محلات تے قلعہ جات نال سجیابہاولپور

پاکستان دے مختلف شہراں (بالخصوص ایسے علاقیاں جہناں وچ قیام پاکستان توں پہلاں مغلیہ بادشاہواں نے قیام کیتا یا اوہ خودمختار ریاست رہے) وچ خوبصورت ریخی تے ثقافتی محلات تے قلعہ جات موجود نیں۔ نواباں دے دور وچ اک توں ودھ کے اک خوبصورت عمارت تعمیر کیتی گئی۔ایہناں وچ1956تک خودمختار ریاست رہن والے بہاولپور دے محلات جات تے نوادرات شامل نیں۔ عباسی خاندان نے اپنے دور وچ بہاولپور وچ جو خوبصورت تے عظیم الشان محلات بنوائے سن اوہناں وچ نور محل’ دربار محل’ نشاط محل’ ڈیرہ نواب صاحب دا صادق گڑھ پیلس شامل نیں جد کہ قلعہ جات وچ قلعہ ڈیر تے ‘قلعہ موج گڑھ’ قلعہ اسلام گڑھ’ قلعہ ولر’ قلعہ پھولڑہ’ قلعہ مٹو تے قلعہ بجنوٹ وغیرہ شامل نیں۔ نواباں نے فن تعمیرات دے نمونہ محلات اوس ویلے شہر دے کول خوبصورت تے پرفضا مقامات اتے بونائے سن جد کہ قلعہ جات شہر توں دور ریگستان وچ ریت دے ٹیلیاں وچ بنائے گئے سن۔
نور محل
نور محل عباسی نواب نے برطانوی راج دے دوران بنوایا سی جہنوں اطالوی طرز تعمیر اتے بنایا گیا۔ راوی کہندے نیں کہ نواب عدنان عباسی نے اپنی بیوی دی خواہش اتے ایہہ محل تعمیر کروایا تاہم اوہ صرف اک رات اوس محل وچ قیام پذیر رہے کیوں جے نواب دی بیوی نے پہلی رات ای بالکونی توں محل نال ملحقہ قبرستان ویکھیا تے دوجے دن اوتھے رہن توں انکار کردتا جہدے مگروں نورمحل اک عرصہ تک سنسان پیا رہیا۔ ایہہ محل ہن پاک فوج دی تحویل وچ اے تے کجھ سال پہلاں ایہدے وچ نور محل میرج ہال تے کافی شاپ دا وادھا کیتا گیا جہدے توں ایہدی افادیت دوچند ہو گئی۔ نور محل دی عمارت نوں انگریز ریاستی انجینئر مسٹر ہینن نے ڈیزائن کیتا جہدی تعمیر 1872 وچ شروع ہوئی تے 1875 وچ ایہہ محل مکمل ہویا۔ کہیا جاندا اے ریاست دے نقشے تے سکوں نوں نیک شگون دے طور تے محل دی بنیاداں وچ دفن کردتا گیا سی۔ محل دی تعمیر لئی بوہتا سامان تے فرنیچر برطانیہ’ اٹلی توں منگوایا گیا سی۔ ایہدی تعمیر اتے اوس ویلے 3کروڑ روپے لاگت آئی سی۔ 2016وچ ایس رقم دا تخمینہ لگایا گیا تے ایہہ 8.1ملین امریکی ڈالر بندی سی۔ایس محل دے 32کمرہ جات’ 14تہہ خانے’ چھ برآمدے تے5گنبد نیں۔ ایہدے ڈیزائن وچ کورنٹیائی تے اسلامی فن تعمیر دی جھلک وی نظر آندی اے۔ پنجویں نواب محمد بہاول خان نے 1906 وچ محل وچ اک خوبصورت مسجد بنوائی سی۔ 1956 وچ جدوں ریاست پاکستان دے نال ضم ہوئی تے ایس عمارت نوں محکمہ اوقاف نے تحویل وچ لے لیتا سی۔
