اجڑے ہوئے ہم وطن

مظہر برلاس

اجے پاکستانی میڈیا تے سیاسی لڑائیاں پیش ہو رہیاں سن کہ 20اگست نوں ڈاکٹر فہمیدہ مرزا نے مینوں فون کیتا تے کہن لگیاں’ سندھ وچ قیامت دا منظر اے لوکاں نوں سیلاب دا سامنا اے ہر پاسے بھکھ پھیلی ہوئی اے۔ بے سہارا لوک کدھر جان؟ سندھ دے حکمران سُتے ہوئے نیں پر مینوں میڈیا تے حیرت اے کہ اوہنوں ایہ سب کجھ نظر نہیں آ رہیا۔ میڈیا اجڑے ہوئے لوکاں نوں کیوں نہیں وکھا رہیا اوہناں لئی آواز بلند کیوں نہیں کر رہیا’ سندھ تے حکومت کرن والے تے شاید ایہ سمجھدے نیں کہ اوہناں نے خدا نوں کوئی جواب ای نہیں دینا’ میرا سندھ برباد ہو گیا’ بلوچستان وچ وی قیامت دا سماں اے پر حکمراناں نوں مخالفین دے خلاف کاروائیاں کرن توں ویہل نہیں’ میڈیا تے سیلاب زدگان دی آواز بنے۔ ڈاکٹر فہمیدہ مرزا دیاں گلاں سن کے میں اوہناں اگے عرض کیتی کہ تہاڈے نال میرا 1997ء توں تعلق اے مینوں اندازہ اے کہ تہاڈا دل دکھی اے’ تسیں خاص طور تے سندھ دے لوکاں دا دکھ نہیں ویکھ سکدیاں۔ تہاڈی گل ٹھیک اے اج رات میں اپنے ٹی وی ٹاک شو وچ سندھ دا تذکرہ کراں گا تے تہانوں وی پروگرام دا حصہ بناواں گا۔ جدوں پروگرام ہو گیا تے اگلے ای دن سندھ دے وزیراعلیٰ مرادعلی شاہ نے صوبے دے 23 ضلعیاں نوں آفت زدہ قرار دے دتا۔
ہن سوال ایہ پیدا ہوندا اے کہ کیہ ایس ٹی وی پروگرام توں پہلاں مرادعلی شاہ نوں پانی وچ ڈبیا ہویا سندھ نظر نہیں سی آ رہیا؟ ایہدا مطلب تے ایہ ہویا کہ ڈاکٹر فہمیدہ مرزا نوں سندھ بارے مرادعلی شاہ توں زیادہ خبر اے’ اوہ سندھ دے حالات زیادہ جان دیاں نیں۔ رہی وفاقی حکومت تے اوہنوں اپنے مقدمے ٹھیک کرن توں علاوہ کوئی کم نہیں آندا یاں فیر اپنے مخالفین تے مقدمے بنانا آندے نیں۔ بلوچستان توں دل دہلا دین والے مناظر دی ویڈیوز یاں تصاویر اکھاں دے ساہمنیو ںگزردی اے تے دل چیر دے رکھ دیندی اے۔ سندھ توں جو ویڈیوز ویکھن نوں ملیاں نیں اوہ وی قیامت دا منظر پیش کردیاں نیں۔ دکھ تے ایہ وی اے کہ ووٹ دین والے ڈب گئے تے ووٹ لین والے بچ گئے۔ ایہ وی کہیا جا رہیا اے کہ سندھ وچ اک خاص شخصیت دیاں زمیناں بچان لئی دو شہر ڈوبے جا رہے نیں۔ اودھر جنوبی پنجاب دے دو تن ضلعیاں وچ سیلاب بستیاں اجاڑ گیا اے مینوں تے شاید ایہدی وی خبر نہ ہوندی پر ساڈی دوست شاعرہ ایمان قیصرانی نے روہی دے روندے ہوئے دکھ بیان کر دتے۔ لکھدیاں نیں ہر پاسے مایوس ہو کے نظر تہاڈے قلم ول ویکھ رہی اے خدا واسطے کجھ ساڈے وسیب دی ترجمانی کرو۔
