موسمیاتی تبدیلی دنیا بھر لئی خطرہ اے

وطن عزیز دا بیشتر حصہ ایس ویلے سیلاب دی تباہ کاریاں توں بری طرح متاثر اے۔ بالخصوص صوبہ سندھ دا اک وڈا حصہ تے بلوچستان’ پنجاب تے خیبر پختوانخوا دے بعض علاقے وی حالیہ سیلاب توں شدید متاثر ہوئے نیں۔ اک اندازے دے مطابق تقریباً تن کروڑ توں ودھ آبادی سیلاب توں براہ راست متاثر ہوئی اے۔ متاثرہ علاقیاں وچ خوراک دی شدید کمی دا اندیشہ اے جد کہ وبائی امراض دے پھُٹن دا خطرہ وی ہر ویلے موجود اے۔ ذرائع آمدروفت بری طرح متاثر ہوئے نیں جہدی وجہ نال اجے تک وی کراچی تے اندرون سندھ دا ملک دے دوجے حصیاں توں ریل دا رابطہ منقطع اے جد کہ سڑکاں دا نظام وی بری طرح متاثر اے۔ بہت سارے پل ٹُٹ گئے نیں تے زراعت دے نظام نوں وی بہت نقصان ہویا اے۔ لوکاں دی زندگی مشکلات نال بھری ہوئی اے کیوں جے زندگی دا تقریباً ہر شعبہ ایس سیلاب توں متاثر ہویا اے۔ اک اندازے دے مطابق نقصان دا اندازہ تقریباً 11ارب ڈالر توں وی بوہتا اے۔ وفاقی تے صوبائی حکومتاں بحالی دے کماں وچ مصروف نیں جد کہ بہت ساری رفاعی تنظیماں تے ادارے وی اپنا کم بھرویں طریقے نال کر رہے نیں۔ ذرائع گھٹ ہون دی وجہ نال بحالی دا کم ایس طرح نہیں ہو رہیا جیویں ہونا چاہیدا اے۔ وزیراعظم شہباز شریف وی ہر متاثرہ علاقے وچ پہنچن دی پوری کوشش کر رہے نیں تاں جے بحالی دے کماں دی خود نگرانی کر سکن۔ بہت سارے دوست ملک تے بین الاقوامی تنظیماں وی امدادی سامان بھیج رہیاں نیں جد کہ اقوام متحدہ دے سیکرٹری جنرل انتوینو گوتریس ولوں بین الاقوامی سطح اتے وی امداد دی بھرویں اپیل کیتی جا چکی اے۔
پاکستان وچ حالیہ سیلاب دی وڈی وجہ موسمی تبدیلی اے جہدا ایس ویلے دنیا نوں سامنا اے۔ اقوام متحدہ دے سیکرٹری جنرل نے پچھلے دناں پاکستان دا دو دناں دا دورہ کیتا تے خود متاثرہ علاقیاں وچ جا کے صورتحال دا جائزہ وی لیا۔ اوہناں دا کہنا بالکل درست اے کہ موسمیاتی تبدیلی وچ پاکستان دا حصہ نہ ہون دے برابر اے جد کہ بدقسمتی نال ایہہ ایس تبدیلی توں سب توں ودھ متاثر ہویا اے۔ بین الاقوامی برادری دی ایہہ بنیادی ذمہ داری اے کہ اوہ گیساں دے اخراج نوں گھٹ کرن تے ایہناں ملکاں دی بھرویں مدد کرن جہڑے ناکردہ گناہواں دی پاداش وچ ایس تباہی توں متاثر ہو رہے نیں۔ دنیا پاکستان اتے رحم نہ کرے بلکہ انصاف کرے بالخصوص دنیا دے امیر ملک جہڑے ایس موسمیاتی تبدیلی دے وڈے موجب وی نیں۔ اظہار یکجہتی دا مطلب اے کہ ایہناں ملکاں بالخصوص پاکستان نوں ذرائع مہیا کیتے جان کہ اوہ ایہناں اثرات دا مقابلہ کر سکے۔ دنیا نے جے ایہناں ذمہ داریاں دا احساس نہ کیتا تے فیر تباہی ساریاں دا مقدر بن سکدی اے۔ اج جے پاکستان ایہدا شکار ہویا اے تے کل ایہو حال کسے ہور ملک دا وی ہو سکدا اے۔ اقوام متحدہ دے سیکرٹری جنرل نے فوری طور تے 160 ملین ڈالر امداد دی اپیل وی کیتی اے تاں جے پاکستان دی فوری مدد کیتی جا سکے۔
موسمیاتی تبدیلی دی سب توں وڈی وجہ گرین ہائوس گیساں دا اخراج اے جہڑا دنیا دے وڈے تے ترقی یافتہ ملکاں وچ موجود انڈسٹریز’ گیس پلانٹس’ نیو کلائی پلانٹس تے وڈے وڈے کارخانیاں دی وجہ نال پیدا ہوندیاں نیں۔ ایہدی وجہ نال درجہ حرارت وچ وادھا ہویا اے تے گلیشیئر پگھل رہے نیں۔ بارشاں بالخصوص Cloud Brust جئی صورتحال دی وجہ نال ایہناں علاقیاں وچ بارشاں بوہتی ویکھن نوں مل رہیاں نیں جتھے ویسے اوسطاً گھٹ بارشاں ہوندیاں نیں جیویں بلوچستان تے صوبہ سندھ دے اندرونی علاقے۔ ایہہ ساری صورتحال ایس گل دا ثبوت اے کہ زندگی دے حقائق تلخ نیں تے ہر ویلے رون دھون تے شکایتاں کرن دے بجائے ویکھنا چاہیدا اے کہ اسیں ایہناں آفات تے مشکلاں نوں گھٹ کرن لئی خود کیہ کیتا اے۔
سانوں اپنے لوکاں دے طرز زندگی وچ بہتری لیان دی بہت لوڑ اے جہدے توں اک تے اوہناں وچ شعور بہتر ہووے گا تے فیر اوہ ایس طرح دی مشکلاں دا بہتر طریقے نال سامنا کر سکن گے۔ معاشی طور تے بہتر تے باشعور لوک ایہناں اثرات دا بہت بہتر طور تے مقابلہ کر سکدے نیں۔ موسمیاتی تبدیلی اک مستقل خطرہ اے جہدے لئی نہ صرف سانوں ہن ذہنی طور تے تیار رہنا چاہیدا اے بلکہ مستقل بنیاداں اتے منصوبہ بندی وی کرنی چاہیدی اے جہڑی کثیر المدتی ہووے۔ ہن کوئی علاقہ ایسا نہیں قرار دتا جا سکدا جتھے روایتی طور تے اوہو موسم ہووے گا جیویں کہ ہمیشہ توں ہوندا رہیا اے۔ جہناں علاقیاں وچ بارشاں بہت گھٹ ہوندیاں سن اوتھے ہن بوہتیاں ہو سکدیاں نیں جیویں کہ ا یس واری ہویا اے تے ایسے طرح جتھے بوہتی بارشیاں ہوندیاں سن اوتھے ہن گھٹ ہو سکدیاں نیں۔ ایسے طرح درجہ حرارت وی گھٹ تے بوہتے ہو سکدے نیں۔ ایہناں اثرات توں موثر طور تے نبڑن لئی حکومتاں نوں فوری اقدامات کرنے ہون گے کیوں جے ہر واری دنیا ساڈی مدد نوں نہیں آوے گی تے نہ ای ہر واری رون دھون نال کم بنے گا۔ اپنی مدد اسیں خود ای کرنی اے تے ایہو دستور زمانہ وی اے۔