سوچیا جے ضرور!

کون کہندا اے اسیں ترقی نہیں کیتی۔ اسیں 75 ورھیاں وچ انج دی ترقی کیتی کہ کمال کر دتا۔ 1947ء وچ اک ملک سی’ اسیں دو بنا دتے’ ساڈے کول اک قائداعظم سی’ ہن ہر جماعت دے کول اپنا اپنا قائداعظم’ ساڈی آبادی چار کروڑ سی’ اج 24کروڑ’ پاکستان بنیا ڈالر ساڑھے تن روپیے دا اج 240 روپیے دا’ ساڈی پہلی کابینہ گورنر جنرل قائداعظم’ وزیراعظم لیاقت علی خان سنے 11وزیراں تے مشتمل’ اودوں مغربی’ مشرقی پاکستان اک سی’ مطلب اج دا بنگلہ دیش وی پاکستان سی۔ اج ادھے پاکستان دی کابینہ 70 وزیراں’ مشیراں تے مشتمل’ پاکستان بنیا ملک تے قرضہ صفر اج قرضہ 50 ہزار ارب توں ودھ’ پاکستان بنن دے 11 ورھے مگروں اسیں آئی ایم ایف دے کول گئے’ اج 22 ویں واری آئی ایم ایف دے کول اپڑے۔ پاکستان بنیا اسیں صرف پاکستانی سی’ اج اسیں سندھی’ پنجابی’ بلوچی’ پٹھان تے پتہ نہیں کیہ کیہ’ سوکھے لفظاں وچ 1947ء وچ اک قوم نوں ملک دی تلاش سی اج اک ملک نوں قوم دی تلاش’ کدی ساڈی عدلیہ دنیا وچ 20 ویں نمبر تے سی اج 140 ملکاں وچ 128 ویں نمبر تے’ کدی ساڈا پاسپورٹ 30 ویں نمبر تے سی’ اج چوتھے نمبر تے’ ایہ وکھری گل تھلیوں چوتھے نمبر’ کدی اسیں جرمنی نوں قرضہ دیندے سی’ سعودی عرب دی اوکھے ویلے وچ مدد کردے سی’ بینکاری وچ چین نوں مشورے دیندے سی عرب ملک صلاح مشورے لئی ساڈے کول آندے سن۔ اسلامی ملکاں دے سربراہ بادشاہی مسجد لہور وچ بیٹھے ملدے سی’ اج ساڈی شہرت دے ایس طرح ڈنکے وج رہے نیں کہ ساڈا حکمران کسے دوست ملک نوں فون کر لوے تے بقول وزیراعظم شہبازشریف اوہ دوست ایہ سوچ کے فوراً چوکنا ہو جاندا اے کہ ایہہ فیر کجھ منگے گا۔
کون کہندا اے اسیں ترقی نہیں کیتی۔ اسیں تے انج دا کمال کر دتا’ کدی عربی شیخ گھمن’ شاپنگ کرن کراچی آندے سن اج اسیں گھمن’ شاپنگ کرن عربی شیخاں دے کول جانے آں۔ کدی پی آئی اے دوجے ملکاں دی ایئر لائناں بنا چلا رہی سی’ اج پی آئی اے اپنے آپ نوں نہیں چلا پا رہی۔ سوکھے لفظاں وچ کدی دنیا تے ایہدے تے سفر کردی ‘اج مجبوری نہ ہووے تے پاکستانی ایہدے تے سفر نہیں کردے۔ کدی سارے پاکستانیاں دا سب کجھ پاکستان وچ سی اج ہر دوجے صاحب حیثیت پاکستانی دا سب کجھ باہر’ کدی ساڈے حکمران محمدعلی جناح بیمار ہوئے تے زیارت وچ قیام کیتا’ اج ساڈے حکمران نوں نزلہ’ زکام وی ہو جاوے تے قیام و طعام’ علاج سب باہر۔ کدی ساڈے بیورو کریٹ صرف پاکستانی سن اج خیر نال 22 ہزار دے نیڑے اوہ بیوروکریٹس جہناں دے کول دوجے ملکاں دی شہریت وی تے دنیا بھر وچ کدھرے بادشاہت’ کدھرے صدارتی نظام’ کدھرے پارلیمانی نظام’ اساں 75 ورھیاں وچ صدارتی نظام’ پارلیمانی نظام’ مارشل لاء سب کجھ بھگتا لئے’ سانوں بادشاہت دی کمی ایس لئی محسوس نہ ہوئی کیوں جے خیر نال اک ادھ نوں چھڈ کے ساڈا جو جمہورا’ اقتدار وچ آیا اوہنے سانوں بادشاہت دی کمی محسوس نہ ہون دتی۔ کدی اسیں صرف سرکار برطانیہ دے غلام سی اج اسیں امریکہ’ چین’ سعودی عرب’ آئی ایم ایف’ ورلڈ بینک تے پتہ نہیں کہدے کہدے حسب قرضہ’ حسب امداد’ حسب خیرات غلام۔ کدی کرپشن وچ ساڈا نمبر50 واں’ اج اسیں کرپشن وچ 180 ملکاں وچوں 140 ویں نمبر تے’ کدی اسیں کنک’ چاول’ چینی ایکسپورٹ کردے سی اج اسیں کنک’ چاول’ چینی’ دالاں تے پتہ نہیں کیہ کیہ باہروں منگوا رہے آں۔
ساڈے کول نااہل’ نالائق’ نکمی قیادت’ ساڈے کول ٹیکس چور’ ذخیرہ اندوز تاجر’ اقلیت نوں کڈھ کے ساڈے کول جعل سازی’ دونمبری دی چیمپئن قوم’ ساڈے کول آبادی بمب’ سوکھے لفظاں وچ اک کمان والا دس کھان والے تے سوکھے لفظاں وچ ایتھے ہر پنج سیکنڈ بعد بچہ پیدا ہو جاوے۔ ساڈے کول بے پیندے دی معیشت مطلب ساڈی معیشت اوہ بھنڈا جہدا پیندا ای نہیں۔ ساڈے کول اینے قرضے کہ جو پیدا نہیں ہوئے اسیں اوہناں دا وی ایڈوانس پھڑ لیا۔ ساڈے کول ویژن لیس’ کنفیوژ فیصلہ ساز’ ساڈے کول اُتوں تھلے تک ہر ادارہ’ ہر شعبہ بیڈگورننس’ بیڈ پرفارمنس تے مس مینجمنٹ دے شاہکاراں نال بھریا ہویا’ ساڈے کول وڈے وڈے عہدیاں تے بونے بیٹھے ہوئے’ ساڈے کول ناانصافی’ ظلم’ خواری’ ساڈے کول دنیا دا سب توں وڈا کشکول’ ساڈے کول طاقتوراں دی محافظ پولیس’ ساڈے کول پیسے والیاں لئی نظام انصاف’ ساڈے کول کجھ گھراں تے کجھ جسماں وچ سمٹی اوہ جمہوریت جو اک سطح توں تھلے آ کے بانجھ ہو جاوے سوکھے لفظاں وچ ساڈے کول اوہ جمہوریت جو اک مخصوص طبقے نوں ای انڈے بچے دیوے۔
ساڈے کول اجیہا نظام جہدے وچ لوکاں لئی اک چنگا ہسپتال نہیں۔ اک چنگا تعلیمی ادارہ نہیں سگوں ایہ سب چھڈو ساڈے کول اجیہا نظام کہ 75 ورھے بعد وی عام بندے لئی پین دا صاف پانی نہیں ایس لئی کون کہندا اے کہ ساڈے کول کجھ نہیں۔ ناشکرا پن نہ کرو’ ساڈے کول تے اوہ کجھ جو کدھرے ہور نہیں’ آخر تے بس ایناں کہنا اے کہ 75 ورھیاں توں جس طرح دی ترقی اسیں کر رہے آں کیہ ایسے طرح دی ترقی اگے وی کرنی اے تے جو کجھ ساڈے کول کیہ ایہنوں انج ای استعمال کرنا اے سوچیے گا ضرور تے ہاں اسلامی جمہوری پاکستان وچ اج کناں اسلام تے کنی جمہوریت’ ایہدے تے ضرور سوچیا جے۔٭٭