پاکستان دا سافٹ امیج تے میڈیا داکردار

31دسمبر دا سورج غروب ہویا تے پورا دبئی لائٹاں تے برقی قمقمیاں نال جگمگا اٹھیا۔ ہر پاسے جوش و خروش سی تے ہر شخص نویں سال نوں خوش آمدید آکھنا چاہ رہیا سی۔ 12وجدے ای اسمان روشنیاں نال بھر گیا۔ لوکاں دے شور تے بے ہنگم موسیقی پاروں کن پئی اواز سنائی نہیں دے رہی سی۔ اچانک اک 20منزلہ بلڈنگ دی 10ویں منزل اتے اگ لگ گئی لیکن لوکی نویں سال دا جشن منان وچ ایس قدر مصروف سن کہ کسی نوں خبر ای نہیں ہوئی لیکن اوسے بلڈنگ دے تھلے روڈ اتے اک پاکستانی کھڑا سی۔ اوہنے جدوں اگ بھڑکدی ویکھی تے لوکاں نوں اپنی جان بچان لئی اوتھوں چھلانگ لاندے ویکھیا تے اوہنے اپنا موبائل کڈیا تے ایس ہیبت ناک منظر دی ویڈیو بنان لگیا۔ اگلے کجھ گھنٹیاں وچ پاکستانی میڈیا اتے ایہہ بریکنگ نیوز بن کے نشر ہون لگی۔ایس ساری کہانی وچ حیرت انگیز گل ایہہ سی کہ اوس بلڈنگ دے کول رہن والے لوکاں نوں وی پاکستانی میڈیا دے ذریعے پتہ چلیا کہ ساڈے پڑوس وچ اگ لگی ہوئی اے۔
سعودی عرب دے لوک تیز ڈرائیونگ دے شوقین نیں۔ 2016 دی اک رپورٹ دے مطابق سعودی عرب دنیا بھر وچ سب توں ودھ حادثاتی موتاں والا ملک بن چکیا سی۔ اوتھے 24گھنٹیاں وچ لاتعداد روڈ حادثے ہوندے نیں لیکن مجال اے کہ اوتھے دا میڈیا اوہنوں ملکی معیشت’ معاشرتی المیاں یا اداریاں دی نااہلی دے نال جوڑے یا فیر مرچ مسالا لا کے ایسی ہوش ربا ہیڈ لائناں دے نال پیش کرے کہ ویکھن والے دنگ رہ جان تے اوہ خود نوں شدید عدم تحفظ دا شکار سمجھن۔ البتہ پاکستانی میڈیا وچ ایہہ گل نہیں’ ایتھے تہانوں ہیروئن دی جتی گواچن توں لے کے بارش دے کھڑے پانی تک’ چھوٹی توں چھوٹی خبر وی ایس انداز وچ ملے گی جہڑی تہانوں ہلا کے رکھ دیوے گی۔ اج توں 20ورھیاں پہلاں صرف پی ٹی وی ہوندا سی جہدے اتے رات 9وجے دا خبرنامہ سن کے حالات بارے معلومات مل جاندیاں سن لیکن اج 90توں ودھ چینل ہر 15منٹ مگروں ایسی ہیڈ لائناں چلاندے نیں جہدے وچ منفی خبراں دا پلڑا بھاری ہوندا اے تے جے تسیں دو گھنٹیاں تک بریکنگ نیوز سندے رہو تے اٹھن توں پہلاں مایوسی دا شکار ہو چکے ہووو گے۔ ایہو حال سیاسی ٹاک شوز دا وی اے جتھے ملکی مسائل حل کرن دے بجائے سیاستداناں نوں اک دوجے دی کھچائی دا موقع دتا جاندا اے تے ریٹنگ دا خوب فیدہ چکیا جاندا اے۔
پرنٹ میڈیا ہووے’ الیکٹرانک میڈیا یا فیر سوشل میڈیا۔ ویکھ کے انج لگدا اے کہ ایس معاشرے وچ کوئی چنگا کم ہو ای نہیں رہیا۔ ہر پاسے نفرت’ دھوکا’ منفیت تے خودغرضی عروج اتے اے حالانکہ انج نہیں اے۔ منیا کہ ایتھے ظلم تے زیادتی اے لیکن ایہدے نال نال بہت سارے چنگے کم وی ہو رہے نیں۔ معاشرہ بالکل ای بے حس نہیں ہویا بلکہ کجھ درد دل رکھن والے وی نیں جہڑے خدمت’ خلوص تے محبت دا مشعل پھڑ کے ایہناں انھیریاں نوں اجالیاں وچ بدلن دی کوشش کر رہے نیں۔
