اللہ خیر ای کرے

ایہ دنیا خالق کائنات دیاں تدبیراں تے احکامات دی تابع اے۔ اسیں گنہگار تے صرف اوہو کجھ کرن دا اختیار رکھنے آں جہدی اوہنے اجازت مرحمت فرمائی ہوئی اے پر ایہ سمجھ بوجھ’ کل دی فکر تے تدبیر وی اوہدی عطا کردہ نعمتاں تے صلاحیتاں دا ای نتیجہ اے کل کیہ ہووے گا؟ ایہدا بہتر علم اوس عالم الغیب توں ودھ کے کسے نوں نہیں پر کل دے بارے اوہدی قدرت دے اشاریاں نوں سمجھنا وی اوہدی منشا توں کسے حد تک ممکن اے تے اسیں اوہدی دتی گئی عقل توں محدود اندازے ضرور لانے آں تے حالات دا اشارا ایہہ وے کہ اسیں موسمی حالات نوں جس حد تک خراب کر دتا اے اوہدے پاروں ساڈے خطے وچ اگلے کئی ورھے تک شدید بارشاں دا قوی امکان اے سگوں اندازا تے ایہہ وے کہ اگوں ایس توں وی زیادہ تیز بارشاں ہون گئیاں۔
موجودہ حالات نوں سامنے رکھیے تے دکھائی دیندا اے کہ اسیں اپنے وسیلے تے اعمال دے زور تے حالیہ تباہی نوں اگلے کئی ورھے تک ٹھیک نہیں کر سکاں گے ایہدے وچ متاثرین دے گھراں توں لے کے سڑکاں تک تے تباہ ہون والے انفراسٹرکچر توں لے کے ڈیم تے ندی نالیاں دے پلاں تک اینی وڈی تباہی ہوئی اے کہ ساڈی معیشت دی کمزوری تے نیت دا کھوٹ اوہنوں کئی ورھے تک اصل حالت وچ نہیں لیا سکے گا۔ اجہے وچ موسمیاتی تبدیلیاں دے نتیجے وچ مستقبل دا منظرنامہ ہور بھیانک تصویر پیش کر رہیا اے تے ماہرین دے بقول ساڈے علاقے وچ اگلا مون سون موسم شاید ایس حالیہ مون سون توں زیادہ شدید تے بدترین ہووے گا۔ یعنی صاف لفظاں وچ کہیا جاوے تے صورتحال ایہہ وے کہ ایس نقصان نوں پورا کرنا تے دور دی گل اے اسیں ایسے دوران ہور اوکڑاں دے شکار ہو جاواں گے۔
جے صرف اپنی گل کیتی جاوے تے رُکھاں دی انھے واہ کٹائی’ گرین ہائوس گیساں دا بے پناہ اخراج’ فضائی آلودگی تے پانی نوں ذخیرہ کرن ول عدم توجہ نے ایس معاملے نوں بدترین نہج تے اپڑا دتا اے۔ سندھ وچ ایناں پانی آیا اے کہ سیہون دے نیڑے پاکستان دی مٹھے پانی دی سب توں وڈی جھیل منچھر اک سو کلو میٹر دے نیڑے دور شہداد کوٹ دے نیڑے واقع حمل جھیل دے نال رَل کے اک اجہی جھیل دا منظر پیش کر چکی اے جہدی ماضی وچ کوئی مثال نہیں ملدی۔ بقول مراد علی شاہ’ سندھ وچ ایس ویلے تربیلا ڈیم دے پانی دے ذخیرے توں ویہہ گنا ودھ پانی کھڑا اے پر دوجے ای ساہ وچ اوہ فرماندے نیں کہ کالا باغ ڈیم ہر صورت اوہ نہیں بنن دین گے یعنی سندھ پانی نال بے شک ڈب جاوے سیلابی پانی بھاویں بحیرہ عرب وچ جا ڈگے سارا سندھ جھیل وچ بدل جاوے پر کالاباغ ڈیم نہیں بنن دین گے۔ اوہناں نوں کوئی دسے کہ پانی نوں تھلے آ کے تباہی مچان توں روکن لئی اوہنوں اُتوں ای قابو کرنا ہووے گا پر جس ملک وچ ہر تکنیکی مسئلہ سیاست دے ڈھائے چڑھ جاوے اوتھے بہتری کیویں آ سکدی اے؟۔