محکمہ آثار قدیمہ نے 2001وچ ایس عمارت نوں محفوظ خوبصورت تے شاہکار یادگار قرار دتا سی۔ ایس محل وچ عباسی ریاست دے دور دی بہت ساری شیواں موجود نیں جہناں وچ غلاف کعبہ’ پرانی تلواراں’ پرانے کرنسی نوٹ’ سکے’ پرانے ویلے دے قنون تے پرانے دور دا پیانو(جہڑا نواباں دی ملکیت سی) شامل نیں۔نور محل وچ نواباں دی تصویراں وی لگی ہوئیاں نیں۔ خیال اے کہ اوہناں وچ صرف اک تصویر اصلی’ باقی ساری خیالی تصویراں نیں۔ ایس محل وچ اک جیل سیل وی سی’ ریاست دے دور دی بگھی’ ایمبولینس’ فائر بریگیڈ دی گڈی تی دوجی کئی شیواں وی محل وچ موجود نیں جہنوںآن والے سیاح بڑی د لچسپی نال ویکھدے نیں۔
دبار محل
دربار محل نوں نواب بہاول خان پنجم نے 1905وچ تعمیر کرایا سی۔ شروع وچ ایس محل دا نام مبارک محل رکھیا گیا جہدا رقبہ 75ایکڑ اتے محیط جہدے وچ زیادہ تر باغات نیں۔ ایہہ عمارت ریاست بہاولپور دی عدالتی تے سرکاری تقریباں دے انعقاد لئی بنائی گئی سی۔ 1966 وچ ایہہ عمارت پاک فوج نوں دے دتی گئی جہدے وچ ہن عسکری دفتر نیں۔ فن تعمیر دے ایس خوبصورت شاہکار نوں عربی تے یورپی اثرات رلا کے بنایاگیا سی۔ ایہدے باہر دے حصہ اتے انتہائی پیچیدہ نقش و نگار دا کم کیتا گیا۔ عمارت دی تیجی منزل مغلیہ طرز دی چھتری وانگوں اے جہدے ہر کونے وچ اعلیٰ طرز دے گونل برج تے گورداوارہ طرز دے گنبد نیں۔
صادق گڑھ پیلس
صادق گڑھ پیلس پاکستان دا اوہ شاہکار ثقافتی ورثہ اے جو 125ایکڑ اتے بنایا گیا تے ایہدا شمار دنیا دی وڈی عمارتاں وچ ہوندا اے۔ ایہہ محل تقریباً پونے دو سال پہلاں تعمیر کیتا گیا سی جہدے اتے ایس ویلے ڈیڑھ لکھ روپے خرچ ہوئے سن تے ایہدی تعمیر وچ ڈیڑھ ہزار مزدوراں نے حصہ لیتا سی۔ ایس محل وچ دنیا دی مختلف ثقافتاں دے طرزتعمیر نوں مدنظر رکھ کے 120کمرے بنائے گئے تاں جے ریاست وچ آن والے دوجے ملکاں دے سربراہواں تے امرا نوں اوہناں دے ملک وانگوں رہائش دتی جا سکے۔ محل وچ اک عالیشان ہال تعمیر کیتا گیا سی جہدے وچ نواب آف بہاولپور اپنے ساتھیاں دے نال ریاست دے موضوعات اتے گل بات کردے سن۔ صادق گڑھ پیلس دی عدالت وچ غلاف کعبہ لتکایا گیا سی جہدے زیر سایہ نواب آف بہاولپور عدالتی امور نمٹاندے سن۔ نواب آف بہاولپور دے زیراستعمال دنیا دی بیش بہا قیمتی کاراں محل وچ موجود سن۔ اوہناں وچوں کجھ نیلام ہو گئیاں تے کجھ اوہناں دے رشتہ دار لے گئے جد کہ کجھ گڈیاں نشانی دے طور تے محل وچ موجود نیں۔