معاشرے دے ایسے مثبت پہلو نوں اجاگر کرن تے ملکی تشخص دا بہترین روپ سامنے لیان لئی قاسم علی شاہ فائونڈیشن نے اک مکالماتی نشست دا پربندھ کیتا جہدے وچ پرنٹ تے الیکٹرانک میڈیا نال تعلق رکھن والی منی پرمنی شخصیات نے رلت کیتی تے ایس موضوع اتے کھل کے اپنی رائے دا اظہار کیتا۔ ایس نشست وچ پاکستان دا سافٹ امیج پیش کرن لئی جہڑی تجویزاں پیش کیتی گئیاں’ اوہ تہاڈے سامنے پیش کیتیاں جاندیاں نیں:
(1) ہم نصابی سرگرمیاں
بچیاں دے سکولاں وچ صبح اسمبلی ہویا کردی سی جہدے وچ علامہ اقبال دی مشہور دعا ”لب پہ آتی ہے دعا بن کے” بالاں نوں پڑھائی جاندی سی۔ ایہدا فیدہ ایہہ ہوندا سی کہ بچے ایہناں لفظاں اتے غور کردے تے ایہدا معنی اپنے استاداں کولوں پچھدے سن تے ایہو چیز اوہناں دے تحت شعور وچ بیٹھ جاندی جہڑی کہ حب الوطنی دی وجہ بندی۔ ایہدے نال نال تقریری مقابلے تے بیت بازی دی صورت وچ ہم نصابی سرگرمیاں وی ہوندی رہندیاں جہناں پاروں بچیاں وچ اپنے ملک و قوم لئی کجھ کرن دا جذبہ پروان چڑھدا لیکن ہن ایہہ طریقہ اکثر سکولاں وچ ختم ہو چکیا اے جہدی وجہ نال نویں نسل وچ اوہ جذبہ وی نہیں رہیا۔ رہی سہی کسر میڈیا نے پوری کردتی تے ایہو وجہ اے کہ اج نویں نسل دے ذہن وچ پاکستان دا منفی امیج بن چکیا اے تے اوہ مایوسی دا شکار نظر آندے نیں۔ لوڑ ایس گل دی اے کہ ایسی ساری سرگرمیاں نوں دوبارہ شروع کیتا جاوے۔
(2) سیروسیاحت’ ثقافت تے صنعت دی پروموشن
بھارتی وزیراعظم کجھ عرصہ پہلاں امریکہ دے دورے تے سن۔ اوتھے اوہناں نے ہندوستانیاں نال خطاب کردے ہوئے آکھیا کہ میں تہاڈے کول ڈالر منگن نہیں آیا بلکہ ایہہ گزارش کرن آیا واں کہ تہاڈے وچوں ہر شخص دی جنی استطاعت ہووے اوہ غیر ملکیاں نوں ایس گل اتے قائل کرے کہ اوہ ہندوستان دا دورہ کرے تے ساڈی ثقافت نوں ویکھے ایہدا وڈا فیدہ ایہہ ہووے گا کہ ساڈی ملکی معیشت مضبوط ہووے گی تے دنیا بھر وچ بھارت دا چنگا امیج سامنے آوے گا۔
ساڈے ملک پاکستان نوں اللہ تعالیٰ نے بہت ساری نعمتاں نال نوازیا اے۔ ایتھے سال دے چار موسم پورے آب و تاب دے نال آندے نیں۔ مختلف طرح دے پھل تے سبزیاں ایتھے پیدا ہوندیاں نیں۔ ایسے بے شمار علاقے نیں جہڑے پہاڑاں’ جنگلاں تے سبزے نال بھرے نیں۔ سانوں وی باہر دی دنیا وچ ایہناں ساری چیزاں نوں پرموٹ کرن دی لوڑ اے۔ ایہدے لئی ٹورازم ڈیپارٹمنٹ ایسے اقدامات چکے کہ انٹرنیشنل میڈیا تے سوشل میڈیا اتے پاکستان دے ایہہ خوبصورت علاقے ودھ توں ودھ پروموٹ ہون۔ساڈے یوٹیوبرز تے وی لاگرز وی ایس سلسلے وچ اپنا بھرواں کردار ادا کر سکدے نیں جد کہ باہر دے ملکاں وچ سیر لئی جان والے پاکستانی اوتھے دے لوکاں نوں ایہہ دعوت دین کہ پاکستان دنیا دا اک حیرت انگیز ملک اے تے جے تسیں اوتھے دا دورہ نہیں کیتا تے تسیں اک بہترین جگہ ویکھن توں محروم رہے او۔
