سیکولر طبقے لئی کجھ سوال

(1) جے سکیولر توں مراد ایہہ اے کہ پاکستان وچ اسیں اپنی اجتماعی حیاتی وچ اسلامی تصورات’ دین اسلام دے اسلامی اصولاں تے اوہ اخلاقی انداز فکر جہڑا مذہب ساڈے عوام وچ پیدا کرنا چاہندا اے’ اوہناں توں دستبردار ہو جائیے تے کیہ ایہہ سکیولرزم لادینیت دے مترادف نہیں ہووے گا؟۔
(2) ”پاکستان دا مطلب محض آزادی تے خودمختاری نہیں بلکہ مسلم نظریہ حیات دا تحفظ اے جہڑا سانوں اک قیمتی تحفہ تے بیش بہا دولت دی صورت وچ عطا ہویا اے”۔ جدوں ریاست دی سطح اتے مسلم نظریہ حیات دے نفاذ دی گل کیتی جاوے تے سکیولر طبقہ اوہدے اتے معترض کیوں ہوندا اے؟
(3) پاکستان دی پارلیمنٹ ایس گل دی پابند اے کہ اوہ ایسی قنون سازی کرے جہڑی قرآن و سنت دے متصادم نہ ہووے تے جہڑے قوانین اسلام توں متصادم نیں اوہناں نوں تبدیل کر دتا جاوے۔ سکیولر سوچ تے فکر رکھن والے پارلیمنٹ دے ایس اختیار نوں تسلیم کیوں نہیں کردے؟
(4)سکیولر حلقے قرارداد مقاصد دے سخت خلاف نیں۔ قرارداد مقاصد پاکستان دی پہلی دستور ساز اسمبلی نے منظور کیتی تے ہن قرارداد مقاصد پاکستان دے دستور دا مستقل تے اہم ترین جزو اے۔ قرارداد مقاصد دے متن دے حوالے دے کے وضاحت کرن کہ سکیولر حلقیاں ولوں قرارداد مقاصد اتے تنقید دی اصل وجوہات کیہ نیں؟
(5) لادین ذہن رکھن والے تے سکیولر حلقے دونویں ای ایس گل دی وکالت کردے نیں کہ پاکستان وچ کاروبار مملکت تے اجتماعی زندگی نال اسلام دا کوئی رشتہ نہیں ہونا چاہیدا۔ پاکستان تخلیق ای اسلام تے اسلامی قومیت دی اے فیر پاکستان وچ مسلماناں دی اجتماعی زندگی دا تعلق اسلام نال کیوں نہیں ہونا چاہیدا؟
(6) مسلماناں دا ایہہ عقیدہ اے کہ اسلام (قرآن و سنت) دے احکامات وچ ساڈی انفرادی تے اجتماعی زندگی دونواں لئی رہنمائی دا سامان موجود اے۔ سکیولر حلقیاں نوں ساڈے ایس عقیدہ دے مطابق عمل کرن تے کیوں اعتراض اے۔ سکیولر طبقہ اک مسلمان مملکت وچ وی ساڈے اجتماعی معاملات توں اللہ تعالیٰ دی ہدایات تے رسول کریمۖ دی تعلیمات نوں دور تے وکھرا رکھن تے جے اصرار کردا اے تے کیہ ایہہ لادینیت نہیں؟
(7) سکیولر حضرات اگرچہ ایہہ وی دعویٰ کردے نیں کہ اوہ اسلام دے خلاف نہیں بلکہ اوہ صرف ریاستی امور توں اسلام نوں وکھرا رکھنا چاہندے نیں۔ سوال پیدا ہوندا اے کہ مسلماناں دی عظیم اکثریت اپنے
ملک وچ ریاستی’سیاسی’ معاشی تے عدالتی امور نوں اسلام دے عین مطابق ویکھنا تے چلانا چاہندی اے تے اوہدے تے سکیولر طبقہ اعتراض کرن دا اکیہ حق رکھدا اے؟
(8) کیہ سکیولر طبقہ ایس گل تے یقین رکھدا اے کہ ریاستی تے اجتماعی امور زندگی لئی قرآن تے سنت رسولۖ وچ کوئی احکامات یا ہدایات موجود ای نہیں یا سکیولر طبقے دا ایہہ خیال اے کہ جے اسلام وچ ریاستی تے اجتماعی امور وچ رہنمائی لئی تعلیمات وی موجود نیں فیر وی مملکت اجتماعی امور توں اسلام نوں دور رکھنا چاہیدا اے؟
