اقوامِ متحدہ اپنی پگ دی لاج رکھے

مذہب اسلام امن شانتی،پیار محبت تے بھائی چارے دا سدھا دین والا آفاقی نظریے دا اک مذہب اے۔تے ملک پاکستان ایس ای نظرئے مطابق بنایا گیا سی۔پاکستان نے جنگی تے عسکری وسائل رکھدے ہوئے وی موقع بنن تے جنگ لئی ہتھیار چکن دے بجائے اپنے دشمن ملک نال ہمیشہ امن دی گل کیتی اے۔پر ایہدا کدی وی مطلب ایہ نہیں کہ پاکستان کِسے پاسیوں کمزور اے۔پاکستان اپنے کول دنیا دی منی پرمنی تے قابل ترین فوج تے انٹیلی جینس رکھدا اے۔تے ایہ فوج طرحاں طرحاں دے جنگی سامان اپنے کول رکھدی اے۔میڈیا اتے جِنہاں دی نمائش ویکھ کے بھارت دے ساہ وی سکے رہندے نیں۔ ایس صورت حال دے باوجود وی امن دی ہی گل کرنا پاکستان دا وڈا پن اے۔پاکستان خطے وچ امن چاہندا اے،انساناں نوں اوہناں دی زندگی امن و امان نال ہنڈاون دی سوچ رکھدا اے۔جنگ کرکے انساناں تے دوجِیاں جاندار مخلوقاں دی موت نہیں چاہندا۔پر ساڈا گواہنڈی ملک بھارت ایس گل دا معنا تے مقصد ایہ کڈھدا اے کہ پاکستان بھارت توں ڈردا ہویا جنگ لڑن توں کھمب کھاندا اے۔اصل گل ایہ وے کہ بھارت ایس حوالیوں اجے کِسے مغالطے تے بھل وچ اے۔اوہنوں شاید ایس گل دا نہیں پتہ کہ مسلمان بارود دے سِر تے نہیں جذبے دے سِر تے جنگ لڑدا اے۔مسلمان امن تے محبت دا سنیہا دین دے نال نال جنگ تے جہاد لئی ہمیشہ گھوڑے تے کاٹھی پاکے رکھدا اے،تے ایہ جہادی فِکر اوہنوں دینِ اسلام توں مِلی اے۔
ایس ساری گل تے بحث نوں مکائیے تے مطلب ایہ نِکلدا اے کہ بھارت ایس چپ نوں ساڈی کمزوری نہ سمجھ بہوے۔ویلا آوے تے ایہ قوم ہتھیار اِک پاسے سٹ کے وی ایمانی جذبے دے زور تے اگوں جڑ جاندی اے،تے فتح ایہدا مقدر بن جاندی اے۔ ایتھے ایہ گل کرنا ضروری سمجھنا واں کہ اسیں دونویں گواہنڈی ملک اِک دوجے توں بچن لئی سالانہ ارباں روپئے دفاعی کماں تے خرچ کرنے آں۔جے اسیں دشمنی نوں بھل بھلا کے ایس خطے وچ امن شانتی دے پھل کھڑائیے تے بڑی وڈی گل ہووے گی۔پر ایہ تے دوہاں ملکاں دے لِیڈراں تے آگوواں تے گل مکنی اے۔دوہاں ملکاں دیاں فوجاں تے حکم دِیاں بدھیاں ہوئیاں نیں،تے جدوں تیک امن معاہدے تے حکمراناں دے دستخط نہیں ہوجاندے دوہاں ملکاں دیاں فوجاں دا ہرویلے الرٹ رہنا ضروری بن دااے۔دوویں ملک جِناں پیسہ دفاع تے خرچ کردے نیں،ایہو پیسہ صحت،تعلیم تے ہور پاسے خرچ کیتا جاسکدا اے۔جے تنقیدی جھات مارئیے تے لگدا اے کہ دوہاں دیساں دی دھرتی اتے ہون دکھ،مصیبتاں،آفتاں تے مسئلے ای اگ رہے نیں۔دوہاں ملکاں دے وسنیک آئے دن نویں توں نویں مسئلیاں نال سامنا کررہے ہندے نیں۔عوام دے دکھاں مصیبتاں تے مسئلیاں نوں گھٹ کرن ول دھیان دینا چاہیدا اے۔