مینوں چشمہ جہلم لنک کینال دا تے پتہ نہیں پر تونسہ پنجند لنک کینال جو تونسہ بیراج چوں نکلدی اے تے دریائے سندھ دا 12000 کیوسک پانی دریائے چناب وچ پاندی اے آبپاشی لئی استعمال ہون والی ایس نہر دا دریائے چناب وچ پایا جان والا پانی پنجند دے مقام تے فیر دریائے سندھ وچ شامل ہو جاندا اے۔ تونسہ بیراج توں تن نہراں نکلدیاں نیں اک ایہو ٹی پی لنک کینال’ دوجی ڈی جی خان کینال تے تریجی مظفرگڑھ کینال۔ موخر الذکر دوویں ششماہی نہراں نیں یعنی چھ مہینے چلدیاں نیں۔ ایہناں دا دورانیہ عموماً اپریل توں اکتوبر تک ہوندا اے ایس واری صورتحال ایہہ سی کہ سندھ نے پانی وچ تباہی مچائی ہوئی سی تے مظفرگڑھ کینال پندراں دن چل رہی سی تے پندراں دن بند سی۔ اٹھارویں ترمیم دے کمال توں فائدہ چکدے ہوئے سیلاب تے بربادی دی صورتحال وچ وی ششماہی نہر لگاتار چھ مہینے لئی نہیں سی چل رہی تے ہر پندراں دن دے بعد پندراں دن لئی بند ہو رہی سی۔ ایہ وی ایس دبائو دا نتیجہ اے جو حکومت وقت دے اتحادیاں نے اوہناں تے پایا ہویا اے۔
گل کدھرے دی کدھر چلی گئی۔ مستقبل دے موسمی حالات دی خبر چنگی نہیں اگلے کئی ورھے ایسے طرح دیاں شدید بارشاں متوقع نیں۔ کراچی وچ ایس ورھے معمول توں چار سو گنا ودھ بارشاں ہوئیاں نیں۔ بلوچستان وچ بارشاں دی شرح کراچی توں وی اُچی سی۔ ایتھے ایہ شرح پنج سو فیصد تے سندھ وچ اٹھ سو فیصد ودھ سی۔ دوجے لفظاں وچ اگوں کئی عشریاں تک ہون والیاں بارشاں ایسے اک ورھے وچ ہو گئیاں۔ نہ ایس پانی نوں سانبھن دا کوئی بندوبست سی تے نہ کڈھن دا۔ نتیجہ تہاڈے سامنے اے پر ایہ گل ایس طرح رکن والی تے بہرحال نہیں کبوتر وانگوں اکھاں بند کر لین نال معاملے حل نہیں ہوندے سگوں ایہ معاملیاں نوں ہور خراب کرن دے مترادف اے۔ موسمیاتی تبدیلیاں دے نتیجے وچ آفات بارے دسن والے ماہرین دا کہنا اے کہ پاکستان موسمیاتی تبدیلیاں پاروں دنیا بھر وچ اجے سب توں ودھ متاثر ہون والے ملکاں وچ پہلے نمبراں اُتے اے۔ خطے وچ ودھن والے درجہ حرارت تے ایہدے نتیجے وچ بحرالکاہل وچ خط استوا دے نیڑے گرم ہواواں ٹھنڈے پانیاں نال ٹکراندیاں نیں تے سطح سمندر دے درجہ حرارت وچ وادھا ہوندا اے تے درجہ حرارت وچ ایہ وادھا ای مون سون دا کارن بن دا اے تے درجہ حرارت وچ کمی بیشی مون سون دی شدت دا فیصلہ کردی اے۔ جیویں جیویں درجہ حرارت ودھے گا مون سون وچ شدت پیدا ہوندی جاوے گی تے ایس ویلے بری خبر ایہہ وے کہ دنیا بھر وچ درجہ حرارت ہولی ہولی ودھ رہیا اے۔ ایس ورھے اپریل وچ پین والی گرمی نے پاکستان دا باٹھ سالہ ریکارڈ بھن دتا اے۔ ایس ورھے پورے یورپ دا گرمی نال بھیڑا حال سی تے اندازہ اے کہ 2026ء تک زمین دے درجہ حرارت وچ پونے دو سینٹی گریڈ دا وادھا ہو جاوے گا۔٭٭