وزیر اعظم دا گھر غیر محفوظ…تے محفوظ ہے کیہ ؟

اہم ترین حکومتی شخصیات دی وزیراعظم دے گھر ہون والی گل بات دی آڈیو ریکارڈنگ افشا ہون اتے ایہہ سوال پیدا ہو گیا اے کہ زویراعظم دا گھر ای جدوں غیر محفوظ اے تے ملک وچ ایسا کوئی ہور مقام اے جہدے بارے وثوق نال آکھ سکیے کہ اوہ مکمل طور تے محفوظ اے؟ کیوں جے گل ریکارڈنگ تک ای محدود نہیں رہی بلکہ ایہہ ریکارڈنگ ڈارک ویب اتے فروخت لئی پیش کردتی گئی اے جہنوں دشمن ملک وی ادائیگی مگروں خرید سکدا اے۔ گل بات دی آڈیولیک ہون نال ایس خیال نوں تقویت ملدی اے کہ ملک دے اہم ترین منصب اتے فائز شخصیات تے مقامات تک نہ صرف غیر محفوظ نیں بلکہ فیصلے’ گل بات تے مشاورت کجھ وی خفیہ رکھنا ممکن نہیں رہیا لہٰذا ایہہ جائزہ لینا ضروری ہو گیا اے کہ ا یہہ ڈیٹا افشا کیویں ہویا؟ آیا وزیراعظم دے گھر گفتگو ٹیپ کرن لئی ڈیوائسز لائیاں گئیاں یا فون ٹیپ کیتے گئے؟ ظاہر اے جو وی ہویا اے کسے اہم ترین تے بااختیار دی تائید و منشا دے علاوہ ممکن نہیں ہو سکدا۔ ملک دے اہم ترین مقام دے غیر محفوظ ہون نال سنجیدہ حلقیاں دے ذہناں وچ ہن ہزارہاقسم دے سوالات مقام بنان لگے نیں۔ آڈیو لیکس دے متعلق اک جے آئی ٹی تشکیل دتی گئی اے تے قومی سلامتی کمیٹی دا اجلاس وی طلب کر لیتا گیا اے مگر ایہہ سلسلہ اکٹھے ہون’ بیٹھن تے گپ شپ تک محدود نہیں رہنا چاہیدا بلکہ جووی ملوث اے اوہدی صرف نشاندہی ضروری نہیں بلکہ کیفر کرادر تک پہنچان دی لوڑ اے۔ وزیراعظم ہائوس دے عملے دی تفتیش دے نال ایس گل دا جائزہ لینا وی اشد ضروری اے کہ اوس ویلے کس ادارے دے کون کون ایسے افسر تعینات سن جہناں دے کول ایسے وسائل سن تے اوہناں نوں ہر جگہ آزادانہ نقل وحرکت دی مکمل آزادی سی۔ نیز ریکارڈنگ کرن دے کیہ مقصد سن ایہہ وی جاننا انتہائی اہم اے۔
وزیراعظم دے گھر سنے اہم مقامات توں خفیہ ریکارڈنگ تے آڈیو لیکس دا معاملہ اینا سادا نہیں کہ معمولی جان کے نظرانداز کر دتا جاوے بلکہ گہرائی تک جا کے ساری سازش دا پتہ چلان نال مستقبل وچ ایسی صورتحال توں بچن دی منصوبہ بندی کیتی جا سکدی اے ویسے وی موجودہ حکومتی اتحاد ولوں تحریک عدم اعتماد پیش کرن توں لے کے اقتدار وچ آن تک دا عمل پہلاں ای رسوائیاں تے الزمااں دی اک لمی داستان اے تے ہن جدوں حکومت اپنے اختتام ول گامزن اے۔ رسوائیاں تے الزاماں دی فہرست دا ہور لما ہونا ظاہر کردا اے کہ کجھ حلقے ایہناں توں بے چین نیں تے اوہناں نوں آئندہ انتخابات وچ کامیابی روکنا چاہندے نیں۔ علاوہ ازیں ایسے خیالات نوں تقویت ملدی اے کہ موجودہ حکمران اتحادنوں لیان تے ہن گھر دی راہ وکھان وچ کدھرے نہ کدھرے کجھ ایسے کردار متحرک نیں جہڑے سازشاں دے تانے بانے بنن توں لے کے عمل کران اتے وی قادر نیں۔ ایہدے وچ کوئی دو رائے نہیں کہ حالیہ آڈیو لیکس نوں چاہے کوئی اہمیت دے یا غیر اہم جان کے نظرانداز کرے شہباز شریف دا کردار بطور وزیراعظم نیک نام نہیں رہیا بلکہ اوہناں نوں اک ایسے منتظم دے طور تے ویکھیا جان لگیا اے جو فرائض دی ادائیگی تے اک پاسے’ خود اپنی حفاظت توں قاصر تے زمانے دی دست برد وچ اے۔ ہور ایہہ کہ اک واری فیر شریف خاندان دے بھارت نال جڑے مفادات بے نقاب ہوئے نیں حالیہ آڈیو لیکس مگروں ایسے الزامات دے حوالے نال ہور کسے دلیل یا ثبوت دی لوڑ نہیں رہی۔
وزیراعظم حلف چکدے ویلے اقرار کردا اے کہ بطور وزیراعظم اوہ کدی کسے نوعیت دے ذاتی فیدے لئی ہر گز کم نہیں کرے گا نہ ای اپنے کسی رشتہ دار یا قریبی نوں نفع پہنچان دی کوشش کرے گا مگر آڈیو لیک توں اندازہ ہوندا اے کہ ایس حوالے نال کرائی گئی یقین دہانیاں اتے بوہتا عمل نہیں کیتا جاندا۔ شہباز شریف نے منصب دا حلف چکدے ویلے جو یقین دہانیاں کرائیاں سن اوہناں نے وی اوہناں دی صریحاً خلاف ورزی کیتی اے۔ دشمن ملک توں چوری سامان منگوان نوں حلف دی پاسداری ہرگز نہیں کہہ سکدے۔ایہدے نال اک ہور اہم گل دی نشاندہی ایہہ ہوئی اے کہ ماضی وچ وی ایس منصب اتے فائز رہن والے گڈیاں دے حصول دے دوران حلف دی خلاف ورزیاں دے مرتکب ہوندے رہے نیں تے فیر چیئرمین نیب لئی غیر جانبدار دی بجائے ایسا جانبدار بندہ تلاش کرن دی گل’ جو اشارہ ابرو اتے سارے قواعد و ضوابط بالائے طاق رکھ کے کورنش بجا لیاوے ایسی گلاں توں نہ صرف حکمراناں دی نیک نامی متاثر ہوئی اے بلکہ سفارشاں تے قومی خزانے دے خلاف عرصہ توں جاری سازشاں دے منظرعام تے آن نال ملک دی روز بروز کھوکھلی ہوندی معیشت دی بابت عوام دی معلومات وچ وی وسیع وادھا ہویا اے۔
اک گل بات وچ الیکشن کمیشن دی جانبداری بے نقاب ہوئی اے جہدے تے ایس تاثر نوں تقویت ملدی اے کہ ایہہ ادارہ غیر جانبدار یا خودمختار نہیں بلکہ ملن والی حکومتی ہدایات نوں مدنظر رکھ کے فیصلے سناندا اے۔ نیز پارلیمنٹ توں باہر بیٹھیا اک شخص ممبران پارلیمنٹ دے استعفیاں دے متعلق فیصلے کرن دا اختیار رکھدا اے۔ ایہہ سپیکر دے منصب دی بے اختیاری تے بے قدری اے جو ایس امر دا ثبوت اے کہ حکمران اپنی سناندا اے۔ نیز پارلیمنٹ توں باہر بیٹھیا اک شخص ممبران پارلیمنٹ دے استعفیاں دے متعلق فیصلے کرن دا اختیار رکھدا اے۔ ایہہ سپیکر دے نصب دی بے اختیاری تے بے قدری اے جو ایس امثر دا ثبوت اے کہ حکمران اپنی سیاست داے سوا ملک یا قوم نوں کجھ اہم نہیں سمجھدے ہور ایہہ کہ موجودہ حکمراناں دے کول فیصلیاں دا کوئی اختیار نہیں بلکہ فیصلے کدھرے ہورو ہوندے نیں تے ساڈے حکمران ملن والی ہدایات اتے محض عملدرآمد تک محدود نیں۔ اک آڈیووچ اپنے ای وزیر خزانہ دا مذاق اڈایا جاندا اے۔ ایہناں گلاں توں ظاہر ہوندا اے کہ برسر اقتدار ایہہ لوک اپنی سیاست بچان لئی کسی وی حد تک جا سکدے نیں۔ ایس دوران اپنے تے بیگانے نوں رگیدنا وی جائز تصور کردے نیں۔
ساری غلطیاں دے باوجود فیر ایہو سوال اے کہ جدوں کوئی گل وزیراعظم دے گھر وچ وی راز نہیں رہندی تے ایسی جگہ اتے قومی سلامتی دے حوالے نال حساس ترین معاملات اتے اجلاس کرنا مناسب اے؟ جدوں کسی ادارے یا ایجنسی نوں ایہہ ای پتہ نہیں کہ ایتھے جاسوسی کہنے کیتی تے فیر زمانے بھر نوں سنا دتی ۔ اداریاں دے کول موجود سارے وسائل دا کجھ فیدہ نہیں مل رہیا بلکہ جہناں اداریاں دی صلاحیتاں اتے اسیں صبح تے شام فخریہ تذکرہ کرنے آں اینی وڈی جاسوسی ہو گئی مگر اوہ اج تک لاعلم نیں۔ وزیراعظم دا گھر تے غیر محفوظ ثابت ہو چکیا ذرا تصور کرو دوجے مقامات تے دفتراں نوں کیہ اسیں مکمل طور تے محفوظ کہن دی پوزیشن وچ آں؟ ظاہر اے حالیہ آڈیو لیکس دے تناظر وچ ایسا کہنا ہن ممکن نہیں رہیا۔ جے آئی ٹی بن چکی اے تے خفیہ ایجسنیاں وی جے متحرک ہو ای گئیاں نیں تے تحقیقات دے دوران صرف ایہہ ای پتہ نہ کرن کہ ملک دے چیف ایگزیکٹو دے گھر وچ ہون والی گل ریکارڈ کرن دی حرکت کہنے کیتی بلکہ ایہہ وی جانن دی کوشش کرو کہ ایسا کہڑے مقصداں لئی کیتا گیا۔ نیز مستقبل وچ غوروفکر مگروں ایسے سنجیدہ تے موثر اقدامات کیتے جان تاں جے راز دی گلاں چوپال دی زینت نہ بن سکن۔ آڈیو لیکس توں حکمراناں دے بھارت نال جڑے مفادات بے نقاب ہون دے نال ایہہ وضاحت وی ہو گئی اے کہ ایہہ فیصلیاں دے حوالے نال قطعی طور تے بے اختیار نیں ایس لئی اوہناں نوں غلطیاں دا ذمہ دار ٹھہرانامناسب نہیں بلکہ ایہہ ایسے کھیڈونے نیں جہناں نال کھیڈن دی سب نوں کھلی چھٹی اے۔ ایہہ کہنا بوہتا درست اے کہ جو فیصلیاںوچ بااختیار نیں غلطیاں دے ذمہ دار وی اوہو نیں کیہ خیال اے تہاڈا؟