدیل کر کے فقط جناح رکھ لیتا یعنی محمد تے علی اوہناں دے نام دا حصہ نہیں رہے سن۔ محمد علی جناح نے لنکن ان وچ تے داخلہ ای ایس وجہ نال لیتا سی کیوں جے اوہدی دیوار اتے لکھے ہوئے دنیا بھر دے نامور قنون داناں وچ سب توں نمایاں نام حضرت محمدۖ دا سی۔ ہن رہیا نام وچ تبدیلی دا مسئلہ تے حقیقت حال ایہہ اے کہ داخلے ویلے قائداعظم دا نام محمد علی جناح بھائی لکھوایا گیا سی جہڑا اوہناں نے درخواست دے کے محمد علی جناح وچ تبدیل کر لیتا تے بھائی دا لفظ جذب کروا تا۔ اوہناں دی بیرسٹری دی سند اتے صرف محمد علی جناح ای لکھیا گیا اے۔
نوجوان کالم نگار لکھدے نیں کہ اوہناں دے کمرے وچ کلین شیو جناح دی اک تصویر آویزاں اے لیکن اوہناں دے اک دوست دی خواہش اے کہ اوہ قائد دے چہرے اتے داڑھی ودھا کے اوہدے تھلے ”مولوی محمد علی جناح” لکھ دین۔ میرے خیال وچ ہاسے مذاق وچ وی ایہہ گل لکھنا کہ کسے دوست نے نوجوان ”پیرزادہ”نوں ایہہ مشورہ دتا اے کہ محمد علی جناح دی داڑھی ودھا کے تصویر دے نال ”مولوی محمد علی جناح تحریرکر دتا جاوے۔ ویسی ای بے ہودگی اے جیویں کوئی ایس کالم نگار نوں ایہہ مشورہ دے دیوے کہ اوہ اپنے دادا مولانا بہاء الحق قاسمی دی داڑھی نوں صاف کر کے اوہناں دی تصویر دے نال مسٹر بہاء الحق قاسمی لکھ دیو۔ ہن آئو ویکھنے آں کہ اسلام دے حوالے نال قائداعظم دا ویژن کیہ سی۔ 19اگست 1941 دے ”رہبر دکن ” وچ مذہب تے مذہبی حکومت دے لوازم کیہ نیں؟ دے جواب وچ قائداعظم دا ایہہ فرمان شائع ہویا ۔ ”میں نہ کوئی مولوی آںنہ ملا نہ مینوں دینیات وچ مہارت دا دعویٰ اے۔ البتہ میں قرآن مجید تے اسلامی قنون دے مطالعے دی اپنے تئیں کوشش کیتی اے۔ ایس عظیم الشان کتاب وچ اسلامی زندگی توں متعلق ہدایات دے باب وچ زندگی وچ زندگی دا روحانی پہلو’ معاشرت’ سیاست’ معیشت غرض انسانی زندگی دا کوئی شعبہ ایسا نہیں اے جہڑا قرآن مجید دی تعلیمات دے احاطے توں باہر ہووے۔
قرآن دی اصولی ہدایت تے سیاسی طریق کار نہ صرف مسلماناں لئی بہترن نیں بلکہ اسلامی سلطنت وچ غیر مسلماں لئی وی حسن سلوک تے آئینی حقوق دا سب توں بہتر تصور موجود اے”۔
”رہبر دکن” ای وچ قائداعظم نے طلبہ دے اک سوال دا جواب دیندے ہوئے فرمایا سی کہ ”اسلامی حکومت دا ایہہ بنیادی امتیاز پیش نظر رہے کہ ایہدے وچ اطاعت تے وفاکشی دا مرجع خدا دی ذات اے۔ ایس لئی تعمیل دا مرکز قرآن مجید دے احکام تے اصول نیں’ اسلام وچ اصلاً کسے بادشاہ دی اطاعت اے نہ کسے پارلیمان دی’ نہ کسی شخص یا ادارہ دی’ قرآن دے احکام ای سیاست تے معاشرت وچ ساڈی آزادی تے پابندی دی حدود متعین کردے نیں’ اسلامی حکومت دوجے لفظاں وچ قرآن دے اصولاں تے احکام دی حکمرانی اے”۔