(9) قرآن تے سنت رسولۖ وچ مسلماناں نوں اجتماعی زندگی تے دنیاوی معاملات دے حوالے نال جہڑی ہدایات موجود نیں کوئی وی مسلماناں دی زبردست تے بے پناہ اکثریت اتے مشتمل ملک اسلام دی ایہناں ہدایات توں روگردانی کیویں کر سکدا اے؟
(10) جے اسلام دا پاکستانی زندگی نال رشتہ ختم کردتا جاوے تے کیہ سکیولرزم نوں پاکستان دی قومی وحدت دا وسیلہ قرار دتا جا سکدا اے۔ جے سکیولر ہندوستان وانگوں پاکستان نوں وی اک سکیولر ریاست بنانا مطلوب سی تے فیر قیام پاکستان دی بنیاد کیہ سی؟
(11)سکیولر طبقہ ایس حقیقت نوں تسلیم کیوں نہیں کردا کہ اک اللہ’ اک رسولۖ تے اک کتاب اتے ایمان رکھن والے مسلماناں نے اسلام دے نام تے تے اسلام لئی متحد تے متفق ہو کے قیام پاکستان لئی جدوجہد کیتی سی۔ سکیولرزم دے نام تے مسلمان قوم نوں متحد تے متحرک نہیں کیتا جا سکدا سی۔ فیر ہن سکیولر کتھوں آ گیا کہ اسیں سکیولرزم لئی اسلام نوں اپنی اجتماعی زندگی توں کڈ دئیے تے ریاستی امور توں وکھرا کر دئیے؟
(12) علامہ محمد اقبال نوں تحریک پاکستان دے حوالے نال جے قائداعظم دا پیش رو آکھیا جاوے تے ہر گز غلط نہیں ہووے گا۔ علامہ اقبال نے اپنے تریخی خطبہ الٰہ آباد وچ فرمایا سی کہ ”اک سبق جہڑا میں تریخ اسلام توں سکھیا اے اوہ ایہہ اے کہ آڑے وقتاں وچ اسلام ای نے مسلماناں دی زندگی نوں قائم رکھیا اے۔ مسلماناں نے اسلام دی حفاظت نہیں کیتی۔ جے اج تسیں اپنی نگاہواں فیر اسلام اتے جما دتیاں تے اوہدے زندگی بخش تخیل توں متاثر او تے تہاڈی منشر تے پراگندہ قوتاں ازسر نو جمع ہو جان گئیاں تے تہاڈا وجود ہلاکت تے بربادی توں بچ جاوے گا”۔ سکیولر حضرات ایہہ دسن کہ جے اسیں اسلام دے زندگی بخش تخیل نوں صرف اپنی ذاتی زندگی تک محدود کر لین تے اپنی اجتماعی تے دنیاوی زندگی وچ اسلام توں لاتعلق ہو جان تے ساڈا وجود ہلاکت تے بربادی توں محفوظ رہ سکدا اے؟ ساڈے انفرادی تے اجتماعی اعمال اسلام دے تابع ہون گے تے فیر ای ساڈا قومی وجود سلامت رہ سکدا اے۔
علامہ اقبال نے خطبہ الہ آباد وچ ایہہ فی فرمایا سی کہ ”اسلام ہن وی اک زندہ قوت اے جہڑی ذہن انسانی نوں نسل تے وطن دی قیود توں آزاد کر سکدی اے۔ میرا عقیدہ اے کہ مذہب نوں فرد تے ریاست دونواں دی حیاتی وچ غیر معمولی اہمیت حاصل اے تے میرا یقین اے کہ ا سلام دی تقدیر خود ایہدے ہتھ وچ اے۔ اوہنوں کسی دوجی تقدیر دے حوالے نہیں
