عمران خان نوں شیخ مجیب الرحمن نہ بنائو

قوماں تریخ توں سبق سکھدیاں نیں پر اسیں کجھ نہیں سکھیا۔ ساڈی پرانی ڈگر برقرار اے تے اسیں اوسے روش تے چل رہے آں۔ اسیں اک واری فیر نفرتاں دی آبیاری کر رہے آں۔ بلبل پاکستان نیرہ نور دی وفات تے اوہناں دی گائی ہوئی فیض صاحب دی نظم کسے نے گھلی۔ ایہ نظم مشرقی پاکستان دی علیحدگی دے حوالے نال سی فیر نصیر ترابی دا کلام یاد آیا’ کیہ خوبصورت انداز وچ اوہناں نے جدائی دا دکھ بیان کیتا۔ایسے طرح ناصرکاظمی دی غزل یاد آ گئی کہ اوہناں نے وی درد نوں لفظاں وچ سمو دتا سی۔ جس دن مشرقی پاکستان وکھرا ہویا سی اوس دن پاکستانی بڑے روئے سن پورا ملک سوگوار سی۔ کجھ لوک تے اگلے جہان ٹر گئے۔ ایم ڈبلیو ایم دے سربراہ راجہ ناصر عباس دے والد بزرگوار نے جیویں ای بی بی سی تے ایہ دکھ بھری خبر سنی تے اوہناں نوں دل دا دورہ پیا تے اوہ اوسے لمحے وطن دی محبت وچ زندگی دی بازی ہار گئے۔
یاد رہوے کہ اسیں پنجی ورھے مشرقی پاکستان وچ نفرت دے بیں بوئے اسیں ڈھاکہ دیاں گلیاں وچ قیام پاکستان لئی مہم چلان والے شیخ مجیب الرحمن نوں غدار بنا دتا۔ اسیں قیام پاکستان دی کوششاں وچ نمایاں کردار ادا کرن والے حسین شہید سہروردی تے مولانا بھاشانی نوں وی غداری دے سرٹیفکیٹ دتے ہورتے ہور اسیں مادر ملت محترمہ فاطمہ جناح نوں وی نہ بخشیا اوہناں نوں وی غدار بنا دتا۔ ساڈے ایتھے خبراں چھپیاں کہ فاطمہ جناح پانی دا بل جمع کروان نہیں تے گرفتاری تے جرمانے لئی تیار ہو جان فاطمہ جناح دے خلاف ایسے طرح دے کی جعلی حربے استعمال کیتے گئے جدوں ایہ باقی سیاستدان اک آمر دے تلوے چٹ رہے سن تے غدار مجیب الرحمن مادر ملت محترمہ فاطمہ جناح دے نال کھڑا سی۔ ایہدے وچ کوئی شک نہیں کہ شیخ مجیب الرحمن مشرقی پاکستان دا مقبول ترین لیڈر سی۔ 1970ء دے الیکشن وچ اوہدے کول 162 سیٹاں سن پر پاکستان دا اک سیاستدان اسٹیبلشمنٹ دے نال مل گیا حالاں کہ اوہدے کول 81 سیٹاں سن پر اقتدار دے لالچ نے ادھا ملک گنوا دتا۔
دوستو! اسیں سوچدے نہیں’ اپنی روش نہیں بدلدے۔ اج دے پاکستان وچ عمران خان مقبول ترین لیڈر اے پچھلے دیہاڑے کراچی دے ضمنی الیکشن وچ اوہدے امیدوار محمود مولوی نے حکومتی اتحاد نوں عبرتناک شکست دتی عمران خان دے امیدوار دے مقابلے وچ پندراں جماعتاں دا سانجھا امیدوار سی پر اوہنے ادھے توں وی گھٹ ووٹ لئے۔ ایس طرح ایم کیو ایم’ جے یو آئی’ اے این پی’ مسلم لیگ ن تے پیپلزپارٹی سنے دوجیاں جماعتاں دی مقبولیت بے نقاب ہو گئی۔ ہن تے حالت ایہہ وے کہ تحریک انصاف ہر تھاں اوہناں نوں ہرا رہی اے۔ پی ڈی ایم دے نال تے انتظامیہ وی اے سارے حربے وی استعمال کیتے جاندے نیں پر فیر وی خان اوہناں توں نہیں ہردا۔ پی ڈی ایم دی پوری قیادت خوف وچ مبتلا اے کہ اوہ اگلے الیکشن وچ کیہ کرے گی؟ ایسے لئی اوہ کدی اک پاسیوں عمران خان دا راہ روکن دی کوشش کردے نیں تے کدی دوجے پاسیوں۔ پوری حکومت’ اوہدے وچ شامل ساریاں جماعتاں’ عمران خان دے خلاف مہم چلاندیاں نیں پر ایہدے باوجود عمران خان دی مقبولیت گھٹ ہون دا ناں نہیں لے رہی۔ اوہدے جلسیاں نے پندراں جماعتاں نوں پریشان کر رکھیا اے۔ پہلے 25مئی نوں عام پاکستانیاں نوں مارن دی کوشش کیتی گئی پر عمران خان نے تصادم دا ایہ خطرہ ٹالیا فیر جدوں اوہنے اسلام آباد وچ جلسے دا اعلان کیتا تے کدھروں ٹی ایل پی برآمد ہو گئی’ اوہنے تصادم دے خطرے نوں فیر ٹالیا تے جلسہ لہور منتقل کر دتا ہن اوہدے ساتھیاں تے نہ مکن والا مقدمیاں دا سلسلہ جاری اے اوہدے حق وچ بولن والیاں تے زمین تنگ کر دتی گئی اے۔ ایہدے باوجود لوک بے خوف و خطر اوہدے قافلے دا حصہ بن جاندے نیں۔
آخری وار دے طور تے اوہدیاں تقریراں نوں براہ راست وکھان تے پابندی لا دتی گئی اے۔ امید اے کورٹ اوہنوں ختم کر دیوے گی جدوں ایس پابندی نال وی جی نہ بھریا تے اوہدے خلاف ایف آئی آر درج کر لئی گئی فیر گرفتاری دا فیصلہ کر لیا گیا جو ایف آئی آر درج کیتی گئی اے اوہدے بارے دسدا جاواں کہ اوس توں زیادہ سخت گلاں آپ وزیرداخلہ رانا ثناء اللہ کر چکے نیں۔ اوہناں نے چیف سیکرٹری تے کمشنر نوں دھمکیاں دتیاں سن سگوں ججاں بارے کہیا سی کہ اسیں ججاں دا گھیرائو کراں گے اوہناں دے لیڈر نے کہیا سی ججاں دے دل بغض نال بھرے ہوئے نیں ایس توں علاوہ اوہناں دی پارٹی دے وکھووکھ رہنما عدالتاں تے پاک فوج بارے کیہ کجھ نہیں کہندے رہے۔ 1977ء وچ تے سپریم کورٹ تے حملہ ای ہو گیا سی۔ ہن ساریاں کاروائیاں عمران خان نوں کندھ نال لان دی کوشش نیں ایہدی وڈی وجہ ایہہ وے کہ پی ڈی ایم دیاں جماعتاں سیاسی میدان وچ پی ٹی آئی دا مقابلہ کرن توں قاصر نیں تے ہن تے گریزاں وی نیں ایہدی وڈی وجہ ایہہ وے کہ عمران خان نے اپنے مخالفاں نوں سیاسی بونے بنا کے رکھ دتا اے۔ ہن کدی کہیا جاندا اے عمران خان دی جان نوں خطرہ اے تے کدی کجھ ہور کہیا جاندا اے۔ صورتحال بڑی گھمبیر اے اک گھنائونا کھیڈ کھیڈیا جا رہیا اے ایس نازک صورتحال وچ باغباناں اگے گزارش اے کہ باغ نوں اجڑن توں بچائو’ عمران خان نوں شیخ مجیب الرحمن نہ بنائو انج وی جمہوریت وچ اکثریت دی رائے دا احترام لازم اے تے ایس ویلے اکثریت عمران خان دے نال اے سوچو کہ ایہ فکر دے لمحات نیں اسیں کدھر جا رہے آں؟ بقول اسلم گورداسپوری
کس قدر بے دست و پا ہے جس کو کہتے ہیں حیات
کتنے بے مقصد ہماری زندگی کے باب ہیں
وہ کسی صورت بھی اسلم پورے ہو سکتے نہیں
جس حماقت کے ہمارے راہبروں کے خواب ہیں