ارشد شریف دی شہادت تے اجتماعی سماجی المیہ

میں ہمیشہ مثبت سوچاں نوں آگو من کے حیاتی دا پینڈا کیتا اے۔لوکاں بارے چنگی رائے رکھی تے نفرتاں وچوں وی محبتاں کشید کیتیاں۔میں ہمیشہ سجناں متراں نوں وی ایہو ای تلقین کیتی کہ مایوسی،حسد یا لالچ جیہے جذبے تہانوں اندروں سیونک وانگر کھا جاندے نیں۔تُسیں سماج نوں تاں ای کجھ چنگا دے سکدے او جے کر تہاڈیاں سوچاں مثبت ہون۔میں ہمیشہ دُوجیاں نوں مثبت سوچن دی تلقین کیتی پر کجھ دناں توں انج لگدا اے کہ میرے جیہے ہر بندے دی تلقین یا کوشش اک رائیگاں مشق توں وکھ کجھ نہیں۔جیہڑے لوک محبتاں ونڈ کے سماج نوں خوشحال بنا سکدے سن،اونھاں لالچاں تے نفرتاں دی کاشت شروع کردتی اے جیہڑی ساڈے توں بعد وی کئی نسلاںوَڈدیاں رہن تے فیر وی اوہدا بی نہیں مکنا۔
 ساڈے سوہنے دیس نوں خورے کس ظالم دی نظر لگ گئی اے کہ ہر آون والا دن دکھ بھرے سنیہے لے کے آوندا اے۔ اِنج لگدا اے جیویں ساڈے مقدراں دے ہنیرے سورج دے اُگڑن دے باوجود مُکن دا ناں نہیں لیرہے۔ جیویں ساڈے نصیباں دے سورج اُتے کسے بد نصیبی دامستقل گرہن مَل دِتا ہوئے۔روز دن چڑھدا اے پر رات داہنیرا تے قہر نہیں جاندا۔ کوئی سکھ سنہیا سنیاں، جیویں صدیاں بیت گئیاں نیں۔ ہر گل وچوں آوندی دُکھاں دی ہواڑ ساڈی قوم دے سینے ساڑھ ساڑھ کے نفسیاتی مریض بنائی کھلوتی اے۔معاشرہ ایہناں زہریلا ہو چکیا اے کہ اپنیاں اپنیاں منفی سوچاں دے قیدی بن کے،جے کر کوئی چنگی گل سوچن دی کوشش وی کرے تے اوہدے وچوں وی نفرتاں دا زہر ای پھُٹ دا اے۔بے حسی دے ماحول اندر،لالچاں دا زہر پالدے،اسیں من حیث القوم اپنے آپ نوں دولے شاہ دے چُوہے من کے، جیویں فیصلہ کر لیا اے کہ اسیں اوہو ویکھنا اے جو ساڈے لاشعور دے چوکٹھے وچ فٹ کردتا گیا اے۔ اسیں اپنی سوچ تے نظریے اَگے نہ تے کسے دلیل نوں مَندے ہاں تے نہ ای کوئی عقل تے شعور راہیں سانوں قائل کر سکدا اے۔ اِنج لگدا اے اسیں اپنے اپنے مفاداں، لالچاں تے نفرتاں دے چھوٹے وڈھے بت بنا کے اوہناں نوں پُوجن توں وکھ کجھ سوچنا ای نہیں چاہندے۔
میں سوشل میڈیا دا بہت سیانا نہیں، پر فیر وی اپنی قوم دے اجتماعی شعور نوں ایس شیشے راہیں ضرور ویکھدا رہنداہاں۔ پچھلے دنیں ارشد شریف دی شہادت ہوئی تے دل بجھ کے رہ گیا۔میں اس خوبصورت نوجوان نوں نہیں ملیا،بس کدی کدھار اوہدا پروگرام ای ویکھیا جیہڑا اکثر چینل بدلن توں روک دیندا سی۔ اوہد ا گل کرن دا انداز تے دلیلاں راہیں موقف پیش کرنا،اوہنوںدُوجے اینکراں توں جدا کردا سی۔ اوہنے اپنی وکھری پچھان بنائی تے ثابت کیتا کہ جے کراَج دے دور چے وی کوئی صحافی محنت کرے تے سماج اُتے اثر اندار ضرور ہُندا اے۔ پر جیویں میں آکھیا ناں کہ ساڈی قوم اپنی سوچ نال ٹکراوندی کوئی وی گل سنن دا حوصلہ نہیں رکھدی۔ سو ارشد شریف نال وی اِنج ای ہویا، پہلاں اوہدا پروگرام بند کروایا گیا، فیرنوکریوں کڈیا گیا تے بعدوں اک منصوبے نال درجن توں زائد مقدمے بنا دِتے گئے۔