محل دے اندر تعمیر مسجد اسلامی طرز تعمیر دا اک خوبصورت نمونہ اے جہڑا ہن وی موجود اے۔ بہاولپور دی تریخی تے ثقافتی ورثہ عمارتاں دا زوال ذوالفقار علی بھٹو دے دور وچ شروع ہویا جدوں تریخی عمارتاں صادق گڑھ پیلس’ نور محل’ گلزار محل’ دربار محل’ قلعہ ڈیر تے نواباں دی دوجی جائیداداں نوں سیل کردتا گیا سی۔ آکھیا جاندا اے ایہہ اقدام نواب صادق محمد خان عباسی جہڑے وزیر بنے سن دے پتر سعیدالرشید عباسی دے نال ذاتی تنازعہ تے چکیا گیا سی۔ ایہدے مگروں اک عرصہ تک ایہناں محلات دی حفاظت نہ کیتی گئی۔ مگروں نور محل’ گلزار محل’ دربار محل’ پاک فوج دی تحویل وچ دے دتے گئے جہدے مگروںایہناں تریخی محلات دی تزئین و آرائش کر کے اوہناں نوں دوبارہ اصل حالت وچ لیایا گیا۔ صادق گڑھ پیلس ہن وی بہاولپور دے نواباں دے زیر تصرف اے مگر عدم توجہی دی وجہ نال ایس محل دی حالت مخدوش اے۔ سالاں لنگھ گئے مگر کسی وی حکومت نے صادق گڑھ پیلس جان والی سڑکاں دی تعمیر اتے توجہ نہیں دتی جہدی وجہ نال صادق گڑھ پیلس جان والے رستے خستہ حالی دا شکار نیں۔
چولستان دے قلعہ جات
ایسے طرحاں بہاولپور شہر توں 120کلومیٹر دور چولستان وچ جہڑے قلعہ بنائے گئے سن اوہناں وچ دوجے قلعہ جات دی وانگوں قلعہ ڈیر تے تریخی اہمیت دا حال جو تحضیل احمد پور شرقیہ وچ واقع اے اوسے نوعیت دے دوجے چھوٹے قلعہ جات چولستان وچ کئی مقامات اتے وکھائی دیندے نیں۔ اک مربع رقبہ اتے پھیلے قلعہ ڈیرہ دی دیواراں دا پھیلائو 1500میٹر تک اے۔ راوی کہندے نیں کہ ایہہ قلعہ پہلی واری 9ویں صدی وچ بھاٹی قبیلے دے اک ہندو حکمران رائے جاجا بھٹی نے بنوا کے اوس ویلے بہاولپور دے بادشاہ راول دیوراج بھٹی نوں خراج تحسین پیش کیتا سی۔ پہلے اوہنوں ڈیرہ راوی کہندے سن جہڑا بعد وچ ڈیراور دے نام توں جانا جاندا رہیا۔ 18ویں صدی وچ ایس قلعہ نوں مسلم نواباں نے فتح کر لیتا سی۔ 1732 وچ عباسی حکران نواب صادق عباسی نے قلعہ نوں دوبارہ تعمیر کروایا فیر ایہہ قلعہ اک واری نواب بہاول خان دے ہتھوں نکل گیا۔ نواب مبارک خان نے 1804 وچ ایہہ قلعہ دوبارہ حاصل کر لیتا۔ ایہہ قلعہ ریاست بہاولپور دے آخری حخمران نواب صادق محمد خان عباسی پنجم دی جائے پیدائش وی اے۔
تریخی اعتبار نال ایہہ قلعہ چولستان دے وسط وچ اک متاثر کن تصویر پیش کر رہیا اے۔ کسی وی حکمران نے قلعہ ڈیراور سنے دوجے قلعہ چات جہڑے کہ تریخی ‘ ثقافتی’ ورثہ نیں نوں محفوظ بنان لئی اج تک کوئی قابل ذکر اقدام نہیں کیتا۔ جے حکومت ایہناں قلعہ جات تے صادق گڑھ پیلس نوں دوجے محلاں وانگوں محفوظ کر کے اوہناں دی مناسب دیکھ بھال کرے تے پاکستان ای نہیں ایہہ دنیا دے بہترین ثقافتی’ سیاحتی مقام بن سکدے نیں۔ ایس توں حکومت نوں ارباں روپے سالانہ سیاحت دی مد وچ آمدن وی ہو سکدی اے جد کہ چولستان دے لوکاں دی زندگی وچ وی بہتری آوے گی تے اوہناں نوں رزوگار دے موقعے ملن گے۔