حکومتی دعوے تے معاشی بدحالی

وزارت خزانہ ولوں جاری ہون والی ماہانہ اقتصادی جائزہ رپورٹ وچ روپیہ تگڑا ہون دا دعویٰ کردے ہوئے مہنگائی گھٹ ہون تے معیشت وچ بہتری نظر آن دی نوید سنائی گئی اے لیکن کیہ عملی طور تے وی انج ای اے۔ غیر جانبدار ذرائع حکومتی دعوویاں دی تصدیق نہیں کردے ۔ٹیکس ریونیو وچ 17فیصد وادھا جھٹلایا نہیں جا سکدا لیکن ایہدے باوجود کرنٹ اکائونٹ خسارے وچ بہتری دا رجحان نہیں ایسے طرح ضروری شیواں دی ویلے تے فراہمی نہ ہون نال سپلائی لائن وی ہنوز غیر مستحکم اے۔ علاوہ ازیں ترسیلات زر وچ 6.3 فیصد کمی آ چکی اے۔ مالی خسارہ 45.4 فیصد ودھ کے 672ارب ہو گیا اے۔ ایسے طرح براہ راست بیرونی سرمایہ کاری وچ 47.1 تک کمی آ چکی اے جیویں رپورٹ وچ روپیہ تگڑا ہون دا دعویٰ کردے ہوئے ترسیلات زر تے سرمایہ کاری وچ کمی دا اعتراف کیتا گیا اے۔ ایہدے تناظر وچ موجودہ حکومت دی تشکیل مگروں معیشت وچ بہتری آن دے دعوویاں نوں تسلیم کرنا محال اے بلکہ اجے تک ملکی معیشت نوں مسلسل چیلنجاں دا سامنا اے۔ روپے دی قدر وچ بہتری نوں مہنگائی وچ کمی قرار دین نوں ماہرین تسلیم کرن توں تذبذب دا شکار نیں بلکہ ایہہ کہیا جا رہیا اے کہ روپے نوں مضبوط کرنا ایہہ عارضی بندوبست اے تے ایہہ سب کجھ دراصل نویں بیرونی قرض دا مرہون منت اے کیوں جے زرمبادلہ دے ذخائر وچ مسلسل کمی دا رجحان اے جے بیرونی برآمدات وچ وادھا نہیں کیتا جاندا درآمدات وچ کمی نہیں لیائی جاندی تے ملک چالوں سال دے اختتام تک ارباں ڈالر دی ادائیگی توں قاصر ہو سکدا اے۔ اجے تے کجھ ملکاں نے سیلاب دی تباہ کاریاں دی وجہ نال قرض قسطاں دی ادائیگی وچ چھوٹ دے دتی اے لیکن ایہہ تصور کر لینا کہ ہن حالات ہمیشہ انج ای رہن گے؟ غلط اے۔
پاکستان اک زرعی ملک اے مگر ایس حقیقت نوں جھٹلانا ممکن نہیں کہ پچھلی کئی دہائیاں توں ساری حکومتاں نے زرعی شعبے نوں نظرانداز کردے ہوئے صنعتاں قائم کرن اتے توجہ مرکوز رکھی۔ صنعتاں دی وی اپنی اہمیت اے مگر صنعتاں دے نال جے زرعی شعبے نوں نظرانداز نہ کیتاجاندا تے اج نہ صرف ملک خوراک دے حوالے نال خود کفیل ہوندا بلکہ برآمدات وچ وی موجودہ حد تک کمی نہ آندی لیکن ہن حالات ایس نہج تک پہنچ چکے نیں کہ ملک وچ صنعتاں تے ہین لیکن خام مال میسر نہیں جہدی وجہ نال صنعتی پیداوار نہ صرف متاثر ہو رہی اے بلکہ خام مال دی درآمد اتے ارباں روپے خرچ ہو رہیا اے۔ ٹیکسٹائل ملاں لئی روئی تک دڑامد کیتی جا رہی اے۔ ایہہ غلط پالیسیاں تے ترجیحات دے نتیجے نیں جہناں نے ملک نوں معاشی لحاظ نال ایس حد تک لاغر کردتا اے کہ ہن قرضیاں دی ادائیگی وی اوکھی ہو گئی اے۔ جے قرضیاں دے بوجھ توں نجات حاصل کرنی اے تے آمدن دے ذرائع ودھانے ہون گے جہدے لئی برآمدات وچ وادھا ناگزیر اے مگر حکومتی ترجیحات تے اطوار اتے طائرانہ نظر پائیے تے تبدیلی دے موہوم توں آثار وی نظر نہیں آندے۔ ہن وی قرضے لے کے غیر پیداواری شعبیاں اتے لان تے ملک نوں قرضیاں دی دلدل وچ ہور دھکیلن دا عمل جاری اے۔ علاوہ ازیں معاشی حالت دی خرابی دے باوجود ایسی غیر ضروری شیواں دی بلا روک ٹوک درآمد جاری اے جہناں دے بغیر گزارہ ممکن اے جے حکومت زرعی رقبہ ودھان اتے توجہ دے کے غیر ضروری شیواں دی درآمد روک دیوے تے ودھدے خسارے اتے بآسانی قابو پایا جا سکدا اے۔ وزیراعظم نے 1800 ارب دے کسان پیکیج دا اعلان کردے ہوئے کھاد تے بجلی دی قیمتاں گھٹ کیتیاں نیں لیکن ایس توں کجھ ودھ کرن دی لوڑ اے۔ اجے تک زرعی رقبے وچ آندی کمی نوں روکن دے حوالے نال کسی قسم دی کوئی پالیسی نہیں بنائی گئی بلکہ ہر حکومت وانگوں ہن وی کوشش کیتی جا رہی اے کہ منہ اتے آئی سوجن نوں میک اپ نال لکایا جاوے ایسے بنا تے کدی کسی پیکج توں مطلوبہ نتائج برآمد نہیں ہوئے۔ موجودہ کسان پیکج توں وی چنگی امیداں جوڑیاں نہیں جا سکدیاں جہدی اک وجہ تے ایہہ اے کہ سیاسی ضرورتاں لئی اعلانات تے کر دتے جاندے نیں مگر اعلانات اتے عملدرآمد دی نوبت گھٹ ای آندی اے۔ دوجی ایہہ کہ کساناں لئی کھاد تے بجلی مہنگی ہون دی بنا تے کاشتکاری نفع بخش نہیں رہی۔ علاوہ ازیں فصل تیار ہون تے سارے فیدے مافیاز لے جاندے نیں ۔ ایہناں وجوہات دی وجہ نال کسان بددل ہو کے دوجے شعبیاں ول جان لگے نیں۔ ایسے وجہ نال سیلاب یا موسمی حالات نوں ذمہ دار ٹھہرائو ملک خوراک وچ خود کفالت دی منزل گوان مگروں ہن بھک تے افلاس ول جان لگیا اے۔
حکومت بار بار دعوے کر رہی اے کہ ملکی معیشت دی بحالی لئی دن رات مصروف اے تے ایہہ کہ مہنگائی تے بے روزگاری گھٹ کرن لئی ہنگامی بنیاداں اتے کم جاری اے مگر سیاسی عدم استحکام نے ہر شعبے نوں بری طرح متاثر کر رکھیا اے کیوں جے سیاسی استحکام نال پالیسیاں وچ تسلسل نہیں رہندا۔ چالوں سال بیرونی قرضیاں اتے سود دی ادائیگی ملکی ریونیو دے 50فیصد ہون دا خدشہ پیدا ہو گیا اے جو ملکی معیشت دی عالمی درجہ بندی کرن والی امریکی ریٹنگ ایجنسی Moody sموڈیز ولوں طے کردہ قرضیاں دی حد توں دوگنا اے جہدی وجہ نال ماہرین دی نظر وچ پاکستان دا ڈیفالٹ رسک 53فیصد ہون دا اندیشہ اے۔ کجھ عالمی اداریاں کولوں نویں قرض دا اجرا یا فیر اقوام متحدہ دے سیکرٹری جنرل انتونیو گوتریس دی اپیل تے 816ملین ڈالر دی امداد ملن نال وقتی طور تے بیرونی ادائیگیاں وچ تے مدد مل سکدی اے لیکن ایہنوں معاشی بحالی ہر گز نہیں کہہ سکدے۔ معاشی بحالی ایہہ ہووے گی کہ منفی توں معیشت نوں مستحکم ریٹنگ اتے لیایا جاوے ایہدے لئی لازم اے کہ عارضی سہاریاں اتے تکیہ کرن دے بجائے معاشی بحالی لئی ٹھوس تے نتیجہ خیز طریقہ کار بنا کے عمل وی کیتا جاوے۔
دنیا وچ موڈیز’ سٹینڈرز اینڈ پوورز تے فچ تن وڈی ریٹنگ ایجنسیاں نیں جہڑی قرضیاں توں لے کے سرمایہ کاری لئی ملک دی ریٹنگ طے کردیاں نیں۔ایہہ ایجنسیاں معیشتاں نوں لاحق خطرات دے چانن وچ ملکاں دی ریٹنگ دا تعین کردیاں نیں جے کسی ریاست دی ریٹنگ مستحکم دی بجائے منفی ہووے تے اوہنوں یا تے قرضے دتے ای نہیں جاندے۔ جے دتے جان تے انتہائی سخت شرطاں دے نال مہنگے دتے جاندے نیں جہناں دی ریٹنگ بہتر یعنی aaaہووے اوہناں نوں وعدے پورے کرن لئی بہتر پوزیشن وچ ہونا جان کے قرض دین والے عالمی ادارے نرم شرطاں دے نال وی بخوشی قرض جاری کر دیندے نیں۔ سیاسی عدم استحکام’ زرمبادلہ دے ذخائر وچ کمی تے ودھدے بیرونی قرضیاں دی وجہ نال تنوں ریٹنگ طے کرن والی ایجنسیاں متفق نیں کہ پاکستان دی معاشی حالت دگر گوں اے۔ پچھلے مہینے ست اکتوبر نوں موڈیز جد کہ فچ نے 21اکتوبر نوں پاکستان دی کریڈٹ ریٹنگ وچ کمی کردے ہوئے اوہنوں منفی کردتا اے جہدا مطلب ایہہ اے کہ ملکی معیشت نوں لاحق خطریاں وچ کمی نہیں آئی بلکہ وادھا ہویا اے۔ خطریاں وچ کمی لیان تے معیشت دی بحالی لئی عوام دی نظراں حکومت اتے نیں۔