ایسے طرح پاکستانی ثقافت نوں وی پروموٹ کرن دی لوڑ اے تاں جے باہر دی دنیا ساڈی ثقافت وچ دلچسپی لوے تے اوہ ایتھے دا دورہ کرے۔ ایس سلسلے وچ باہر دے ملکاں وچ موجود پاکستانی سفارت خانے نوں قومی سطح اتے پروموٹ کرنا چاہیدا اے تے ایہدی بہترین صورت ایہہ ہے کہ ویلے دے نال نال پاکستانی صنعت دی نمائش کیتی جاوے تے بین الاقوامی سطح اتے ایہنوں پروموٹ کیتا جاوے۔
ایہناں سارے اقدامات پاروں ایس گل دی امید کیتی جا سکدی اے کہ ساڈی ثقافت’ صنعت تے سیروسیاحت نوں پوری دنیا وچ فروغ ملے گا تے پاکستان دا اک بہترین چہرہ دنیا دے سامنے آوے گا۔
(3) تصویر دا دوجا رخ
پرانے زمانے وچ یورپی مصنفین جدوں مسلم ملکاں دا دورہ کردے تے اوہناں نوں قلمبند کردے ہوئے مسلماناں دی کمزوریاں تے کوتاہیاں نوں نمایاں کردے جد کہ اوہناں دے شاندار کارنمامیاں نوں نظرانداز کر دیندے۔ اوہناں دی لکھی کتاباں تریخ دا حصہ بن جاندیاں تے مگروں لوک جدوں اوہناں دا مطالعہ کردے تے اوہ سمجھدے کہ مسلمان اک نکام قوم اے جہڑی اپنے ادب و تہذیب تے قومی اثاثیاں نوں وی سنبھال نہیں سکی۔ اج دے زمانے وچ ایہہ کم ساڈا میڈیا کر رہیا اے۔ صرف منفی واقعات نوں ہیڈ لائناں بنا کے پیش کرن دا مطلب ایہہ اے کہ ساڈے معاشرے وچ چنگا کم ہو ای نہیں رہیا۔ ایس صورتحال وچ ایس چیز دی بہت لوڑ اے کہ میڈیا تصویر دا دوجا رخ وی وکھاوے تے معاشرے وچ ہون والے مثالی کماں نوں وی پیش کرے تاں جے پاکستانی قوم وچ اعتماد پیدا ہووے۔
(4) اردو ادب’ بین الاقوامی سطح اتے
ایہہ ساڈے اتے اللہ دا کرم اے کہ ساڈے کول ادب دی اک روشن تریخ موجود اے۔ کہانی’ افسانہ’ ناول تے داستان گوئی دے ذریعے ایسے بہترین کردار لکھے گئے جہناں نے معاشرتی اصلاح وچ بھرواں کردار دا کیتا۔ ایتھے دے ادبا تے مصنفین علم و حکمت دے اعتبار نال کسے وی قوم دے ادیباں توں گھٹ نہیں تے اوہناں دے لکھے ادب نوں نصاب دا حصہ بنایا جا سکدا اے۔ اج کل پاکستان وچ فرنچ تے روسی ادب دا اردو ترجمہ مقبول ہو رہیااے۔ جے ایہہ ہو سکدا اے تے فیر ساڈے ایس شاندار ادب نوں وی انگریزی ‘ فرانسیسی تے روسی زبان وچ منتقل کیتا جانا چاہیدا اے تاں جے ساڈے مشاہیر دے علم و دانائی توں باقی دنیا مستفید ہووے تے ساڈا اک بہترین روپ دنیا دے سامنے آ جاوے۔
(5) انگریزی چینل داقیام
انٹرنیشنل میڈیا پاکستان بارے 50فیصد تک منفی خبراں نشر کر رہیا اے۔ ایہدا توڑ اک ای اے کہ ساڈے کول وی انگریزی چینل ہون۔ بدقسمتی نال ایتھے ایہہ میدان خالی اے جد کہ پڑوسی ملک ول جے ویکھیے تے اوتھے 700چینل نیں جہناں وچوں 300چینل انگریزی دے نیں۔ا یس گل دی بہت لوڑ اے کہ پاکستان وچ انگریزی چینل دا قیام عمل وچ لیایا جاوے جہڑا انٹرنیشنل میڈیا دی برابری کرے تے بین الاقوامی سطح تے ساڈے خلاف ہون والے پراپیگنڈے دا سدباب کرے۔
