ربا میرے دیس دی خیر

سعداللہ شاہ

کیا دشمنی ہے آپ سے جب آپ ہیں امام
ہے آپ ہی کے ہاتھ میں جب قوم کی لگام
اب تک تو چل رہا ہے فقط آپ کا نظام
کہتی ہے ایک دنیا ہمیں آپ کا غلام
میرا خیال اے کہ تسیں اینے سخن فہم او کہ مینوں ایہناں شعراں نوں کھولن دی لوڑ نہیں۔ تسیں ایہنوں نوحا یاں کجھ وی کہہ لوو پر ایہہ ہے حقیقت قومی سطح تے وی تے بین الاقوامی سطح تے وی۔ فیر جواب شکوہ وی اے۔ آخر ہو کیہ رہیا اے کہ مہنگائی پنتالی فیصد نوں چھو چکی اے ایہ مہنگائی سیلاب دی ای اک قسم اے کہ لوکاں نوں غربت تے بے کسی وچ ڈوبے ہوئے اے۔ وزیراعظم شہبازشریف ایس توں علاوہ کیہ کہن کہ سیلاب متاثرین نوں اکلا نہیں چھڈاں گے پر اوہناں نے ساری عوام نوں مہنگائی دے سمندر وچ ڈبکیاں کھان لئی چھڈ دتا اے۔ تسیں چنگی طرح جان دے او کہ عمران د ا مداح وی رہیا تے اوہدے رویے دا ناقد وی پر حضور تسیں تے حد ای کر دتی اے زیادہ مثالاں نہیں دیواں گا پر صرف اک ادھ خان صاحب دے دور وچ مہنگائی ہوئی سی تے ایہو کہ اعلان ہوندا کہ پٹرول دس روپیے ودھے گا تے خان صاحب دس نوں پنج کرکے شرماندے ہوئے مسکرا دیندے۔ اسیں تھوڑا جیہا پیچ و تاب کسدے ہوئے کہندے کہ پنج روپیے دا فائدہ ہو گیا پر شہبازشریف حکومت معصومیت دے مقابلے مکار تے چالاک اے۔ اعلان ایہ کردی اے کہ پٹرول اٹھاراں روپیے فی لٹر گھٹ ہو رہیا اے لوک بے فکر ہو کے سوندے نیں کہ سویرے پٹرول سستا ہووے گا تے پوا لواں گے سویرے اٹھدے نیں تے لگدا اے شاید اٹھاراں روپیے کمی والا تے خواب سی اوہ تے چھ ست روپیے ہور مہنگا ہو گیا اے ایہ سراسر دھوکھا دہی اے۔ مزید ویکھ لوو کہ بار بار اخبار وچ اعلان کہ فیول ایڈجسٹمنٹ چارجز ختم کیتے جا رہے نیں تے محکمے نوں ہدایت دتی جا چکی اے پتہ لگا کہ کسے دے کول کوئی نوٹس نہیں آیا تے نال ای اک ٹیکہ ہور جڑ دتا گیا کہ بجلی فی یونٹ پنج روپیے ودھا دتی گئی اے۔ انج کمال ای تے کردے نیں ایہ اتحادی ایہ اکٹھے ہو کے قوم تے حملہ آور ہوندے نیں۔ ایہناں وچوں کسے نے وی سیلاب زدگان لئی جیب ڈھلی نہیں کیتی۔ اکثر تے باہر توں آن والی امدا ددے منتظر نیں زرداری صاحب جو چھ چھ گھنٹے شجاعت صاحب دے کول آ کے بیٹھدے سن ڈبن والیاں دے کول نہیں جا سکے۔ بندہ پچھے کہ کہ تسیں کرن کیہ آئے سی تہانوں آن دا چاء چڑھیا سی فرماندے نیں معیشت بچان آئے سی سبحان اللہ۔میرے معزز قارئین تہاڈی زندگی وچ اک تجریہ تے ضرور آیا ہووے گا کہ کدی تساں کسے نوں ڈبدے ویکھیا ہووے گا تے فیر اوہنوں کوئی بچان والا آیا ہووے گا تے ڈبن والا انھے واہ سہارا لین لئی ہتھ ماردا اے کدی ایہ ہتھ بچان والے دے کچھے یعنی نیکر تے وی پے جاندا اے ایہ وچارے معیشت نوں ڈبن توں بچان لئی آئے سی معیشت ایہناں نوں لے ڈبی۔ ہن ایہ ہتھ پیر مار رہے نیں ہتھ وچ کجھ نہیں آ رہیا:
