یونیورسٹی آف لاہور سرگودھا کیمپس وچ بولیاں دا مڑ جِیون سیمینار

انگلشرز انٹرنیشنل تے دل دریا پاکستان رجسٹرڈ دی سانجھ نال یونیورسٹی آف لاہور سرگودھا کیمپس وچ پنجابی زبان بارے سیمینار تے پنجابی مشاعرے دا پربندھ کیتا۔سیمینار دی پردھانی ڈائریکٹر لاہور یونیورسٹی سرگودھا کیمپس ڈاکٹر ظہور احمد ہوراں کیتی تے پنجابی مشاعرے دی پردھانی جگ دھمے شاعر ڈاکٹر بشیر فیض ہوراں کیتی۔ سیمینار دی نقابت ڈاکٹر زرینہ قاسم ہوراں تے مشاعرے دی نقابت علی احمد گجراتی ہوراں کیتی۔سیمینار دا سِرناواں بولیاں دا مڑ جِیون سی۔سیمینار وچ رلت کرن لئی پاکستان دے وکھ وکھ علاقیاں توں آئے استاداں، طالب علماں، لکھاریاں تے ماں بولی دے شاعراں تو ںاَڈ جیون دے وکھ وکھ کھیتراں نال سانگا رکھن والے لوک سرگودھے اپڑے۔ یونیورسٹی آف لاہور سرگودھا کیمپس دے انگریزی شعبے دے صدر ڈاکٹر انصرمحمود نے سبھ رلتیاں نوں جی آیاں نوں آکھیا۔پروگرام دی نظامت دی ذمہ داری نبھاندے ہوئے یونیورسٹی آف سرگودھا وچ انگریزی دی پروفیسر ڈاکٹر زرینہ قاسم ہوراں نے اپنی ساری گل بات پنجابی وچ کیتی نال دسیا کہ میں انگریزی پڑھاندی ہاں پر بولدی پنجابی ہاں۔ ایتھوں تیکر کہ ڈاکٹر زرینہ ہوراں نے پنجاب دے باہروں آون والے پروہنیاں توں وی سوال پنجابی وچ ہی کیتے تے آکھیا پئی مینوں پک اے کہ تسیں پنجابی سمجھدے او۔
سیمینار دا اچیچا خطبہ یونیورسٹی آف سرگودھا وچ انگریزی دے پروفیسر ڈاکٹراعجاز اصغر بھٹی ہوراںپیش کیتا۔ پنڈی بھٹیاں دے جم پل ڈاکٹر اعجاز ہوراں اپنی ساری گل بات پنجابی وچ ہی کیتی۔ اوہناں نے اپنے خطبے وچ پنجابی بولی دی امیری نوں درساندے ہوئے آکھیا پئی پنجابی زبان دی پرانی شاعری انگریزی دی پرانی شاعری نالوں کِتے ودھ سوہنی، نرول تے سچی ہے۔ اوہناں نے انگریزی دے پہلے شاعر چاسر دی شاعری دا ٹاکرا پنجابی دے پہلے شاعر بابا فرید دی شاعری نال کر کے دسیا کہ بابا فرید دی پنجابی شاعری انگریزی دی شاعری نالوں بہت پہلاں ہی پختہ ہوچکی سی۔ اوہناں نے پنجابی زبان دے ودھا لئی ایس گل تے زور دِتا پئی سانوں ہر پدھر تے اپنی بولی دی گل کرنی چاہیدی ہے تاں جے لوکاں اندر اپنی بولی تے اپنا ورثہ سانبھن دی جاگ لگے۔ سیمینار وچ جیہناں ہور سوجھواناں نے پنجابی زبان بارے گل بات کیتی اوہناں وچ سرگودھا یونیورسٹی وچ پنجابی دے ایسوسی ایٹ پروفیسر تے انٹرنیشنل سنٹر فار پنجاب سٹڈیز دے ڈائریکٹر ڈاکٹر منیر گجر، انگلشرز سینٹرل پنجاب دے کوآرڈینیٹر ملک اللہ داد، دل دریا پاکستان رجسٹرڈ دے سرپرستِ اعلی تے انگلشرز دے کوآرڈینیٹر پنجاب لینگوئیجز ڈاکٹر عامر ظہیر بھٹی، یونیورسٹی آف بلتستان سکردو وچ انگریزی شعبہ دے سربراہ پروفیسر ڈاکٹر محمد عیسی توں وکھ انگلشرز انٹرنیشنل دے صدر ڈاکٹر منتظر مہدی ہوریں شامل سن۔
