سیاسی بیان

اقتدار جاوید

ساڈے تہاڈے دِلاں دے وزیراعظم شہبازشریف دے فوکل پرسن ابوبکرعمر نے آکھیا اے کہ ”شہبازشریف 2010 وچ نوکیا 3310 استعمال کردے سن” تے ہن وی اوہ اوس زمانے نوں یاد کرکے ہاواں بھردے نیں کہ کیہ بھلا زمانہ سی۔ نہ سوشل میڈیا سی’ نہ اجہے کلپاں دی بھرمار ہوندی سی جو اک ہتھ توں دوجے ہتھ توں ہوندے ہوئے کجھ لمحیاں وچ کروڑاں تک اپڑ جاندے سن۔ ہن اک ویڈیو کلپ توں جان چھپدی اے تے اک ہور گردش کرن لگدی اے۔ اوس زمانے وچ تھوڑے جہے چینل ہوندے سی تے گنتی دے کجھ اینکرز۔ ہن ہر کوئی اک چینل کھول کے بیٹھا ہویا اے ہور تے ہور فیس بک تے وی نیم مزاحیہ اداکاراں نے مت ماری ہوئی اے۔ دوجی قباحت ایہہ وے کہ دس دس ورھے پہلے دیاں میریاں تقریراں دے کلپ چک لیاندے نیں۔ بھائی جوش خطابت وی کوئی شے ہے کہ نہیں؟۔ اک کلپ 2008ء دا اے۔ سچ ایہہ وے کہ میں تقریر وچ کہیا سی کہ ”اگوں جدوں میں تہاڈے نال مخاطب ہوواں گا تے دس دیواں گا کہ ملک نوں کس طرح عظیم بنایا جاوے گا”۔ ہن سوشل میڈیا والے سوال کردے نیں کہ اوہ کہڑا طریقہ سی۔ سدھا سادہ جواب اے کہ بھائی یان تاحیات وزیراعظم بنا دتے جان۔ اینی جہی گل اے جو ایہناں دے بھیجے وچ داخل ای نہیں ہو رہی۔ کہندا میں کجھ آں سوشل میڈیا والے ایہدا کجھ مطلب ہور کڈھ لیندے نیں۔
ہن ویکھو اقوام متحدہ دے سیکرٹری جنرل انتونیوگریٹس دے دورے تے میرا اوہناں دی کنڈ تے تھاپڑا محبت دا اظہار سی پر سوشل میڈیا ہن تک اوہدی بھد اڑان تے تلیا ہویا اے۔ نوکیا 3310 ایس لحاظ نال نعمت سی ایہدے تے اجہی واہیات چیزاں گھلن تے اپ لوڈ کرن دا انتظام ای نہیں سی۔ ہن اوہ اقبال دی نظم دا ہمالہ دا آخری شعر پڑھدے نیں تے رندھی رندھی آواز وچ مینوں سناندے نیں
ہاں دکھا دے اے تصور پھر وہ صبح و شام تو
دوڑ پیچھے کی طرف اے گردش ِ ایام تو
اشکبار اکھاں نال اقبال دی عظمت گن گاندے نیں کہ اوہ کنے دوراندیش شاعر سن کہ اوہ ایہناں سوشل میڈیا ایکٹوسٹس دی مستقبل دیاں سرگرمیاں بارے جانوں سن۔
وفاقی وزیر داخلہ رانا ثناء اللہ نے کہیا اے کہ الیکشن توںپہلاں عمران خان دی سیاست ختم ہو جاوے گی ایس لئی پوری کوشش کیتی جا رہی اے کہ کس طرح الیکشن منعقد ای نہ ہون تے عمران خان دی مقبولیت دا کم تمام ہو جاوے۔ ایس سلسلے وچ ساڈا الیکشن کمیشن نال پورا مک مکا ہویا اے جو کم اسیں سیاسی میدان وچ نہیں کر سکدے اوہ الیکشن کمیشن دے راہیں کرن دا چنگا انتظام کیتا ہویا اے۔ عین ممکن اے کہ چیف الیکشن کمشنر نوں اوہدی ایس طرح دی کارگزاری تے سینٹ دی ممبری وی سستی کر دتی جاوے۔ آخر اوہ برادری بھائی رانا مقبول توں کسے طرح گھٹ نہیں۔ ہن چیف الیکشن کمشنر دے تعاون دی کیہ کیہ کہانیاں سناواں۔ سمجھدار لئی اشارہ کافی اے۔ ایہ محبت دا قصہ اے جو اصل وچ دو روحاں دا میل سی۔ الیکشن کمشنر نے سانوں یقین دلایا اے کہ کسے نہ کسے کیس وچ ایس عمران دا مکو ٹھپ دتا جاوے گا۔ جدوں گریڈ 22 دا افسر ایہ گل کر رہیا ہووے تے اوہدے تے یقین کرنا اک لازمی گل اے۔ دوجا ہن تسیں نو حلقیاں دی کہانی سنو تے تہانوں یقین ہو جاوے گا کہ میں سچ کہہ رہیا واں۔ پہلے نو حلقیاں دے ممبراں دے استعفے منظور کیتے فیر الیکشن دا اعلان کیتا فیر الیکشن ملتوی کر دتا۔ فیر استعفیٰ قبول کرن والا نوٹیفکیشن معطل کر دتا۔
