بنگلہ دیش دی ترقی خطے لئی اک روشن مثال

بنگلہ دیش زراعت توں صنعتی انقلاب وچ داخل ہو چکیا اے۔ ملک وچ 100اکنامک زونز قائم کیتے جا رہے نیں۔36ارب ڈالر سالانہ کمان والی گارمنٹس ایکسپورٹ بھارت تے پاکستان دی مجموعی برآمدات توں بوہتی اے۔ اک حالیہ رپورٹ دے مطابق بنگلہ دیش دی فی کس آمدنی 2064 ڈالر اے جد کہ پاکستان دی ایس توں ادھی یعنی 1271 ڈالر اے۔
بنگلہ دیش دنیا وچ ریڈی میڈ گارمنٹس دا دوجا سب توں وڈا ایکسپورٹر بن چکیا اے۔ جہناں کمپنیاں نوں چین وچ مزدور مہنگے پے رہے سن۔ اوہ ہن بنگلہ دیش تے ویتنام دا رخ کر رہیاں نیں۔ جے اسیں بنگلہ دیش دی تریخ اتے اک نظر پائیے تے اوہدی ترقی قابل تعریف اے۔ اوہ کئی معاملیاں وچ خطے دے ملکاں توں اگے اے۔ بنگلہ دیش وچ فیملی پلاننگ دا پروگرام بہت کامیاب رہیا۔ ایس ملک وچ جنسی مساوات دا ریکارڈ بہتر اے۔ ایتھے دے معاشرے دے ایہو خوبیاں اوہدی طاقت نیں۔ بنگلہ دیش ترقی کر رہیا اے تے کئی شعبیاں وچ جنوبی ایشیائی ملکاں لئی اک مثال اے۔ ایہہ الفاظ شیخ حسینہ واجد دے نہیں نیں’ ایہہ الفاظ برطانوی جریدے اکانومسٹ دے نیں۔ 16کروڑ دی آبادی والے ملک دی 2008 مگروں اقتصادی شرح نمو 6 فیصد توں ودھ چلی آ رہی اے۔ پچھلے سال جی ڈی پی دی سالانہ شرح 7.3فیصد رہی جہڑی کہ بھارت تے پاکستان توں وی ودھ اے۔
برطانوی صحافی مارک ٹیلی اپنی اک رپورٹ وچ لکھدے نیں۔ میں 1970 مگروں کئی واری بنگلہ دیش گیا۔ ایس ویلے ایس ملک وچ ہندوستانی فوج تے مکتی باہنی وچ جنگ دے کارن وڈی تباہی دا عالم سی۔ سڑکاں ٹٹی ہوئیاں سن تے پل اجڑے ہوئے سن۔ لاقانونیت دا دور سی۔ لوک حکومت نوں للکاردے رہندے سن۔ اقتصادیات وچ زبردست گراوٹ آندی جا رہی سی۔1974 وچ خوفناک قحط پیا سی تے حکومت دا کہنا سی کہ ایہدے وچ 27ہزار افراد مارے گئے سن۔ حالانکہ غیر سرکاری طور تے ایہہ تعداد 18لکھ دسی جاندیا ے۔ ایس قحط دے نال فیر شیخ مجیب الرحمان تے اوہدے اہل خاندان دا فوجی بغاوت وچ کم تمام ہویا سی جہدے مگروں بنگلہ دیش وچ کدی جمہوریت تے کدی مارشل لا دا دور چلدا رہیا۔
رپورٹ دے مطابق بنگلہ دیش دی بکھری معیشت تے غیر مستحکم سیاست دے دوران جے کسی نے سب توں اہم کم کیتا اے تے اوہ این جی اوز نیں۔ بنگلہ دیش دے قیام دے نال اک این جی او فضل حسن دی BRACبنی سی جہدا مقصد صحت توں تعلیم تے روزگار توں ریلیف تک دا سی۔ ایس این جی او نے بنگلہ دیش دی ترقی وچ بہت اہم کردار ادا کیتا۔ ہن ایہہ این جی او صرف بنگلہ دیش تک محدود نہیں رہی اے بلکہ افریقہ تے ایشیا دے دوجے ملکاں وچ وی پھیل چکی اے۔ مارک ٹیلی کہندے نیں کہ میری نظر وچ بنگلہ دیش نوں اپنی اقتصادی حالت بہتر توں بہتر کرن وچ بیرونی امداد دا بہت وڈا سہارا ملیا سی۔ ایس امداد دے نال جہڑے مشورے ملے’ اوہناں نوں بنگلہ دیش نے قبول کیتا جہدے کارن ترقی ملی مگر بنگلہ دیش دی این جی اوز تے بین الاقوامی اداریاں وچ اکثر ایہدے اتے ٹکرائو وی ہویا۔ این جی اوز دا عویٰ رہیا اے کہ ملک لئی کیہ بہتر اے تے کیہ نہیں اوہ بہتر طور تے جاندے نیں۔ بنگلہ دیش وچ بیرونی امداد دے کارن سیاستداناں لئی ایہہ آسان رہیا اے کہ اپنی سہولت توں اقتصادی فیصلے کر سکن۔
رپورٹ وچ اوہدا تقابل بھارت توں کیتا گیا تے آکھیا گیا ایہدے برعکس بھارت کسی دی امداد وصول کرن نوں تیار نہیں کیوں جے اوہدے نال جہڑے مشورے ہوندے نیں اوہ قابل قبول نہیں۔
مارک ٹیلی نے جو آکھیا اوہ حرف بہ حرف درست اے۔ بنگلہ دیش ایس ویلے ہندوستان یا پاکستان سنے پورے خطے لئی اک مثال بن گیا اے۔ 51 سال پہلاں جدوں بنگلہ دیش بنیا تے اوس ویلے اوہدی تصویر اک برباد تے بے حال ملک دی سی۔ سقوط ڈھاکہ مگروں پہلے عشرے وچ ملکی معیشت دا دارومدار ہندوستانی صنعت کاراں یا بین الاقوامی خیرات اتے سی۔ سیاست دا وی ایہو عالم سی۔ میجر جنرل ضیا الرحمن’ فیر جنرل حسین محمد ارشاد فیر خالدہ ضیا دی بنگلہ دیش نیشنلسٹ پارٹی کرپشن’ اقربا پروری’ حزب اختلاف نوں رگیدنے دا سلسلہ انتقامی سیاست’ غرض اک بندر تماشا چلدا رہیا’ فیر جانے کیہ ہویا کہ بنگلہ دیشیاں دے قومی رویے وچ اک تبدیلی آنا شروع ہو گئی تے 2006 مگروں گارمنٹس سیکٹر وچ بین الاقوامی سرمایہ کاری شروع ہوئی تے معاشی ترقی نے پچھے مڑ کے ویکھنا بند کر دتا۔ اج صورتحال ایہہ اے کہ جدوں ایہہ ملک دشمناں دی ریشہ دوانیاں توں بنگلہ دیش بنیا تے ایس ویلے معیشت وچ صنعتی سیکٹر دا حصہ 7فیصد سی جو ہن ودھ کے 30فیصد تک جا پہنچیا اے۔ 1970 وچ سائیکلون توں مرن والیاں دی لاشاں لئی کفن گھٹ پے گئے سن مگر اج بنگلہ دیش دی 83فیصد ایکسپورٹ گارمنٹس انڈسٹری دی مرہون منت اے۔
36ارب ڈالر سالانہ کمان والی ایکسپورٹ ہندوستان تے پاکستان دی مجموعی گارمنٹس ایکسپورٹ توں ودھ اے۔ امریکہ تے جرمنی بنگلہ دیشی گارمنٹس دے سب توں وڈے خریداری نیں۔ بنگلہ دیشی تاریکن وطن سالانہ 15 ارب ڈالرز مبادلہ بھیجدے نیں۔ ایس اعتبار نال جے گارمنٹس انڈسٹری تے تارکین وطن دے زرمبادلہ نوں جمع کر لیتا جاوے تے بنگلہ دیش دے کول غیر ملکی زرمبادلہ دے ذخائر لگ بھگ 36 ارب 85 کروڑ ڈالرز نیں۔ ایشیائی ترقیاتی بینک تے ایچ ایس بی سی دے اندازیاں دے مطابق جے نمو 2030 تک 7فیصد سالانہ رہی تے اگلے 10ورھیاں وچ بنگلہ دیش دی 300ارب ڈالر دی معیشت 700 ارب ڈالر دے حجم تک پہنچ کے دنیا دی 30وڈی معیشتاں وچ شامل ہو سکدی اے۔