سوجھواناں نے ایس سیمینار راہیں پنجابی زبان دی چنگی بھلک لئی بہت ودھیا سجھا دِتے۔ جیہناں وچ پنجابی بولی نوں اپنی اگلی نسل تک اپڑاون، ایہدے وچ ودھ توں ودھ لکھتی مواد پیدا کرن، ہر پدھر تے پنجابی زبان دا مقدمہ لڑن، یونیورسٹیاں وچ پنجابی پڑھائی لکھائی شروع کرن توں وکھ پنجابی زبان دے استاداں تے شاعراں وچکار آپسی سانجھ ودھاون اتے زور دِتا گیا۔سوجھواناں نے ایس گل تے زور دتا کہ ماں بولی نوں جیوندا رکھن لئی دیس پنجاب دا ہر پتر تے ہر دِھی اپنا فرض نبھاوے۔
پنجابی مشاعرے وچ رلت کرن والیاں وچ ڈاکٹر بشیر فیض تاندلیانوالہ،ریاض ارمان جلالپور بھٹیاں، ڈاکٹر فرحت عباس راولپنڈی،رفعت وحید راولپنڈی،اعظم علی اعظم چنیوٹ،شاہراز وٹو تاندلیانوالہ، امتیاز قیس چٹھہ علی پور چٹھہ،اویس باسل گجرات، شیخ ذکا اللہ بھلوال، ہما سہروردی ساہیوال،الیاس گھمن سرگودھا،ارشد جانی تاندلیانوالہ، آکاش وٹو اوکاڑہ،محمد طلحہ،محمد ندیم، صدف آفرین، عائشہ بخت لاہور یونیورسٹی سرگودھا کیمپس تے علی احمد گجراتی ہوراں دے ناں شامل سن۔انگلشرز انٹرنیشنل تے دل دریا پاکستان نے پنجابی زبان دے ودھا لئی رل کے کم کرن دی لوڑ اتے زور دِتا۔ ایہناں دوہاں تنظیماں دی سانجھ نال ماں بولی پنجابی دا اگلا وڈا پروگرام ستائی اٹھائی انتی اکتوبر نوںیونیورسٹی آف اوکاڑہ وچ تِن دِناں دی اک کانفرنس تے اک وڈا پنجابی مشاعرہ رکھیا گیا ہے جیہدے وچ پنجاب دے ہر علاقے توں سوجھوان تے شاعر ماں بولی دی سیوا وچ اپنا حصہ پاون لئی رلت کرن گے۔
آخر تے اس سیمینار تے مشاعرے وچ رلت کرن والے سبھناں متراں نوں یادگاری سرٹیفیکیٹ تے اچیچے پروہنیاں نوں یادگاری شیلڈاں وی دتیاں گیاں۔ اکٹھ دے بعد یونیورسٹی ولوں آن والے سارے پروہنیاں لئی بہترین ان پانی دا آہر کیتا گیا سی۔یونیورسٹی آف لاہور سرگودھا کیمپس دے ڈائریکٹر ڈاکٹر ظہور احمد ہوراں یونیورسٹی وچ پڑھان والے پروفیسرز تے زور دتا کہ اوہ پنجابی زبان دے ودھا تے بقا لئی لازمی کم کرن۔ اوہناں دا آکھنا سی کہ پنجابی زبان تے پنجابی شاعری واسطے یونیورسٹی کیمپس ہر وقت حاضر اے۔