حد ایہہ کہ اوہنوں اوس وطن توں دور جان اُتے مجبور کر دِتا گیا جیہدی حفاظت کردیاں اوہدے پیو اپنی جوانی نذر کیتی تے جوان بھرا نے جامِ شہادت نوش کیتا۔ اوہ تاں شہیداں دا وارث سی، ایس مٹی نال محبت اوہدے لہو وچ رَچی ہوئی سی۔ اوہنے بھاویں وردی نہیں سی پائی، پر اپنے فوجی سپاہیاں نال سپاہی بن کے ہر محاذ اُتے ڈَٹ کے کھلوتا سی۔اسیں اوہنوں کیہڑے مورچے اتے اپنی ریاست دی لڑائی لڑدیاں نہیں ویکھیا؟ ہمیشہ اپنی ریاست دی گل کیتی۔ ایس ریاست نوں خرابیاں توں پاک کرن دا بِیڑاچکیا۔ پر فیر وی ایس ملک دی زمین ارشد شریف اُتے تنگ کر دتی گئی۔ اوہنوں مجبور کیتا گیا کہ اوہ پاکستان چھڈ دیوے۔ اپنے پیارے دیس نوں چھڈ کے قلم قبیلے دا ایہہ سپاہی کدی ایس ملک، تے کدی اوس ملک، اپنے نظریے دا مُل تاردا رہیا۔ اخیر کینیا دے شہر نیروبی وچ ارشد دا ایہہ پینڈا شہادت دے نُکتے اُتے آن مُکیا۔
ارشد شریف نے جانا سی، سو ٹُر گیا۔اوہدے جان دا دکھ اپنی تھاویں، پر ایس توں وَدھ دکھ اپنے سماج دی بے حسی دا اے،جیہڑا ہر شے، ہر واقعے تے ہر المیے نوں اپنے مفاداں دی عینک راہیں ای ویکھدا اے۔ میں سوشل میڈیا دے شیشے وچ اپنے سماج دی مکروہ شکل ویکھ کے اپنے آپ توں شرمسار ہورہیا واں،کہ اسیں اپنے سماج نوںکس قدرظالم بنا دتا اے۔ عام لوکائی دی گل تاں اک پاسے رکھیے، مریم بی بی دا ٹویٹ ای ویکھ لئو کہ اوہ کیہو جیہی سوچ رکھدی اے۔ ایہنی سوہنی زنانی، کنِیاں زہریلیاں سوچاں دی مالک اے؟۔اک جوان پُتر دی ماں کیویں کسے دُوجے دے پتر دی موت اُتے اپنے بغض دا اظہار کر سکدی اے؟ کلیجہ پاٹ نہیں جاندا؟پر مریم بی بی دی سفاکی تے کتے اَگے دی گل اے۔فیر اوناں دے چاہیواناں تے اخیر ای کر دِتی۔ کئی ارکان اسمبلی تے کئی جمہوریت دے مامے چاچے۔تے کئی انسانی حقاں دے سالے،کِنے ای ظالم مینوں سوشل میڈیا دے ایس شیشے وچ مردے نوچن والیاںگنجیاں گرجاں دا روپ دھارے وکھالی دِتے۔ایہہ اوہ لوک نیں جیہڑے ساڈی ریاست نوں شعور دین دے دعویدار نیں، جنھاں سماج نوں سدھے راہے پاونا اے۔ایہہ بدبخت ایہنے مکروہ نیں، کہ بے شرمی، بے حیائی تے بے غیرتی جیہے لفظ وی بہت چھوٹے پے جاندے نیں۔
گل ارشد شریف دی شہادت توں ودھ کے ساڈے اجتماعی سماجی المیے دی اے۔اسیں اک میت نوں وی اپنے سیاسی مقاصد لئی وَرتن توں باز نہیں آوندے۔ سیاسی فائدے تے چھڈو، ساڈے لئی ڈُب مرن دا مقام اے کہ ساڈے اندر دا گند سانوں اک میت اُتے سیاسی طنزاں کرن اُتے مجبور کر ردااے۔ سچی پُچھو تے اوہ بظاہر وَڈے لوک،بڑے ای چھوٹ،کمینے تے گھٹیا لگ رہے نیں جیہڑے اپنے دل اندر محبتاں دی تھاویں کرودھ تے نفرتاں پال کے معاشرے دیاں رگاں وچ مسلسل زہر بھر رہے نیں۔رب سوہنا ساڈے سماج نوںاجیہے زہریلے لوکاںتے گنجیاں گِرجاںتوں محفوظ رکھے۔
پنجاب زندہ آباد، پاکستان پائندہ آباد