اک حالیہ رپورٹ دے مطابق بنگلہ دیش دی فی کس آمدنی 2064ڈالراے جد کہ پاکستان دی ایس توں ادھی یعنی 1271 ڈالر اے۔سٹیٹ بینک دی حالیہ رپورٹ دے مطابق پاکستان دے زرمبادلہ دے ذخائر لگ بھگ 13ارب 24کروڑ ڈالرز نیں۔ پنج سال توں گھٹ عمر بالاں وچ شرح اموات دا تناسب بنگلہ دیش وچ 25اے جد کہ پاکستان وچ 59اے۔ پاکتان وچ 72 فیصد بچے پرائمری سکولاں وچ داخل نیں جد کہ بنگلہ دیش وچ ایہہ تناسب 98فیصد اے۔ ورلڈ اکنامک فورم دے مطابق بنگلہ دیش وچ پچھلے 10ورھیاں وچ 80 لکھ لوکاں نوں غربت توں کڈیا گیا اے۔ لوکاں دی امدنی وی ایسے عرصے وچ تن گنا ہو گئی اے تے ایہدی وجہ ایہہ اے کہ چین مگروں ایہہ دنیا دی دوجی وڈی گارمنٹس انڈسٹری رکھن والا ملک بن چکیا اے۔ بنگلہ دیش دی وڈی آبادی نوجواناں اتے مشتمل اے جہدے وچوں چھ لکھ آئی ٹی وچ بطور فری لانسر کم کر رہے نیں۔
بنگلہ دیش زراعت توں صنعتی انقلاب وچ داخل ہو چکیا اے۔ ملک وچ 100اکنامک زونز قائم کیتے جا رہے نیں تاں جے بیرونی سرمایہ کاراں نوں ترغیبات دے کے متوجہ کیتا جاوے۔ پاکستان دے پہلے عام انتخابات
1970 وچ ہوئے سن جہڑے مگروں سقوط ڈھاکہ اتے منتج ہوئے۔ عوامی لیگ دے سربراہ شیخ مجیب الرحمان جدوں اسلام آباد پہلی واری آئے سن تے اوہناں نے ایتھے دی تعمیرو ترقی ویکھ کے آکھیا سی کہ مینوں اسلام آباد توں پٹ سن کے ریشیاں دی بو آ رہی اے۔ مگر ہن سوال ایہہ اے کہ پاکستان نوں آزاد ہوئے 75 سال تے بنگلہ دیش نوں بنے 51 سال ہوئے نیں تے فیر اوہ سانوں پچھے کیویں چھڈ گیا اے؟ معاشیات دے میدان وچ نوبل انعام یافتہ امرتاسین دا کہنا اے کہ بنگلہ دیش نے بعض میداناں وچ حیران کن کامیابی حاصل کیتی اے۔ اوہنے اک پسماندہ ملک توں ترقی پذیر ملک دا درجہ تیزی نال حاصل کیتا اے۔ اوہنے فی کس آمدنی’ انسانی وسائل تے معاشی نمو وچ شاندار کارکردگی وکھائی اے۔ 2021 وچ بنگلہ دیش نے درمیانی ترقی دے حامل ملک دا درجہ حاصل کر لیتا جد کہ 2041 وچ اوہ ترقی یافتہ ملک بن جاوے گا۔ جہڑی تیزی نال اوہنے پچھلے کجھ ورھیاں وچ ترقی دی رفتار وکھائی اے اوہ سارے ترقی پذیر ملکاں لئی اک رول ماڈل دا درجہ حاصل کر چکیا اے۔
تھلے کجھ شعبیاں وچ پاکستان تے بنگلہ دیش دا تقابلی جائزہ پیش کردے نیں۔