کیتا جا سکدا”۔ علامہ اقبال وانگوں ہر مسلمان دل توں آرزومند اے کہ اوہ اسلام دے مقاصد تے اوہدی تعلیمات اتے عمل کرے۔ فرد تے ریاست دونواں دی زندگی وچ اسلام نوں غیر معمولی اہمیت حاصل اے۔ اسیں اوہدے پابند آں۔ جے اسیں اپنی اجتماعی زندگی تے ریاست دے امور وچ اسلام دے احکامات نوں ترک کرنے آں تے ایہہ لادینیت تے کفر ہووے گا۔ فیر سکیولر طبقہ جہڑا اصرار کردا اے کہ ریاست دے امور نال اسلام دا کوئی رشتہ نہیں ہونا چاہیدا۔ اوہ سکیولرزم نوں لادینیت تسلیم کیوں نہیں کردا؟
(13) علامہ اقبال دے نزدیک اسلام اک نجی معاملہ نہیں اے۔ علامہ اقبال نے خطبہ الہ آباد وچ ای آکھیا سی کہ جے اسیں اسلام نوں نجی معاملہ تک محدود سمجھاں گے تے اک اخلاقی تے سیاسی نصب الدین دی حیثیت نال اسلام دا وی اوہو حشر ہووے گا جہڑا مغرب وچ مسیحیت دا ہویا اے۔ علامہ اقبال نے ہور آکھیا کہ ”اسلام دے مذہبی نصب العین نوں اوہدے معاشرتی نظام توں جہڑا خود اوہدا پیدا کردہ اے’ وکھ نہیں کیتا جا سکدا۔ دونویں اک دوجے لئی لازم و ملزوم نیں۔ جے اسیں اک ترک کیتا تے بالآخر دوجے نوں وی ترک کرنا پووے گا۔ میں نہیں سمجھدا کہ کوئی مسلمان اک لمحے لئی وی کسی ایسے نظام سیاست اتے غور کرن لئی آمادہ ہووے گا۔جہڑا کسی ایسے وطنی یا قومی اصول اتے مبنی ہووے گا جہڑا اسلام دے اصول اتحاد دے منافی ہووے۔ جدوں سکیولر لابی ریاستی امور توں اسلام نوں دور رکھن دی تبلیغ کردی اے تے کیہ فیر اسیں سکیولرزم نوں لادینیت سمجھن وچ حق بجانب نہیں؟
(14) علامہ محمد اقبال اسلام دے بغیر آزادی وطن دا تصور وی نہیں کر سکدے سن۔ اوہناں نے دو ٹوک انداز وچ فرمایا سی کہ ”جے آزادی ہند دا نتیجہ ایہہ ہووے کہ جیسا دارالکفر ہن اے ویسا ای رہوے یا ایہدے توں وی بدترین بن جاوے تے مسلمان ایسی آزادی وطن دا تصور وی نہیں کر سکدے سن۔ اوہناں نے دو ٹوک انداز وچ فرمایا سی کہ ”جے آزادی ہند دا نتیجہ ایہہ ہووے کہ جیسا دارالکفر ہن اے ویسا ای رہوے یا ایس توں وی بدترین بن جاوے تے مسلمان ایسی آزادی وطن اتے ہزار واری لعنت بھیجدا اے” یا چند ایسی ریاستاں دی عدم موجودگی وچ شریعت اسلامیہ دا نفاذ ایس ملک (متحدہ ہندوستان) وچ ممکن نہیں”۔ہن جہڑی سکیولر لابی آزاد اسلامی ریاست پاکستان وچ شریعت اسلامیہ دے نفاذ دی مخالف اے اوہ پاکستان نوں اک لادینی ریاست بنانا نہیں چاہندی تے ہور کیہ چاہندی اے؟ فیر ایہہ سکیولر حضرات سکیولرازم نوں لادینیت تسلیم کیوں نہیں کردے؟
(15) سکیولر طبقے نوں ایہہ گل چنگی طرح سمجھ لینی چاہیدی اے کہ اسلام وچ وفاداری اللہ تعالیٰ لئی اے نہ کہ تخت و تاج لئی۔ اسلامی حکومت دا مفہوم ایہہ اے کہ حکومت اسلام دے احکامات دے تابع ہووے گی۔ قائداعظم دا ایہہ ارشاد اے کہ ”اسلامی حکومت دے تصور دا ایہہ امتیاز پیش نظر رہنا چاہیدا اے کہ ایہدے وچ اطاعت تے وفا دا مرجع خدا دی ذات اے جہدی تعمیل دا عملی ذریعہ قرآن مجیددے احکام تے اصول نیں۔ اسلام وچ اصلاً نہ کسے بادشادہ دی اطاعت اے نہ کسے شخص تے ادارے دی۔ قرآن کریم دے احکام ای سیاست تے معاشرت وچ ساڈی آزادی تے پابندی دی حدود متعین کر سکدے نیں۔ دوجے لفظاں وچ اسلامی حکومت قرآن دے اصول تے احکام دی حکومت اے”۔ میں اپنے ولوں قائداعظم دے فرمان وچ کوئی وادھا تے ترمیم کر سکنا واں تے نہ ای کسی سکیولر طقبے نوں ایہہ حق حاصل اے کہ اوہ قائداعظم دی 11 اگست 1947 دی تقریر نوں بنیاد بنا کے جہڑا سکیولر طبقہ ایہہ پروپیگنڈا کردا اے کہ قائداعظم پاکستان نوں سکیولر ریاست بنانا چاہندے سی اوہ سکیولر لابی قائداعظم دی اوہناں اک سو توں ودھ تقریراں نوں کیویں نظرانداز کر سکدے نیں جہدے وچ قائداعظم نے قرآن دے احکام تے اصولاں دی حکمرانی دا ذکر کیتا۔ قائداعظم نوں اپریل 1943 وج سرحد مسلم سٹوڈنٹس فیڈریشن نے اک پیغام دی درخواست کیتی تے قائداعظم نے جواب وچ فرمایا: ”تسیں مینوں کوئی پیغام دین لئی آکھیا اے میں تہانوں کیہ پیغام دیاں جد کہ ساڈے کول پہلاں ای اک پیغام موجود اے جہڑا ساڈی رہنمائی تے بصیرت افروزی لئی کافی اے۔ اوہ پیغام اے خدا دی عظیم کتاب قرآن کریم قائداعظم دے ایہناں ارشادات دے ہوندے ہوئے کیہ کوئی انصاف پسند تے دیانتدار شخص ایہہ دعویٰ کر سکدا اے کہ قائداعظم پاکستان نوں سکیولر ریاست بنانا چاہندے سن؟
قائداعظم نے 11اگست 1947 دی تقریر وچ اقلیتاں دے حوالے نال جو وی آکھیا سی اوہ اوہناں دے برابر دے شہری حقوق دے حوالے نال آکھیا سی۔ اسلام وچ اقلیتاں دے حقوق دے تحفظ لئی جہڑی تعلیمات نیں اوہ کسی ہور مذہب وچ نہیں۔ 11 اگست 1947 دے تن دن مگروں قائداعظم نے 14 اگست 1947 نوں جہڑی تقریر فرمائی سی اوہدے توں وی واضح ہو جاندا اے کہ قائداعظم نے غیر مسلماں دے حقوق دے تحفظ لئی روشنی تے رہنمائی رسول کریمۖ دی تعلیمات توں حاصل کیتی سی۔ قائداعظم نے آکھیا سی کہ اوہ شہنشاہ اکبر نے غیر مسلماں دے نال رواداری تے خیر سگالی دا جہڑا بنرتائو کیتا سی اوہ کوئی نویں گل نہیں سی۔اوہدی ابتدا تیرہ سو سال پہلاں ای ساڈے رسول کریمۖ نے کردتی سی۔ اوہناں نے زبان ای تو نہیں بلکہ عمل نال یہودیاں تے عیسائیاں اتے فتح حاصل کرن مگروں اوہناں دے نال نہایت چنگا سلوک کیتا۔ اوہناں دے نال رواداری ورتی تے اوہناں دے عقائد دا احترام کیتا۔ مسلمان جتھے کدھرے وی حکمران رہے’ انج ای رہے۔ مسلماناں دی تریخ ویکھی جاوے تے اوہ ایسے ای انسانیت نواز تے عظیم القدر اصولاں دی مثالاں نال بھری پئی اے”۔
11 اگست دی تقریر وچ وی قائداعظم نے بلا لحاظ مذہب تے قوم سارے شہریاں لئی مساوی حقوق دی گل کیتی سی۔ قائداعظم دا ایہہ اعلان اسوۂ رسول اکرمۖ تے اسلامی تعلیمات دے عین مطابق سی۔ ایہدے توں سکیولرازم دا مفہوم کڈنا انتہا درجے دی بددیانتی اے۔ سکیولرزم دا مکروہ چہرہ ویکھنا ہووے تے تسیں سکیولر بھارت وچ ویکھ سکدے او۔