پنجاب حکومت دا عظیم منصوبہ

لہوریاں نوں ہلے گلے تے رونق والیاں کھیڈاں نال بڑی محبت اے۔ سارے چاہندے نیں کہ دوبارہ دنیا دیاں وڈیاں ٹیماں پاکستان دا دورہ کرن’ اسیں ایہناں میچاں نوں ویکھن جائیے تے لطف اندوز ہوئیے۔ دوجے پاسے سکیورٹی دے ناں تے جو کجھ شہریاں نوں بھگتنا پیندا اے اوہ وی اک لمی کہانی اے۔ لہور وچ جدوں کدی کرکٹ’ ہاکی یاں کسے ہور کھیڈ دے میچ ہوندے نیں تے قذافی سٹیڈیم وچ موجود دفتراں دے لوکاں نوں آن جان وچ جو مشکلات پیش آندیاں رہیاں نیں اوہناں دا بیان ممکن نہیں۔ کھیڈاں دی کئی سیریز جدوں مہینوں جاری رہندیاں نیں تے کام دا ڈھیر حرج ہوندا اے۔ ایہ ساری مشکلات صرف قذافی سٹیڈیم تک محدود نہیں سگوں پورے لہور نوں ایہدا خمیازہ بھگتنا پیندا رہیا اے۔ سویرے کھڈاریاں دا ہوٹل توں قذافی سٹیڈیم اپڑنا’ دوپہر نوں لنچ کرن جانا تے واپس آنا تے شام نوں دوبارہ ہوٹل واپسی ایہ اوہ چار موقعے ہوندے نیں کہ جدوں پورے شہر دی ٹریفک روک دتی جاندی سی تے سڑکاں دے آل دوالے پردے لا دتے جاندے سن تاں جے کوڑے دے ڈھیر تے اوہناں دی نظر نہ پوے۔
چوہدری پرویزالٰہی صاحب ولوں 25 منزلہ کمپلیکس بنان دا اعلان سنیا تے دل نوں عجیب طرح دی خوشی تے سرشاری حاصل ہوئی اوہ ایس لئی کہ ایس کمپلیکس بارے دسیا جا رہیا اے کہ ایہ قذافی سٹیڈیم دے نیڑے بنایا جاوے گا ایہدے وچ کھڈاریاں تے دوجے عہدیداراں دی رہائش دا انتظام ہووے گا تے زیرزمین ٹنل دے راہیں راہ وی بنایا جاوے گا جہدے توں کھڈاری سٹیڈیم وچ آ جا سکن گے۔ یقینا اجہی صورت وچ سکیورٹی تے نہ چوکھی رقم خرچ ہووے گی نہ پولیس دیاں دوڑاں لگن گئیاں تے نہ شہر دا ناطقہ بند ہووے گا۔
بچیاں دی تربیت تے شخصیت سازی لئی کھیڈ بڑے ضروری نیں۔ موبائل تے کمپیوٹر تک قید بچیاں تے گبھروئواں نوں کھیڈاں دے میدان تک لیان لئی اجہیاں کاوشاں ضروری نیں جو اوہناں نوں چیلنجز قبول کرن تے دنیا وچ پاکستان دا جھنڈا بلند کرن ول راغب کرن۔ کھیڈاں دی ترویج لئی وزیراعلیٰ پنجاب نے نجی یونیورسٹیاں دے وائس چانسلرز دی میٹنگ دا تذکرہ کرکے ایس پاسے اشارا کیتا اے کہ ہر تعلیمی ادارے دے طالب علم نوں کھیڈاں دے میدان تک رسائی دین دی حکمت عملی بنائی جا رہی اے۔ ملکی تے غیرملکی کوچز دی خدمات تے کرکٹ توں علاوہ ہاکی’ کبڈی تے دوجیاں کھیڈاں دے فروغ تے دھیان دینا وی قابل تحسین اے۔ پنجاب دے عظیم کھڈاری جہناں نے پوری دنیا وچ پاکستان دا ناں اچا کیتا اوہناں نوں پرائیڈ آف پنجاب دے ایوارڈ نال نوازنا قابل فخر اے۔ جدوں کسے کھڈاری نوں سراہیا جاندا اے تے نویں نسل نوں ایہ اوہناں دی محنت بارآور آن دا مثبت پیغام وی دتا جاندا اے جہدے نال اوہناں وچ محنت تے جدوجہد کرن دا رجحان پیدا ہوندا اے۔ پنجاب دے فعال وزیر کھیڈ تیمور مسعود ملک صوبے وچ کھیڈاں دی جدید بنیاداں تے اصلاحات دے حوالے نال بڑے پرعزم نیں۔ حالیہ کامیاب تقریب اوہناں دے مستقبل دے لائحہ عمل نوں اجاگر کردی نظر آندی اے۔
حکومت پنجاب نوں پرائیڈ آف پنجاب ایوارڈز دا سلسلہ ہر شعبے تک پھیلا دینا چاہیدا اے۔ پلاک نے ایس ایوارڈ نوں پہلے اپنی مدد آپ دے تحت شروع کیتا تے ہر ورھے کئی بندیاں نوں ایس ایوارڈ نال نوازیا گیا جہدے نال اک لکھ روپیہ دتا جاندا سی۔ فیر 2017-18ء وچ دو سالہ سکیم بنائی گئی جہدے تحت تن لکھ روپیے دتے جاندے سن۔ ایس ویلے تک تک پنجاب دے ادب شاعری، نثر، فلم، ٹی وی، آرٹ اینڈ کلچر دے وکھووکھ شعبیاں وچ چودھری فخر زمان، افضل احسن رندھاوا، انور مسعود، گلوکار شوکت علی، غلام علی، اللہ دتہ لونے والا، ثریا ملتانیکر، شاکر شجاع آبادی، ڈاکٹر شہزاد قیصر، پاکستان پنجابی ادبی بورڈ، روزن گجرات، اسلم کمال، مصطفی قریشی، بہار بیگم، انجمن، شاہد، عثمان پیر زادہ، عارف لوہار، ڈاکٹر اعجاز انور، سید افضل حیدر، ڈاکٹر شہباز ملک، ڈاکٹر حنیف چودھری، بابا نجمی، اقبال قیصر، ویر سپاہی، راشد حسن رانا، منیزہ ہاشمی سنے 50 لوکاں نوں ایہ ایوارڈ دتے جا چکے نیں۔
پرویزالٰہی صاحب اگے گزارش اے کہ پرائیڈ آف پنجاب ایوارڈ دے حوالے نال پلاک دی سکیم نوں دوبارہ شروع کرن دے احکامات جاری کرن تے ایہدے نال پنج لکھ دی رقم رکھی جاوے تاں جے ادب’ آرٹ تے کلچر دے شعبیاں دے عظیم لوکاں نوں خراج تحسین پیش کیتا جا سکے۔ ہن جد کہ قذافی سٹیڈیم دے نیڑے اک ارب ڈالر نال پنجی منزلہ کمپلیکس بنایا جاوے گا جہدے وچ پنجاب حکومت صرف 30 فیصد تے باقی 70 فیصد یو اے ای دی حکومت خرچ کرے گی تے یقینا صوبے وچ کھیڈاں دے فروغ وچ بڑی پیش رفت سامنے آوے گی۔ چوہدری پرویزالٰہی صاحب نے پنجاب نوں 1122′ پلاک تے ایس طرح دے کئی منصوبے دتے جو دوررس نتیجے رکھدے نیں۔ پلاک ورگے ادارے دوجے صوبیاں وچ چھیتی قائم ہو گئے سن پر پاکستان وچ ادھی صدی دے بعد ایہ ادارہ اوہناں دیاں کوششاں نال وجود وچ آیا۔ 25 منزلہ کمپلیکس وی اک اجیہا ای عظیم الشان منصوبہ اے جو کھیڈاں دے فروغ وچ سنگ میل ثابت ہووے گا۔ رب کرے ایہ چھیتی توڑ چڑھے۔٭٭