پھر مرے ہاتھ پائوں چلنے لگے
جب میرے ہاتھ سے کنارا گیا
اک صاحب مفتاح اسماعیل نیں۔ کمال ایہہ وے کہ اوہ ہسدے تے مسکراندے ہوئے ذبح کردے نیں تے پوری طرح چس لیندے نیں اوہناں دی عینک وچوں وی اوہناں دی اکھا ںدی چمک نظر آ رہی ہوندی اے اوہ کدی خیر دی خبر لے کے سکرین تے نہیں آندے۔ اوہناں نے نوازشریف تے مریم نواز دیاں ساریاں خوشیاں ماند کر دتیاں نیں اصل وچ ن لیگ نوں اپنے ای شیر تے بیٹھنا مہنگا پے گیا اے کہ شیر بدک کے نس گیا اے۔ اب نہ ہاتھ باگ پر ہے نہ پاہے رکاب میں۔ انج شیر دے نہ تے رکاب ہوندے نیں تے اوہدی واگ ہوندی اے۔ دوجے پاسے خان صاحب مکمل یلغار دے موڑ وچ نیں کیوں کہ ایس توں ودھ مثالی صورتحال ہو ای نہیں سکدی۔ مونس الٰہی دا لب و لہجہ ویکھن والا اے۔ فرماندے نیں عمران نے جدوں کہیا شہبازشریف نوں اسلام آباد وچ بند کر دیاں گے۔ بھئی ایہ تے بھینسے نوں لال رومال وکھان دے مترادف اے میں سوچدا رہیا کہ ایہ دن وی آنے سن بہرحال مونس الٰہی اجے بچے نیں پرویزالٰہی دی بالغ نظری نوں نہیں اپڑے۔ میں تے اجے اک مخمصے وچ الجھیا ہویا واں کہ جیویں سیلاب دے پانیاں دے زور دے اگے وڈے وڈے ہوٹل تے عمارتاں ککھاں وانگوں رڑھ گئیاں اوسے طرح ایہ صورت گری ول غمازی کر رہی اے۔ اداریاں دا وقار داء تے لگا ہویا اے انج وقار تے اعتبار وچ بڑا فرق اے کاش کہ اعتبار بنایا ہوندا۔
ربا میرے دیس دی خیر
سر تے شور اے کانواں دا
آخر وچ کالم نوں ذرا سخن رنگ کر دیئے کہ اک محفل سخن غازی بابر صاحب دے ہاں اسیں برپا کیتی۔ غازی بابر ساڈے محسن ظہیرالدین بابر دے چشم و چراغ نیں۔ کجھ شعر:
وہ تو رویا تھا عادتا گوہر
اور ہم نے اجاڑ لی دنیا
(انمول گوہر)
دل مسافر کو ٹھکانے کی پریشانی ہے
اور مجھے خاک اڑانے کی پریشانی ہے
پہلے اس دشت میں پانی کی پریشانی تھی
اب مجھے نائو بنانے کی پریشانی ہے
(سجاد بلوچ)
خزاں کے دور میں اتری دھنک بہاروں کی
کبھی نہ پھیکا پڑا یاد یار کا موسم
(ڈاکٹر خالدہ انور)
کوئی قدیم سرائے مجھے بلاتی ہوئی
کوئی ستارا مجھے راستہ دکھاتا ہوا
پڑے ہوئے تھے گل و مہر و ماہ سروں میں
گزر گیا کوئی درویش حمد گاتا ہوا
(نذیر قیصر)