اک گل یاد رکھو کہ جے عمران دی سیاست دا خاتمہ الیکشن توں پہلاں نہ ہویا تے الیکشن کمیشن نال مل کے الیکشن وچ اسیں جہڑی جیہی تیہی پھیرنے آں اوہہ ساریاں نے ویکھی ہوئی اے۔ اسیں ہر طریقہ ازما رہے آں کوئی نہ کوئی طریقہ کارگر ضرور ہووے گا۔ ہمت کرے انسان تے کیہ نہیں ہو سکدا۔ اپنے اخبار دے مطابق سیہون دے دورے دوران وزیراعلیٰ سندھ مرادعلی شاہ دی کشتی تیل ختم ہون پاروں بند ہو گئی۔ کشتی چلان والی ٹیم نوں پانی وچ اتر کے کشتی نوں دھکا لانا پیا۔ ایس کشتی دی مثال اپنے ملک عزیز پاکستان ورگی اے۔ اپنے ملک دا وی تیل ختم ای سمجھو۔ آقا زرداری دے فرمان تے اسیں سندھی لوکاں دا اپنے طور تے سارا تیل کڈھ لیا اے پر اک ادھ قطرہ باقی ہووے تے اوہدے بارے کجھ نہیں کہیا جا سکدا۔کوشش جاری اے کہ ایہدا وی کوئی انتظام کیتا جاوے تے اوہناں نوں نچوڑ کے جہڑی ادھی پونی کپی نکلدی اے اوہ وی کڈھ لئی جاوے۔ اپنی تے آقازرداری دی پوری کوشش اے کہ ملک دا تیل ختم نہ ہووے۔ جے ایہ ٹنٹا ای ختم ہو گیا تے کاہے دی سیاست۔
اصل وچ تے اسیں ایس گرداب چوں ملک و قوم دی کشتی باہر کڈھ لیاواں گے جے لوکاں دی کشتی نوں دھکا لانا پیا اے تے اوہ فکر نہ کرن ہر کم منجانب اللہ۔ انسان دے وس وچ کجھ وی نہیں۔ اوہی ہوندا اے جو اللہ نوں منظور ہوندا اے تے شاعر مرزا محمد رضا خاں برق کہہ گئے نیں کہ
اے صنم وصل کی تدبیروں سے کیا ہوتا ہے
وہی ہوتا ہے جو منظور خدا ہوتا ہے
مسلم لیگ ن دے برین تے ساڈے دفاع دے ذمہ دار وفاقی وزیر دفاع خواجہ محمد آصف نے کہیا اے کہ ”نویں آرمی چیف دا تقرر حکومت دا آئینی تے قنونی اختیار اے ایہ حق استعمال کیتا جاوے گا پر اجے غور شروع نہیں کیتا تے جدوں اسیں غور کرنے آں تے لگ پتہ جاندا اے تسیں ویکھیا ہووے گا کہ اسیں ملک دے وڈے وڈے مسئلیاں تے غور کرنے آں تے اجیہا قدم اٹھانے آں کہ ملک ہور پچھے چلا جاندا اے تے اسیں اقتدار توں دس دس ورھے تک کڈھ دتے جانے آں پر حکومت وچ آندے ای اپنے غوروخوض دا سلسلہ اوتھوں دوبارہ شروع کرنے آں جتھوں چھڈیا سی۔ انج وی سوچنا تے سمجھنا ساڈے کھبے ہتھ دا کھیڈ اے۔ وماتوفیقی الا اللہ۔
مسلم لیگ ن کے برین اور ہمارے دفاع کے ذمہ دار وفاقی وزیر دفاع خواجہ محمد آصف نے کہا ہے کہ “نئے آرمی چیف کا تقرر حکومت کا آئینی اور قانونی اختیار ہے یہ حق استعمال کیا جائے گا مگر ابھی غور شروع نہیں کیا”۔اور جب ہم غور کرتے ہیں تو لگ پتہ جاتا ہے۔آپ نے دیکھا ہو گا کہ ہم ملک کے بڑے بڑے مسائل پر غور کرتے ہیں اور ایسا قدم اٹھاتے ہیں کہ ملک مزید پیچھے چلا جاتا ہے اور ہم اقتدار سے دس دس سال تک نکال دیے جاتے ہیں مگر حکومت میں آتے ہیں تو اپنے غوروخوض کا سلسلہ وہیں سے دوبارہ شروع کرتے ہیں جہاں سے چھوڑا تھا۔ویسے بھی سوچنا اور سمجھنا ہمارے بائیں ہاتھ کا کھیل ہے۔ وما توفیقی الا باللہ ٭