پنجاب دھرتی دا شیر پُتر۔۔۔رائے احمد خاں کھر ل شہید

رائے احمد خاں کھرل (1776 -1857) 1857 دی جنگ آزادی دے دوران نیلی بار دے علاقے وچ مقامی قبیلیاں دی برطانوی راج دے خلاف بغاوت (گوگیرہ بغاوت) دے رہنما تے سالار بن کے سامنے آئے تے اپنی بہادری تے دھرتی دی محبت نال اوہ داستان لکھ گئے جہدے تے پنجابی قوم جہنا وی فخر کرے گھٹ اے۔ 1849 وچ انگریزاں نے سکھ حکمراناں کولوں اقتدار کھوہ کے جدوں پنجاب اتے قبضہ کر لیا تے راوی دے علاقے توں کھرل’ فتیانہ’ کاٹھیہ تے دُوجے خوددار خانداناں دی مزاحمت اتے قابو پان لئی پاکپتن’ اوکاڑہ’ منٹگمری (موجودہ ساہیوال) گوگیرہ تے ہڑپہ دے علاقیاں اتے مشتمل اک ضلع بنایا گیا جہدا صدر مقام پہلے پاپتن تے فیر گوگیرہ نوں رکھیا گیا۔ تریخ دان لکھدے نیں کہ رائے احمد خاں کھرل برطانوی سامراج دے خلاف سی۔ انگریزاں دے ظلماں دی داستاناں سنن تے ویکھن مگروں انگریز سرکار نال دشمنی اوہناں دے دل وچ کٹ کٹ کے بھری سی۔ 1857 دی جنگ آزادی ویلے جدوں انگریزاں نے مسلماناں نوں توپاں دے اگے بنھ کے اڈان دا ظالمانہ کھیڈ کھیڈیا تے پنجاب دے بہادر جواناں نے غاصب طاقت نوں للکارنا شروع کر دتا۔ جون دی اک سویر’ گوگیرہ وچ تعینات انگریز افسر برکلے نے علاقے دے معتبر سرداراں نوں طلب کیتا تے بغاوت نال نبڑن لئی اوہناں کولوں گھوڑے تے جوان منگے۔ رائے احمد نواز خان کھرل نے برکلے نوں جواب دتا کہ صاحب ایتھے کوئی وی اپنا گھوڑا’ زنانی تے زمین نہیں چھڈدا۔ تریخ دَسدی اے کہ 10جون 1857 نوں ملتان چھائونی وچ پلاٹون نمبر 69 نوں بغاوت دے شبہ وچ نہتا کیتا گیا تے پلاٹون کمانڈر نوں مع دس سپاہیاں دے توپ دے اگے رکھ کے اڈا دتا گیا۔ اخیر جون وچ بقیہ نہستی پلاٹون نوں شبہ ہویا کہ اوہناں نوں چھوٹی چھوٹی ٹولیاں وچ فارغ تے فیر تھوڑا تھوڑا کر کے تہ تیغ کیتا جاوے گا۔ سپاہیاں نے بغاوت کردتی۔ تقریباً بارہ سو سپاہیاں نے بغاوت دا علم اُچا کیتا۔ انگریزاں دے خلاف بغاوت کرن والے مجاہدین نوں شہر تے چھائونی وچ واقع پل شوالہ اتے دربار بہائوالدین زکریا دے سجادہ نشین مخدوم شاہ محمود قریشی نے انگریزی فوج دی قیادت وچ اپنے مریداں دے نال گھیرے وچ لے لیتا تے تن سو دے کول کول نہتے مجاہدین نوں شہید کروا دتا۔ ایہہ مخدوم شاہ محمود قریشی موجودہ شاہ محمود قریشی دے لکڑ دادا سن تے اوہناں دا نام اوہناں دے حوالے نال رکھیا گیا اے۔ کجھ باغی دریائے چناب دے کنارے شہر توں باہر نکل رہے سن کہ اوہناں نوں دربار شیر شاہ دے سجادہ نشین مخدوم شاہ علی محمد نے اپنے مریداں دے نال گھیر لیتا تے اوہناں دا قتل عام کروایا۔ مجاہدین نے ایس قتل عام توں بچنے لئی دریا وچ چھالاں مار دتیاں۔ کجھ لوک دریا وچ ڈب کے جاں بحق ہو گئے تے کجھ لوک پار پہنچن وچ کامیاب ہو گئے۔ پار پہنچ جان والیاں نوں سید سلطان احمد قتال بخاری دے سجادہ نشین دیوان آف جلالپورہ پیروالہ نے اپنے مریداں دی مدد نال شہید کردتا۔ مجاہدین دی اک ٹولی شمال وچ حویلی کورنگا ول نکل گئی جہنوں مہر شاہ آف حویلی کورنگا نے اپنے مریداں تے لنگڑیال’ ہراج’ سرگانہ تے ترگڑ سرداراں دے نال گھیر لیتا تے چن چن کے شہید کیتا۔ مہر شاہ آف حویلی کورنگا سید فخر امام دے پڑدادا دا سگا بھرا سی۔ اوہنوں ایس قتل عام وچ فی مجاہد شہید کرن اتے 20روپے نقد یا اک مربع اراضی عطا کیتی گئی۔ مخدوم شاہ محمود قریشی نوں 1857 دی جنگ آزادی دے کچلن وچ انگریزاں دی مدد دے عوض مبلغ تن ہزار روپے نقد’ جاگیر’ سالانہ معاوضہ مبلغ اک ہزار ست سو اسی روپے تے 8 چاہات بطور معافی دوام عطا ہوئی۔ ہور ایہہ کہ 1860 وچ وائسرائے ہند نے بیگی والا باغ عطا کیتا۔ مخدوم آف شیر شاہ مخدوم شاہ علی محمد نوں دریائے چناب دے کنارے مجاہدین نوں شہید کرن دے عوض وسیع جاگیر عطا کیتی گئی۔ حویلی کورنگا دے معرکے وچ بظاہر سارے مجاہدین راوی دے کنارے وسن والے مقامی جانگلیاں دی اک وڈی تعدادایس تحریک آزادی وچ شامل ہو گئی۔ جانگلی علاقے وچ ایس بغاوت دا سرخیل رائے احمد خان کھرل سی جوگوگیرہ دے نواحی قصبہ جھامرہ دا وڈا زمیندار تے کھرل قبیلے دا سردار سی۔ احمد خان کھرل دے نال مراد فتیانہ’شجاع بھدرو’ موکھا وہنی وال تے سارنگ کھرل جئے مقامی سردار تے زمیندار سن۔ جدوں درگاہواں دے سجادہ نشیناں ولوں مجاہدین آزادی اتے زمین تنگ کردتی گئی۔ ایسے ویلے وچ راوی بار وچ رائے احمد نواز خان کھرل دا وجود اوہناں لئی سایہ عاطفت ثابت ہویا۔ رائے احمد نواز خان کھرل نے نہ صرف انگریز افسر برکلے نوں گھوڑے تے جوان دین توں انکار کیتا بلکہ معرکہ کورنگا توں بچ جان والے مجاہدین نوں وی پناہ دتی۔ ایدھر جولائی دے پہلے ہفتے دریائے ستلج دے کنڈے آباد دو ٹو قبیلے نے انگریز سرکار نوں لگان ادا کرن توں انکار کیتا تے انگریز نے اوہناں اتے چڑھائی کردتی۔ اوہناں دے مال مویشی ہانک کے لے گئے تے بستیاں نوں اگ لا دتی۔ ایسے دوران گوگیرہ دے بہت سارے خاندان قید کر لئے گئے۔ انگریز دے ایس اقدام دی خبر جدوں رائے احمد خان کھرل نوں پہنچی تے اوہناں دا لہو کھول اٹھیا۔ تے اوہناں نے جیل توڑن دا فیصلہ کر لیا۔ گوگیرہ بنگلہ دی جیل وچ کھرل سردار دے مجاہدین وی قید سن۔ چنانچہ 26جولائی 1857 نوں رائے احمد خان کھرل نے اپنے ساتھیاں دے نال جیل اتے حملہ کر دتا۔ قریب چار سو انگریز فوجیاں نوں جہنم واصل کیتا تے مسلمان قیدیاں نوں چھڈوا لیتا۔ ایس معرکے وچ رائے احمد خان کھرل خود وی زخمی ہویا۔ گوگیرہ جو اوس ویلے ضلعی ہیڈ کوارٹر سی۔ اوہدی جیل توڑن تے سامراج دے ہاں تھرتھلی مچ گئی۔ گوگیرہ دے برکلے’ منٹگمری (ساہیوال) دے مارٹن تے ملتان دے میجر ہملٹن دی نیندراں اڈ گئیاں۔ جون’ جولائی دے مہینیاں وچ جنگ زوراں تے رہی۔ منٹگمری گزٹ لکھدا اے کہ احمد خان کھرل اک غیر معمولی صلاحیتاں دا مالک’ دلیر تے ذہین بندا سی۔ اوہدی قیادت وچ ستلج تے راوی دے سارے نامور قبائل متحد ہو کے بغاوت وچ شریک ہوئے۔ اوہناں دا ہیڈ کوارٹر راوی دے اوس پار کوٹ کمالیہ سی۔ ایس اٹھن والے طوفان دا پہلا نشانہ ضلعی صدر مقام گوگیرہ (موجودہ اوکاڑہ دے کول واقع قصبہ) دے مقام اتے واقع جیل بنی جہدے اتے حملہ کر کے رائے احمد خان کھرل تے اوہدے ساتھی بغاوت دے جرم وچ بند کئی سو قیدیاں نوں چھڈا کے گھنتے جنگلاں وچ روپوش ہو گئے۔ احمد خان دے پے در پے حملیاں دی وجہ نال منٹگمری دا علاقہ (موجودہ ساہیوال ڈویژن تے ضلع ٹوبہ) تقریباً تن مہینیاں تک قبضے توں نکل گیا تے عملی طور تے رائے احمد خان دی عملداری قائم ہو گئی۔ رائے احمد خان کھرل نے 16 ستمبر نوں کمالیہ دے سارے زمینداراں نوں اکٹھا کیتا تے اوہناں نوں جنگ آزادی وچ شمولیت دی ترغیب دتی۔ اگرچہ رائے احمد خان کھرل دے بلاوے اتے آن والے زمیندار کھرل سردار دی آواز اتے لبیک کہہ رہے سن لیکن اوہناں وچوں ای سرفراز کھرل نامی اک شخص میر جعفر تے میر صادق دی تریخ دہران نوں وی بے چین بیٹھیا سی۔ رات نے جیویں ای کالی چادر پائی’ کمالیہ دے سرفراز کھرل نے میر جعفراں دی تریخ وچ اک ہور کالے باب دے وادھے لئی گھوڑی دا رخ برکلے دے بنگلے وَل پھیر دتا۔ رات دے تقریباً ساڈے گیارہ وَجے سن جدوں سرفرازنے برکلے نوں جگا کے رائے احمد خان کھرل دے اکٹھ دی روداد سنائی۔ سویر ہوندے ای برکلے نے جھامرہ اتے چڑھائی کردتی۔ رائے احمد خان کھرل انگریز دے ہتھ نہ آیا تے اوہناں نے پنڈ دے بالاں تے زنانیاں نوں لے جا کے گوگیرہ جیل وچ بند کر دتا۔ ایہہ خبر مجاہدین تک پہنچی تے موجودہ اوکاڑہ توں خانیوال تک دا علاقہ میدان جنگ بن گیا۔ ایدھر راوی دا ایہہ مجاہد وطن دی آزادی لئی تازہ لہو دا بندوبست کر رہیا سی تے اودھر دلی وچ ہندوستان دی غلامی اتے مہر ثبت کیتی جا چکی سی کہ میرٹھ تے دلی توں بھڑکن والے جنگ آزادی دے شعلے بہادر شاہ ظفر دی گرفتاری دے نال راکھ ہو چکے سن۔
21ستمبر دے دن انگریز نے مخبری ای دی بنیاد تے گشکوری دے جنگل وچ نورے دی ڈال تے حملہ کیتا۔ بار دے مجاہدین آزادی نے ایسی داد شجاعت دتی کہ ا نگریز فوج توپخانے توں مسلح ہو ن دے باوجود ظہر تک ڈیڑھ کوس پچھے ہٹ چکی سی۔ میدان قدرے صاف ہویا تے کھرل سردار نے نماز عصر دی نیت بنھ لیتی۔ اودھر برکلے وی اپنے سپاہیاں دے نال کول ای لکیا ہویا سی۔ رائے احمد خان کھرل اجے دوسری رکعت پڑھ رہیا سی کہ اسسٹنٹ کمشنر برکلے نے فائر دا آرڈر دتا۔ دھاڑے سنگھ یا گلاب رائے بیدی دی گولی جیویں ای کھرل سردار نوں لگی سردار سجدے وچ ڈگ گیا۔ انج جنگ آزادی دے عظیم ہیرو رائے احمد خان کھرل نے 21ستمبر نوں حالت سجدہ وچ جام شہادت نوش کیتا۔ انگریز رائے احمد خان کھرل دا سر وَڈ کے لے گئے۔ رائے احمد خان کھرل دے قصبہ جھامرہ نوں ملیا میٹ کر دتا’ فصلاں ساڑ دتیاں تے مال مویشی ضبط کر لئے۔ رائے احمد خان کھرل دے سر نوں دن ویلے گوگیرہ جیل دے سامنے لٹکا دتا جاندا تے رات نوں جیل وچ کڑے پہرے وچ رکھیا جاندا۔ پہرے داراں وچ اک سپاہی جھامرے دا سی۔ اوہدی پہرے دی واری آئی تے اوہنے سر نوں گھڑے وچ رکھیا تے جھامرے پہنچ کے رات دے انھیرے وچ رائے احمد خان دی قبر تلاش کر کے کسے نوں دَسے بغیر سر دفنا دِتا۔ 22ستمبر نوں راوی کنڈے مسٹر برکلے دا مجاہدین نال سامنا ہویا تے مراد فتیانہ’ داد فتیانہ’ احمد سیال نے برکلے نوں مار کے اپنے سردار دا حساب برابر کر دتا۔مگروں گورا فوج نے ایہناں مجاہدین نوں گرفتار کر کے کالے پانی بھجوادتا۔ اک پاسے جے راوی بار وچ آباد قبائل قومی حمیت دا نشان بنے اپنے 80 سالہ کھرل سردار دی قیادت وچ سینہ سپر سن تے دُوجے پاسے سجادگان تے مخدومین حق نمک ادا کردے ہوئے انگریز سامراج دی فوج دے نال سن۔ جہناں وچ دربار سید یوسف گردیز دا سجادہ نشین سید مراد شاہ گردیزی’ دربار بہائوالدین زکریا دا سجادہ نشین مخدوم شاہ محمود قریشی’ دربار فریدالدین گنج شکر دا گدی نشین مخدوم آف پاکتپن’ مراد شاہ آف ڈولا بالا’ سردار شاہ آف کھنڈا تے گلاب علی چشتی آف ٹبی لال بیگ دے علاوہ وی کئی مخدوم تے سجادہ نشین شامل سن۔وفاداری دے صلے وچ انگریز سرکار نے کھرل تے دوجے قبائل دی زمیناں کھوہ کے اپنے مخبراں تے حمایتیاں نوں الاٹ کر دتیاں جہڑے اج وڈے وڈے گدی نشین بنے بیٹھے نیں تے جہڑے اَج وی کسے نہ کسے طریقے نال علاقے دے اصل وارثاں نوں اپنا غلام بنائے ہوئے نیں۔ بالائی طبقہ وچ ایہہ کالے انگریز گورے انگریزاں توں وی ودھ ظالم ثابت ہوئے۔ جہناں قبائل نے تحریک آزادی وچ قربانیاں دتیاں۔ پہلے اوہناں دی زمیناں اتے قبضے کیتے تے مگروں اوہناں دی اولاداں نوں تعلیم تے ترقی توں دور رکھن دی کامیاب کوششاںکردے رہے۔ 1857 دی جنگ آزادی تریخ وچ انمٹ نقوش چھڈ گئی اے لیکن رائے احمد خان کھرل شہید دا غیرت مند کردار تریخ وچ اک علامت دے طور تے ابھریا۔ نامساعد حالات تے قلیل ترین وسائل ہون دے باوجود اوہناں نے انگریز سامراج دی پالیسیاں توں 81سال دی عمر وچ بغاوت کیتی۔ تہی دست قبائل دا ایہہ بڈھا سردار جس ویلے قومی غیرت دا نشاں بنے سامراج دے سامنے سینہ سپر کھڑا سی۔ عین اوسے ویلے کجھ درگاہواں دے سجادہ نشین جاگیراں تے نقدی مال و زر دے عوض قومی غیرت و حمیت انگریز سامراج دے پیراں وچ نچھاور کیتے جا رہے سی۔ اسیں اللہ دے نیک بندیاں دی دلوں عزت کرنے آں لیکن اوہناں دی گدیاں اتے بیٹھن والیاں دے کردار توں سانوں اختلاف اے تے اسلام وچ گدی نشینی دا تصور ویسے وی بالکل نہیں اے۔ جے انج ہوندا تے حضرت امام حسین مدینہ پاک توں کوفہ کیوں جاندے۔ لوڑ اے کہ اج دی نسل نوں اپنے اصل ہیروواں دی حیاتیاں بارے پڑھیا جاوے۔ اج کل پی ٹی وی اتے غازی ارطغرل ڈرامہ ویکھن والے بڑی چھیتی سمجھ سکدے نیں کہ اپنی صفاں وچ موجود غدار ریاستاں نوں کس قدر نقصان پہنچاندے رہے نیں۔