اپنی سویردے مالک بنو

جیف بیزوس171 بلین ڈالر دے نال دنیا دا امیر ترین انسان بن گیا۔ نوواک ڈی جو کو وچ دنیا دا نمبرون ٹینس پلیئر بن گیا۔ بابر اعظم دنیا دا بہترین بلے باز بن گیا۔ محمد بن راشد المختوم نے دنیا دا سب توں وڈا ایکسپو قائم کیتا۔ جیمز سٹیوارٹ ہالی ووڈ داسٹار بن گیا۔ رابرٹ لیونا ڈودنیا دا بہترین فٹبالر بن گیا وغیرہ وغیرہ۔
ایہہ ساری گلاں سن کے انسان دی عقل دنگ رہ جاندی اے کہ ساڈے وانگوں اک انسان ایس مختصر جئی حیاتی وچ اینی شان دار ترقیاں کیویں کر لیندا اے؟
ایس سوال توں مجبور ہو کے اسیں ایہناں شخصیات بارے ریسرچ کرنے آں۔ اوہناں دے انٹرویوز سننے آں’ اوہناں دی آپ بیتی تے سوانح حیات پڑھنے آں تے دل ای دل وچ اوہناں وانگوں کامیاب بن جان دی کوشش کردے آں لیکن جہڑی بنیادی عادت پاروں ایہہ لوک عام توں خاص بنے۔ ایہدے اتے عمل پیرا ہون دی کوشش نہیں کردے۔
جی ہاں! ایہناں سارے کامیاب ترین تے موثر ترین انساناں وچ جتھے ہور بہت ساری شیواں مشترک نیں اوتھے اوہناں دی اک عادت ایہہ وی اے کہ ایہہ سویرے سورج طلوع ہون توں پہلاں جاگ جاندے نیں۔ اوہ ویلا کہ جدوں الارم چلا چلا کے لوکاں نوں بیدار کرن دی خبر دے رہیا ہوندا اے تے اوہ جاگ تے جاندے نیں لیکن فیر غنودگی دا اک زور داجھونکا اوہناں دے ذہن اتے لگدا اے تے اوہ اپنے الارم دا گلہ دبا کے اپنے منہ اتے تکیہ رکھ لیندے نیں تے اک واری فیر نیندر دی وادیاں وچ چلے جاندے نیں تے ایویں ایہہ کامیاب لوک اٹھدے نیں’ اپنے دن دا آغاز کردے نیں تے خود نوں تیار کر کے دنیا اتے چھا جاندے نیں۔
بادصبادے جھونکیاں وچ خوشگوار احساس ہون دے نال نال اک ایسی طاقت وی ہوندی اے جہڑی جہڑے انسان دے دل و دماغ نوں چھو لووے تے اوہ حقیقی طور تے اک باکمال انسان بن جاندا اے۔ طلوع آفتاب توں پہلے والی روشنی دی چمک ای ایسی ہوندی اے کہ اوہ جہدے اتے پیندی اے اوہدی زندگی وچ روشنیاں دا بسیرا ہو جاندا اے تے اوہدی بنیادی وجہ ایہہ ہے کہ آپۖ نے دعا منگی اے کہ اے اللہ! میری امت لئی دن دے ابتدائی حصے وچ برکت عطا فرما (سنن الترمذی:1212)
جہڑی چیز لئی سردار کائناتۖ نے دعا منگی ہووے فیر اوہ خیر تے برکت توں کیویں خالی رہ سکدی اے؟ ایہو وجہ اے کہ ایس ویلے اٹھ کے اپنے دن دا آغاز کرن والے لوک شان دار ترقیاں حاصل کر لیندے نیں۔
دسمبر 2018 نوں اک کتاب شائع ہوئی جہدا نام اے:The 5 AM Club
ایس کتاب دے مصنف رابن شرما نیں جہڑے کہ اک بہترین موٹیویشنل ٹرینر تے سکسیس (Success) کوچ نیں۔ اج توں 20ورھیاں پہلاں اوہناں نے 5 AM Club دا نظریہ دتا سی تے ایہہ نعرہ لایا سی کہ اپنی سویر دے مالک بنو’ خود نوں کامیاب بنائو۔
روبن شرما بذات خود اک ایلیٹ پرفارمنس ایکسپرٹ تے لیڈرشپ دے موضوع اتے چنگا عبور رکھدے نیں۔ اوہناں نے اپنے کلائنٹس نوں وی ایہہ راز سمجھایا تے ایس فلسفے پاروں اوہناں دی صحت’خیالات تے جذبات’ قابلیت تے پروفیشنل ترقی وچ بے انتہا وادھا ہویا۔