قائداعظم دے درج بالا فرمودات یقینا کسی مولوی یا مولانا دے فرمودات نہیں نیں لیکن قائداعظم دی ایہہ تعلیمات پڑھن مگروں وی کوئی انصاف پسند ایہہ الزام عائد کر سکدا اے کہ قائداعظم پاکستان وچ سکیولر طرز حکمرانی دے حق وچ سن۔ قائداعظم دی اک لمی تقریر 12جون 1938دے روزنامہ انقلاب وچ شائع ہوئی سی۔ ایہدا اک اقتباس ملاحظہ ہووے ”مسلماناں نوں پروگرام تلاش کرن دی لوڑ نہیں اے۔ ایہناں دے کول تیرہ سو سال توں اک مکمل پروگرام موجود اے تے اوہ قرآن پاک اے۔ قرآن پاک وچ ساڈی اقتصادی ‘ تمدنی تے معاشرتی اصلاح تے ترقی دے علاوہ سیاسی پروگرام وی موجود اے۔ میرا ایسے قنون الٰہیہ اتے ایمان اے تے میں جہڑا آزادی دا طالب آں اوہ ایسے کلام الٰہی دی تعمیل اے۔ تعلیم قرآن ای وچ ساڈی نجات اے تے ایہدے ذریعے اسیں ترقی دے سارے مدارج طے کر سکنے آں”۔
اک مولوی یا مولانا دے پوتے نوں جے داڑھی دی تضحیک کر کے خوشی ہوندی اے تے اوہ اپنا شوق ضرور پورا کرے لیکن ایس سوال دا جواب اوہدے کول کیہ اے کہ جدوں قائداعظم ایہہ فرماندے نیں کہ قرآن پاک دی صورت وچ ساڈے کول اک مکمل پروگرام موجود اے جہدے وچ معیشت وی اے’ معاشرت وی اے تے سیات وی تے ایہہ کہ قرآنی تعلیمات اتے عمل کر کے ای اسیں ترقی دی ساری منزلاں طے کر سکنے آں تے فیر قائداعظم دے وژن نوں سکیولر قرار دینا کیویں درست ہو سکدا اے۔ کیہ قائداعظم نوں صرف کلین شیو ہون دی وجہ نال سکیولر تے لبرل ثابت کیتا جا سکدا اے۔ داڑھی تے علامہ اقبال دی وی نہیں سی تے اوہ مولوی محمد اقبال وی نہیں سن مگر کیہ ایہہ حقیقت نہیں کہ وڈے وڈے مولویاں’ مولانا تے پیرزادیاں نے وی دین اسلام دی اوہ خدمت نہیں کیتی ہووے گی جہڑا مقام حرمت اسلام دے حوالے نال محمد اقبال دا اے۔ قائداعظم وی اسلام دے سچے تے مخلص خدمت گزار سن۔ ایتھے میں کتاب ”تعمیر پاکستان تے علمائے ربانی” دے صفحہ 231 اتے شائع ہون والے قائداعظم دے ارشاد دا حوالہ دینا ضروری سمجھنا واں۔ قائد نے آکھیا سی کہ ”میں مسلماناں دی جہڑی خدمت کیتی اے اوہ اسلام دے اک ادنیٰ سیاسی تے خدمت گزار دی حیثیت نال کیتی اے۔ ہن پاکستان نوں دنیا دی عظیم قوم تے ترقی یافتہ ملک بنان لئی تسیں میرے نال رل کے جدوجہد کرو’ میری آرزو اے کہ پاکستان صحیح معنیاں وچ اک ایسی مملکت بن جاوے کہ اک واری فیر دنیا دے سامنے فاروق اعظم دے سنہری دور دی تصویر کھچ جاوے”۔ فیر قائداعظم دی 14 فروری 1948 دی بلوچستان دے سبی دربار وچ کیتی جان والی اک ناقابل فراموش تے مشہور تقریر دا ایہہ اقتباس وی ملاحظہ کر لو۔ ”میرا ایمان اے کہ ساڈی نجات دا راز ایہناں سنہری اصولاںدی پیروی وچ اے جہناں نوں ساڈے قنون دین والے حضور نبیۖ کریم نے سانوں عطا کیتا۔ سانوں اپنی جمہوریت دی بنیاد حقیقی اسلامی نظریات تے اصولاں اتے رکھنی چاہیدی اے”۔
قارئین! قائداعظم دے ایہہ ارشادات پڑھ کے ہن خود ای فیصلہ کر لوو کہ ایہہ خیالات سکیولر ریاست دے کسی مدعی دے ہو سکدے نیں یا رسول کریمۖ دے کسی سچے تے حقیقی پیروکار دے۔
نوجوان کالم نگار نے ایہہ دعویٰ وی کیتا اے کہ قائداعظم ترکی دے کمال اتاترک دے سکیولرازم تے لبرل ازم توں بہت متاثر سی۔ جے اتاترک دا سکیولرز قائداعظم دا آئیڈیل ہوندا تے اوہ کدی سرحد مسلم وچ نہ فرماندے کہ ”پاکستان دا مطلب صرف آزادی تے خودمختاری نہیں بلکہ اوس مسلم نظریے دا تحفظ ساڈی اصل مراد اے جہڑا اک بیش قیمت تحفے تے اثاثے دے طور تے ساڈے تک پہنچیا اے”۔