(6) اج کونٹنٹ دا دور اے
صحافی تے استاد معاشرے دے ایسے ارکان نیں جہڑے معاشرے نوں کونٹنٹ دیندے نیں۔ استاد دا کونٹنٹ جس قدر بہترین’ موثر تے سبق آموز ہووے گا ایسے قدر معاشرے وچ اقدار تے روایتاں پروان چڑھن گئیاں تے تربیت دا سلسلہ بہترین ہووے گا۔ ایسے طرح صحافی جس قدر مثبت تے حقائق اتے مبنی کونٹنٹ میڈیا نوں دیوے گا ایسے قدر ایس قوم دا سافٹ امیج دنیا دے سامنے آوے گا۔ تسیں جے پڑوسی ملک داکونٹنٹ ویکھو تے اوہناں دی کجھ ویڈیو اینی ایموشنل نیں جہناں نوں ویکھ کے انسان دی اکھاں بھِج جاندیاں نیں۔ سانوں وی موثر تے انوکھا کونٹنٹ پیش کرنا چاہیدا اے تے شارٹ فلماں ول آنا چاہیدا اے۔ بدقسمتی نال ساڈا صحافی موثر تے سبق آموز کونٹنٹ دے بجائے اندر دی خبر لیان لئی بوہتی کوششاں کردا اے۔ ایتھے کونٹنٹ دلوں نہیں بنایا جاندا کہ ریٹنگ لئی بنایا جاندا اے تے ایسے وجہ نال اوہدے وچ جان نہیں اے۔
(7) معاشرے نوں سدھارن والے عمل
کتاب’ لیڈر تے رائے عامہ بنان والے لوک’ ایہہ تن ایسے عمل نیں جہڑے معاشرے نوں سدھار سکدے نیں۔ سانوں کتاب نوں فروغ دینا چاہیدا اے۔ ایہدے توں نویں افکار تے نویں خیالات جنم لیندے نیں تے معاشرے وچ مثبت تبادلہ خیال ودھدا اے۔ ایہدے نال نال لیڈراں دی ذمہ داری ایہہ بندی اے کہ اوہ سوشل میڈیا اتے کم کرن والے لوکاں دی رہنمائی کرن۔ ایس میدان وچ بہت چنگا کم ہو رہیا اے لیکن احساس ذمہ داری دی کمی اے۔ جے ساڈے یوٹیوبرز احساس ذمہ داری نال لبریز ہو جان تے اوہ معاشرے نوں بہتری ول لے جان وچ اک شاندار کردار ادا کر سکدے نیں۔
(8) ریسرچ اینڈ ڈویلپمنٹ
ریسرچ اینڈ ڈویلپمنٹ پاروں کوئی وی قوم شاندار ترقی کر سکدی اے۔ اج پوری دنیا وچ امریکہ دا رعب ایسے وجہ نال اے کہ اوہ تحقیق دے میدان وچ سب توں اگے اے۔ ایس سال 2022وچ امریکہ نے اک کھرب 40ارب ڈالر دی خطیر رقم ریسرچ اینڈ ڈویلپمنٹ لئی مختص کیتی اے کیوں جے اوہ ایہہ گل جاندا اے کہ ایس چیز دا براہ راست تعلق قومی تشخص دے نال اے۔ اج دی دنیا وچ ایسے قوم دا دبدبہ اے جہدے کول علم تے کونٹنٹ اے۔ امریکہ دنیا بھر دے اعلیٰ دماغاں نوں سیلی کان ویلی مدعو کردا اے تے اوہناں نوں پرکشش آفر دیندا اے تاں جے نواں علم ایجاد کیتا جاوے تے دنیا بھر وچ اپنے شاندار قومی تشخض نوں پروان چڑھایا جاوے۔ سانوں وی ریسرچ اینڈ ڈویلپمنٹ دے میدان وچ کم کرن دی بہت لوڑ اے تے سالانہ گھٹ توں گھٹ 10ارب دی رقم ایس مقصد لئی مختص کرنی چاہیدی اے فیر ای اسیں ترقی ول سفر کرنا شروع کر سکاں گے۔