رابن شرما نے چار سال دے لمے عرصے وچ ایہہ کتاب پوری کیتی۔ کتاب وچ موجود سارے نکات اوہناں دی تحقیق تے آزمودہ تجربات اتے مبنی نیں۔ ایہہ کتاب جدوں منظر عام اتے آئی تے ہر پاسے اوہدے چرچے ہون لگے تے کجھ ای عرصے وچ ایہنے فروخت دے ریکارڈ توڑ دتے۔ ویکھدے ای ویکھدے ایہہ دنیا بھر وچ مقبول ہو گئی تے دنیا دی مختلف زباناں وچ ایہدے ترجمے ہوئے۔ دراصل ایس کتاب دا فلسفہ ایس قدر آسان تے شانادر اے کہ جہنے وی پڑھیا’ اوہ اوہنوں اپنان اتے مجبور ہو گیا۔ رابن شرما دے بقول’ دنیا وچ موجود سارے اوہ لوک جہڑے کسے وی لحاظ نال لیڈرشپ دے عہدے اتے ہون’ اوہ 5 AM Club وچ شامل ہون گے۔
آئو اک نظر ایس شاندار کتاب اتے پانے آں۔
The 5 AM Clubوچ مندرجہ ذیل فارمولے دَسے گئے نیں:
(1) کامیابی لئی چار اندرونی زمیناں
اج دے دور وچ ہر شخص خود نوں کامیاب ویکھنا چاہندا اے لیکن جدوں تک انسان اپنی اندرونی چار زمیناں نوں تیار نہ کر لووے تے کامیاب ہونا بہت ای اوکھا اے۔اوہ چار زمیناں ایہہ نیں:
مائنڈ سیٹ ‘ہارٹ سیٹ ‘ہیلتھ سیٹ ‘سول(Soul)سیٹ
مائنڈ سیٹ دا تعلق نفسیات دے نال اے کہ لوک ساڈے نال کیہ رویہ اختیار کردے نیں تے ایہناں رویاں کولوں اسیں بہت کجھ سکھنے آں۔
ایہہ گل وی واضح رہوے کہ صرف مائنڈ سیٹ نوں بہتر کر کے انسان کامیابی حاصل نہیں کر سکدا کیوں جے کامیابی حاصل کرن وچ ایہدا کردار صرف 25فیصد ہوندا اے۔ ایہدے نال نال باقی تن زمیناں وی تیار کرنی ضروری نیں۔
اپنے ہارٹ سیٹ نوں بہتر کرنا وی ضروری اے۔ ایہہ انسان دے جذبات نیں جہدے وچ پیار’ غصہ’ محبت’ نفرت’ غم تے سرور شامل نیں۔واضح رہوے کہ انسان جس قدر اپنے جذبات اتے کنٹرول رکھ سکے گا’ اوس قدر ای اوہدے وچ لیڈرشپ دی صلاحیت پروان چڑھے گی۔ اوہ انتقام دے بجائے درگزر تے معافی نال کم لووے گا تے ایسے وجہ نال سارے لوکاں دا پسندیدہ بن جاوے گا۔
تیجے نمبر اتے ہیلتھ سیٹ اے جہدا انسان نے ہر حال وچ خیال رکھنا ہوندا اے کیوں جے انسان جو کجھ وی اے’ اپنی صحت پاروں اے۔ جے اوہدی صحت ای نہ رہوے تے فیر اوہ جی وی نہیں سکے گا تے نہ ای اپنی ایس زندگی توں لطف لے سکے گا۔ ہیلتھ سیٹ نوں بہتر کرن لئی انسان نوں گھٹ توں گھٹ خوراک لینی چاہیدی اے۔ ورزش باقاعدگی نال ہووے تے پانی دا استعمال بھرواں ہووے۔ یاد رکھو کہ ایس چیز اتے کوئی کمپرومائز نہیں کرنا چاہیدا ورنہ انسان اپنی صلاحیتاں دا بھرواں اظہار نہیں کر سکے گا تے انج اوہ ترقی وی نہیں کر سکے گا۔
چوتھے نمبر اتے سول سیٹ اے جہنوں بہتر تے مضبوط کرنا وی بہت ضروری اے۔ ایہہ انسان دا رب دے نال تعلق اے۔ عبادت’ مراقبہ تے دعا اے۔ اللہ دی نعمتاں دا شکر تے ساری مخلوق لئی خیر خواہی چاہنا اے۔ یاد رہوے کہ روحانی مضبوطی ای انسان نوں اوہ طاقت دیندی اے جہدے پاروں اوہ زندگی وچ بہت اَگے جا سکدا اے تے نال ای نال اوہ ذہنی مسئلیاں توں وی بچ سکدا اے۔
(2) عادتاں دا ٹُٹنا تے بننا’
