رانا احتشام ربانی، علمی، سماجی تے رفاہی شخصیت

رانا احتشام ربانی صاحب نال میرا تعارف 2010 وچ جمہوری پبلی کیشنز دے آفس وچ ہویا۔ ایس ادارے توں اوہناں دیاں کافی کتاباں چھپیاں۔ رانا احتشام ربانی نے ”امن ” تے ”انسانیت فائونڈیشن” دے ناں تنظیم قائم کیتی جہدے اوہ صدر نیں تے مینوں اوہناں نے سیکرٹری اطلاعات مقرر کیتا۔ ایہ رجسٹرڈ تنظیم اے۔ ایس فائونڈیشن دے تحت اوہ کئی تقریباں کروا چکے نیں۔ رانا صاحب کافی ملکاں دا دورہ کر چکے نیں جتھے اوہناں نے ”Peace” دے حوالے نال لیکچرز دتے تے پاکستان دی نمائندگی کیتی۔ رانا احتشام ربانی مخلص تے ہمدرد انسان نیں اوہناں دا تعلق سیاسی گھرانے نال اے اوہناں دے والد گرامی رانا غلام صابر خاں ایم پی اے’ ایم این اے رہے نیں۔ اوہناں دے نزدیک سیاست عبادت اے۔ انسان دی فلاح نوں اوہ سیاست سمجھدے نیں کہ لوکاں دے مسئلے حل ہون۔ اوہناں نے دکھ’ درد دور ہون’ اوہناں نوں روزگار تے انصاف ملے۔ صاف پانی ملے’ علاج ہووے۔ اپنیاں لکھتاں راہیں اوہ پوری دنیا وچ جانے پہچانے جاندے نیں۔ پمفلٹ تے کتاباں دی شکل وچ اوہ شعور تے دانش دیاں گلاں عام کر رہے نیں۔ سچائی دا شعور انسان وچ ہو جاوے تے ایہ بڑی گل اے۔ رانا صاحب چھوٹی جہی گل وچ وڈی گل کہہ جاندے نیں۔ اوہ انساناں دے وچکار محبت دا پیغام دیندے نیں۔ رانا احتشام ربانی دیاں لکھتاں چھوٹیاں چھوٹیاں لہراںن یں جو پورے سمندر دی ارتعاش بن جاندیاں نیں۔ اوہ لوکاں نوں چھوٹیاں چھوٹیاں گلاں نال اپنے ول راغب کردے نیں۔ ایہ اسلوب بڑے بڑے مکالمیاں توں ودھ بامعنی اے۔ میں سمجھنا واں کہ معاشرے نوں بدلن دا خواب ویکھنا ای اوہدی تعبیر دا ذریعہ بن جاندا اے۔ رانا صاحب 14جنوری 1950ء نوں اوکاڑہ وچ پیدا ہوئے۔ ایم سی ہائی سکول اوکاڑہ توں میٹرک کیتا۔ گورنمنٹ کالج لہور توں ایم اے پولیٹیکل سائنس دا امتحان پاس کیتا۔ ایہدے بعد حمایت اسلام لاء کالج لہور توں ایل ایل بی کیتا۔
رانا صاحب 1971ء وچ قومی ہاکی چیمپئن ٹیم دے ممبر رہ چکے نیں۔ رانا صاحب اردو’ انگریزی تے پنجابی تن زباناں دے رائٹر نیں۔ نثر توں علاوہ تن زباناں وچ اوہناں نے آزاد نظماں وی کہیاں۔ اوہناں دیاں نظماں زیادہ تر امن دے موضوع تے ہوندیاں نیں۔ رانا صاحب مولانا رومی’ حضرت داتا گنج بخش تے پنجابی صوفی شاعراں توں متاثر نیں۔ بلھے شاہ دیاں کافیاں تے ہیر وارث شاہ دا مطالعہ اکثر کردے نیں۔ قائداعظم دے بعد اوہ ذوالفقارعلی بھٹو دی شخصیت توں متاثر نیں کہ ایہناں دو حکمراناں نے ملک دی بہتری لئی سوچیا تے عمل کرکے وکھایا۔ رانا صاحب اپنیاں لکھتاں تے تقریراں دے راہیں نویں نسل دی ذہنی تربیت کر رہے نیں۔ اوہ اقتدار دی تھاں سسٹم دی تبدیلی چاہندے نیں۔ ایسے طرح اوہناں دیاں لکھتاں وی جذبے تے خلوص نال بھریاں ہوئیاں نیں۔ اوہ اپنیاں لکھتاں تے گل بات وچ قنون دی پابندی’ عمل داری تے انصاف دی فراہمی تے زیادہ زور دیندے نیں۔ اوہ ہر انسان نوں برابر سمجھدے نیں۔ بھاویں اوہ صدر’ وزیراعظم ہووے یاں عام انسان۔
رانا صاحب دیاں لکھتاں دا مآخذ تے منبع قرآن مجید اے۔ اوہ روزانہ ترجمے دے نال قرآن پڑھدے نیں ایس دوران کوئی خیال ذہن وچ آندا اے تے اوہ کاغذ تے لکھ لیندے نیں۔ اوہ امن تے محبت دے داعی تے پرچارک نیں۔ اوہ انساناں دے وچکار محبت دا پیغام دیندے نیں۔ انسان اک پنڈ’ محلہ’ گلی’ شہر’ صوبے تے ملک وچ اکٹھے رہندے نیں۔ سارے رَل کے دفتراں’ کاربوار’ ملازمتاں تے کھیتاں وچ کم کردے نیں سارے رَل مل کے بازاراں’ مارکیٹاں توں ضرورت دیاں شیواں دی خریدوفروخت کردے نیں تے فیر سارے اپنے مسئلے مل جل کے حل کر سکدے نیں۔ اپنے دکھ مل کے ونڈ سکدے نیں۔ اپنیاں خوشیاں مل جل کے منا سکدے نیں۔ اللہ تعالیٰ نے اوہناں نوں آسائشاں’ علم’ تدبر تے دانائی نال نواز رکھیا اے۔ ایہدے باوجود اوہناں وچ عجزوانکساری پائی جاندی اے۔ میں جدوں وی اوہناں نوں ملنا واں مینوں اپنائیت دا احساس ہوندا اے۔ میں رانا صاحب توں بڑا متاثر آں۔ متمول شخص ہون دے باوجود میرے جہے فقیر نال وی پیار کردے نیں۔ اوہناں دی مصاحبت وچ بہہ کے مینوں علم سکھن دا موقع ملدا اے۔ اوہناں نے عوامی طور تے انسانی شعور وچ آگہی دی تحریک شروع کیتی ہوئی اے۔ ایس سلسلے وچ اوہناں نے کتاباں توں علاوہ زندگی دے وکھووکھ موضوعات تے ہزاراں پمفلٹ ونڈے تے ونڈدے رہندے نیں۔
پمفلٹ وکھووکھ شہراں’ ٹریناں’ بساں تے ویگناں وچ ونڈے جاندے نیں۔ رانا احتشام ربانی صاحب نے گورنمنٹ کالج یونیورسٹی لہور وچ پولیٹیکل سائنس ڈیپارٹمنٹ دی چھترچھاویں انٹرنیشنل کانفرنس وچ شرکت کیتی۔ اوتھے چین توں آئے ہوئے وفد دے ممبر نے رانا صاحب دی کتاب ”Pathway to Peace” وصول کردے ہوئے آکھیا کہ اسیں ایس کتاب دا چینی زبان وچ ترجمہ کراواں گے۔ میں سمجھناواں کہ ایہ رانا صاحب لئی بڑا اعزاز اے۔٭٭