ٹاپ ٹین پاکستان

قوم نوں مبارک ہووے مریم نواز دی سزا ختم ہو گئی۔ اوہ خاوند سنے باعزت بری ہو چکیاں۔ حالات بدل چکے اوہناں دے دن پھر گئے نیں۔ ہن سننے آں’ خیراں نیں اپنی حکومت اے۔ ہن والد محترم میاں نواز شریف دی وطن واپسی دا رستہ ہموار کیتا جا رہیا اے۔ ویسے عملی طور تے جے اک موقف اتے دو ملزماں دی سزا معاف ہو چکی تے تیجے ملزم نوں وی لامحالہ اوہدے اتے ریلیف ملے گا۔ ایس کیس دا فیصلہ تے عدالت وچ ہویا اے لیکن نہ جانے لو گ کیوں کہہ رہے نیں کہ ایہہ تے طے شدہ ڈیل دا حصہ سی کہ میاں نواز شریف’ اسحاق ڈار واپس آن گے سیاستداناں اتے قائم نیب دے کیسز ختم ہون گے (اگلیاں نے نیب ای ختم کر دتی اے) مریم نواز تے انتخابی سیاست لئی اہل ہو چکیاں۔ ہن میاں نواز شریف نوں اہل بنان دا مرحلہ باقی اے۔ ہن قوم میاں نواز شریف دے کیس ختم ہون’ سزا دے کالعدم قرار دتے جان تے باعزت واپسی تے انتخابی سیاست وچ اہل ہون دا انتظار کرے۔ میاں نواز شریف کسے وجہ نال الیکشن نہ لڑ سکے تے مریم نواز متبادل دے طور تے موجود نیں۔ البتہ الیکشن مہم میاں نواز شریف ای چلان گے۔ ہن اگلے الیکشن وچ جان لئی بیانیے تیار کیتے جا رہے نیں جہناں وچ ساڈے خلاف سیاسی طور تے انتقامی کارروائیاں کیتی گئیاں۔ عدالتاں نے ثابت کردتا کہ اسیں بے گناہ ساں سانوں سازش دے ذریعے اقتدار توں وکھرا کر کے عمران خان نوں لیایا گیا۔ اللہ نے سانوں سرخرو کیتا۔ ہن اسیں دوبارہ تہاڈی خدمت لئی حاضر آں۔ حالانکہ حقیقت ایہہ ہے کہ جدوں ایہہ کیس بنے’ جدوں عدالتی کارروائی دا آغاز ہویا ‘جدوں میاں نواز شریف نوں سزا ہوئی اوس ویلے ن لیگ دی حکومت سی۔ ہن جد کہ سارا کجھ ریورس ہو رہیا اے ایس ویلے وی ن لیگ دی حکومت اے۔ میرے خیال وچ عمران خان نوں عوام وچ مقابلے لئی میاں نواز شریف نوں ویلکم کرنا چاہیدا اے تے نواں بیانیہ بنانا چاہیدا اے۔ اوہناں دے فیصلے عوامی عدالت وچ ہون گے۔ا للہ کرے عوام نوں فیصلے دا موقع مل جاوے۔ گل مریم نواز دی باعزت بریت دی ہو رہی سی’ عدالت نے تے عدم ثبوت دی بنا اتے بری کردتا تے عدالت نے خود کہیا کہ شاید کیس صحیح ہووے لیکن اسیں بغیر ثبوتاں دے کسے نوں سزا کیویں دے سکنے آں۔ ایس لئی ایہہ فیصلہ ہویا اے انصاف نہیں۔ ساڈی عدالتاں فیصلے کردیاں نیں انصاف نہیں کیوں جے عدالتاں دے سامنے جو فائلاں رکھیاں جاندیاں نیں تے جہڑے شواہد فراہم کیتے جاندے نیں اوہناں نوں مدنظر رکھ کے فیصلے کیتے جاندے نیں۔ انصاف دی فراہمی لئی سسٹم نوں کردار ادا کرنا ہووے گا۔انصاف لئی تفتیش تے پراسیکیوشن دا بنیادی کرادر اے جو حکومت دے کنٹرول وچ اے۔ ایہو وجہ اے کہ حکومتاں اپنی مرضی دے فیصلے کراون وچ کامیاب ہو جاندیاں نیں۔ ایہو وجہ اے جہدا زور چلدا اے اوہ اپنی من مرضی کر لیندا اے۔ ساڈاجوڈیشل سسٹم وی ملزم نوں سپورٹ کردا اے۔ شک دے سارے فیدے ملزم نوں پہنچدے نیں جرم ثابت کرنا مدعی دی ذمہ داری اے۔ ملزم کولوں کوئی نہیں پچھ سکدا کہ توں ثابت کر کہ تیرے اتے الزام غلط اے۔ نیب مریم نواز دے خلاف ثبوت فراہم کرن وچ نکام رہی جہدی بنا تے اوہ باعزت بری ہو گئیاں۔ لیکن ایہہ حقیقت اپنی جگہ سوالیہ نشان لائے کھڑی اے کہ نہ نیب دی تفتیش شریف فیملی کولوں پچھ سکی کہ ایہہ جائیداداں کتھوں کیویں بنیاں نہ ای شریف فیملی منی ٹریل دے سکی۔ عوام ایہہ جانن وچ حق بجانب نیں کہ آخر کہڑا ایسا الہ دین دا چراغ اے جہڑا صرف حکمراناں دے کول اے تے اوہ جدوں رگڑدے نیں تے اوہناں دے سامنے دولت دے ڈھیر لگ جاندے نیں۔ ایہدے برعکس عوام دن رات محنت کر کے دو وقت دی روٹی پوری نہیں کر سکدے۔ آخر ایہہ ماجرا کیہ اے۔ پاکستان وچ اج تک جہنے وی حکمران آئے نیں اوہناں وچوں کسی دا احتساب نہیں ہو سکیا۔ انصاف دی عدم فراہمی کارن جرم پرموٹ ہو رہیا اے۔ پاکستان ہر لحاظ نال ٹاپ ٹین دی فہرست وچ رہندا اے۔ ویسے ایس ملک دا باوا آدم ای نرالا۔ اخلاقیات نام دی چیز ساڈے تصور وچ نہیں۔ دنیا وچ شاید سب توں ودھ ملاوٹ کرن والیاں ملکاں وچ الحمداللہ اسیں سرفہرست ہوواں گے جتھے خالص چیز دا تصور وی ممکن نہیں رہیا۔ ایہہ اسلامی دنیا دا واحد ایٹمی ملک اے۔ آبادی دے لحاظ نال ساڈا پنجواں نمبر اے۔ دنیا دی وڈی فوجاں رکھن والے ملکاں وچ وی ساڈا شمار ٹاپ ٹین وچ ہوندا اے۔ دنیا دی صف اول دی انٹیلی جنس ایجنسی ساڈے کول اے۔ معدنی وسائل جہنے ساڈے کول نیں شاید
ای کسی ہور دے کول ہون۔ جہنے حسین دلکش موسم ساڈے کول نیں دنیا دے کسی ہور ملک دے کول نہیں۔ جہنی زرخیز زمیناں ساڈے کول نیں شاید ای دنیا وچ کسی ہور ملک دے کول ہون۔ ساڈے جیا نہری نظام وی کسی ہور کے کول نہیں۔ اسیں دنیا وچ دوجا وڈا ددھ پیدا کرن والا ملک آں۔ دوجا وڈا دالاں پیدا کرن والا تیجا وڈا چنے پیدا کرن والاچوتھا وڈا گوشت پیدا کرن والا پنجواں وڈا کھجور تے کماد پیدا کرن والا اٹھواں چاول پیدا کرن والا نواں گندم پیدا کرن والا’ چھٹا وڈا تمباکو پیدا کرن والا ملک اے۔ پیاز پیدا کرن والا چوتھا وڈا ملک اے۔ جے پھلاں دا ذکر کرئیے تے پاکستان دنیا دا دوجا وڈا آڑو پیدا کرن والا سی۔ وڈا امرود پیدا کرن والا تے پنجواں وڈا ام پیدا کرن والا ملک اے لیکن ایہدے باوجود اسیں نکام تے نامراد آں۔ انج کیوں اے ایہدی بہت ساری وجوہات ہون گئیاں جہدے وچ منصوبہ بندی دا فقدان وی ہو سکدا اے لیکن بنیادی عنصر انصاف دی عدم فراہمی تے عدم مساوات اے۔ جہناں معاشریاں نے ترقی کیتی اے اوہناں دی بنیاد انصاف اتے قائم اے۔اخلاقیات اوہناں دا بنیادی وصف ہوندا اے۔ سوچیں ضرور آخر ایہہ گورکھ دھندا ہے کیہ؟