حیدرآباد دکن دے طلبا نال گل بات کردے ہوئے قائداعظم نے صاف لفظاں وچ ایہہ فرمایا سی کہ ”جدوں میں انگریزی زبان وچ مذہب Religionدا لفظ سننا واں تے ایس زبان تے محاورے دے مطابق میرا ذہن لامحالہ خدا تے بندے دے پرائیویٹ تعلق ول منتقل ہو جاندا اے لیکن میں خوب جاننا واں کہ اسلام دے نزدیک مذہب دا ایہہ محدود تے مقید مفہوم نہیں اے کیوں جے زندگی دا کوئی ایسا شعبہ نہیں اے جہڑا اللہ دی عظیم کتاب دی تعلیمات دے احاطہ توں باہر ہووے”۔
ہن قائداعظم دے ایہہ ارشادات پڑھ یا سن کے ساری دنیا نوں تے ایہہ پتہ چل گیا اے کہ قائداعظم نے پاکستان نوں اک سکیولر ریاست بنان لئی حاصل نہیں کیتا سی مگر ساڈے ہاں دا مٹھی بھر سکیولر طبقہ فیر وی ایہہ جھوٹا تے بددیانتی اتے مبنی پروپیگنڈ ااپنی روایتی ہٹ دھرمی دے نال کیتے جا رہیا اے کہ قائداعظم سکیولر سوچ رکھن والے سیاستدان سن تے اوہ مذہب نوں سیاست وچ شامل کرن دے خلاف سن۔ پاکستان دے سکیولر عناصر دے جھوٹ تے تضادات دا ایس توں وڈا ثبوت ہور کیہ ہو سکدا اے کہ اوہ تے تسلیم کردے نیں کہ پاکستان دو قومی نظریے دی بنیاد اتے قائم ہویا سی لیکن پاکستان دی بنیاد اسلام نوں تسلیم نہیں کردے۔ سکیولر طبقہ دَسے کہ دو قومی نظریے دی بنیاد اسلام نہیں سی تے ہور کیہ سی۔ قائداعظم نے ہندوواں تے مسلماناں وچ دو قومی نظریے دی حقیقت دی وضاحت اپنے درج ذیل ارشاد وچ کجھ ایس طرح بیان فرمائی سی۔ ”اسیں دونواں قوماں وچ صرف مذہب دا فرق نہیں اے۔ ساڈا کلچر اک دوجے توں وکھرا اے تے ساڈا دین اک ایسا ضابطۂ حیات اے جہڑا زندگی دے ہر شعبہ وچ ساڈی رہنمائی کردا اے۔ اسیں ایس ضابطہ دے مطابق زندگی بسر کرنا چاہنے آں” (27نومبر 1945) دو قومی نظریے تے اسلام دے حوالے نال جے قائداعظم دی ساری تقریراں’ بیان تے انٹرویو دے حوالے دتے جان تے میرا ایہہ کالم کئی کالماں اتے پھیل جاوے گا۔ ویسے وی میں اسلام دے مکمل ضابطۂ حیات ہون دی نسبت نال قائداعظم دے ہور فرمودات لکھ کے سکیولر عناصر نوں ہور زیادہ خوفزدہ نہیں کرنا چاہندا۔ البتہ میں بڑے ادب نال سکیولرازم دے پجاری نوجوان کالم نگار نوں ایہہ کہنا چاہنا واں کہ اوہ قائداعظم نوں ”مولوی محمد علی جناح” جیا خطاب دے کے تے اوہناں دے چہرے اتے داڑھی لان جئے تمسخر آمیز انداز اپنان توں اجتناب کرن۔جے ”پیرزادہ” صاحب نوں مولویاں تے مولانا نال نفرت اے تے اوہناں نوں اپنے دادا تے اوہناں دے وی پیو دا مذاق اڈان دا پورا حق حاصل اے لیکن اوہناں نوں پوری قوم دے پیو محمد علی جناح دا ایس انداز نال تمسخر اڈان دی اجازت نہیں دتی جا سکدی۔ گھٹ توں گھٹ اسیں لکھن پڑھن والیاں نوں اینا مہذب’ شائستہ تے ذمہ دار ضرور ہونا چاہیدا اے کہ اسیں بانی پاکستان قائداعظم دا تذکرہ سنجیدگی نال کرئیے۔ سنجیدگی دا مطلب سنجیدگی ای اے ایس توں مراد پھکڑپن’ بے تکا انداز تحریر تے بے پرکی اڈانا ہرگز نہیں۔