ایس کتاب وچ اک بہترین نکتہ ایہہ وی بیان کیتا گیا اے کہ انسان دی عادتاں کیویں ٹُٹدی تے بندیاں نیں۔ ظاہر اے کہ سویرے اُٹھنا اک اوکھا کم اے تے ایہدے اتے استقامت اختیار کرنا ایس توں وی اوکھا۔ ایس لئی ضروری اے کہ پہلاں اپنی عادت ایس طرح بنا دتی جاوے کہ سویرے خود بہ خود اٹھیا جاوے۔ روبن شرما آکھدے نیں کہ انسانی عادتاں ٹٹن تے نویں عادتاں بنن لئی 66دن درکار ہوندے نیں۔ ایہہ 22دن دے تن سرکل ہوندے نیں۔ پہلے 22دن مستقل مزاجی دے نال اک عادت اتے عمل کرن نال پرانی عادت ٹٹ جاندی اے۔ 22دن دے دوجے سرکل وچ نویں عادتاں دے رستے بندے نیں تے آخری 22دناں وچ اوہ عادت ساڈے تحت الشعور وچ بیٹھ جاندی اے تے فیر انسان خود بخود اوہ کم کرن لگ جاندا اے۔
تسیں جے سویرے جاگن دا تہیہ کر لیا اے تے شروع وچ ایہہ کم بڑا اوکھا لگے گا لیکن جے تسیں ایہنوں مستقل مزاجی نال کرو تے ہولی ہولی ایہہ آسان ہوندا جاوے گا تے ایہدے مگروں کوئی مشکل ای نہیں رہوے گا۔
محمد علی کلے کہندا اے:میں اپنی تربیت دے اک اک منٹ نال نفرت کیتی سی’ چھڈنا نہیں اے۔ اج تکلیف چک لوو’ باقی دی حیاتی چیمپئن بن کے لنگھے گی تے فیر انج ای ہویا۔
رابن شرما دسدا اے کہ سویرے اٹھن لئی تہانوں اپنے لئی کوئی اک محرک لبھنا ہووے گا جہڑا تہانوں ترغیب دیوے۔ جدوں تہاڈی اکھ کھل جاوے تے انتظار نہ کرو فوراً بستر توں نکلو ورنہ تہاڈا ذہن تہانوں ورغلانا شروع کر دیوے گا کہ ایہدے تے سکون بستر نوں چھڈ کے تے باہر جا کے کیہ کر لوو گے ‘ سوجا یار’ نیندر دے مزے لوو۔مگر تسیں اوہدی گل نہیں سننی۔
اپنے ایس عمل نوں تسیں مستقل مزاجی نال کردے رہوو تے جدوں تہانوں محسوس ہووے کہ تسیں ایس ٹریک اتے چل پئے او تے خود نوں شاباش دیو’ اگے دا کم تہاڈے لئی آسان ہو جاوے گا۔
(3) ویں/ویں/ویں دا فارمولہ
جدوں انسان دن بھر دی تھکاوٹ مگروں پرسکون نیندر لے لیندا اے تے سویرے جاگدا اے تے اوہدے دماغ دے سارے مسلز بڑے ای متحرک ہوندے نیں تے ایہو ویلا ہوندا اے جہدے وچ انسان اپنے ذہن نوں بہترین انداز وچ پروگرام کر سکدا اے تے ایس پروگرامنگ پاروں اوہ اپنے سارے دن نوں شاندار بنا سکدا اے جہڑا کہ یقینا اوہدی ذاتی تے پروفیشنل زندگی نوں ترقی دی راہ اتے گامزن کر دیندا اے۔
رابن شرما سویرے اٹھن مگروں والے پہلے گھنٹے نوں فتح دا گھنٹہ آکھدا اے تے اوہدے وچ اوہ تجویز کردا اے کہ ایس گھنٹے نوں ویں ویں منٹ دے تن حصیاں وچ تقسیم کیتا جاوے تے ہر حصے وچ وکھری وکھری سرگرمی کیتی جاوے۔ ایہہ تن سرگرمیاں بھرویں حرکت’ خود دا جائزہ لینا تے خودنموئی اتے مشتمل نیں۔
The 5 AM Clubدے مطابق فتح دے گھنٹے دے پہلے ویں منٹ وچ بھرویں ورزش کرنی اے تے گہرے گہرے سانس لینے نیں۔ ورزش ایس انداز وچ کرنی اے کہ پسینے چھٹ جان۔ ایہہ سرگرمی تہاڈے لئی بہت ضروری اے کیوں جے جاگن مگروں ہارڈ ورک کرن نال ڈوپا مین تے سیروٹونین دا بہائو تیز ہو جاندا اے جہدی وجہ نال انسان دا ذہن چست’ طاقتور تے مضبوط ہو جاندا اے تے اوہدی کاررکردگی وچ جان آ جاندی اے۔ ایہہ عمل روز کرن نال انسان دا مدافعتی نظام وی مضبوط ہو جاندا اے جہدے توں اوہ بیماریاں دا مقابلہ کر سکدا اے تے انج انسان ہمیشہ صحت مند تے فٹ رہندا اے۔