اِک دوجے دی نفرت وچ ہون تک اسیں جِنا کو جانی تے مالی نقصان کر چکے آں اوہدے نتیجے وچ دوہاں ملکاں نوں چاہیدا اے کہ ٹھنڈے دل دماغ نال سوچ کے سرحداں نوں یاری دوستی تے میل ملاپ دِیاں راہواں وچ بدل دین۔یورپ دے فلاحی اداریاں دی طرحاں سانوں اِک دوجے دے عوام دے بھلے لئی وسائل خرچ کرنے چاہیدے نیں۔تے ایس خطے نوں امن دی دھرتی بناونا چاہیدا اے۔پر دکھ والی گل اے بھارت نوں ایہ گل کدے نئیں پچدی۔اوہدے متھے توں نفرت دے وٹ اترن دی بجائے پیرو پیر ہور پئیندے جاندے نیں۔ میڈیا اتے کئی واقعیاں تے گلاں نال ثابت ہو چکیا اے کہ دوہاں ملکاں دے عوام تے آپس وچ میل ملاپ رکھنا تے نفرت دی لکیر نوں مٹاونا چاہندے نیں۔پر ہمیشہ بھارت دی لیڈر شِپ ولوں ای ایس نفرت تے غصے نوں نہ مکاون دا کسے وی رنگ وچ اظہار کیتا گیا اے۔
ایہ وی گل حقیقت اے کہ بھارت نوں ایس اپنی ضِد اتے اڑے رہن دا ہمیشہ نقصان ای ہویا اے۔ناکامی تے نموشی اوہدا مقدر بنی ہوئی اے،پر بھارت دی لیڈر شِپ ایس توں سبق نہیں سِکھ رہی۔نریندر مودی دی دھون وچ جیہڑا سریا اے اوہ اِک دن اوہدے ای سِر وچ وجنا اے۔ایہ گل نرندر مودی خورے کیوں نئیں سوچدا کہ بھارتی عوام وی اوہدی منحوس تے بھیڑی سوچ نوں پسند نہیں کردے تے اوس دی ایس حرکتاں توں نکو نک تنگ آئے ہوئے نیں۔پر مودی تے اوس بھوترے ہوئے اوٹھ دی طرحاں اے جیہڑاں بالاں دیاں چِیکاں سن کے باز آجان دی بجائے سگوں ہور نٹھدا اے تے بالاں دی جان نال اوہدا کوئی لگ لینا نئیں ہندا۔کیونکہ اک حیوان تے ڈنگر نوں کِیہ لگے بالاں دیاں چِیکاں نال۔حیوان نے تے اپنی حیوانی وکھا کے رہنا ہندا اے۔ایہو حال مودی دا اے۔ پاکستان دی فوج کِسے پاسیوں وی کمزور نہیں،تے عوام وی جہاد دے جذبے توں خالی نہیں۔پر اسیں امن چاہنے آں اسیں مسلمان آں تے ساتھوں انساناں دی تباہی ویکھی نہیں جاندی۔ایہ مسلمان دی وڈی صفت اے کہ اوہ اخلاقی حوالیوں ریشم دی طرحاں نرم اے تے جنگ ویلے لوہے دی طرحاں سخت وی اے۔ہون بھارت دی نویں نسل وی سرحداں اتے پِلچھی تے سڑکڑے دی طرحاں اگی ہوئی نفرت تے دشمنی نوں مکا کے ایتھے محبت تے امن دیاں قلماں گڈناں چاہندی اے۔نفرت تے دشمنی دی ایس پِلچھی تے سڑکڑے دے اندر سازشاں تے امن مخالف پالیسیاں دے لکے چھپے زہری ناگاں باہر کڈھ کے سِرِیاں مِدھ دینا چاہندی اے۔عالمی پدھر تے امن دا ڈھول وجاون والے ادارے اقوامِ متحدہ نوں وی ایس گل ول دھیان دینا چاہیدا اے۔تاں جے پتہ لگ جائے کہ اقوامِ متحدہ واقعی امن دا پرچارک اے۔پر اقوامِ متحدہ وی اندر کھاتے ایس حق وچ نہیں۔کھل ڈلھ کے امن دے خلاف چلن نال اوہدی پگ میلی ہندی اے۔اقوام متحدہ دا منصب آکھدا اے کہ اوہ اپنی پگ میلی ہون ول نہ ویکھے سگوں چودھرمے دی ایس پگ دی لج رکھن لئی پگ نوں بھارت دے پیراں وچ رکھ کے امن دی گل منواوے۔٭