جنوبی پنجاب’ سندھ تے بلوچستان تے گزری قیامت تے طوفان نوح ثانی تے کوئی کالم لکھو۔ معذرت پر شاید حکمراناں تے ایواناں نوں اقتدار دی رسہ کشی تے اپنے من مرضی دیاں وکالتاں توں کجھ اگے ایہ رینگدے ہوئے کیڑے مکوڑے وی نظر آ جان۔ حکمراناں نوں اقتدار دی غلام گردشاں توں ویہل نہیں اوہ تے بھاری بھر کم وفد نال بیرونی دوریاں تے نیں۔ کنی تباہی ہوئی ہووے گی کہ ڈی جی خان دی ایہ شاعرہ اپنے وسیب لئی رو پئی اے۔ ایہ اوہو ایمان قیصرانی اے جنہے کرونا دے دناں وچ حالات تے پوری غزل لکھی سی اوہدا اک شعر اج وی زبان زدعام اے کہ:
دل تو پہلے ہی جدا تھے یہاں بستی والو
کیا قیامت ہے کہ اب ہاتھ ملانے سے گئے
حضرت موسیٰ نے اللہ تعالیٰ اگے عرض کیتی کہ اے میرے خدا جدوں توں کسے قوم نال ناراض ہوندا ایں تے ناراضگی دا اظہار کیویں کردا ایں؟ حضرت موسیٰ دے سوال تے رب کائنات نے جواب دتا’ اے موسیٰ میں اوس قوم تے اجہے حکمران مسلط کر دینا واں جہڑے چنگے نہیں ہوندے۔ تسیں ذرا غور کرو کہ ایس ویلے جو ٹولا اقتدار وچ اے اوہنوں لوکاں لئی سوچن دی ویہل ای نہیں’ جدوں توں ایہ ٹولا مسلط ہویا اے لوک مہنگائی دی چکی وچ پس گئے نیں تے ہن تے ملک دے زیادہ حصے وچ سیلاب بستیاں کھا گیا اے انساناں نوں نگل گیا اے جو بچ گئے نیں اوہ زندگی بچان لئی بھکھ نال لڑ رہے نیں۔ جدوں لوکاں دے ساہ دیاں ڈوریاں کٹ رہیاں نیںتے ساڈے حکمران بیرونی دوریاں تے نیں یاں فیر محفوظ تھاواں تے نیں۔
ہے کوئی جو ایہ سوچدا ہووے کہ آخر منصوبہ بندی کیوں نہیں ہوندی’ بند بنھن دے ناں تے ہر ورھے پیسہ کتھے چلا جاندا اے چھوٹے ڈیمز کیوں نہیں بنائے جاندے’ جو بنائے گئے اوہ اینے گھٹیا کیوں سن؟ ساڈے حکمران کیوں نہیں سوچدے کہ صرف حکمرانی کرنا ای اوہناں دا کم نہیں ملک سنوارنا وی اوہناں دا فرض اے کنہے قدرتی آبی گزرگاہواں تے کالونیاں بنان دتیاں؟ کنہے شہراں وچ نکاسی آب دا بندوبست نہ کیتا؟ ایہدے لئی کون جواب دہ اے تے ہن سیلاب زدگان تک خوراک تے دوجیاں شیواں نہ اپڑان دا ذمہ دار کون اے؟ یقین کرو مینوں تے اوہ نوجوان نہیں بھلدا جو اپنی زندگی دا کل اثاثہ دو بکریاں بچاندے بچاندے آپ پانی دی نذر ہو گیا’ اپنے پالتو جانوراں دی محبت وچ اپنی زندگی لہراں دے حوالے کر گیا۔ کاش کوئی سوچدا پر اہل اقتدار نوں ویہل کتھے؟ صورتحال ایہہ وے کہ بقول اسلم گورداسپوری:
زندگی میں ہر طرف سیلاب ہی سیلاب ہیں
کیا قیامت ہے یہاں دریا بھی زیر آب ہیں