اگلے ویں منٹ وچ تہاڈے کول چار سرگرمیاں ہوندیاں نیں:ڈائری لکھنا’ پلاننگ کرنا’ مراقبہ’ عبادت تے دعا
ایہدے پاروں تہاڈے خیالات مثبت ہون گے۔ رب نال تعلق مضبوط ہووے گاجہڑا تہانوں احساس تشکر نال بھر دیوے گا۔ ایس عمل نال تہاڈا شعور ودھے گا تے تسیں اپنے بارے آگاہی حاصل کر لوو گے۔ ایہہ ساری شیواں تہانوں پرسکون رکھن وچ بھرویں مدد دین گئیاں جہدے وجہ نال تہاڈی تخلیقی صلاحیت پروان چڑھے گی تے تسیں بہترین پرفارمنس دے سکو گے۔
20منٹ دے تیجے رائونڈ وچ تسیں خود نوں بہتر کرنا اے۔ ایہدے وچ تسیں اپنے گولز تے اہداف دا تجزیہ کر سکدے او۔ کتاب پڑھ سکدے او۔ آڈیو کتاب (Audio Book) سن سکدے او یا ایسی ای کوئی بہترین ویڈیو ویکھ سکدے او جہدے توں تسیں کجھ نواں سکھو تے اوہ تہاڈی قابلیت نوں ہور پروان چڑھاوے۔
رابن شرما کہندا اے کہ The 5 AM Club وچ شامل ہون مگروں پہلے گھنٹے نوں ایس انداز وچ گزارن نال کجھ ای دناں وچ تسیں اپنے اندر شاندار تبدیلیاں محسوس کر سکو گے۔
(4) موبائل فون :تخلیقیت دا دشمن
ایس کتاب دا اک اہم تے کمال نکتہ ایہہ وی اے کہ دنیا وچ موجود جہنے وی باکمال تے کامیاب ترین افراد نیں اوہ خود نوں ایہناں ساری شیواں توں دوررکھدے نیں جہڑیاں اوہناں دی تخلیقی صلاحیتاں وچ دخل اندازی دی مرتکب ہو رہیاں ہون۔ اج دے دور دا سب توں وڈا نشہ موبائل فون اے تے ایہو انسان دی تخلیقی صلاحیت وچ انتشار دا کارن وی بندا اے۔ دنیا دے کامیاب لوک ایس چیز اتے مضبوط کنٹرول رکھدے نیں تے خود نوں ایسی کسے وی چیز دا غلام نہیں بنن دیندے۔
ایہہ اک تلخ حقیقت اے کہ اسیں اک ایسے دور وچ جی رہے آں جتھے وڈی وڈی کمپنیاں ساڈی توجہ حاصل کرن لئی لکھاں ڈالرز خرچ کر رہیاں نیں تے جدوں اسیں ایس جال وچ پھس جانے آں تے فیر اوہ ایہدے توں ارباں ڈالرز کماندیاں نیں۔ اج دی سب توں قیمتی چیز انسان دا ویلا تے توجہ اے جہڑا کہ بدقسمتی نال اسیں بری طرح ضائع کر رہے آں۔ یاد رکھو کہ فیس بک’ یوٹیوب’ ٹویٹر دے بے تحاشا استعمال نال تسیں فالور تے بن سکدے او’لیڈر کدی نہیں۔
رابن شرما دَسدا اے کہ ضرورت دے مطابق سوشل میڈیا دے استعمال مگروں اپنے ویلے دا بوہتا حصہ اپنے کوالٹی ورک اتے خرچ کرنا چاہیدا اے۔ ایہدے لئی اوہ اک پورا فریم ورک وی دَسدا اے کہ دنیا دے جہنے وی عظیم لوک نیں اوہ رات 8وجے مگروں خود نوں موبائل توں دور کر دیندے نیں۔ اوہ اپنی فیملی نوں وقت دیندے نیں۔ کتاب پڑھدے نیں تے 9:30اتے بستر تے چلے جاندے نیں۔اوہ بھرپور تے گہری نیندر لیندے نیں تے سویرے تازہ دم ہو کے The 5 AM Club دی روٹین اتے عمل پیرا ہوندے نیں۔ اوہ ایس لائف سٹائل اتے مکمل پابندی دے نال عمل پیرا ہوندے نیں تے ایسے وجہ نال دنیا اتے راج کردے نیں۔ اپنے اندر بہترین عادتاں پیدا کرن تے اک کامیاب زندگی گزارن لئی ایس کتاب دا مطالعہ تہاڈے لئی بے حد مفید رہوے گا۔