معیشت: پاکستان دی معیشت دا حجم 264 ارب ڈالر اے ۔ ایس حساب نال ایہہ دنیا دی 40ویں وڈی معیشت اے۔ لیکن جے قوت خریداری دے حوالے نال ویکھیا جاوے تے پاکستان دی معیشت دنیا وچ 22ویں نمبر اتے آندی اے۔ ایہدی فی کس آمدنی 1271 ڈالر اے جد کہ معاشی ترقی دی رفتار 0.4 فیصد اتے کھڑی اے جو پچھلے 68 سالاں وچ کم ترین سطح اے۔ پچھلے مالی سال وچ پاکستان دی برآمدات 21.387 ارب ڈالرز سن۔ بنگلہ دیش دی معیشت دا حجم 338 ارب ڈالرز اے۔ قوت خریداری دے حوالے نال بنگلہ دیش پاکستان توں پچھے یعنی دنیا وچ 30ویں نمبر اتے اے۔ ایہدی معاشی ترقی دی رفتار جو کورونا توں پہلاں ایشیا وچ پہلے نمبر اتے یعنی 8.2 سی ہن اوہ 3.8 اتے آچکی اے لیکن فیر وی پاکستان دی ترقی دی منفی رفتار توں بہتی اگے اے۔ پاکستان وچ غربت دی شرح کورونا مگروں 40فیصد تک پہنچ چکی اے جد کہ بنگلہ دیش وچ ایہہ 20فیصد اے۔ پچھلے مالی سال وچ پاکستان نوں اووسیز پاکتانیاں ولوں 14.2 ارب ڈالر بھیجے گئے جد کہ ایسے عرصے بنگلہ دیش نوں ایس مد وچ 19.8 ارب ڈالر موصول ہوئے۔ زراعت دا پاکستان دی معیشت وچ حصہ 54فیصد سی جو ہن گھٹ ہو کے 20فیصد اتے آچکیا اے۔
بنگلہ دیش وچ زراعت دا حصہ 17فیصد’ صنعت دا 30فیصد تے سروسز دا 52فیصد اے۔ زراعت وچ بنگلہ دیش نے اینی ترقی کیتی اے کہ اوہنوں ہن فوڈ باسکٹ نال تشبیہ دتی جاندی اے۔ بنگلہ دیش دنیا وچ چاول پیدا کرن والا چوتھا تے پاکستان دسواں وڈا ملک اے۔ پاکستان دنیا وچ کپاس دی پیداوار دے حوالے نال پنجواں وڈا ملک اے لیکن بنگلہ دیش چین مگروں کپاس دی درآمد کرن والا دوجا ملک اے کیوں جے بنگلہ دیش دی 80 فیصد برآمدات دا تعلق گارمنٹس نال اے۔ بنگلہ دیش دا ٹکہ وی ساڈے روپے دے مقابلے وچ دوگنی طاقت رکھدا اے۔
تعلیم و صحت:1951دی مردم شماری دے مطابق مشرقی پاکستان دی آبادی چار کروڑ 20لکھ جد کہ مغربی پاکستان دی تن کروڑ 40لکھ سی۔ جد کہ اج بنگلہ دیش دی آبادی 16کروڑ50لکھ تے پاکستان دی 22کروڑ اے۔ پاکستان وچ شرح خواندگی 60 فیصد تے بنگلہ دیش وچ 75فیصد اے۔ بنگلہ دیش وچ اوسط عمر 73 سال جد کہ پاکستان وچ 68 سال اے جو ایس گل دا ثبوت اے کہ اوتھے معیار زندگی بلندتر اے۔ آئی ایل او دے مطابق بنگلہ دیش وچ 33.2 فیصد جد کہ پاکستان وچ 25.1فیصد زنانیاں کم کردیاں نیں۔
حقیقت ایہہ اے کہ کوئی وی ملک ہووے اوہ مجموعی تے مستحکم پالیسیاں توں ترقی کردا اے۔ ساڈے ملک وچ کمی کسی شے دی نہیں لیکن منصوبہ سازی دے فقدان نے ایس عظیم ملک تے اوہدے باسیاں نوں اوتھوں تک پہنچن نہیں دتا جہدے دعوے کیتے جاندے رہے۔ مسائل نال نبردآزما ہونا مشکل امر نہیں ایہدے لئی لازم اے کہ ملک وچ سیاسی استحکام ہووے’ فیصلے میرٹ اتے ہون’ کرپشن دا قلع قمع ہووے تے مواقع محض اشرافیہ لئی نہ ہون بلکہ عام بندا وی بلارکاوٹ کوئی وی کاروبار کر سکے۔