زندہ قوماں دی زندگی

اک ارب پتی صنعت کار اک مچھیرے نوں ویکھ کے بڑا حیران ہویا جو مچھیاں پھڑن دی تھاں اپنی کشتی کنڈھے لا کے سگرٹ لائی بیٹھا سی۔ اوس ارب پتی توں رہیا نہ گیا تے آخر اوہنے مچھیرے توں پچھن لگا۔ برا نہ منوں تے اک گل پچھاں’ توں مچھیاں کیوں نہیں پھڑ رہیا؟ مچھیرا :کیوں جے اج دے دن وچ کافی مچھیاں پھڑ چکیا واں۔ صنعتکار: توں ہور کیوں نہیں پھڑ رہیا؟ مچھیرا: میں ہور مچھیاں پھڑ کے کیہ کراں گا؟ صنعتکار: بھئی ایس طرح توں زیادہ پیسے کما سکنا ایں’ فیر تہاڈے کول موٹر والی کشتی ہووے گی جہدے نال توں ڈونگھے پانیاں وچ جا کے مچھیاں پھڑ سکیں گا۔ تہاڈے کول نائیلون دے جال خریدن لئی کافی پیسے ہون گے’ اوہدے نال توں ہور زیادہ مچھیاں پھڑیں گا تے زیادہ پیسے کمائیں گا۔ چھیتی توں ایہناں پیسیاں پاروں دو کشتیاں دا مالک بن جاویں گا تے بہت سارے ملازم تیرے لئی کم کر رہے ہون گے۔ ہو سکدا اے تیرا ذاتی جہازاں دا بیڑا ہووے تے فیر توں وی میرے وانگوں امیر ہو جاویں گا۔
مچھیرا: فیر ایہدے بعد میں کیہ کراں گا؟
صنعتکار: فیر توں آرام نال بہہ کے زندگی دا لطف اٹھانا۔
مچھیرا: تے تینوں کیہ لگدا اے میں ایس ویلے ہور کیہ کر رہیا واں؟
ڈاکٹر محمد خانی کہندے نیں کہ میں اک دن اپنی گڈی وچ بیٹھا ہویا سی کہ اک سولاں سالہ نوجوان آیا تے کہیا کیہ میں تہاڈی گڈی دا سامنے والا شیشہ صاف کر لواں؟ جی۔ اوہنے گڈی نوں بڑی نفاست نال صاف کیتا تے میں اوہنوں اجرت دے طور تے ویہہ ڈالر دتے’ اوہنے تعجب نال میرے ول ویکھیا تے سوال کیتا کہ کیہ تسیں امریکہ توں پرتے او’ جی’ کیہ میں تہاڈے توں امریکہ دی یونیورسٹیاں بارے سوال کر سکنا واں کہ اوتھے صفائی دی کنی اجرت ملدی اے؟ اوہ انتہائی درجے دا مودب سی’ میرا اضطراب ودھیا کہ میں اوہنوں اپنے ول بلاواں تاں جے اوہدے نال گل کر سکاں۔ ایس لئی میں اوہدے اگے سوال کیتا: تیری عمر کنی اے؟ سولاں سال’ ثانیہ متوسطہ وچ پڑھنا ایں؟ نہیں میں تے سادسہ اعدادیہ مکمل کر چکیا واں۔ ایہ کیویں ممکن ہویا؟ ایس لئی کہ ہر امتحان وچ میری ودھیا کارکردگی تے چنگے نمبر لین دی وجہ نال مینوں اگلی کلاساں وچ بٹھا دتا گیا’ فیر توں ایتھے کیوں کم کر رہیا ایں؟ جدوں میں صرف دو سال دا سی تے میرے والد صاحب دا انتقال ہو گیا تے میری ماں اک گھر وچ باورچی دی حیثیت نال کم کردی سی’ میں تے میری بھین باہر کم کرنے آں’ میں امریکی یونیورسٹیاں بارے سنیا اے کہ اوہ چنگی کارکردگی دے حامل طلبہ نوں سکالرشپ دیندیاں نیں تاں جے اوہ اپنے تعلیمی دورانیے نوں جاری رکھ سکن۔ کیہ امریکہ وچ تہاڈا کوئی ہے جو تہاڈی مدد کر سکے؟۔ میں اپنے علاوہ کسے نوں مددگار نہیں پاندا۔ چلو کھانا کھان چلنے آں۔ ایس شرط تے تہاڈے نال کھانا کھان لئی چلاں گا کہ میں تہاڈی گڈی دے پچھلے شیشے وی صاف کراں گا’ میں ہامی بھر لئی’ ریسٹورنٹ وچ جا کے اوہنے آپ کھانا کھان دی تھاں اپنا کھانا اپنی ماں تے بھین لئی پیک کرن نوں کہیا۔ میں نوٹ کیتا کہ اوہنوں انگریزی زبان وچ بہترین صلاحیت حاصل اے وکھووکھ کماں وچ تجربے پاروں اوہ اک پالش شدہ نوجوان اے۔ میں اوہنوں اپنے ڈاکومنٹس گھروں لیان دی ترغیب دتی تے اپنی استطاعت دے مطابق اوہدے لئی کوشش کیتی’ چھ مہینے دے بعد اوہنوں ویزا مل گیا تے دو دن بعد اوہ مینوں ملیا تے کہیا ”باخدا مارے خوشی کے آنسو ہمارے تھمتے نہ تھے” دو ورھے بعد یونیورسٹی والیاں نے اوہدا ناں نیویارک ٹائمز وچ جدید ٹیکنالوجی دے کم ترین ماہر دی حیثیت نال نشر کیتا۔ میں تے میری فیملی اوہنوں اپنے واسطے باعث سعادت سمجھنے آں۔
میری بیوی نے اوہدی ماں تے بھین لئی اوہدے علم وچ لیائے بناں ٹکٹ خرید لئے۔ نوجوان اپنی ماں تے بھین نوں امریکہ وچ اپنے سامنے پا کے رون توں علاوہ اپنے منہ چوں اک لفظ وی نہ کڈھ سکیا۔ اک دن میں تے میری بیوی گھر وچ سی کہ اوس نوجوان نوں ویکھیا کہ گھر چوں باہر میری گڈی صاف کر رہیا اے’ میں اوہنوں اوہدی ایس طرح غیرمتوقع آمد تے’ خوشی نال گلے لایا تے کہیا: توں ایہ کیہ کر رہیا ایں؟ تسیں مینوں رہن دیو تاں جے میں اپنے آپ نوں بھُل نہ سکاں کہ میں ایس توں پہلاں کیہ سی تے تسیں میرے لئی کیہ کیتا اے؟ اوس نوجوان فلسطینی دا ناں فریدعبدالعالی اے جہڑا ہاورڈ یونیورسٹی دے بہترین تے مشہور ترین استاداں وچوں اک ایہو زندہ قوماں دی مثال اے تے ایہو زندہ قوماں دا مطمع نظر اے۔